ལོག་ལྟ་ཆོས་ལུཊ་ཀྱི་ངོ་བོར་བསྒྱུར་ཐབས་བྱས་ན་མི་འགྲིག

༧གོང་ས་མཆོག་གིས་ཁེ་ན་ཌའི་ནང་གི་མཛད་འཕྲིན་གྲུབ་སྟེ་ཨ་རིའི་ནང་ཞབས་སོར་འཁོད་ཡོད་ཅིང་། དེ་གའི་མི་མང་ལ་སློབ་ཕྲུག་ཚོར་བྱམས་བརྩེ་གཞི་ལ་བཞག་པའི་ཤེས་ཡོན་སློབ་གསོ་སྤྲོད་དགོས་པ་གལ་འགངས་ཆེན་པོ་ཡིན་སྐོར་གསུངས་འདུག               ཟླ་འདིའི་ཕྱི་ཚེས་ ༢༠ ཉིན་༧གོང་ས་མཆོག་ཁེ་ན་ཌའི་གྲོང་

ཁྱེར་ཝན་ཁོ་ཝར་(Vancouver)ནང་ཞབས་སོར་འཁོད་ཡོད་ཅིང་། ཕྱི་ཚེས་ ༢༡ ནས་ ༢༤ ཉིན་བར། ཁུལ་དེའི་ནང་གི་སློབ་ཆེན་དང་རིག་གཞུང་ལྟེ་གནས་ཁང་སོགས་སུ་མི་མང་ལ་བཀའ་སློབ་དང་། རྒྱལ་སྤྱིའི་ཚན་རིག་པ་དང་ཚོང་ལས་སྡེ་ཚན་འདྲ་མིན་གྱི་སྤྱི་ཁྱབ་འགན་འཛིན་ཁག་ཅིག་ལ་བཟང་སྤྱོད་དང་འབྲེལ་བའི་ཐོག་བཀའ་བསྡུར་བཅས་གནང་ཡོད་འདུག གཞན། ཁེ་ན་ཌའི་སྤྱི་ཚོགས་ཡར་རྒྱས་བློན་ཆེན་སྐུ་ཞབས་ཇེ་སོན་ཀེན་ནི་(Jason Kenney )ལགས་དང་དཔྱ་ཁྲལ་བློན་ཆེན་སྐུ་ཞབས་ཀེར་རི་ལིན་ཕིན་ཌེ་ལེ་ (Kerry-Lynn Findlay)ལགས་རྣམ་གཉིས་གཙོས་བོད་དོན་རྒྱབ་སྐྱོར་ཚོགས་པའི་ཚོགས་མི་ ༡༠ ལ་མཇལ་འཕྲད་གནང་ཡོད་འདུག

ཕྱི་ཚེས་ ༢༣ ཉིན་བོད་རིགས་ ༡༠༠༠ ལྷག་ལ་བཀའ་སློབ་གནང་སྐབས། ཁོང་གིས་ང་ཚོ་བཙན་བྱོལ་དུ་འབྱོར་ནས་ལོ་ངོ་ ༥༥ ལྷག་བརྒལ་བཞིན་ཡོད། ད་ལྟ་མི་རབས་གསར་པ་ཚོས་ཀྱང་སོ་སོའི་བུ་ཕྲུག་གསོ་སྐྱོང་བྱས་ཏེ་མི་ཐོག་བརྗེ་བཞིན་ཡོད་ཀྱང་། བོད་ཀྱི་རིག་གཞུང་སྲུང་སྐྱོབ་ལ་ལྷག་བསམ་དང་མི་རིགས་ཀྱི་ལ་རྒྱ་སྔར་ལྷག་ཆེ་རུ་འགྲོ་བཞིན་ཡོད། བོད་ཀྱི་རྩ་དོན་འདི་ད་ལྟའང་མ་ཤི་གསོན་པོར་གནས་ཡོད་པའི་རྒྱུ་མཚན་གཅིག་དེ་ཆོས་དང་རིག་གཞུང་ལ་བརྟེན་ནས་བྱུང་ཡོད། དེ་སྔོན་ངས་བརྗོད་རྒྱུ་བྱུང་། བོད་ཀྱི་ནང་བསྟན་ཆོས་ལུགས་ནི་གཞན་དང་མ་འདྲ་བར་མཚན་ཉིད་ཀྱི་རིགས་ལམ་ཐོག་ནས་བརྟག་དཔྱད་ཀྱིས་གཏན་ལ་ཕབ་པ་ཞིག་དང་། རང་རེའི་སྐད་ནི་ནཱ་ལེནྜའི་ནང་པའི་ཆོས་བརྒྱུད་དཔྱིས་ཕྱིན་པ་འགྲེལ་བཤད་རྒྱག་ཐུབ་མཁན་དེ་ཡིན། དེང་སྐབས་ནཱ་ལེནྜ་ནི་གྱང་རོ་ཞིག་ལས་མེད་ཀྱང་། འདི་ལས་བྱུང་བའི་ཆོས་བརྒྱུད་བོད་ཀྱི་རིག་གཞུང་ནང་གསོན་པོར་གནས་ཡོད་པ་ལ་ཧ་ཅང་དགེ་མཚན་ཆེན་པོ་ཞིག་ཡོད། རྒྱ་ནག་ཏུ་ནང་པའི་མི་འབོར་ས་ཡ་བཞི་བརྒྱ་ནས་ལྔ་བརྒྱའི་བར་ཡོད་པ་ཚོའི་ཁྲོད་ཀྱི་མང་པོ་ཞིག་བོད་ཀྱི་ནང་ཆོས་ལ་དོ་སྣང་བྱེད་རྒྱུ་ཤུགས་ཆེ་རུ་འགྲོ་བཞིན་ཡོད། ཅེས་སོགས་གསུངས་འདུག

ཕྱི་ཚེས་ ༢༤ ཉིན་ཨ་རིའི་ཨ་ལཱ་བྷ་མ་ (Alabama)མངའ་སྡེའི་བྷར་མིན་ཧམ་གྲོང་ཁྱེར་དུ་ཞབས་སོར་འཁོད་ཡོད་པ་དང་། ཕྱི་ཚེས་ ༢༥ ཉིན་ཨ་ལཱ་བྷ་མའི་གཙུག་ལག་སློབ་ཁང་ནང་དུ་ཀླད་རྩའི་འགྱུར་ལྡོག་དང་གསོ་ཐབས་སྐོར་གྱི་བགྲོ་གླེང་ཐོག་ཞུགས་ཡོད་ཅིང་། ཚེས་ ༢༦ ཉིན་གྱི་སྔ་དྲོར་བྷར་མིན་ཧམ་གྲོང་ཁྱེར་ལས་ཁུངས་ཀྱི་གོ་སྒྲིག་འོག་༧གོང་ས་མཆོག་གིས་ཆོས་དད་ཀྱི་ར་བ་ལས་བརྒལ་བ་ (Beyond Belief)ཞེས་པའི་ཆོས་ལུགས་འདྲ་མིན་གྱི་མི་སྣའི་བགྲོ་གླེང་ཐོག་ལྷན་ཞུགས་གནང་ཡོད་པ་དང་། ཉིན་རྒྱབ་གྲོང་ཁྱེར་དེའི་རྩེད་ཐང་དུ་མི་ ༨༠༠༠ བརྒལ་བར་ཆོས་ལུགས་དང་མ་འབྲེལ་བའི་བཟང་སྤྱོད་ (Secular Ethics in Our Time) ཅེས་པའི་ཐོག་གསུང་བཤད་གནང་ཡོད་འདུག

སྐབས་དེར་༧གོང་ས་མཆོག་གིས། ཆོས་ལུགས་གང་འདྲ་ཞིག་ཡིན་རུང་བྱམས་བརྩེའི་བསླབ་བྱ་དགོས་སྐོར་གཅིག་མཚུངས་གསུང་གི་ཡོད། སྤྱིར་བཏང་ཁ་ཆེ་དང་ཡེ་ཤུ་ཙམ་དུ་མ་ཟད། ནང་པ་སངས་རྒྱས་པའི་ཆོས་ཀྱི་རྗེས་འབྲང་ནང་དུའང་ལོག་ལྟ་མཁན་ཡོད་སྲིད། གལ་ཏེ་ལོག་ལྟའི་བྱ་སྤྱོད་དེ་རིགས་ཆོས་ལུགས་ཤིག་གི་ངོ་བོར་བསྒྱུར་ཐབས་བྱས་ན་ འགྲིག་གི་མེད་ལ། དེ་བཞིན་ང་ཚོ་ནི་སྐྱེ་བ་ནས་འཆི་བའི་བར་མཚམས་སུ་འཚོ་བཞིན་གནས་པའི་སེམས་ཅན་ཞིག་ཆགས་ཡོད་སྟབས། ལུས་སེམས་གཉིས་བདེ་གནས་ཐོག་ཞི་བདེའི་ངང་ནས་འཚོ་ཐབས་ལ་སྔར་ལྷག་འབད་བརྩོན་བྱེད་དགོས་པ་ཧ་ཅང་གལ་ཆེན་པོ་ཆགས་ཡོད། གང་ཡིན་ཞེ་ན། སེམས་སྐྱིད་པོ་བྱུང་ན་ལུས་པོ་བདེ་ཐང་ལ་ཕན་ཐོགས་ཆེན་པོ་ཡོད། ལྷག་པར་དུ་རང་ཉིད་ཀྱི་མི་ཚེ་སྐྱིད་པོ་ཞིག་དང་ཁྱིམ་ཚང་བདེ་སྐྱིད་ལྡན་པ་ཞིག་ཡོང་རྒྱུར་དངུལ་དང་དབང་ཤུགས་ཁོ་ནའི་ཡོང་ཐབས་མེད་སྟབས། རང་རྒྱུད་ལ་ཡོད་པའི་བཟང་སྤྱོད་གོང་སྤེལ་ཐོག་ང་ཚོས་གཞན་གཅེས་འཛིན་གྱི་བསམ་བློ་གཏོང་ཐུབ་ན། རང་ཉིད་ལ་བདེ་སྐྱིད་ཡོང་གི་ཡོད། དེ་ལྟར་ཡོང་བར་སློབ་ཆུང་སྐབས་ནས་སློབ་ཆེན་བར་གྱི་སློབ་ཕྲུག་སོགས་ལ་བྱམས་བརྩེ་གཞི་ལ་བཞག་པའི་ཐོག་ནས་ཤེས་ཡོན་སློབ་གསོ་སྤྲོད་དགོས་པ་ཤིན་ཏུ་གལ་འགངས་ཆེན་པོ་ཆགས་ཡོད། ཅེས་སོགས་གསུངས་འདུག

ཕྱི་ཚེས་ ༢༨ ཉིན་༧གོང་ས་མཆོག་ཨ་རིའི་ཉིའུ་ཇར་སི་ཡི་ཕི་རིན་སི་ཊོན་(Princeton)གཙུག་ལག་སློབ་ཆེན་ནང་མི་མང་ལ་བྱམས་བརྩེའི་སྐོར་ལ་བཀའ་སློབ་གནང་རྒྱུ་ཡིན་པ་དང་དེ་ནས་རིམ་གྱིས་ཨ་རིའི་གྲོང་ཁྱེར་བྷོ་སི་ཊོན་དང་ཉེའུ་ཡོག་དུ་ཆིབས་བསྒྱུར་གྱིས་མི་མང་ལ་ཆོས་འབྲེལ་དང་། འཛམ་གླིང་བཟང་ཕྱོགས་སུ་འགྱུར་བ་གཏོང་མཁན་རླབས་ཆེན་མི་སྣའི་བགྲོ་གླེང་སོགས་སུ་མཉམ་ཞུགས་གནང་རྒྱུ་ཡིན་འདུག

གསར་འགོད་པ། པདྨ་མཚོ།

དུས་བབ་དྲ་བ་ནས།།