ཡུ་གུར་བ་འཇིགས་སྐུལ་ཚོགས་པའི་ནང་ཞུགས་འདུག་ཟེར།

རྒྱ་ནག་གི་མི་སེར་ཡིན་པའི་ཏུར་ཀི་སི་ཐན་ཁ་ཆེ་ལས་འགུལ་ཚོགས་པའི་ཚོགས་མི་ ༣༠༠ ལྷག་དཀྱུལ་ཤར་ཁ་ཆེ་འཇིགས་སྐུལ་ཚོགས་པ་(ISIS)ཞེས་པའི་ནང་ཞུགས་ཏེ་ཨི་རག་དང་སི་རེ་ཡའི་གཞུང་དམག་ལ་འཐབ་འཁྲུག་རྒྱག་གི་ཡོད་འདུག

ཕྱི་ཚེས་ ༡༦ ཉིན་རྒྱལ་སྤྱིའི་གསར་ལམ་ཁག་ཅིག་ནང་གནས་ཚུལ་སྤེལ་བར། ད་ལྟའི་རྒྱ་ནག་འོག་ཡོད་པའི་ཡུ་གུར་ཁ་ཆེ་ལས་འགུལ་ཚོགས་པ་ (ETIM) ཡི་

ཚོགས་མི་ ༣༠༠ ལྷག་ཀྲར་ཀེ་ (Turkey) བརྒྱུད་ཨི་རག་དང་སེ་རི་ཡའི་ནང་གི་ཁ་ཆེ་འཇིགས་སྐུལ་དྲག་སྤྱོད་ཚོགས་པ་ (ISIS) ཞེས་པའི་ནང་འཛུལ་ཞུགས་བྱས་ཡོད་སྟབས། རྒྱ་ནག་གཞུང་གིས་ཁོ་ཚོས་དངོས་ཤུགས་བརྒྱུད་གསུམ་ནས་ཤིན་ཅང་མི་རིགས་ལ་ངན་སྐུལ་བྱས་ཏེ་ཤིན་ཅང་གི་བརྟན་བརླིང་དང་བདེ་འཇགས་ལ་ཉེན་ཁ་བཟོ་བཞིན་ཡོད་སྐོར་སྐྱོན་བརྗོད་བྱེད་ཀྱིན་ཡོད་ཚུལ་འཁོད་འདུག

རྒྱ་ནག་གཞུང་འབྲེལ་གོ་ལའི་དུས་བབ་ (Global Times)ཞེས་པའི་ཐོག ཨི་རག་གི་སི་རེ་ཡ། ལེ་བྷན་ནོན་བཅས་ཀྱི་འབྲེལ་ཡོད་བདེ་སྲུང་ལས་ཁུངས་ཀྱིས།ཡུ་གུར་ཁ་ཆེ་འཇིགས་སྐུལ་པ་ ༣༠༠ ལྷག་གིས་ཁ་ཆེ་འཇིགས་སྐུལ་དྲག་སྤྱོད་ཚོགས་པའི་ཁོངས་སུ་ཞུགས་ཏེ། ཨི་རག་དང་སི་རེ་ཡར་དམག་འཁྲུག་རྒྱག་གི་ཡོད་པའི་གནས་ཚུལ་རྒྱ་གཞུང་ལ་མཁོ་སྤྲོད་བྱས་ཡོད། ཅེས་འཁོད་ཡོད།

རྒྱ་ནག་ཕྱི་སྲིད་ལྷན་ཁང་གི་མགྲིན་ཚབ་པ་ཆིན་ཀང་གིས་གསར་འགོད་པར། ཨི་རག་དང་སི་རེ་ཡའི་ནང་རྒྱ་ནག་གི་མི་སེར་ཡིན་པའི་འཇིགས་སྐུལ་པ་ག་ཚོད་ཡོད་མེད་ཏག་ཏག་བརྗོད་དཀའ་ཡང་། ད་ལྟའི་གནས་སྟངས་འོག་འཇིགས་སྐུལ་པ་མང་པོ་ཞིག་རྒྱལ་མཚམས་གང་རུང་བརྒྱུད་དཀྱིལ་ཤར་ཨེ་ཡ་ཤའི་ནང་འགྲོ་བའི་ལམ་ཁ་མང་པོ་ཡོད་སྟབས། རྒྱལ་ཁབ་ཚང་མས་འཛམ་གླིང་གི་ཞི་བདེ་དང་བརྟན་བརླིང་སྲུང་སྐྱོབ་བྱེད་ཆེད་མཉམ་འབྲེལ་བྱས་ཏེ་འཇིགས་སྐུལ་པ་ཚར་གཅོད་བྱེད་པར་རོགས་འདེགས་བྱ་རྒྱུ་ཧ་ཅང་གལ་ཆེ། ཞེས་བརྗོད་འདུག

ད་ལོའི་ཕྱི་ཟླ་ ༧ ཚེས་ ༡༩ ཉིན། རྒྱ་ནག་གི་དཀྱིལ་ཤར་ཨེ་ཤ་ཡའི་སྐུ་ཚབ་ཝའོ་སེ་ཁུ་ཡིས་གསར་ལམ་ཐོག རྒྱ་ནག་གི་མི་སེར་ཡིན་པའི་ཤར་ཏུའུ་ཀི་སི་ཐན་གྱི་ཁ་ཆེ་ལས་འགུལ་ཚོགས་པའི་ཚོགས་མི་ ༡༠༠ ལྷག་དཀྱིལ་ཤར་ཨེ་ཤ་ཡའི་ནང་སོང་སྟེ་ཁ་ཆེ་འཇིགས་སྐུལ་དྲག་སྤྱོད་པར་དམག་རོགས་བྱེད་ཀྱིན་ཡོད། ཅེས་ངོས་ལེན་བྱས་ཡོད་འདུག

ལོ་གཉིས་གོང་ནས་བཟུང་རྒྱ་གཞུང་གིས། པེ་ཅིན་དུ་རྟེན་གཞི་བྱས་པའི་ཀྲར་ཀེ་གཞུང་ཚབ་ཁང་གིས་ཡུ་གུར་པ་ཚོར་ཐོངས་མཆན་གང་འདོད་སྤྲད་པ་དང་། ཁག་ཅིག་གིས་ཁྲིམས་འགལ་ཐོག་ལྷོ་ཨེ་ཤ་ཡའི་རྒྱལ་ཁབ་ཁག་བརྒྱུད་ནས་ཀྲར་ཀེའི་ནང་བསླེབས་རྗེས། ཨི་རག་དང་སི་རེ་ཡའི་ནང་སོང་སྟེ་ཁ་ཆེ་འཇིགས་སྐུལ་ཚོགས་ཁངས་སུ་ཞུགས་ཡོད་པའི་སྐྱོན་བརྗོད་བྱེད་ཀྱི་ཡོད་འདུག

པེ་ཅིན་ཀྲར་ཀེ་གཞུང་ཚབ་ཀྱིས། རྒྱ་ནག་གཞུང་གི་སྐྱོན་བརྗོད་ནི་གཞི་རྩ་མེད་པ་ཞིག་ཡིན་པ་མ་ཟད། རྒྱ་ནག་རང་གི་ནང་དུ་ཤར་ཏུར་ཀི་སི་ཐན་གྱི་ཁ་ཆེ་ལས་འགུལ་ཚོགས་པའི་ཚོགས་མི་ཚོར་ཕྱི་སྐྱོད་ལག་འཁྱེར་རྫུན་མ་སྤྲད་དེ་ཀྲར་ཀེའི་ནང་ཡོང་རྗེས་ཨི་རག་དང་སི་རེ་ཡའི་ནང་འགྲོ་བཞིན་ཡོད་ཅིང་། གལ་སྲིད་ས་གནས་དེ་དག་ནང་གི་ཕྱི་སྐྱོད་ལག་འཁྱེར་དང་ཐོངས་མཆན་རྫུན་མ་སྤྲོད་མཚམས་བཞག་ཚེ་དཀའ་ཉོག་དེལ་སེལ་ཐུབ། ཅེས་བརྗོད་འདུག

གནད་དོན་དབྱེ་ཞིབ་པ་ཚོས། རྒྱ་ནག་གཞུང་གིས་དུས་རྒྱུན་ཤིན་ཅང་ནང་མི་གསོད་དང་འབར་གས་དོན་རྐྱེན་གང་བྱུང་བ་དག་ཤར་ཏུར་ཀི་སི་ཐན་གྱི་ཁ་ཆེ་ལས་འགུལ་ཚོགས་པ་ (ETIM) ཡིས་བཟོས་པ་ཡིན་པའི་སྐྱོན་འཛུགས་བྱེད་ཀྱིན་ཡོད་ཀྱང་། དོན་དངོས་ཐོག་རྒྱ་ནག་གིས་ཡུ་གུར་ཁ་ཆེ་འཇིགས་སྐུལ་པ་ག་ཚོད་དཀྱིལ་ཤར་ཨེ་ཤ་ཡའི་ཁ་ཆེ་འཇིགས་སྐུལ་དྲག་སྤྱོད་ཚོགས་པའི་ནང་ཞུགས་ཡོད་མེད་ཤེས་མེད་ཚུལ་བརྗོད་ཡོད་འདུག

གསར་འགོད་པ། ལྷ་སྐྱབས་རྒྱལ།

དུས་བབ་དྲ་བ་ནས།།