རྒྱ་ནག་དང་ཉི་ཧོང་གིས་དམག་ཆེན་གསུམ་པར་རེ་འབོད་ཀྱི་མཆོད་འབུལ།

སྔ་ལོར་ཉི་ཧོང་གི་སྲིད་བློན་ཨ་བྷེ་ཡིས་འཛམ་གླིང་དམག་ཆེན་གཉིས་པའི་ནང་འདས་གྲོངས་སུ་ཕྱིན་པའི་ཉི་ཧོང་དམག་མིའི་དྲན་རྟེན་ལྷ་ཁང་དུ་མཆོད་འབུལ་བྱས་པར་རྒྱ་ནག་གིས་སྐྱོན་བརྗོད་ཤུགས་ཆེན་བྱས་ཡོད་ཅིང་། ཁ་སང་རྒྱ་ནག་གི་སྲིད་འཛིན་ཞི་ཅིན་ཕིན་གྱིས་ནན་ཅིན་དམར་གསོད་ཆེན་མོར་འདས་མཆོད་ཀྱི་

མཛད་སྒོ་ཞིག་བསྡུས་ཏེ་གཏམ་བཤད་སྤེལ་འདུག

ཁ་སང་ཕྱི་ཟླ་ ༡༢ ཚེས་ ༡༣ ཉིན། རྒྱ་ནག་ནན་ཅིན་གྲོང་ཁྱེར་དུ། 'ནན་ཅིན་དམར་གསོད་ཆེན་མོ' ་དྲན་གསོའི་འདས་མཆོད་སྒྲུབ་པའི་མཛད་སྒོ་ཞིག་ཚོགས་ཡོད་ཅིང་། དེ་ནི་འཛམ་གླིང་དམག་ཆེན་གཉིས་པའི་སྐབས་ཉི་ཧོང་གོང་དམག་གིས་ནན་ཅིན་སོགས་རྒྱ་ནག་བྱང་ཤར་ཁུལ་དུ་བཙན་འཛུལ་བྱས་སྐབས་རྐྱེན་ལམ་དུ་ཕྱིན་པའི་དམག་དམངས་ལ་རྒྱལ་ཡོངས་རང་བཞིན་གྱི་མྱ་ངན་འདས་མཆོད་བྱས་པ་ཞིག་ཡིན་ཞིང་། འདས་མཆོད་མཛད་སྒོའི་སྟེང་རྒྱ་ནག་གི་སྲིད་འཛིན་ཞི་ཅིན་ཕིན་མཉམ་ཞུགས་བྱས་ཏེ། ང་ཚོས་ནན་ཅིན་དམར་གསོད་ཆེན་མོའི་ཁྲོད་ཀྱི་འདས་པོ་ཚོར་རྒྱལ་ཡོངས་འདས་མཆོད་བྱས་པ་ནི། བྱམས་སེམས་ཅན་གྱི་མི་རྣམས་ཀྱིས་ཞི་བདེ་ལ་རེ་སྙེག་བྱེད་པར་འབོད་སྐུལ་གཏོང་ཆེད་ཡིན་པ་ལས་མུ་མཐུད་འཁོན་སེམས་འཆང་བའི་ཆེད་དུ་མིན། ཀྲུང་གོ་དང་ཉི་ཧོང་རྒྱལ་ཁབ་གཉིས་ཀྱི་མི་དམངས་མི་རབས་བར་ནས་མི་རབས་བར་མཛའ་མཐུན་དང་། ལོ་རྒྱུས་མིག་དཔེར་བལྟས་ཏེ་ཞི་བདེ་ལ་བྱས་རྗེས་འབུལ་འོས། ལོ་རྒྱུས་བརྗེད་ཚེ་ངོ་ལོག་པ་ཡིན་ལ། ནག་ཉེས་ཁས་མ་བླངས་ཚེ་ནག་ཉེས་བསགས་པ་ཡིན་ཏེ། བཙན་འཛུལ་དམག་འཁྲུག་གི་ལོ་རྒྱུས་སྣང་མེད་དུ་འཇོག་འདོད་པའི་རྣམ་འགྱུར་དང་། བཙན་འཛུལ་དམག་འཁྲུག་གི་ངོ་བོ་ཡག་པོར་སྒྱུར་འདོད་ཀྱི་གཏམ་སྤྱོད་ཅི་ཙམ་བྱས་ཀྱང་ཆོག བཤད་སྟངས་ཅི་འདྲ་ཡག་ཀྱང་རུང་། དེ་དག་ཡོངས་རྫོགས་ཀྱིས་མི་རིགས་ཀྱི་ཞི་བདེ་དང་དྲང་བདེན་ལ་སྔར་ལས་ལྷག་གི་གནོད་བསྐྱལ་བ་ཡིན། ནོར་འཁྲུལ་གྱི་གཏམ་སྤྱོད་དེ་དག་ལ་ཞི་བདེ་དང་དྲང་བདེན་ལ་དགའ་བའི་མི་རྣམས་ཀྱིས་ངེས་པར་དུ་དོགས་ཟོན་དང་མཐའ་གཅིག་ཏུ་ངོ་རྒོལ་བྱེད་དགོས། ཞེས་སོགས་ཀྱི་གཏམ་བཤད་སྤེལ་འདུག

ལོ་འགའི་གོང་ནས་ཞི་བདེ་རྒྱ་མཚོའི་མངའ་ཁུལ་གྱི་མཚོ་གླིང་ཁག་ཅིག་ཐོག་རྒྱ་ནག་དང་ཉི་ཧོང་བར་རྩོད་གླེང་བྱུང་བ་དང་བསྟུན་ཏེ། ༢༠༡༣ ལོའི་ཟླ་ ༡༢ ཚེས་ ༢༦ ཉིན། ཉི་ཧོང་གི་སྲིད་བློན་ཤིང་ཛོ་ཨ་བྷེ་ཉི་ཧོང་རྒྱལ་ས་ཊྲོཀ་ཡོ་ནང་ཡོད་པའི་འཛམ་གླིང་དམག་ཆེན་གཉིས་པའི་ཁྲོད་རྐྱེན་འདས་སུ་སོང་བའི་ཉི་ཧོང་གི་དམག་མིའི་དྲན་རྟེན་ལྷ་ཁང་Yasukuni Shrine ཞེས་པར་མཆོད་འབུལ་དུ་བསྐྱོད་པར། རྒྱ་ནག་གཙོས་པའི་ཐེ་ཝན་དང་ཀོ་རུ་ཡ། ཨ་རི་སོགས་ཀྱིས་ཉི་ཧོང་གིས་འཛམ་གླིང་དམག་ཆེན་གཉིས་པའི་སྐབས་ཀྱི་ནག་ཉེས་ལ་དགོངས་སེལ་ཞུ་རྒྱུའི་ཚབ་ཏུ་ཁྱིམ་མཚེས་རྒྱལ་ཁབ་ཁག་གི་མི་མང་དམར་གསོད་གཏོང་མཁན་ཚོར་གུས་འདུད་ཡི་རངས་བྱས་པ་དེ་ནི་ལོ་རྒྱུས་ཀྱི་རྨ་ཁར་སླར་ཡང་ཚ་བྱུག་པ་དང་གཅིག་མཚུངས་ཡིན་ཚུལ་སྐྱོན་བརྗོད་བྱས་ཡོད། དེ་བཞིན་ད་ལོའི་ཕྱི་ཟླ་ ༡༠ པའི་ནང་སླར་ཡང་ཉི་ཧོང་གི་གྲོས་ཚོགས་འཐུས་མི་ ༡༠༠ ལྷག་ལྷ་ཁང་དེར་མཆོད་འབུལ་དུ་སྐྱོད་སྐབས། སྲིད་བློན་ཨ་བྷེ་དངོས་སུ་མཉམ་ཞུགས་བྱས་མེད་ཀྱང་མཆོད་རྫས་བསྐུར་ཏེ་མྱ་ངན་ཞུས་པར་སླར་ཡང་རྒྱ་ནག་དང་ཀོ་རི་ཡས་སྐྱོན་བརྗོད་ཆེན་པོ་བྱས་ཡོད།

རྒྱ་ནག་གཞུང་འབྲེལ་གསར་ལམ་ཁག་ཏུ་གནས་ཚུལ་སྤེལ་བར། ཐེངས་འདིའི་རྒྱ་ནག་ནན་ཅིན་གྱི་འདས་མཆོད་དེ་ནི། ཉི་ཧོང་དམག་གིས་ ༡༩༣༧ ཟླ་ ༡༢ ཚེས་༡༣ ཉིན་ནས་བཟུང་ནན་ཅིན་ལ་བཙན་འཛུལ་བྱས་ཏེ་ཟླ་གཅིག་ལྷག་རིང་དམག་མི་འབུམ་གསུམ་ ༣༠༠༠༠༠ ལྷག་རྐྱེན་ལམ་དུ་བཏང་སྟེ་ལོ་རྒྱུས་དེབ་ཐེར་ནང་ཆེས་མུན་ནག་གི་ཤོག་ལྷེ་ཞིག་བསྐྲུན་ཡོད་ཚུལ་དང་། ད་ལོའི་ཕྱི་ཟླ་ ༢ ཚེས་ ༢༧ ཉིན་རྒྱ་ནག་རྒྱལ་ཡོངས་དམངས་ཆེན་སྐབས་བཅུ་གཉིས་པའིི་རྒྱུན་ཨུད་ལྷན་ཚོགས་སྟེང་གྲོས་ཆོད་བཞག་སྟེ། ལོ་ལྟར་ཕྱི་ཟླ་ ༡༢ ཚེས་ ༡༣ ཉིན་ནི་ནན་ཅིན་དམར་གསོད་ཆེན་མོར་རྒྱལ་ཁབ་ཐུན་མོང་གིས་འདས་མཆོད་སྒྲུབ་པའི་ཉིན་མོར་གཏན་འབེབས་བྱས་པ་ཞིག་ཡིན་སྐོར་སོགས་འཁོད་འདུག

ཐེངས་འདིར་རྒྱལ་སྤྱིའི་གསར་འགོད་པ་ཚོས་དོ་སྣང་བྱུང་བར། ནན་ཅིན་དམར་གསོད་ཆེན་མོའི་དྲན་རྟེན་གླིང་ཁའི་རྡོ་རིང་སྟེང་མི་ ༣༠༠༠༠༠ ལྷག་གི་ཚེ་སྲོག་འཕྲོག་ཞེས་འཁོད་ཡོད་ཀྱང་། གླིང་ཁའི་ལྷོ་ངོས་ཀྱི་མཁར་སྟེང་དུ་མིང་ཐོ་འཁོད་ཡོད་པའི་ནང་དམག་མི་ ༡༠༥༠༥ ཙམ་གྱི་མང་བྱང་ལས་མེད་སྐོར་བརྗོད་འདུག ཨ་རིའི་རྩོམ་པ་པོ་ Brandon Sanderson ལགས་ཀྱིས་འཛམ་གླིང་དམག་ཆེན་གཉིས་པའི་སྐོར་ལ་ཞིབ་འཇུག་བྱས་པའི་ནང་། "ཉི་ཧོང་དམག་མིས་ ༡༩༣༧ ཟླ་ ༡༢ པའི་ཚེས་ ༡༣ ཉིན་ནས་བཟུང་བདུན་ཕྲག་བདུན་རིང་། ནན་ཅིན་དུ་རྒྱན་ནག་གི་མི་མང་དང་དམག་མི་ ༣༠༠༠༠ ལྷག་སྡེབ་གསོད་བྱས་ཡོད་ཅིང་། གྲོང་ཁྱེར་མང་པོར་བཅོམ་སྲེག་དང་། བུད་མེད་ ༢༠༠༠༠ ནས་ ༨༠༠༠༠ བར་བཙན་གཡེམ་བཏང་བ་དང་དམག་མིའི་གཡོག་པོར་བཙན་འཁྲིད་བྱས་ཡོད། དམག་འཁྲུག་ཞི་འཇགས་རྗེས་ཞིབ་འཇུག་བྱས་སྐབས་ཞི་བའི་མི་མང་དང་དམག་མི། བཙོན་པ་བཅས་ཁྱོན་མི་ ༢༠༠༠༠༠ ཙམ་རྐྱེན་ལམ་དུ་སོང་ཡོད་པའི་མཇུག་འབྲས་ཐོན་ཡོད།" ཅེས་འཁོད་འདུག

རྒྱ་ཕྱོགས་ནས་བསྒྲགས་པའི་ནན་ཅིན་གཡུལ་འཁྲུག་ཁྲོད་རྐྱེན་འདས་སུ་སོང་བའི་གྲངས་ཀ་དེ་ཉི་ཧོང་ཕྱོགས་ནས་ཁས་ལེན་བྱེད་ཀྱི་མེད་པ་མ་ཟད། རྒྱལ་སྤྱིའི་ཁྲིམས་དོན་ལྷན་ཁང་ཁག་ཅིག་གིས་ཞིབ་འཇུག་བྱས་པའི་གྲུབ་དོན་ལའང་སྐབས་དེར་རྐྱེན་འདས་སུ་སོང་བའི་མི་གྲངས་འབུམ་གཉིས་ལས་བརྒལ་མེད། མཚན་ཉིད་རིག་པ་བ་དང་ལོ་རྒྱུས་སྨྲ་བ་ Frank Smitha ལགས་ཀྱིས་རྩོམ་སྒྲིག་བྱས་པའི་ ‘Japan’s war against China and the soviet Union’ ཞེས་པའི་སྟེང་། རྒྱ་ནག་གི་ཕྱོགས་ནས་ཉི་ཧོང་དམག་མིས་ ༡༩༣༧ ཟླ་ ༡༢ ཚེས་ ༡༣ ཉིན་ནས་བཟུང་བདུན་ཕྲག་དྲུག་རིང་ནན་ཅིན་དུ་ཞི་བའི་མི་མང་དང་དམག་མི་ ༣༠༠༠༠༠ ལྷག་རྐྱེན་འདས་སུ་བཏང་ཡོད་ཚུལ་རྗོད་ཀྱི་ཡོད་ཀྱང་། ཨ་རིའི་རྩོམ་པ་པོ་ Iris Chang ལགས་ཀྱིས་སྐབས་དེར་མི་ ༢༦༠༠༠༠ རྐྱེན་འདས་སུ་སོང་ཡོད་ཅེས་བརྗོད་ཡོད་ལ། ཨ་རིའི་གསར་འགོད་པ་དང་རྩོམ་པ་པོ་ Jonathan Spence ལགས་ཀྱིས་ཀྱང་དམག་མི་དང་མི་སེར་ ༤༢༠༠༠ ཙམ་རྐྱེན་འདས་དང་། བུད་མེད་ ༢༠༠༠༠ ཙམ་ལ་བཙན་གཡེམ་ཐེབས་ཡོད། ཅེས་བརྗོད་འདུག

ཐེངས་འདིའི་འདས་མཆོད་སྟེང་རྒྱ་ནག་གི་སྲིད་འཛིན་ཞི་ཅིན་ཕིན་གྱིས་གཏམ་བཤད་སྤེལ་དོན། དེ་རིང་ང་ཚོས་འདི་ནས་ནན་ཅིན་དམར་གསོད་ཆེན་མོའི་ཁྲོད་འདས་གྲོངས་སུ་སོང་བ་ཚོར་རྒྱལ་ཁབ་ཐུན་མོང་གིས་འདས་མཆོད་སྒྲུབ་པའི་མཛད་སྒོ་བསྡུས་ཏེ། འཇར་པན་བཙན་འཛུལ་བས་དམར་གསོད་བཏང་བའི་ཉེས་མེད་འདས་པོ་དེ་དག་ལ། ཀྲུང་གོའི་མི་དམངས་ཀྱིས་རྒྱལ་ཁབ་ཀྱི་ཆེད་དུ་ཚེ་སྲོག་ཕུལ་བའི་གསར་བརྗེ་སྔོན་གཤེགས་དཔའ་བོ་དང་མི་རིགས་ཀྱི་དཔའ་བོར་དྲན་གསོ་བྱས་ཏེ། ཀྲུང་གོའི་མི་དམངས་བློ་བརྟན་འགྱུར་མེད་ཀྱིས་འཕེལ་རྒྱས་བགྲོད་ལམ་དུ་སྐྱོད་པའི་བླ་མེད་ཕུགས་འདུན་མཚོན་པར་བྱས་ཡོད་ལ། ཀྲུང་གོའི་མི་དམངས་ཀྱིས་ལོ་རྒྱུས་སེམས་ལ་དམ་པོར་འཛིན་པ་དང་འདས་སོང་མི་བརྗེད་པ། ཞི་བདེ་ལ་གཅེས་སྤྲས་བྱེད་པ། མ་འོངས་གསར་གཏོད་བྱེད་པ་བཅས་ཀྱི་ལངས་ཕྱོགས་བརྟན་པོ་འཛམ་གླིང་མི་མང་ལ་བསྒྲགས་པ་ཡིན། ཞེས་དང་བརྗོ་འདུག

འཇར་པན་བཙན་འཛུལ་བས་བསླངས་པའི་ནན་ཅིན་དམར་གསོད་ཆེན་མོ་དེས་འཛམ་གླིང་ཡ་ང་བར་བྱས་པ་དང་། སྙིང་རྗེ་ཡོད་པའི་མི་རྣམས་ཡ་ང་བར་བྱས། འཛམ་གླིང་འཁྲུག་ཆེན་གཉིས་པར་རྒྱལ་ཁ་ཐོབ་རྗེས། ཡོན་ཏུང་རྒྱལ་སྤྱིའི་དམག་དོན་ཁྲིམས་ཁང་དང་ཀྲུང་གོ་དམག་འཁྲུག་ཉེས་ཅན་ཁྲིམས་གཅོད་དམག་དོན་ཁྲིམས་ཁང་བཅས་ཀྱིས་གྱོད་དོན་དེར་རྟོག་ཞིབ་བྱས་ཏེ་ངོས་འཛིན་གཅིག་གྱུར་ཐོག ཀྲུང་གོའི་མི་དམངས་ཀྱི་ཟུངས་ཁྲག་གིས་སྦགས་པའི་འཇར་པན་གྱི་ ཉེས་ཅན་པ་སྐོར་ཞིག་ལ་ཁྲིམས་ཆད་ཕོག་པ་བསྒྲགས་ཡོད་སྟབས། ལོ་རྒྱུས་ནི་དུས་ཀྱི་འཕེལ་འགྱུར་དང་བསྟུན་ནས་འགྱུར་མི་སྲིད་ལ། དོན་དངོས་ཀྱང་ཁ་ཡག་རྫུན་བཟོ་ལ་བརྟེན་ནས་ཡལ་མི་སྲིད། ཅེས་སོགས་བརྗོད་འདུག

ཞི་ཡིས་མུ་མཐུད་དུ་བརྗོད་དོན། ང་ཚོས་འཇར་པན་བཙན་འཛུལ་དམག་འཁྲུག་ཁྲོད་རྐྱེན་ལམ་དུ་ཤོར་བའི་སྤུན་ཟླ་རྣམས་དང་། ཕྱིའི་བཙན་འཛུལ་ལ་འགོག་རྒོལ་བྱས་ཏེ་རང་སྲོག་བློས་བཏང་བའི་སྤུན་ཟླ་ཡོངས་ལ། ད་ལྟའི་ཀྲུང་གོ་ནི་མི་མང་གི་ཞི་བདེའི་འཚོ་བར་སྲུང་སྐྱོབ་བྱེད་པའི་ནུས་སྟོབས་ཡོད་པའི་རླབས་ཆེན་གྱི་རྒྱལ་ཁབ་ཅིག་ཡིན་ལ། ཀྲུང་ཧྭ་མི་རིགས་ཀྱིས་གཞན་གྱི་བཙན་འཛུལ་དང་གཉའ་གནོན་མྱོང་བའི་དུས་རབས་ཡོངས་སུ་མཇུག་རྫོགས་ཏེ། ཀྲུང་གོ་མི་མང་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་བགྲོད་ལམ་བརྒྱུད་དེ་དམིགས་འབེན་མངོན་འགྱུར་བྱེད་པ་དང་། ཀྲུང་ཧྭ་མི་རིགས་རླབས་ཆེན་བསྐྱར་དར་གྱི་ཀྲུང་གོའི་ཕུགས་འདུན་མངོན་འགྱུར་བྱེད་ཆེད་འབད་བརྩོན་བྱེད་བཞིན་ཡོད། ཅེས་སོགས་བརྗོད་འདུག

ཐེངས་འདིའི་འདས་མཆོད་མཛད་སྒོར་རྒྱ་ནག་གི་དམག་མི་དང་ལས་རིགས་འདྲ་མིན་གྱི་འཐུས་མི་ཆིག་ཁྲི་ལྷག་དང་། ནན་ཅིན་གཡུལ་འཁྲུག་ཁྲོད་ཞུགས་མྱོང་མཁན་གྱི་རྒན་འཁོགས། དེ་བཞིན། རྒྱ་ནག་གི་མཐུན་ཕྱོགས་རྒྱལ་ཁབ་ཁག་གི་གཞུང་ཚབ་སོགས་མཉམ་ཞུགས་བྱས་ཡོད་འདུག མྱ་ངན་དངོས་གཞིིའི་སྐབས་རྒྱ་ནག་གི་མཁའ་དམག་གིས་ཉེན་བརྡ་བཏང་བ་དང་མཉམ་དུ་ནན་ཅིན་གྲོང་ཁྱེར་ཡོངས་ཀྱི་རླངས་འཁོར་དང་མེ་འཁོར། གྲུ་གཟིངས་བཅས་ཀྱིས་དུས་གཅིག་ཏུ་དུང་བརྡ་བརྒྱབ་སྟེ་སྐར་མ་གཅིག་རིང་མྱ་ངན་བྱས་ཡོད་འདུག

ལོ་རྒྱུས་ཡིག་ཚགས་ལྟར་ན། ༡༩༣༡ ཟླ་ ༩ པའི་ནང་ཉི་ཧོང་གིས་ནན་ཅིན་དང་ཧྲང་ཧེ་སོགས་རྒྱ་ནག་བྱང་ཤར་གྱི་གྲོང་འཁྱེར་ཁག་ཏུ་བཙན་འཛུལ་བྱས་ཤིང་། ༡༩༣༦ ལོར་གོ་མིན་ཏང་དང་གུང་ཁྲན་ཏང་མཉམ་འབྲེལ་གྱིས་ཉི་ཧོང་ལ་དམག་འཐབ་བྱ་རྒྱུའི་གྲོས་མཐུན་བྱུང་སྟེ། ཡན་ཨན་དུ་ཡོད་པའི་དམར་ཤོག་ཚོགས་པའི་སྲིད་གཞུང་དེ་གོ་མིན་ཏང་གི་ཡན་ལག་ལས་ཁུངས་སུ་མིང་བསྒྱུར་བྱས་པ་མ་ཟད། དམར་དམག་ཁྲི་ ༨ ཡོད་པ་དེའང་གོ་མིན་ཏང་གི་དམག་སྡེ་ཨང་བརྒྱད་པར་མིང་བསྒྱུར་བྱས་ཏེ། ༡༩༣༧ ཟླ་ ༧ ཚེས་ ༥ ཉིན་ནས་དམག་འཁྲུག་དངོས་སུ་མགོ་འཛུགས་བྱས་ཡོད།

དམག་འཁྲུག་དེའི་ཁྲོད་རྒྱ་ནག་དང་ཉི་ཧོང་གི་དམག་མི་དང་། ནན་ཅིན་གྱི་ཉེས་མེད་མི་སེར་བཅས་མི་འབུམ་གཉིས་ལ་ཉེ་པའི་ཚེ་སྲོག་ཤོར་ཡོད་པ་མ་ཟད། དོན་རྐྱེན་དེ་བརྒྱུད་ནས་འཛམ་གླིང་དམག་ཆེན་གཉིས་པ་མེ་བཞིན་འབར། ཅང་ཅེ་ཧྲིས་མགོ་ཁྲིད་དེ་ ༡༩༣༦ ནས་ ༡༩༤༤ ལོའི་བར་གོ་གུང་མཉམ་འབྲེལ་གྱིས་ 'རི་འགོག་དམག་འཁྲུག' བརྒྱབ་པའི་གོ་སྐབས་དང་བསྟུན་ཏེ། མའོ་ཙེ་ཏུང་གིས་གོ་མིན་ཏང་ལ་ཡིད་ཆེས་མེད་པའི་ཐོག་ནས་དམར་དམག་རྒྱ་སྐྱེད་དང་རྟེན་གཞི་གསར་འཛུགས་བྱས་ཡོད་ཅིང་། ཕྱི་དགྲར་ཁ་གཏད་གཅོག་བཞིན་གོ་གུང་ནང་འཁྲུག་ཐེངས་མང་བྱུང་ཡོད་པ་དང་། ༡༩༤༥ ལོའི་ཟླ་ ༨ ཚེས་ ༦ ཉིན་ཨ་རིས་ཉི་ཧོང་གི་ཧི་རོ་ཞི་མར་རྡུལ་ཕྲན་མཚོན་ཆ་གཡུགས་པ་དང་། ཚེས་ ༨ ཉིན་ཨུ་རུ་སུས་ཀྱང་རྒྱ་ནག་ལ་རྒྱབ་རོགས་ལྟ་བུར་ཉི་ཧོང་ལ་དམག་རྒྱག་རྒྱུ་གསལ་བསྒྲགས་བྱས་སྟབས་ཉི་ཧོང་ཕམ་ཉེས་སུ་སོང་སྟེ། ཟླ་དེའི་ཚེས་ ༡༥ ཉིན་ཉི་ཧོང་གིས་མགོ་བཏགས་ཞུས་ཏེ་འཛམ་གླིང་དམག་ཆེན་གཉིས་པ་མཇུག་བསྒྲིལ་ཡོད་འདུག

གསར་འགོད་པ། དོན་འགྲུབ་བཀྲ་ཤིས།

དུས་བབ་དྲ་བ་ནས།།