ཀུན་གསལ་མེ་ལོང་མཉེན་ཆས་དབུ་འབྱེད།

ཕྱི་ཚེས་ ༡༤ ཉིན་གནས་མཆོག་རྡོ་རྗེ་གདན་དུ་དཔལ་རྒྱལ་བ་ཀརྨ་པ་མཆོག་གིས་ཀུན་གསལ་མེ་ལོང་ཞེས་པའི་གསུང་རབ་མཉེན་ཆས་ཤིག་དབུ་འབྱེད་གནང་འདུག

ཟླ་འདིའི་ཕྱི་ཚེས་ ༡༤ ཉིན་གནས་མཆོག་རྡོ་རྗེ་གདན་གྱི་ཉེ་འཁྲིས་སུ་ཡོད་པའི་གཏེར་སྒར་དགོན་གྱི་བླ་གྲྭ་མང་པོ་འདུ་འཛོམས་ཐོག དཔལ་རྒྱལ་བ་ཀརྨ་པ་མཆོག་

གིས་དམ་ཆོས་བང་མཛོད་ལས་འཆར་ཚོགས་པས་བཟོས་བའི་ཀུན་གསལ་མེ་ལོང་(Adarsha)ཞེས་པའི་མཉེན་ཆས་ཤིག་ཚོད་ལྟའི་ཚུལ་དུ་དབུ་འབྱེད་གནང་བ་དང་འབྲེལ། དམ་ཆོས་བང་མཛོད་ཅེས་པའི་ལས་འཆར་གྱི་དགོས་དམིགས་དང་བརྙན་རས་བརྒྱུད་ཀུན་གསལ་མེ་ལོང་མཉེན་ཆས་བེད་སྤྱོད་གཏོང་ཕྱོགས་སྐོར་ངོ་སྤྲོད་གནང་འདུག

མཉེན་ཆས་དབུ་འབྱེད་ཐོག་རྒྱལ་བ་ཀརྨ་པ་མཆོག་གིས་དམ་ཆོས་བང་མཛོད་ཅེས་པའི་ལས་འཆར་གྱི་དགོས་དམིགས་སྐོར་གསུངས་དོན། དུས་རབས་ཉེར་གཅིག་པ་འདིར་ཆ་འཕྲིན་གྱི་དུས་རབས་ཟེར་གྱི་ཡོད་པ་དང་། ཆ་འཕྲིན་དུས་རབས་འདིར་དྲ་རྒྱ་དང་སྤྱི་ཚོགས་འབྲེལ་ལམ་ངོ་དེབ་སོགས་འདྲ་མིན་སྣ་ཚོགས་ཤིག་ཡོད་སྟབས། དེ་ཚོ་བརྒྱུད་ནས་གནས་ཚུལ་མང་པོ་ཞིག་ཕན་ཚུན་གཏོང་སྤེལ་བྱེད་པའི་དུས་ཚོད་ཅིག་ཏུ་སླེབ་བསྡད་ཡོད་པ་རེད། སྔོན་མ་ཡིན་ན་བཀའ་བསྟན་བཅོས་ཀྱི་གསུང་རབ་དེ་ཚོ་གོས་ཆེན་གྱིས་དཀྲིས་ཏེ་མཆོད་བཤམས་ནང་བཞག་ཡོད་ཀྱང་། དེང་སང་གསུང་རབ་ལྟ་ཀློག་བྱེད་པར་ངེས་པར་དུ་དཔེ་མཛོད་ཁང་དུ་འགྲོ་མི་དགོས་པར་སོ་སོའི་ལག་ཐོགས་ཁ་པར་དང་གློག་ཀླད་སོགས་ཀྱི་ནང་ནས་ལྟ་ཀློག་ཐུབ་པ་ཞིག་བཟོ་དགོས་པ་དེ། དེང་སང་གི་འགྲོ་སྟངས་འདྲ་བོ་ཆགས་བསྡད་ཡོད་པ་རེད། ཡིན་ནའང་། བོད་བརྒྱུད་ནང་པ་སངས་རྒྱས་པའི་ངོས་ནས་དེ་ཚོའི་ཕྱོགས་ལ་ཏོག་ཙམ་རྗེས་ལུས་འདྲ་བོ་ཐེབས་བསྡད་ཡོད་པ་རེད། ང་ཚོའི་བོད་ཡིག་གི་དྲ་རྒྱ་དེ་ཚོ་ཡིན་ནའང་གཞན་དག་ལ་བལྟས་པ་ཡིན་ན་རྒྱ་ཆུང་ཆུང་དང་གྲངས་འབོར་ཉུང་ཉུང་རེད། དེའི་ནང་ནས་བཀའ་བསྟན་འགྱུར་དང་གསུང་རབ་སྐོར་ནས་དེ་བས་ཀྱང་ཉུང་ཉུང་ཆགས་ཡོད། དུས་རབས་ཀྱི་རྗེས་ཟིན་པ་བྱས་ནས་འགྲོ་མ་ཐུབ་ན་དེང་དུས་ཀྱི་མིའི་དགོས་མཁོ་དང་འདོད་བློ་སྐོང་མ་ཐུབ་པ་ཆགས་ཡོད་དུས། དེང་དུས་ཀྱི་མི་ཚོས་ང་ཚོའི་སྲོལ་རྒྱུན་གྱི་གསུང་རབ་ལ་དབྱིངས་ཞེ་དྲག་མེད་པར་གསུང་རབ་རིན་ཐང་བྲལ་བ་དེ་ཚོ་རིམ་གྱིས་ལྟ་ཀློག་དང་སློབ་སྦྱོང་བྱེད་མཁན། དེ་ལ་ཞིབ་འཇུག་བྱེད་མཁན་ཉུང་དུ་ཉུང་དུ་འགྲོ་བའི་ཉེན་ཁ་ཡོད་སྟབས། ང་ཚོས་༼དམ་ཆོས་བང་མཛོད༽ཅེས་པའི་ལས་འཆར་དེའི་ཐོག་ནས་རྒྱལ་བའི་བཀའ་འགྱུར་དང་བསྟན་འགྱུར་གཙོ་བོར་གྱུར་བའི་བོད་བརྒྱུད་ནང་པ་སངས་རྒྱས་པའི་གསུང་རབ་ཆ་ཚང་བ་ཞིག་དང་། དེ་ཙམ་མ་ཟད་ཆོས་དང་མ་འབྲེལ་བའི་བོད་ཀྱི་རིག་གཞུང་སྐད་ཡིག་དང་འབྲེལ་བའི་ཡིག་ཆ་དེ་ཚོའང་། དེང་དུས་ཀྱི་ཐབས་ལམ་གསར་པའི་ཐོག་ནས་འཛམ་གླིང་སྤྱི་ཡོངས་ཀྱིས་ཞིབ་འཇུག་དང་སློབ་སྦྱོང་བྱེད་པར་སྟབས་བདེ་པོ་དང་ལས་སླ་པོ། བེད་སྤྱོད་ཆེན་པོ་ཡོང་སླད་དུ་ལས་འཆར་འདི་སྤེལ་བ་ཡིན་ལ། དེ་རིང་གི་ལས་འཆར་འདི་ཚོད་ལྟའི་དཔེ་མཚོན་ཙམ་དུ་དབུ་འབྱེད་བྱེད་ཀྱི་ཡོད་པ་རེད། ཅེས་གསུངས་འདུག

ཡང་ཁོང་གིས། དེ་རིང་དབུ་འབྱེད་བྱས་པའི་ལྡེ་མིག་འདྲ་བོ་(མཐེབ་སྡེར)འདིའི་ནང་དུ་ག་རེ་ཡོད་པ་རེད་ཟེར་ན། འཇང་བཀའ་འགྱུར་གྱི་འདུལ་བ་ནས་མདོ་སྡེ་བར་གྱི་པོ་ཏི་ ༧༡ ལ་ལྟ་ཀློག་དང་འཚོལ་ཞིབ་བྱེད་རྒྱུ་ཡོད་པ་རེད། མཉེན་ཆས་འདི་ཀུ་ཤུ་རྟགས་ཅན་དང་སྐར་ཁུང་རྟགས་ཅན་གྱི་གློག་ཀླད་ནང་དུ་ལྟ་ཀློག་བྱེད་ཐུབ་ལ། མཉེན་ཆས་འདིའི་མིང་ཨ་ཏར་ཤ་ཟེར་དུས་བོད་སྐད་ཐོག་༼མེ་ལོང༽ཟེར་གྱི་ཡོད་པ་རེད། མེ་ལོང་ཞེས་བཏགས་དགོས་པའི་རྒྱུ་མཚན་ཅི་ཡིན་ཟེར་ན། རྒྱལ་བའི་བཀའ་འགྱུར་རིན་པོ་ཆེ་དང་མ་འོངས་པར་བསྟན་འགྱུར་སོགས་མཁས་པ་རྣམ་པའི་གསུང་རབ་ག་ཚོད་ཐུབ་ཐུབ་ཅིག་འདིའི་ནང་དུ་བཅུག་རྒྱུ་ཡིན་པས། གསུང་རབ་ཐམས་ཅད་མེ་ལོང་ནང་གཟུགས་བརྙན་ཤར་བ་ནང་བཞིན་འདིའི་ནང་ནས་འཆར་ཐུབ་ཀྱི་ཡོད་པས་ཀུན་གསལ་མེ་ལོང་ཞེས་བཏགས་པ་རེད་ཅེས་དང་། ལས་འཆར་འདི་ལས་སླ་བོ་དང་སྟབས་པོ་ཞིག་གཏན་ནས་མིན་པར་དཀའ་ལས་ཞེ་དྲག་རྒྱག་དགོས་པ་དང་། ཞུ་དག་གཏོང་རྒྱུ་གཅིག་པུར་དམིགས་བསལ་གྱི་མཉེན་ཆས་བཟོས་ཏེ། ན་ནིང་ནས་མགོ་འཛུགས་ཀྱིས་ལོ་ངོ་ ༢ རིང་བྱས་པ་དང་། ད་ལྟའི་ཆར་མི་ ༢༡ གིས་ཉིན་གང་བོར་གློག་ཀླད་དུ་བལྟས་ནས་ཞུ་དག་བྱེད་ཀྱི་ཡོད་པ་དང་། དེ་བཞིན་མ་དཔེ་འཚོལ་སྡུད་དང་དཔེ་བསྡུར་སོགས་ལས་འཆར་འདིར་དཀའ་ལས་ཚད་མེད་པ་ཞིག་ཡོད་སྐོར་དང་། མ་འོངས་པར་བོད་ནང་ནས་ལྟ་ཀློག་བྱེད་པར་སྟབས་བདེ་ཡོང་སླད། ལས་འཆར་ཚོགས་པ་གཙོ་བོ་དེ་ཐའེ་ཝན་དུ་བཙུགས་ཡོད་པ་དང་། ཕྱི་ལོ་ ༢༠༡༦ ལོར་ཀུན་གསལ་མེ་ལོང་མཉེན་ཆས་དྲ་རྒྱའི་ནང་བཅུག་སྟེ་དངོས་སུ་འཛམ་གླིང་ཤར་ནུབ་ཀྱི་སྐྱེས་བོ་ཚང་མས་ལྟ་ཀློག་ཐུབ་པ་གནང་རྒྱུ་དང་། དེ་བཞིན་མ་འོངས་པར་འཇང་བཀའ་འགྱུར་ལ་མ་དཔེ་ཆེ་ཆུང་ག་ཚོད་ཡོད་པ་དེ་བསྐྱར་དུ་པར་སྐྲུན་བྱས་ཏེ། ཆོས་སྡེ་ཁག་དང་བླ་ཆེན་རྣམ་པར་རིན་མེད་ཀྱིས་ཕུལ་ཐུབ་པའི་རེ་བ་གནང་བཞིན་ཡོད་སྐོར་སོགས་གསུངས་འདུག

གསར་འགོད་པ། པདྨ་མཚོ།

དུས་བབ་དྲ་བ་ནས།།