བཙུན་མ་ཞིག་འཛིན་བཟུང་།

རྒྱ་ནག་གཞུང་གིས་མགོ་ལོག་དགའ་བདེ་རྫོང་མདོ་ལའི་རྡོ་ཁ་དགོན་གྱི་བཙུན་མ་ཞིག་འཛིན་བཟུང་བཀག་ཉར་བྱས་འདུག

ཟླ་འདིའི་ཚེས་ ༢༥ ཉིན་རྒྱ་ནག་གཞུང་གིས་མཚོ་སྔོན་ཞིང་ཆེན་མགོ་ལོག་བོད་རིགས་རང་སྐྱོང་ཁུལ་དགའ་བདེ་རྫོང་མདོ་ལའི་རྡོ་ཁ་དགོན་ནམ་ངེས་སྟོན་ཆོས་འཁོར་གླིང་དགོན་པའི་བཙུན་མ་ཀུན་བཟང་ལྷ་མོ་ལགས། མགོ་ལོག་ཁུལ་ཐོག་གི་སྨན་ཁང་ཞིག་ཏུ་ནད་པར་སྨན་བཅོས་ལྟ་སྐྱོང་བྱེད་སྐབས། དགའ་བདེ་རྫོང་

ཉེན་རྟོག་པས་ཁ་པར་ཡོང་སྟེ། མགྱོགས་མྱུར་ཉེན་རྟོག་ཁང་དུ་ཕྱི་ཕྱོགས་ནས་བསྐུར་བའི་འོད་སྡེར་ཞིག་ལེན་དུ་ཡོང་དགོས་སྐོར་བརྗོད་ཡོད་འདུག ཚེས་ ༢༦ ཉིན་གྱི་ཞོགས་པའི་ཆུ་ཚོད་ ༩ པའི་ཐོག་བཙུན་མ་ཀུན་བཟང་ལྷ་མོས་རོགས་པ་ཞིག་འཁྲིད་དེ་ཉེན་རྟོག་ཁང་དུ་འགྲོ་སྐབས། དགའ་བདེ་རྫོང་ཉེན་རྟོག་པས་བཙུན་མ་ཁོང་གིས་ནག་ཉེས་ཚབས་ཆེན་བསགས་ཡོད་སྟབས། ཞིང་ཆེན་དུ་འཁྲིད་དེ་བཀག་ཉར་འདྲི་གཅོད་བྱེད་དགོས་པ་དང་། ཁོང་གི་འགྲོ་རོགས་ལ་ཁྱིམ་དུ་སོང་སྟེ་བཙུན་མ་ཁོང་ལ་ཟ་མ་དང་འཚོ་བའི་མཁོ་ཆས་སོགས་གྲ་སྒྲིག་བྱེད་དགོས་ཚུལ་བཤད་དེ་ཉིན་དེར་འཛིན་བཟུང་བཀག་ཉར་བྱས་ཡོད་འདུག

བོད་ནས་འབྲེལ་ཡོད་ཅིག་གིས་གསར་ལམ་དུ་གནས་ཚུལ་མཁོ་སྤྲོད་བྱས་པ་ལྟར་ན། རྒྱ་གཞུང་ཉེན་རྟོག་པས་བཙུན་མ་ཀུན་བཟང་ལྷ་མོར་ཕྱི་ཕྱོགས་ནས་འོད་སྡེར་ཞིག་བསྐུར་ཡོད་ཚུལ་བཤད་པ་དེ་བཙུན་མ་ཁོང་ཉེན་རྟོག་ཁང་དུ་འགུག་ཐབས་སུ་རྫུན་སྒྲིག་བྱས་པ་ཞིག་ཡིན་པ་དང་། ཉིན་དེར་བཙུན་མ་ཁོང་འཛིན་བཟུང་བཀག་ཉར་བྱས་རྗེས་ཉེན་རྟོག་པ་ཁག་ཅིག་ཁོང་གི་སྡོད་ཤག་ཏུ་སོང་སྟེ་སྔོག་བཤེར་བྱས་ཡོད་པ་མ་ཟད། མོའི་ཁ་པར་དང་ཅ་ལག་ཁག་ཅིག་ཀྱང་གཞུང་བཞེས་བཏང་ཡོད་འདུག

རང་ལོ་ ༣༠ ཡིན་པའི་བཙུན་མ་ཀུན་བཟང་ལྷ་མོ་ལགས་ནི། མཚོ་སྔོན་ཞིང་ཆེན་མགོ་ལོག་བོད་རིགས་རང་སྐྱོང་ཁུལ་དགའ་བདེ་རྫོང་ཁོ་ཆུ་ཤང་གི་མི་ཡིན་ཞིང་། ད་ལྟའི་བར་མདོ་ལའི་རྡོ་ཁ་དགོན་དུ་སློབ་གཉེར་གནང་ཞོར་ས་གནས་ཀྱི་དྭ་ཕྲུག་དང་ཁྱིམ་ཚང་སྐྱོ་བོའི་རིགས་ཀྱི་བྱིས་པ་ཚོར་བོད་ཡིག་སློབ་ཁྲིད་གནང་གི་ཡོད་འདུག་ལ། གླིང་རྗེ་གེ་སར་རྒྱལ་བའི་སྒྲུང་བཤད་མཁན་ཞིག་དང་འཁྲབ་སྟོན་གནང་མཁན་ཞིག་ཀྱང་ཡིན་འདུག

གསར་འགོད་པ། དོན་གོ

དུས་བབ་དྲ་བ་ནས།།