ཚེས་པ་ ༡༨ ཉིན་རང་བཙན་ཐོབ་བམ།

ཟླ་འདིའི་ཚེས་ ༡༨ ཉིན་སེ་ཀོ་ལན་ཌི་དབྱིན་ཇིའི་མངའ་འོག་ནས་རང་བཙན་བྱེད་མིན་མང་མོས་འོས་བསྡུ་བྱ་རྒྱུ་ཡིན་འདུག

ཉིན་འདི་འགར་རྒྱལ་སྤྱིའི་གསར་ལམ་ཁག་ཏུ་ཚ་ཚ་འུར་འུར་གྱིས་གླེང་བཞིན་པ་ཞིག་ནི། ཟླ་འདིའི་ཚེས་ ༡༨ ཉིན་དབྱིན་ཇིའི་གཞུང་གིས་སེ་ཀོ་ལན་ཌི་

(Scotland) མི་མང་ཚོར་དབྱིན་ཇིའི་མངའ་འོག་ནས་ལོགས་སུ་རང་བཙན་བྱེད་མིན་མང་མོས་འོས་བསྡུ་བྱ་རྒྱུ་ཡིན་ཞིང་། དེ་ནི་ ༢༠༡༡ ལོར་རྒྱལ་ཡོངས་འོས་བསྡུའི་སྐབས་སེ་ཀོ་ལན་ཌིའི་རྒྱལ་ཡོངས་ཆབ་སྲིད་ཚོགས་པ་ (Scottish National Party) ཞེས་པར་རྒྱལ་ཁ་ཐོབ་ཡོད་པར་བརྟེན། གཞུང་འཛིན་ཚོགས་པ་འདི་བརྒྱུད་དེ་སེ་ཀོ་ལན་ཌིའི་མི་མང་ལ་དབྱིན་ཇིའི་མངའ་འོག་ནས་ལོགས་སུ་རང་བཙན་བྱེད་མིན་གྱི་མང་མོས་འོས་བསྡུའི་ཐོབ་ཐང་རག་པ་ཞིག་ཡིན་འདུག གནས་ཚུལ་འདིར་རྒྱ་ནག་གཙོས་རྒྱལ་ཁབ་ཁག་ཅིག་གིས་དོ་སྣང་ཆེན་པོ་བྱེད་བཞིན་ཡོད་འདུག

འདིའི་ཐད་སེ་ཀོ་ལན་ཌིའི་བློན་ཆེན་དང་པོ་སཱལ་མོན་ (Alex Salmond) མཆོག་གིས་གསར་འགྱུར་བརྒྱུད་ལམ་ཁག་ཏུ་བརྗོད་པར། "ད་བར་སེ་ཀོ་ལན་ཌི་དབྱིན་ཇིའི་མངའ་འོག་ཏུ་ལོ་ ༣༠༠ ཙམ་རིང་བསྡད་ཡོད་པར་བརྟེན། ད་ཆ་མུ་མཐུད་དབྱིན་ཇིའི་མངའ་འོག་ཏུ་སྡོད་དགོས་པ་ཆགས་ཀྱི་མེད་སྟབས། གལ་ཏེ་སེ་ཀོ་ལན་ཌི་དབྱིན་ཇིའི་མངའ་འོག་ནས་ལོགས་སུ་རང་བཙན་རྒྱལ་ཁབ་ཅིག་ཏུ་འགྱུར་བ་ཡིན་ན། མངའ་ཁུལ་ནང་རྡོ་སྣུམ་ཐོན་ཁུངས་ཡག་པོ་ཡོད་སྟབས། མང་ཚོགས་ལ་ཁེ་ཕན་ཆེན་པོ་འཐོབ་རྒྱུ་ཙམ་མ་ཟད། མ་འོངས་པར་སེ་ཀོ་ལན་ཌི་འཛམ་གླིང་ཐོག་སྟོབས་འབྱོར་ཆེ་ཤོས་གྲས་ཆགས་ངེས་ཡིན" €ཞེས་བརྗོད་འདུག

དབྱིན་ཇིའི་སྲིད་བློན་ཌ་ཝུ་ཌི་ཁེམ་རོན་ (David Cameron)གྱིས། "འདས་པའི་ལོ་རྒྱུས་ནང་དབྱིན་ཇི་དང་སེ་ཀོ་ལན་ཌི་མཉམ་འབྲེལ་བྱས་ཏེ་གཞུང་བསྐྱངས་པར་བརྟེན། འཛམ་གླིང་ཐོག་དབྱིན་ཇིའི་རྒྱལ་ཁབ་དེ་སྲིད་འབྱོར་རིག་གསུམ་དང་། སྤྱི་ཚོགས་གནས་སྟངས་གང་ཐད་ནས་གཡུར་དུ་ཟ་བའི་གྲུབ་འབྲས་ཐོན་ཡོད་སྟབས། སེ་ཀོ་ལན་ཌི་དབྱིན་ཇིའི་མངའ་འོག་ཏུ་མུ་མཐུད་གནས་རྒྱུ་གལ་ཆེན་པོ་ཆགས་ཡོད" €ཅེས་བརྗོད་འདུག

སེ་ཀོ་ལན་ཌི་དབྱིན་ཇིའི་མངའ་འོག་ནས་རང་བཙན་བྱེད་མིན་གྱི་གནད་དོན་གཙོ་བོ་ནི། སེ་ཀོ་ལན་ཌིའི་མངའ་ཁུལ་གྱི་རྡོ་སྣུམ་དང་། ད་ལྟ་སེ་ཀོ་ལན་ཌིའི་ནང་བེད་སྤྱོད་བྱེད་བཞིན་པའི་དབྱིན་སྒོར་ (Pound) དེ་མུ་མཐུད་སེ་ཀོ་ལན་ཌིའི་ནང་བཀོལ་སྤྱོད་བྱེད་མིན་ལ་ཐུག་ཡོད་ཅིང་། ད་བར་དབྱིན་ཇིའི་གཞུང་གིས་སེ་ཀོ་ལན་ཌིའི་མངའ་ཁུལ་ནས་རྡོ་སྣུམ་(barrel) ཐེར་འབུམ་ ༢༤ ལྷག་བཏོན་ཡོད་པ་དང་། ད་དུང་ལོ་ ༣༠ ལྷག་གི་ཐོན་ཁུངས་ཡོད་པ་མ་ཟད། ༢༠༡༨ བར་རྡོ་སྣུམ་གྱི་ཁྲལ་འབབ་ཡོང་འབབ་དབྱིན་སྐོར་ཐེར་འབུམ་ ༥༧ ཙམ་ཡོང་རྒྱུའི་ཚོད་དཔག་བྱེད་བཞིན་ཡོད་སྟབས། གལ་ཏེ་དབྱིན་གཞུང་ལ་སེ་ཀོ་ལན་ཌིའི་རྡོ་སྣུམ་ཡོང་འབབ་མེད་པ་ཆགས་ན། ༢༠༡༧ དང་ ༢༠༡༨ བར་དབྱིན་ཇིའི་ཁྲལ་འབབ་ཡོང་འབབ་བརྒྱ་ཆ་ ༣༨ ཙམ་ཉམས་རྒུད་འགྲོ་རྒྱུ་ཡིན་འདུག

འདས་པའི་ལོ་རྒྱུས་ནང་སེ་ཀོ་ལན་ཌིས་དབྱིན་ཇིར་དམག་འཐབ་བྱས་ཏེ་དབྱིན་ཡུལ་བཙན་བཟུང་དང་། དབྱིན་ཇིས་སེ་ཀོ་ལན་ཌི་བཙན་བཟུང་བྱས་པ་སོགས་བྱུང་ཡོད་པ་མ་ཟད། ༡༨༤༣ ལོར་སེ་ཀོ་ལན་ཌི་དབྱིན་ཇིའི་མངའ་འོག་ནས་རང་བཙན་རྒྱལ་ཁབ་ཅིག་ཡིན་པར་ངོས་འཛིན་ཐོབ་ཡོད་ཀྱང་། ༡༩༠༧ ལོར་སེ་ཀོ་ལན་ཌི་དབྱིན་ཇི་དང་ཟླ་སྒྲིལ་བཏང་ཡོད་འདུག

ད་རེབ་ཀྱི་མང་མོས་འོས་བསྡུའི་ཁྲོད་སེ་ཀོ་ལན་ཌིའི་ནང་གནས་སྡོད་རང་ལོ་ ༡༦ ཡན་གྱི་མང་ཚོགས་ཚང་མ་འོས་བསྡུའི་ནང་ཞུགས་ཆོག་ཅིང་། ཆ་རྐྱེན་གཞན་ཞིག་ནི་འོས་ལྡུག་མཁན་ཚང་མ་དབྱིན་ཇིའི་མི་སེར་རམ་ཡུ་རོབ་སྤྱི་མཐུན་གྱི་མི་སེར་ཡིན་པ་གང་ཞིག་ལ་དབྱིན་ཡུལ་ནང་སྡོད་ཆོག་པའི་ལག་འཁྱེར་ཡོད་པ་ཞིག་དགོས་ཀྱི་ཡོད་སྟབས། དབྱིན་ཡུལ་གྱི་ས་ཁུལ་འདྲ་མིན་ནང་གནས་སྡོད་སེ་ཀོ་ལན་ཌིའི་མི་རིགས་འབུམ་ ༨ ཙམ་གྱིས་འོས་ལྡུག་ཆོག་གི་མེད་པ་དང་། ཡང་སེ་ཀོ་ལན་ཌིའི་ནང་གནས་སྡོད་བྱེད་བཞིན་པའི་དབྱིན་ཇིའི་མི་རིགས་འབུམ་ ༤ ཙམ་གྱིས་འོས་ལྡུག་ཆོག་པ་ཆགས་ཡོད་འདུག

ཟླ་འདིའི་ཚེས་ ༡༤ ཉིན་དབྱིན་ཡུལ་ཚགས་ཤོག་ (The Observer) ཅེས་པས་སེ་ཀོ་ལན་ཌི་དབྱིན་ཇིའི་མངའ་འོག་ནས་རང་བཙན་བྱེད་མིན་ཐད་དྲ་ཐོག་བསམ་ཤོག་ཅིག་བསྡུས་པ་བརྒྱུད་སེ་ཀོ་ལན་ཌི་རང་བཙན་མི་འདོད་མཁན་བརྒྱ་ཆ་ ༤༧།༧ དང་། རང་བཙན་<འདོད་མཁན་བརྒྱ་ཆ་ ༤༢།༣། འོས་བསྡུར་ཆ་ཤས་ལེན་གྱི་མིན་ཟེར་མཁན་བརྒྱ་ཆ་ ༡༠ ཙམ་བྱུང་ཡོད་པ་མ་ཟད། ཡང་གཟའ་ཉི་མའི་དུས་བབ་ (Sunday Times) ཀྱིས་བསམ་ཤོག་བསྡུས་པའི་ནང་ལའང་སེ་ཀོ་ལན་ཌི་རང་བཙན་འདོད་མཁན་བརྒྱ་ཆ་ ༥༠།༦ དང་། རང་བཙན་མི་འདོད་མཁན་བརྒྱ་ཆ་ ༤༩།༤ བྱུང་ཡོད་འདུག

ཁ་སང་དབྱིན་ཡུལ་ནང་རྟེན་གཞི་བྱས་པའི་སྙན་གྲགས་ཅན་གྱི་ཚགས་ཤོག་རེས་གཟའ་ཉི་མའི་དུས་བབ་དང་། རེས་གཟའ་ཉི་མའི་ཆ་འཕྲིན། རེས་གཟའ་ཉི་མའི་བྱ་མ་རྟ་ (Sunday Mail)། རེས་གཟའ་ཉི་མའི་བང་ཆེན་སོགས་ཀྱི་རྩོམ་སྒྲིག་པའི་གཏམ་ནང་། སེ་ཀོ་ལན་ཌི་དབྱིན་ཇིའི་མངའ་འོག་ནས་རང་བཙན་ཐོབ་ཚེ། རྒྱལ་ཁབ་གཉིས་ཀྱི་དཔལ་འབྱོར་དང་ཆབ་སྲིད་ཐོག་གྱོང་གུད་ཆེན་པོ་ཕོག་རྒྱུ་ཡིན་སྐོར་འཁོད་ཡོད་པ་དང་། དེ་ཡང་རེས་གཟའ་ཉི་མའི་དུས་བབ་ཀྱི་རྩོམ་སྒྲིག་པའི་གཏམ་ནང་། "དབྱིན་ཡུལ་ཁ་བྲལ་གཏོང་བ་དེ་ནི་ཡིད་སྐྱོ་དགོས་པའི་གནས་སྟངས་ཤིག་ཆགས་ཡོད་སྟབས། རྒྱལ་ཞེན་ལྷག་བསམ་གྱིས་ཕྱུག་པའི་སེ་ཀོ་ལན་ཌིའི་མི་རིགས་ཤིག་ཡིན་ཚེ། སེ་ཀོ་ལན་ཌི་དབྱིན་ཇིའི་མངའ་འོག་ཏུ་སྡོད་རྒྱུའི་བསམ་ཤོག་འཕེན་དགོས། གལ་ཏེ་སེ་ཀོ་ལན་ཌི་དབྱིན་ཇིའི་མངའ་འོག་ནས་ལོགས་སུ་རང་བཙན་ཐོབ་པ་ཡིན་ན། དབྱིན་ཡུལ་གྱི་ད་ཡོད་དབང་ཐང་འཛམ་གླིང་འདི་ནས་ཉམས་དམས་སུ་འགྲོ་ངེས་ཡིན"  ཞེས་དང་། དེ་བཞིན། རེས་གཟའ་ཉི་མའི་ཆ་འཕྲིན་གྱི་རྩོམ་སྒྲིག་པའི་གཏམ་ནང་། "སེ་ཀོ་ལན་ཌིའི་མི་རིགས་ཚོས་སེ་ཀོ་ལན་ཌི་དབྱིན་ཇི་ནས་ལོགས་སུ་ཁ་བྲལ་འདོད་ཀྱི་ངོ་དགའ་སྤྲེལ་ལད་ཐབས་ཇུས་ལ་འགོག་རྒོལ་བྱས་ཏེ། རྒྱལ་ཁབ་གཅིག་གི་འཛིན་སྐྱོང་འོག་ཤར་སྐྱོད་ཐུབ་རྒྱུར་འོས་ཤོག་འཕེན་ དགོས" ཞེས་བརྗོད་འདུག

ཟླ་འདིའི་ཚེས་ ༡༠ ཉིན་རྒྱ་ནག་གི་གཞུང་འབྲེལ་གསར་འགྱུར་བརྒྱུད་ལམ་གོ་ལའི་དུས་བབ་(Global Times) ཀྱི་རྩོམ་སྒྲིག་པའི་གཏམ་ནང་། “གལ་ཏེ་དབྱིན་ཇི་དང་སེ་ཀོ་ལན་ཌི་རྒྱལ་ཁབ་ཁ་ཁ་ཆགས་ཚེ། ད་ལྟ་དབྱིན་ཇི་རྒྱལ་སྤྱིའི་ཐོག་ཤུགས་རྐྱེན་མང་ཤོས་བཟོ་མཁན་གྲས་ཀྱི་རྒྱལ་ཁབ་ཡིན་པ་དེ་མ་འོངས་པར་ཉམས་རྒུད་འགྲོ་རྒྱུ་མ་ཟད། དབྱིན་ཡུལ་གྱི་རྒྱལ་རབས་ལོ་རྒྱུས་ཁྲོད་སྲིད་བློན་ཌ་ཝུ་ཌི་ཁེམ་རོན་རྒྱལ་ཁབ་གཅིག་སྒྲིལ་བྱེད་མ་ཐུབ་མཁན་གྱི་ཉེས་ཅན་ཞིག་ཆགས་རྒྱུ་ཡིན།”ཞེས་སོགས་བསམ་ཚུལ་སྤེལ་འདུག

སྲིད་དོན་དབྱེ་ཞིབ་པ་ཚོས། ད་རེབ་དབྱིན་ཇིའི་གཞུང་གིས་སེ་ཀོ་ལན་ཌི་དབྱིན་ཇིའི་མངའ་འོག་ནས་ལོགས་སུ་རང་བཙན་བྱེད་མིན་མང་མོས་འོས་བསྡུའི་ཐོབ་ཐང་སྤྲད་པ་དེས་རྒྱ་ནག་གཙོས་གཅིག་བསྡུད་གཞུང་ཁག་ཅིག་ལ་བློ་སྒོ་འབྱེད་ཐུབ་ཡོད་སྐོར་བརྗོད་འདུག

གསར་འགོད་པ། དོན་གྲུབ།

དུས་བབ་དྲ་བ་ནས།