གནས་ཚུལ་བརྒྱུད་འགོད་བྱེད་བཞིན་ཡོད།

སོ་སོའི་ལས་ཀའི་ཞོར་དུ་བཙན་བྱོལ་སྤྱི་ཚོགས་ནང་གི་གནས་ཚུལ་དང་རྒྱལ་སྤྱིའི་གནས་ཚུལ་གལ་ཆེན་ཁག་སྒེར་གཉེར་དྲ་ཚིགས་བརྒྱུད་དེ་བོད་ནང་ལ་ཁྱབ་སྤེལ་གཏོང་གི་ཡོད་ཟེར།

དབྱིན་ཡུལ་དུ་གནས་སྡོད་སྟོང་སྐོར་ཐུབ་བསྟན་ལགས་ཀྱིས་ནུབ་ཕྱོགས་སུ་གྱར་བའི་བོད་མི་སྤྱི་མཚུངས་ལྟར་སོ་སོའི་ཉིན་རེའི་ལས་ཀའི་ཞོར་དུ།
'བོད་ཀྱི་ཟམ་པ' €™ཞེས་པའི་དྲ་བ་ཚིགས་ཤིག་གཉེར་ཏེ། བོད་ཕྱི་ནང་གཉིས་ཀྱི་གསར་འགྱུར་དང་རྒྱལ་སྤྱིའི་གསར་འགྱུར་གལ་ཆེན་རིགས་བརྒྱུད་འགོད་དང་། དྲག་གནོན་འོག་གི་བོད་མིའི་གླུ་སྒྲ་ཞེས་པའི་གླུ་གཞས་དྲ་བའི་ཐོག གཞིས་ལུས་བོད་མིའི་གནས་བབ་དང་སེམས་ཀྱི་རེ་འབོད། ༧གོང་ས་མཆོག་དང་སྲིད་སྐྱོང་བློ་བཟང་སེང་གེ་མཆོག་སོགས་ལ་ཕུལ་བའི་བསྟོད་གླུ་དང་པར་རིས་སོགས་བསྡུ་འགོད། གཞན། གངས་རིའི་རོལ་དབྱངས་དྲ་བའི་ཐོག་བོད་ཕྱི་ནང་གཉིས་ནས་གསར་དུ་ཐོན་བཞིན་པའི་གླུ་གཞས་བསྡུ་འགོད་སོགས་ཀྱི་ལས་ཀ་བྱེད་བཞིན་ཡོད་སྟབས། ཉེ་སྔོན་ཁོང་དྷ་རམ་ས་ལར་བསླེབས་པ་དང་བསྟུན་ཏེ་འདི་གའི་གསར་འགོད་པས་ཁོང་གི་ལས་ཀའི་སྐོར་ལ་གླེང་མོལ་ཐུང་ཙམ་བྱས།

ཁོང་གིས་དྲ་ཚིགས་དེའི་དམིགས་ཡུལ་ངོ་སྤྲོད་གནང་བ་ལྟར་ན། བོད་ནང་གི་གསར་འགྱུར་བཙན་བྱོལ་ནང་དུ་ལེན་རྒྱུ་དང་། བཙན་བྱོལ་ནང་གི་གསར་འགྱུར་དང་རྒྱལ་སྤྱིའི་གསར་འགྱུར་གལ་ཆེན་རིགས་བོད་ནང་བརྒྱུད་སྒྲོག་བྱེད་ཆེད་ཡིན་པ་དང་། དྲ་རྒྱ་དེ་སྒོ་འབྱེད་བྱས་ཏེ་ལོ་ ༢ ལྷག་འགྲོ་བཞིན་ཡོད་ཅིང་། ད་སྔ་ཀློག་བྱེད་མཁན་མང་ཆེ་བ་བོད་ནང་གི་བོད་མི་ཡིན་འདུག ཁོང་གིས་བརྗོད་དོན། ངས་ནམ་རྒྱུན་བོད་མིའི་སྒྲིག་འཛུགས་ཀྱི་དྲ་བ་དང་བོད་ཀྱི་དུས་བབ། བང་ཆེན། ཨེ་ཤ་ཡ་རང་དབང་རླུང་འཕྲིན་ཁང་། ཨ་རིའི་རླུང་འཕྲིན་དྲ་ཚིགས་སོགས་ནས་གནས་ཚུལ་གལ་ཆེན་ཁག་ཟམ་པ་དྲ་བར་བརྒྱུད་འགོད་བྱས་ཏེ་གནས་ཚུལ་ཁྱབ་སྤེལ་བྱེད་བཞིན་ཡོད། བོད་ནང་གི་དྲ་ཚིགས་ཁག་ནས་གནས་ཚུལ་བསྡུ་འགོད་བྱས་པ་མང་ཆེ་བ་སྤྱི་ཚོགས་རིག་གནས་དང་མང་སྲོལ། མི་སྣ་ངོ་སྤྲོད་སོགས་ཡིན། གང་ཡིན་ཟེར་ན། རྒྱ་གཞུང་གི་སྟངས་འཛིན་འོག་བོད་མིའི་སྤྱི་ཚོགས་འཚོ་བ་དངོས་ཀྱི་གནས་ཚུལ་རིགས་དཀོན་པོ་རེད། དེ་ནས་ཟམ་པ་དྲ་བའི་ནང་བོད་མིའི་སྒྲིག་འཛུགས་ཀྱི་དྲ་བརྙན་དང་ཨ་རིའི་རླུང་འཕྲིན་ཁང་གི་ཀུན་གླེང་། ཨེ་ཤ་ཡ་རང་དབང་རླུང་འཕྲིན་ཁང་གི་དྲ་བརྙན་བཅས་རྒྱུན་དུ་ལྟ་ཐུབ་པའི་དྲ་བརྙན་གསུམ་བཞག་ཡོད། ཅེས་བརྗོད་བྱུང་།

བྲེལ་འཚུབ་ཆེ་བའི་སྤྱི་ཚོགས་ཤིག་གི་ནང་ཉིན་ལྟར་སྒེར་ངོས་ནས་བོད་དང་འབྲེལ་བའི་གསར་འགྱུར་མང་པོ་བརྒྱུད་གཏོང་བྱེད་པར་དཀའ་ངལ་ཅི་ཡོད་དྲིས་པར་ཁོང་གིས། ངས་དབྱིན་ལན་གྱི་བོད་པའི་ཟ་ཁང་ཞིག་ནང་ལས་ཀ་བྱེད་བཞིན་ཡོད། ཞོགས་པའི་ཆུ་ཚོད་ ༦ པ་ནས་ལས་ཀ་བྱས་ན། ཕྱི་དྲོ་ཆུ་ཚོད་ ༤ པར་ལས་ཀ་གྲོལ་གྱི་ཡོད་སྟབས། དེ་ནས་ཆུ་ཚོད་གང་ཡོད་ཕུད་ནས་སོ་སོའི་ཤེས་ཚོད་ཐུབ་ཚོད་ཀྱིས་གསར་འགྱུར་བརྒྱུད་གཏོང་དང་བསྡུ་རུབ་སོགས་ལ་ཤུགས་རྒྱག་གི་ཡོད། ང་སྔོན་ཆད་སློབ་གྲྭར་འགྲོ་མྱོང་མེད་སྟབས། བོད་ཡིག་དང་དབྱིན་ཡིག་གཉིས་ཀ་ཡག་པོ་མེད། ཡིན་ནའང་ལས་ཀའི་ཞོར་དུ་གང་ཐུབ་ཀྱིས་ཡར་རྒྱས་གཏོང་གི་ཡོད། ཅེས་བརྗོད་བྱུང་།

ཉེ་སྔོན་དཀར་མཛེས་ཁུལ་གྱི་གསར་འགོད་པ་ཞིག་ལྷ་སར་མཇལ་སྐོར་དུ་ཕྱིན་པའི་སྐོར་བརྗོད་དོན། ཉེ་སྔོན་ངའི་ངོ་ཤེས་གསར་འགོད་པ་ཞིག་གུང་གསེང་གི་སྐབས་དང་བསྟུན་ཏེ་ལྷ་སར་གནས་སྐོར་དུ་ཕྱིན་འདུག ལམ་བར་ནས་རྒྱ་གཞུང་གིས་བོད་རིགས་ཚོར་དམིགས་བསལ་དམ་དྲག་དང་སྔོག་བཤེར་བྱེད་ཀྱི་ཡོད་སྟབས། ཁོ་རང་གི་པོད་འཕྲིན་ནང་ལྷ་སར་འགྲོ་རྒྱུ་དེ་བདེ་བ་ཅན་གྱི་ཞིང་ཁམས་ལ་འགྲོ་བ་ལས་ཀྱང་དཀའ་ལས་ཆེ་བ་འདུག་ཅེས་བརྗོད་འདུག ཡང་ཉིན་ཞིག་ཁོ་ལྷ་སའི་མགྲོན་ཁང་ཞིག་ཏུ་སྡོད་སྐབས། ཉེན་རྟོག་པ་ཡོང་སྟེ་རྙོག་གྲ་མང་པོ་བཤད་དེ་ཕྱིར་འཕུད་གཏོང་གྲབས་བྱས་ཡོད་འདུག ཁོ་རང་རྒྱུན་དུ་བོད་སྐད་ཡིག་དང་རིག་གཞུང་སོགས་ཀྱི་ཐད་དོ་སྣང་ཧ་ཅང་ཆེན་པོ་འདུག ཐེངས་ཤིག་ཁོ་ཕ་ཡུལ་དུ་ཕྱིན་སྐབས། ཁོ་རང་ཆུང་དུས་སློབ་གྲྭར་འགྲོ་སའི་གྲོང་གསེབ་ཀྱི་བོད་ཡིག་སློབ་ཆུང་དེར་ལྟ་རུ་ཕྱིན་སྐབས། སློབ་གྲྭ་སྒོ་བརྒྱབ་སྟེ་དམར་སྒར་བཙུགས་ཡོད་པ་མཐོང་པས་ཕངས་སེམས་ཆེན་པོ་བྱུང་སྐོར་ལབ་སོང་། ཞེས་པ་སོགས་བརྗོད་བྱུང་།

གསར་འགོད་པ། པདྨ་མཚོ།

དུས་བབ་དྲ་བ་ནས།།