ལི་ཁེ་ཆིང་གི་གོ་གནས་ཕབ་ཉེན་འདུག

ཉེ་སྔོན་འཇར་མན་མེན་ཅིན་གསར་ཁང་གིས་རྒྱ་ནག་གི་སྲིད་བློན་ལི་ཁེ་ཆིང་གི་ལུས་ཁམས་བདེ་ཐང་མིན་པ་དང་ཤེས་འཇོན་གཉིས་ཀྱིས་འདང་གི་མེད་སྟབས་གོ་གནས་ཕབ་ཉེན་ཡོད་སྐོར་བསྒྲགས་འདུག

ཟླ་འདིའི་ཕྱི་ཚེས་ ༧ ཉིན་འཇར་མན་མེན་ཅིན་གསར་ཁང་གི་དཔལ་འབྱོར་དུས་དེབ་སྟེང་། རྒྱ་ནག་གི་སྲིད་འཛིན་ཞི་ཅིན་ཕིན་གྱི་དབང་ཤུགས་གཅིག་སྡུད་

ཀྱི་ཐབས་ཇུས་ལག་བསྟར་བྱས་ཏེ་སྲིད་བློན་ལི་ཁེ་ཆིང་ཟུར་ཕུད་བཏང་ཡོད་པ་མ་ཟད། ཁོ་བོའི་ལུས་ཁམས་བདེ་ཐང་མིན་པ་དང་རྒྱལ་ཁབ་ཀྱི་དཔལ་འབྱོར་འཕེལ་སྒྲུབ་ནུས་པ་ཞན་པོ་ཡིན་པ་སོགས་ཀྱིས། ལི་ཁེ་ཆིང་སྲིད་བློན་ནས་ཕབ་སྟེ། རྒྱལ་ཡོངས་དམངས་ཆེན་རྒྱུན་ལས་ལྷན་ཁང་གི་མགོ་ཁྲིད་ཅིག་ཏུ་བསྐོ་བཞག་བྱེད་པའི་ཉེན་ཁ་ཡོད་སྐོར་གྱི་གནས་ཚུལ་སྤེལ་ཡོད་པ་མ་ཟད། ཁོང་གི་ཚབ་ཏུ་ཁྲུང་ཆིན་གྲོང་ཁྱེར་གྱི་དམར་ཤོག་དྲུང་ཆེ་སུན་ཀྲིན་ཚེ་དང་། རྒྱལ་སྲིད་སྤྱི་ཁྱབ་ཁང་གི་སྲིད་བློན་གཞོན་པ་ཝང་ཡཱང་། ཧྲང་ཧེ་གྲོང་ཁྱེར་གྱི་དམར་ཤོག་དྲུང་ཆེ་ཧན་ཀྲིན་བཅས་ཀྱི་ནང་ནས་གཅིག་བསྐོ་བཞག་བྱེད་སྲིད་སྐོར་བརྗོད་ཡོད་སྟབས། སྤྱི་ཚོགས་ཐོག་ནས་གནས་ཚུལ་དེར་དོགས་སློང་སྣ་ཚོགས་དང་གླེང་གཞི་ཆེན་པོར་གྱུར་འདུག

གནས་ཚུལ་དེ་ཕྱི་ཕྱོགས་ཀྱི་བརྒྱུད་ལམ་ཁག་ཏུ་ཁྱབ་རྗེས། རྒྱ་ནག་ཤིན་ཧྭ་གསར་ཁང་གིས་ཟླ་འདིའི་ཕྱི་ཚེས་ ༡༤ ཉིན་ནས་བཟུང་ཉིན་གྲངས་ ༧ རིང་སྲིད་བློན་ལི་ཁེ་ཆིང་གིས་ཡ་གླིང་གི་རྒྱལ་ཁབ་གསུམ་དུ་རྒྱལ་དོན་སྐོར་སྐྱོད་མགོ་བཙུགས་བྱས་ཡོད་པ་དང་། ཐེངས་འདིའི་སྐོར་སྐྱོད་སྐབས་རྒྱལ་སྤྱིའི་ཚོགས་ཆེན་ཐོག་མཉམ་ཞུགས་ཀྱིས་རྒྱལ་ཁབ་ ༢༢ ཀྱི་མགོ་ཁྲིད་དང་མཇལ་འཕྲད་གནང་རྒྱུ་དང་། ཕྱི་འབྲེལ་གྱི་བྱེད་སྒོ་ཁག་ ༧༠ ཉེ་བ་ཡོད་སྐོར་དང་། ལི་ཡི་མངོན་གསལ་གྱི་སྤྱོད་ཚུལ་དང་དབང་ཤུགས་ཀྱིས་སྔར་ལས་འཛམ་གླིང་གི་སྐྱེས་བུ་མང་པོའི་ཡིད་དབང་འགུག་རྒྱུ་ཡིན་ལུགས་བསྒྲགས་འདུག

ཨ་རིའི་རླུང་འཕྲིན་ཁང་གི་རྒྱ་སྐད་སྡེ་ཚན་གྱིས་མེན་ཅིན་གསར་ཁང་གི་སྤྱི་གཉེར་བ་ཧེ་ཕིན་ལགས་སུ་གནས་ཚུལ་དེའི་སྐོར་བཅར་འདྲི་བྱེད་སྐབས་ཁོང་གིས། གནས་ཚུལ་དེས་ལི་ཁེ་ཆིང་ད་ལྟ་སྲིད་སྟེགས་ནས་ཕབ་རྒྱུ་རེད་ཟེར་གྱི་ཡོད་པ་མ་རེད། ཐེངས་རྗེས་མའི་རྒྱ་ནག་དམར་ཤོག་ཚོགས་པའི་རྒྱུན་ལས་འཕོ་འགྱུར་སྐབས་ལི་ཁེ་ཆིང་སྔར་བཞིན་སྲིད་བློན་དུ་འདུག་མི་ཐུབ་པ་མ་ཟད། ཁོ་བོའི་གོ་གནས་མངོན་གསལ་གྱིས་མར་ཆག་སྟེ། རྒྱལ་ཡོངས་དམངས་ཆེན་རྒྱུན་ལས་ལྷན་ཁང་གི་དབང་ཆ་ཅི་ཡང་མེད་པའི་མགོ་ཁྲིད་རིམ་པ་གཉིས་པ་ཞིག་ཏུ་བསྐོ་བཞག་བྱེད་སྲིད་པ་དང་། དེ་ལ་རྒྱུ་མཚན་གཉིས་ཡོད། གཅིག་ནས་ཁོ་བོའི་དཔལ་འབྱོར་རིག་པའི་ཤེས་ཚད་ཀྱིས་འདང་གི་མེད་པ་དང་། དཔལ་འབྱོར་དོ་དམ་ནུས་པ་ཧ་ཅང་ཞན་པ། གཉིས་ནས་ཁོ་བོའི་གཟུགས་པོའི་གནས་སྟངས་ཀྱིས་ཡོང་གི་མེད་པ་རེད། གནས་ཚུལ་དེ་སྔ་ས་ནས་རྒྱ་ནག་གི་མཐོ་རིམ་སྤྱི་ཚོགས་དང་དཔོན་རིགས་ནང་ཁུལ་དུ་ཁྱབ་ཟིན་པ་རེད། ཅེས་བརྗོད་འདུག

པེ་ཅིན་གྲོང་ཁྱེར་གྱི་སྲིད་གཞུང་ལྟེ་གནས་ཀྲུང་ནན་ཧེ་རུ་གནས་སྡོད་བྱེད་མཁན་ཞིག་གིས་གསར་འགོད་པར། སྲིད་བློན་ལི་ཁེ་ཆིང་ལ་དེ་སྔོན་ནས་གཅིན་པ་མངར་འགྱུར་གྱི་ན་ཚ་ཡོད་པ་དང་། སྲིད་བློན་དུ་བསྐོ་བཞག་བྱས་རྗེས་ཕྱི་ནང་གི་ལས་ཀའི་གནོན་ཤུགས་ཀྱིས་ཁོ་བོའི་ན་ཚ་ཇེ་སྡུག་ཇེ་སྡུག་ཏུ་འགྲོ་བཞིན་ཡོད་ལ། འདས་པའི་ལོ་ ༢ ནང་ལི་ཡི་ལུས་ཁམས་གནད་དོན་ཐད་ཀྲུང་ནན་ཧེ་རུ་ལབ་གླེང་མང་པོ་བྱུང་བཞིན་ཡོད་པ་དང་། ཡོངས་ཁྱབ་ཀྱི་བྱེད་སྒོ་མ་གཏོགས་རྒྱུན་དུ་སྒོ་ཕྱི་རུ་འགྲོ་བའང་ཧ་ཅང་ཉུང་ཉུང་ཡིན་སྐོར་བརྗོད་འདུག

རྒྱ་ནག་དམར་ཤོག་ཚོགས་པའི་ལོ་རྒྱུས་ཆེད་མཁས་པ་ཀོ་ཝིན་ཆན་གྱིས། ལི་ཁེ་ཆིང་གི་སྲིད་བློན་གྱི་གོ་གནས་དེ། ཏང་གི་ཚོགས་ཆེན་ ༡༨ པར་ཧུའུ་ཅིན་ཐའོ་དང་ཅང་ཙེ་མེན་ཚོགས་པས་བསྟུན་ཐབས་ལ་བརྟེན་ནས་བྱུང་ཞིང་། དེ་ལ་བརྟེན་ནས་ཞི་དང་ལི་སྒྲིག་གཞི་ཟེར་བའང་ཆགས་པ་རེད། ཡིན་ནའང་། ལོ་ ༢ ཡང་མ་འགོར་བར་ཞི་ཅིན་ཕིན་གྱིས་འཆར་བཀོད་དེ་མགོ་གཏིང་བསློགས་པ་མ་ཟད། ཁོ་རང་གཅིག་པུས་དབུས་གཞུང་གི་ལས་དོན་ཚོགས་ཆུང་༩ ཡི་འགན་དབང་བདག་ཏུ་བཟུང་སྟེ། ཐ་ན་ནོར་དོན་སྣེ་ཁྲིད་ཚོགས་ཆུང་གི་ཚོགས་གཙོ་ཡང་ཁོ་རང་བྱས་ནས་ནོར་དོན་འགན་འཁུར་བ་སྲིད་བློན་ལི་ཁེ་ཆིང་ཟུར་མཐར་དེད་དེ། ཚོགས་ཆུང་དེའི་རྒྱུན་ལས་དཀྱུས་མ་ཙམ་ལས་དཔལ་འབྱོར་སྲིད་བྱུས་ལག་བསྟར་ཐད་ཐག་གཅོད་བྱེད་པའི་དབང་ཆ་ཅི་ཡང་མེད་པར་གྱུར་བ་རེད། ཅེས་བརྗོད་འདུག

གནད་དོན་དཔྱད་ཞིབ་པ་ཚོས། ད་ལྟ་རྒྱ་ནག་དམར་ཤོག་ཚོགས་པའི་དབང་ཆ་ཡོད་ཚད་ཞི་ཅིན་ཕིན་གྱིས་བདག་བཟུང་བྱས་ཏེ། ལི་ཁེ་ཆིང་ལ་དམག་དོན་དང་དཔལ་འབྱོར་སོགས་ལ་དོ་དམ་གྱི་དབང་ཆ་ཅི་ཡང་མེད་སྟབས། རྒྱལ་སྲིད་སྤྱི་ཁྱབ་ཁང་གི་སྲིད་བློན་གྱི་མིང་དེ་དགོས་མཁོ་མེད་པ་ཞིག་ཏུ་གྱུར་ཡོད་ཀྱང་། ཞི་ཅིན་ཕིན་གྱིས་ཁོ་རང་གི་སྒྲིག་འཛུགས་དེ་སྲ་བརྟན་དུ་གཏོང་བར་ཐབས་ཇུས་ཡོད་རྒུ་འདོན་བཞིན་ཡོད་སྟབས། ལི་ཁེ་ཆིང་སྲིད་བློན་ནས་འཕོ་འགྱུར་བཏང་བ་ཡིན་ན། སྒྲིག་འཛུགས་ནང་ཁུལ་དུ་གཡོ་སྐྱོམ་ཆེན་པོ་བྱུང་རྒྱུ་ཡིན་པས། ད་ལྟ་ཁོ་བོ་སྲིད་བློན་ནས་འཕོ་འགྱུར་གཏོང་མི་སྲིད་ཀྱང་། སྲིད་བློན་ལས་འཁུར་གྱི་དུས་ཡུན་རྫོགས་རྒྱུར་ད་དུང་ལོ་ ༣ ཙམ་ཡོད་པས་ཉེན་ཁ་ཆེན་པོ་ཡོད་སྐོར་དང་། མ་འོངས་རྒྱུན་ལས་འཕོ་འགྱུར་སྐབས་སྲིད་བློན་འོས་མིར་ཁྲུང་ཆིན་གྲོང་ཁྱེར་གྱི་དམར་ཤོག་དྲུང་ཆེ་སུན་ཀྲིན་ཚེ་དང་། རྒྱལ་སྲིད་སྤྱི་ཁྱབ་ཁང་གི་སྲིད་བློན་གཞོན་པ་ཝང་ཡཱང་། ཧྲང་ཧེ་གྲོང་ཁྱེར་གྱི་དམར་ཤོག་དྲུང་ཆེ་ཧན་ཀྲིན་བཅས་བསླེབ་སྲིད་པ་དང་། གལ་སྲིད་ཞི་ཅིན་ཕིན་གྱིས་རང་ཕྱོགས་ཀྱི་མི་ཞིག་དམིགས་འབེན་དུ་བཟུང་ཡོད་ན། ཧན་ཀྲིན་ཟེར་བ་སྔོན་ཆད་ཁོ་རང་གི་ལག་རོགས་ཤིག་ཡིན་པས་སྲིད་བློན་གྱི་རྐུབ་སྟེགས་ཁོ་བོར་སྤྲོད་སྲིད་སྐོར་བརྗོད་ཀྱི་འདུག

གསར་འགོད་པ། པདྨ་མཚོ།

དུས་བབ་དྲ་བ་ནས།།