ཨ་དཀོན་རིན་པོ་ཆེ་བཀྲོངས་མཁན་ལ་ཁྲིམས་བཤེར།

ཟླ་འདིའི་ཕྱི་ཚེས་ ༢༧ ཉིན་ཁྲིན་ཏུའུ་འབྲིང་རིམ་ཁྲིམས་ཁང་གིས་ཨ་དཀོན་རིན་པོ་ཆེ་བཀྲོངས་མཁན་ཐུབ་བསྟན་ཀུན་གསལ་དང་ཁོའི་ཚ་བོ་གཉིས་ལ་ཁྲིམས་བཤེར་བྱས་ཡོད་འདུག

ཟླ་འདིའི་ཕྱི་ཚེས་ ༢༧ ཉིན་སི་ཁྲོན་ཁྲིན་ཏུའུ་འབྲིང་རིམ་མི་མང་ཁྲིམས་ཁང་གིས། ཨ་དཀོན་རིན་པོ་ཆེ་སྐུ་བཀྲོངས་མཁན་ཐུབ་བསྟན་ཀུན་གསལ་ཟེར་བ་དང་། ཁོའི་ཚ་བོ་ཚེ་རིང་ (Tsering Banyue )གཉིས་ལ་ཁྲིམས་ར་ཚོགས་ཏེ་

ཁྲིམས་བཤེར་བྱས་ཡོད་པ་མ་ཟད། ཉེས་ཅན་འགེབ་སྲུང་བྱས་པའི་ནག་ཉེས་འོག་ཐུབ་བསྟན་ཀུན་གསལ་གྱི་ཚ་བོ་རྒྱ་མཚོ་(Geni Jiangcuo)ཟེར་བ་ཞིག་ལའང་ཁྲིམས་བཤེར་བྱས་ཡོད་པ་དང་། སྐབས་དེར་ཨ་དཀོན་རིན་པོ་ཆེ་མཆོག་གི་སྲས་དང་ནང་པའི་མཐུན་ཚོགས་ཀྱི་སྐུ་ཚབ་འགའ་བཅས་ཟུར་ཉན་དུ་ཕེབས་ཡོད་འདུག

སི་ཀོ་ལན་ཌི་དུས་བབ་ཀྱིས་གནས་ཚུལ་སྤེལ་བ་ལྟར་ན། ཐུབ་བསྟན་ཀུན་གསལ་ནི་འཇིམ་བཟོ་བ་ཞིག་ཡིན་ཞིང་། དེ་སྔོན་སི་ཀོ་ལན་ཌིར་ཡོད་པའི་ཨ་དཀོན་རིན་པོ་ཆེ་མཆོག་གི་དགོན་པ་བསམ་ཡས་གླིང་དུ་ལོ་ ༥ ལས་ཀ་བྱས་ཡོད་པ་དང་། ཐེངས་འདིའི་ཁྲིམས་བཤེར་སྐབས་ཐུབ་བསྟན་ཀུན་གསལ་གྱིས་ཁོ་བོ་ལག་དམར་མིན་ལུགས་ཀྱི་ཁུངས་སྐྱེལ་བྱས་མེད་པ་མ་ཟད། ཨ་དཀོན་རིན་པོ་ཆེ་མཆོག་གིས་ཁོ་བོར་རྒྱ་སྒོར་ཁྲི་ ༢༧༠ ཆད་ཡོད་ལུགས་བརྗོད་ཡོད་པ་དང་། ཁོའི་ཚ་བོ་ཚེ་རིང་གིས་ཐུབ་བསྟན་ཀུན་གསལ་ལ་རོགས་པ་བྱས་ནས་ཕྱིན་པ་མ་གཏོགས་དམར་གསོད་ཀྱི་ལས་ལ་ཞུགས་མེད་སྐོར་བརྗོད་ཡོད་འདུག

སྦེལ་ཇམ་ནང་པའི་མཐུན་ཚོགས་ཀྱི་ཚོགས་གཙོ་ཁཱར་ལོ་ལཱེ་ཁེ་སུ་(Carlo Luyckx)ལགས་ཀྱིས། ཐུབ་བསྟན་ཀུན་གསལ་གྱིས་ཨ་དཀོན་རིན་པོ་ཆེ་མ་བཀྲོངས་སྔོན་དུ་ཁོ་བོར་སྒོར་མོ་སྤྲོད་དགོས་སྐོར་བརྗོད་ཡོད་ཀྱང་། ཁོ་བོས་བསམ་ཡས་གླིང་དུ་དང་བླངས་ཀྱིས་འཇིམ་བཟོའི་ཞབས་ཞུ་བསྒྲུབ་རྒྱུ་ཡིན་པའི་གན་རྒྱ་ཡི་གེ་ཁྲིམས་ཁང་ལ་ཕུལ་ཡོད་ལུགས་དང་། ཁོ་བོ་བསམ་ཡས་གླིང་དུ་སྡོད་པའི་རིང་བཟའ་བཏུང་དང་སྡོད་གནས་ཀྱི་འགྲོ་སོང་ཚང་མ་དགོན་པས་གནང་བ་ཡིན་པས། ཁོས་དེ་ལྟར་བསྒྲུབ་ཐུབ་པ་ཡིད་ལའང་འཁོར་མི་ཐུབ་པའི་སྐོར་བརྗོད་འདུག

ཡང་ཁོང་གིས་གསར་ལམ་དུ། ༧རྒྱལ་བ་ཀརྨ་པ་མཆོག་དང་ཨ་དཀོན་རིན་པོ་ཆེའི་གཅེན་པོ་རྣམ་གཉིས་ཀྱིས་ལག་དམར་ལ་སྲོག་ཁྲིམས་མི་གཅོད་པའི་ཐུགས་རེ་གནང་གི་ཡོད་སྐོར་བརྗོད་འདུག་ལ། ཨ་དཀོན་རིན་པོ་ཆེ་སྐུ་སྒེར་གྱི་ཕྱག་རོགས་གྲྭ་ཐུབ་བསྟན་ལགས་ཀྱིས། བྱམས་སྙིང་རྗེ་དང་བཟོད་སྒོམ་ལ་ཡིད་ཆེས་ཉམས་ལེན་བྱེད་མཁན་ཞིག་གི་ངོས་ནས་མི་ཞིག་བཀྲོངས་བར་རྐྱེན་བྱས་ཏེ། མི་གཞན་ཞིག་གི་ཚེ་སྲོག་འཕྲོག་པ་དེ་འཁོན་འཛིན་སློང་བའི་རྒྱུ་ཡིན་སྐོར་བརྗོད་ཡོད་པ་མ་ཟད། ཐུབ་བསྟན་ཀུན་གསལ་བསམ་ཡས་གླིང་དུ་ཡོད་སྐབས་སྒོར་མོ་དགོས་པའི་རེ་འདུན་འདོན་མྱོང་མེད་ལ། ཁོ་རང་འགྲོ་སྐབས་ཀྱང་ཕན་ཚུན་བར་མི་ལེགས་པའི་ཚོར་སྣང་གང་ཡང་མེད་སྐོར་བརྗོད་འདུག

ཨ་དཀོན་ཀརྨ་བཤད་སྒྲུབ་ཆོས་ཀྱི་ཉི་མ་མཆོག་འདས་ལོའི་ཕྱི་ཟླ་ ༡༠ ཚེས་ ༨ ཉིན་གྱི་སྔ་དྲོར། སི་ཁྲོན་ཁྲིན་ཏུའུ་གྲོང་ཁྱེར་གྱི་བོད་མིའི་འདུས་སྡོད་ཁུལ་ཝུའུ་ཧོ་སིའི་མགྲོན་ཁང་ཞིག་ཏུ་སྐུ་བཀྲོངས་ཡོད་པ་དང་། སྐབས་དེར་ཁོང་གི་ཚ་བོ་བློ་དགའ་དང་ཁ་ལོ་བ་འཇིགས་མེད་དབང་རྒྱལ་གཉིས་ཀྱང་མཉམ་དུ་དམར་གསོད་བཏང་ཡོད་པ་རེད། ཨ་དཀོན་རིན་པོ་ཆེ་མཆོག་ནི་རྒྱལ་སྤྱིའི་རོགས་པ་ཚོགས་པའི་ཚོགས་གཙོ་དང་། ཡུ་རོབ་ཏུ་ནང་པའི་དགོན་པ་བཞེངས་མཁན་ཐོག་མ་དེ་ཡིན་ལ། ཁོང་གིས་ཕྱི་ལོ་ ༡༩༩༠ ནས་བཟུང་ཁོང་གིས་བོད་ནང་གི་སློབ་གྲྭ་ཁག་ ༦༡ དང་། སྨན་ཁང་ ༡༩ ། རྒན་གསོ་ཁང་ ༣ ། བཤད་གྲྭ་ ༢༩ ། དབུལ་སྐྱོབ་ཁང་ ༥ ། རིག་དངོས་སྲུང་སྐྱོབ་ཁང་ ༣ ། སྨན་རྩྭ་འདེབས་འཛུགས་ཁང་ ༢ བཅས་གསར་རྒྱག་དང་རོགས་རམ་གནང་ཡོད་འདུག

གསར་འགོད་པ། པདྨ་མཚོ།

དུས་བབ་དྲ་བ་ནས།།