ཀྲུའུ་ཡོང་ཁང་གི་ཉེས་ཆད་རིམ་པ་དང་པོ།

ཁ་སང་ཀྲུའུ་ཡོང་ཁང་རྒྱ་ནག་དམར་ཤོག་ཚོགས་པ་ནས་ཕྱིར་འཕུད་བཏང་ཡོད་པ་མ་ཟད་སྲིད་ཁྲིམས་ལྷན་ཁང་ལ་ཁྲིམས་ཐག་གཅོད་རྒྱུའི་དབང་ཆ་སྤྲད་ཡོད་འདུག

ཁ་སང་རྒྱ་ནག་ཤིན་ཧྭ་གསར་ཁང་དང་རྒྱལ་སྤྱིའི་གསར་འགྱུར་བརྒྱུད་ལམ་ཆེ་ཁག་གིས་གནས་ཚུལ་སྤེལ་བ་ལྟར་ན། འདས་པའི་ཟླ་ཤས་རིང་རྒྱ་ནག་དབུས་སྒྲིག་ཁྲིམས་

ཞིབ་བཤེར་ལྷན་ཁང་གིས་རྒྱ་ནག་དབུས་ཆབ་སྲིད་རྒྱུན་ལས་དང་རྒྱལ་ཁབ་བདེ་འཇགས་ལྷན་ཁང་གི་མགོ་ཁྲིད་ཟུར་པ་ཀྲུའུ་ཡོང་ཁང་ལ་རྟོག་ཞིབ་བྱས་པ་བརྒྱུད། ཁོས་དབང་ཆ་སྒེར་དཔྱོད་བྱས་ཏེ་ལྐོག་རྔན་ལྐོག་ཟ་བླངས་ཡོད་པ་མ་ཟད། བུད་མེད་མང་པོ་དང་གབ་མཐུན་གྱིས་འདོད་སྲེད་ཀྱི་ཉོ་ཚོང་བྱས་པ་དང་། ནང་མི་སྤུན་མཆེད་དང་གྲོགས་པོར་གཞུང་གི་ལས་ཀ་དང་ཚོང་གི་འགན་རྒྱ་སྤྲད་པ་དང་རྒྱལ་ཁབ་ཀྱི་ཁྲིམས་སྒྲིག་བརྩི་མེད་བཏང་བ་སོགས་ར་སྤྲོད་བྱུང་སྟེ། ཁོ་རྒྱ་ནག་དམར་ཤོག་ཚོགས་པའི་ཁོངས་ནས་ཕྱིར་འཕུད་བྱས་ཡོད་པ་མ་ཟད། རྒྱ་ནག་དབུས་སྒྲིག་ཁྲིམས་ཞིབ་བཤེར་ལྷན་ཁང་གིས་ཁྲིམས་ཐག་གཅོད་རྒྱུའི་ཐག་གཅོད་བྱས་ཡོད་སྐོར་བསྒྲགས་འདུག

རྒྱ་ནག་ཤིན་ཧྭ་གསར་འགྱུར་བརྒྱུད་ལམ་ཐོག་བཀོད་དོན། ཀྲུའུ་ཡོང་ཁང་གིས་དབང་ཆ་བེད་སྤྱོད་ལོགས་པ་བཏང་ནས་ཁྲིམས་འགལ་གྱི་ཁེ་ཕན་བསྒྲུབས་པ་མ་ཟད། ནང་མི་སྤུན་མཆེད་བརྒྱུད་མི་གཞན་གྱི་ས་ནས་ལྐོག་རྔན་བླངས་པ་དང་། ལུས་འབྲེལ་བྱེད་ཡུལ་གྱི་བུད་མེད་དང་གྲོགས་པོ་ཉེ་འདུ་བཅས་ལ་ཚོང་གཉེར་རོགས་སྐྱོར་བྱས་ཏེ་རྒྱུ་ནོར་ཕོན་ཆེན་བླངས་པ་དང་། དེ་བཞིན་འདོད་སྲེད་ཀྱི་ཉོ་ཚོང་བྱས་པ་སོགས་ཀྱི་ནག་ཉེས་བསགས་ཡོད་པ་ཤེས་རྟོགས་བྱུང་སྟེ། དམར་ཤོག་ཚོགས་པ་ནས་ཕྱིར་འཕུད་བཏང་ཡོད། ཅེས་སོགས་བཀོད་འདུག

༢༠༡༤ ལོའི་ཟླ་ ༧ ཚེས་ ༢༩ ཉིན་རྒྱ་ནག་དམར་ཤོག་ཚོགས་པའི་ཆབ་སྲིད་ལྷན་ཁང་གི་ཚོགས་འདུ་ཞིག་ཐོག་རྒྱ་ནག་དབུས་སྒྲིག་ཁྲིམས་ཞིབ་བཤེར་ལྷན་ཁང་གིས་ཀྲུའུ་ཡོང་ཁང་གིས་དབང་ཆ་སྒེར་གཅོད་བྱས་ཏེ་ལྐོག་རྔན་ལྐོག་ཟ་བྱས་ཡོད་པའི་ནག་ཉེས་ཕྱིར་བསྒྲགས་དང་འབྲེལ། ཁོ་ལ་ཞིབ་བཤེར་བྱ་རྒྱུའི་ཐག་གཅོད་བྱས་པ་ལྟར། འདས་པའི་ཟླ་ཤས་རིང་ཞིབ་བཤེར་བྱས་ཏེ་ཟླ་ ༡༠ ནང་ཚོགས་པའི་སྐབས་བཅོ་བརྒྱད་པའི་རྒྱ་ནག་དབུས་དམར་ཤོག་ཀྲུང་ཨུ་ཚང་འཛོམས་ཚོགས་ཆེན་ཐེངས་བཞི་པའི་སྟེང་། རྒྱ་ནག་གི་མཐོ་རིམ་མགོ་ཁྲིད་ཚོས་ཀྲུའུ་ཡོང་ཁང་གཙོས་ཁོའི་ངན་རོགས་མཐོ་རིམ་དཔོན་རིགས་དྲུག་དམར་ཤོག་ཚོགས་པའི་ཚོགས་ཁོངས་ནས་ཕྱིར་འཕུད་བཏང་ཡོད་ཀྱང་། སྐབས་དེར་རྒྱ་ནག་གཞུང་གིས་གནས་ཚུལ་དེ་ཕྱིར་བསྒྲགས་བྱས་མེད་ཀྱང་། དེའི་རྗེས་རྒྱ་ནག་དབུས་སྒྲིག་ཁྲིམས་ཞིབ་བཤེར་ལྷན་ཁང་གིས་ཀྲུའུ་ཡོང་ཁང་གིས་ངན་རོགས་དག་རེ་རེ་བཞིན་འཇུ་བཟུང་བྱས་ནས་ཁྲིམས་ཐག་བཅད་ཡོད་སྟབས། ཁ་སང་རྒྱ་ནག་གཞུང་གིས་ཀྲུའུ་ཡོང་ཁང་གིས་ནག་ཉེས་གང་ཡིན་གཞུང་འབྲེལ་གསལ་ བསྒྲགས་བྱས་ཡོད་འདུག

གནད་དོན་དབྱེ་ཞིབ་པ་ཚོས། ཞི་ཅིན་ཕིན་གྱིས་ལྐོག་ཟ་རུལ་སུངས་ལ་རྡུང་རྡེག་གཏོང་རྒྱུའི་སྲིད་ཇུས་བཟུང་སྟེ། རྒྱ་ནག་དབུས་ཆབ་སྲིད་རྒྱུན་ལས་ཀྱི་མགོ་ཁྲིད་ཟུར་པ་ཀྲུའུ་ཡོང་ཁང་ལ་འཇུ་བཟུང་བྱས་ཡོད་ཀྱང་། དུས་རྒྱུན་གང་ཙམ་རིང་ཁོར་ཁྲིམས་ཐོག་ནས་ཐག་གཅོད་གང་ཡང་བྱེད་ཐུབ་ཀྱང་། ད་རེབ་ཞི་ཅིན་ཕིན་གྱིས་དཔོན་རིགས་གཞན་གྱིས་སྐྱོན་བརྗོད་བྱེད་མིན་ལ་མ་ལྟོས་པར་ཁོའི་ནག་ཉེས་གསལ་སྟོན་བྱས་པ་དེས། ཞི་ཅིན་ཕིན་ལ་རྒྱ་ནག་གི་སྔར་གྱི་མགོ་ཁྲིད་ཚོ་ལས་དབང་ཆ་ཆེ་བ་ཡོད་པ་གསལ་བཤད་བྱས་པ་རེད་སྐོར་བརྗོད་འདུག

༢༠༡༤ ལོར་རྒྱ་ནག་དབུས་སྒྲིག་ཁྲིམས་ཞིབ་བཤེར་ལྷན་ཁང་གིས་ཀྲུའུ་ཡོང་ཁང་ལ་འབྲེལ་བ་ཡོད་པའི་པའོ་ཞི་ལེ་ལ་ཚེ་བཙོན་དང་ལའོ་ཧན་ལ་སྲོག་ཁྲིམས་བཅད་རྗེས། ཟླ་ ༧ པའི་ནང་ཀྲུའུ་ཡོང་ཁང་འཛིན་བཟུང་འོག་རྟོག་ཞིབ་བྱེད་མགོ་བརྩམས་པ་མ་ཟད། ཀྲུའུ་ཡོང་ཁང་གི་བུ་ཀྲུའུ་བེན་ (Zhou Bin) དང་རྒྱ་ནག་བདེ་འཇགས་ལྷན་ཁང་གི་བློན་ཆེན་གཞོན་པ་ལེ་ཏུང་ཧྲིན་ (Li Donsheng)། རྒྱ་ནག་རྡོ་སྣུམ་ལས་ཁུངས་ཀྱི་མགོ་ཁྲིད་ཟུར་པ་ལེ་ཧྭ་ལིན་ (Li Hualin)དང་། ཅང་ཙེ་མིན་ (Jiang Jiemin)། རྒྱ་ནག་ཧེད་ནན་གྲོང་ཁྱེར་གྱི་སྤྱི་ཁྱབ་གཞོན་པ་ཅེ་ཝེན་ལིན་ (Ji Wenlin) དང་སི་ཁྲོན་ཞིང་ཆེན་གྱི་མཐོ་རིམ་མགོ་ཁྲིད་ཀོའོ་ཡོང་ཞང་ (Gou Yongxiang) དང་ལེ་ཁྲུང་ཁྲིན་ (  Li Chuncheng)བཅས་ལའང་དབང་ཆ་སྒེར་གཅོད་དང་ལྐོག་ཟ་རུལ་སུངས་ལ་སོགས་ཀྱི་ཉེས་མིང་འོག་འཛིན་བཟུང་བྱས་ཡོད་འདུག

གསར་འགོད་པ། དོན་གྲུབ།

དུས་བབ་དྲ་བ་ནས།།