སྨར་ཚང་བཀའ་བརྒྱུད་བསྐྱར་གསོ་གནང་རྒྱུ་ཡིན།

དེ་རིང་ཉིན་གུང་བོད་ཀྱི་དཔེ་མཛོད་ཚོགས་ཁང་དུ་སྨར་ཚང་བཀའ་བརྒྱུད་རྒྱལ་ཡོངས་དྲ་བ་ཞེས་པ་དབུ་འབྱེད་གནང་བའི་ཐོག སྤྱི་འཐུས་ཚོགས་གཙོ་མཆོག་གིས་ཆོས་བརྒྱུད་སླར་གསོ་ཡོང་མིན་དེའི་དབང་ལུང་མན་ངག་གི་བརྒྱུད་པ་ཏག་ཏག་བསྡད་ཡོད་མེད་ལ་འབྲེལ་ཡོད་ལས་ཁུངས་སོགས་ནས་ཞིབ་འཇུག་བྱེད་དགོས་སྐོར་

གསུངས་སོང་།

དེ་རིང་ཉིན་གུང་ཆུ་ཚོད་ ༡༢།༣༠ ཐོག གངས་སྐྱིད་བོད་ཀྱི་དཔེ་མཛོད་ཚོགས་ཁང་དུ། སྨར་ཚང་རྒྱལ་ཡོངས་ཚོགས་པའི་གོ་སྒྲིག་འོག བོད་རྒྱ་དབྱིན་གསུམ་ཐོག་ཡོད་པའི་༼སྨར་ཚང་བཀའ་བརྒྱུད་རྒྱལ་ཡོངས་དྲ་བ༽ཞེས་པ་དབུ་འབྱེད་དང་སྦྲགས། སྨར་ཚང་བཀའ་བརྒྱུད་ཕྱག་བཏབ་ནས་ལོ་ངོ་ ༨༤༨ དང་ཉམས་གུད་སོང་ནས་ལོ་ ༣༧༠ ཕྱིན་ཡོད་པ་དང་། ཕྱི་ལོ་༢༠༠༧ ལོ་ནས་བཟུང་ཐའེ་ཝན་སྨར་ཚང་ཆོས་ཚོགས་དང་དབྱིན་ལན་སྨར་ཚང་ཆོས་ཚོགས། སྨར་ཚང་རྒྱལ་ཡོངས་ཚོགས་པ་གསུམ་མཉམ་འབྲེལ་གྱིས། སྨར་ཚང་བཀའ་བརྒྱུད་སླར་གསོའི་བྱ་བར་ཞུགས་ཡོད་པའི་སྐོར་ལ་གསལ་བསྒྲགས་ཤིག་གནང་སོང་། སྐབས་དེར་སྐུ་མགྲོན་གཙོ་བོར་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་དང་ཚོགས་གཞོན་མཁན་པོ་བསོད་ནམས་བསྟན་འཕེལ་ལགས། སྤྱི་འཐུས་རྒྱུན་ལས་དགེ་བཤེས་སྨོན་ལམ་མཐར་ཕྱིན་ལགས། དེ་བཞིན་སྨར་ཚང་རྒྱལ་ཡོངས་ཚོགས་པའི་ཚོགས་གཙོ་གངས་རི་ཀརྨ་རིན་པོ་ཆེས་དབུས་འབྲེལ་ཡོད་ལས་བྱེད་དང་གསར་འགོད་པ་བཅས་འཛོམས་འདུག

དྲ་བ་དབུ་འབྱེད་ཐོག་གངས་རི་ཀརྨ་རིན་པོ་ཆེ་ལགས་ཀྱིས་སྨར་ཚང་བཀའ་བརྒྱུད་ཉམས་པ་སླར་གསོ་བྱེད་པར་གཞི་རྩ་ཡོད་མེད་དང་། སླར་གསོའི་བྱ་བར་ཞུགས་པའི་བརྒྱུད་རིམ་དང་གྲུབ་འབྲས་སོགས་ཀྱི་ཐད་དོན་ཚན་བཞི་ཡིག་ཐོག་སྒྲོག་སྦྱངས་གནང་སྐབས། ཕྱི་ལོ་ ༢༠༠༡ ལོར་དཔལ་ལྡན་སྐུ་སྒེར་ཡིག་ཚང་དང་༧གོང་མ་རྡོ་རྗེ་འཆང་། མཁན་ཆེན་ཀུན་དགའ་དབང་ཕྱུག་སོགས་ཀྱིས་རྒྱབ་སྐྱོར་གནང་བའི་བཀའ་དྲིན་ལ་བརྟེན་ནས། ཁོང་ཐའེ་ཝན་ལ་འགྲོ་དུས་རྒྱ་རིགས་འུན་འུན་ཐོ་ཟེར་བ་ཞིག་གིས་ཁོ་པ་སྨར་ཚང་བཀའ་བརྒྱུད་སྲོལ་བཏོད་མཁན་ཆོས་རྗེ་སྨར་པ་རིན་པོ་ཆེའི་ཡང་སྲིད་ཡིན་ཟེར་བ་དང་། བོད་བརྒྱུད་ནང་བསྟན་སྨར་ཚང་བཀའ་བརྒྱུད་རིག་གཞུང་ཡིན་ཟེར་ནས་རྒྱ་རིགས་སྐྱ་བོ་ལ་གྲྭ་ཆས་གཡོག་པ་དང་གྲྭ་རྫུན་བཟོས་པ། བོད་བརྒྱུད་ནང་བསྟན་གྱི་མིང་འཁུར་ནས་ཁྱབ་བསྒྲགས་ལོག་པ་བྱས་པར་བརྟེན། ཐའེ་ཝན་ལ་གཉུག་མ་གནས་པའི་བཀའ་བརྒྱུད་པ་བླ་གྲྭ་འགའ་ཤས་ཀྱིས་སྨར་ཚང་དེ་སྨར་ཁམས་ནས་དར་བའི་ཆོས་བརྒྱུད་ཅིག་ཡིན་པས། རྒྱ་འུན་འུན་ཐོ་ལ་གདོང་ལེན་དང་སྨར་ཚང་ཉམས་གསོའི་ལས་དོན་སྒྲུབ་ཐུབ་པའི་ཆེད་དུ་ངོས་ལ་རེ་སྐུལ་ཡང་ཡང་བྱས་པ་དང་། ངའི་སྐུ་གོང་མ་སྨར་ཚང་བཀའ་བརྒྱུད་ཀྱི་ཕྱག་ཆེན་མན་ངག་རྒྱ་མཚོ་ཉམས་ལེན་བྱེད་མཁན་ཞིག་ཡིན་པ་དང་། ང་རང་སྐྱེ་ཡུལ་སྨར་ཁམས་ཡིན་པ་སོགས་རྒྱུ་རྐྱེན་མང་པོ་ཞིག་ལ་བརྟེན་ནས་སྨར་ཚང་གི་ཆོས་བརྒྱུད་འདི་ཉམས་པ་སྐྱར་གསོ་བྱེད་རྒྱུར་འབྲེལ་བ་ཆེན་པོ་ཞིག་ཡོད་པར་མཐོང་སྟེ་ཉམས་གསོ་བྱ་རྒྱུའི་ཀུན་སློང་སྐྱེས་པ་ཞིག་ཡིན། ཞེས་དང་།

ཡང་ཁོང་གིས། ད་ལྟ་ཆོས་བརྒྱུད་འདི་བསྐྱར་གསོ་བྱེད་རྒྱུའི་གཞི་རྩ་གཙོ་བོ་ནི། ཆོས་རྗེ་སྨར་པ་རིན་པོ་ཆེའི་ཉམས་རྟོགས་ལས་འཁྲུངས་པའི་ཕྱག་ཆེན་མན་ངག་རྒྱ་མཚོ་དང་རི་ཆོས་ཡོན་ཏན་ཀུན་འབྱུང་སོགས་སྙན་བརྒྱུད་ཟབ་མོ་རྣམས། འགྲོ་མགོན་རིན་ཆེན་དང་རྒྱལ་བ་ཡང་དགོན་པ་ཡེ་ཤེས་རྒྱལ་མཚན་གཉིས་ལ་གནང་བ་ནས་བཟུང་བླ་རབས་དྲུག་པ་ཆོས་ཀྱི་རྡོ་རྗེའི་བར་སྙན་བརྒྱུད་འབའ་ཞིག་ཏུ་བཞུགས། ཆོས་ཀྱི་རྡོ་རྗེའི་ཞལ་སློབ་ཡེ་ཤེས་རྒྱལ་མཚན་གྱིས་ཡིག་ཐོག་ཏུ་ཕབ་པའི་སྨར་ཚང་ཕྱག་ཆེན་མན་ངག་རྒྱ་མཚོ་ཤོག་གྲངས་ལྔ་བརྒྱ་ཉེར་ལྔ་ཙམ་ཡོད་པ་འདི་ནི། སྨར་ཚང་བཀའ་བརྒྱུད་ཀྱི་སྙན་བརྒྱུད་ཀུན་གྱི་ཡང་སྙིང་། འབུར་ཐོན་གྱི་ཆོས་བརྒྱུད་འཛིན་པའི་གཞི་མ། ཕ་ཆོས་གསེར་གྱི་ཡང་ཞུན་འདིའི་བརྒྱུད་པ་གསེར་རིའི་ཕྲེང་བ་བསྒྲིགས་པ་ལྟ་བུ་ད་བར་བླ་བརྒྱུད་སུམ་ཅུ་སོ་དྲུག་ཙམ་ཕེབས་འདུག་པས། བསྟན་པ་འདི་བསྐྱར་གསོ་བྱེད་རྒྱུའི་གཞི་རྩ་ཡོད་པ་རྒྱུ་མཚན་གསལ་པོ་མཐོང་སྟེ་ཉམས་གསོ་བྱ་རྒྱུ་ཐག་གཅོད་བྱས་ཏེ། ཕྱི་ལོ་ ༢༠༠༧ རྒྱ་གར་དུ་བོད་ཀྱི་བླ་ཆེན་རྣམས་ལ་སྙན་གསན་ཞུ་ཆེད་དུ་བཅར་ཡང་༧གོང་ས་མཆོག་དང་ ༧གོང་མ་རྡོ་རྗེ་འཆང་རྣམ་གཉིས་ཕྱི་རྒྱལ་དུ་ཕེབས་པའི་དུས་དང་འཕྲད་ནས་ཞུ་རྒྱུ་ མ་རྙེད། ༧རྒྱལ་དབང་ཀརྨ་པ་མཆོག་ལ་སྙན་གསན་ཞུས་པས་རིན་པོ་ཆེ་མཆོག་གིས་སྨར་ཚང་ཆོས་ཚོགས་ལ་སྟོན་པའི་སྐུ་ཞིག་ཀྱང་བསྩལ་གནང་མཛད། ཕྱིས་སུ་༧གོང་མ་རྡོ་རྗེ་འཆང་དབྱིན་ལན་ལ་ཕེབས་དུས་སྙན་གསན་ཞུས་པ་ཡིན། ཞེས་དང་། ད་ལྟའི་ཆར་རྒྱ་རིགས་འུན་འུན་ཐོ་ཡིས་བོད་བརྒྱུད་ནང་བསྟན་ལ་ཁྱབ་བསྒྲགས་ལོག་པ་སྤེལ་བར་ཁྲིམས་གཏུག་བྱེད་ཀྱིན་ཡོད་སྐོར་གསུངས་སོང་།

རིན་པོ་ཆེ་ལགས་ཀྱིས་ཕྱི་ལོ་ ༡༩༩༣ ལོར་ཁོང་བོད་དུ་ཕྱིར་ཕེབས་སྐབས། ༧གོང་ས་མཆོག་གིས་བོད་ཀྱི་ཆོས་དང་རིག་གཞུང་སྟོང་ལ་ཉེ་བའི་དུས་འདིར་སློབ་གྲྭ་དང་བཤད་གྲྭ་གསར་འཛུགས་དགོས་པ་གལ་ཆེན་ཡིན་པའི་བཀའ་སློབ་ལམ་སྟོན་གནང་བ་ལྟར། ཁོང་བོད་དུ་བསླེབས་མ་ཐག་རིས་མེད་ཀྱི་བཤད་གྲྭ་དང་སློབ་གྲྭ། བོད་སྨན་འཛིན་གྲྭ་བཅས་ཆེད་འཛུགས་ཀྱིས་བོད་ཀྱི་ཆོས་དང་རིག་གཞུང་ཉམས་པ་སླར་གསོ་གནང་ནས་ལོ་ ༥ འགོར་རྗེས། རྒྱ་གཞུང་གིས་ཁོང་༧གོང་ས་མཆོག་གི་གསང་ཉུལ་བ་ཡིན་ལུགས་སྐྱོན་འཛུགས་བྱས་ཏེ་བཙན་བྱོལ་དུ་ཡོང་དགོས་བྱུང་བ་དང་། ལམ་བར་རླངས་འཁོར་དོན་རྐྱེན་བྱུང་སྟེ་ཁོང་སྲིང་མོ་དང་མི་ ༢༧ རྐྱེན་འདས་སུ་ཕྱིན་ཞིང་། རྒྱ་གཞུང་གིས་ཁོང་གི་སློབ་གྲྭ་དང་བཤད་གྲྭ་བཙན་གྱིས་སྒོ་བརྒྱབ་པ་སོགས་ཀྱི་དཀའ་ངལ་མང་པོ་འཕྲད་པའི་སྐོར་ཡང་ངོ་སྤྲོད་གནང་སོང་།

མཇུག་ཏུ་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་སྨར་ཚང་བཀའ་བརྒྱུད་ཉམས་གསོའི་སྐོར་ལ་གསུང་བཤད་གནང་དོན། ངས་ཆོས་ཕྱོགས་ནས་ཅི་གང་ཤེས་ཀྱི་མེད་ཀྱང་ཕར་ཚུར་སྐད་ཆ་དྲིས་པ་ཡིན་ན། དེ་སྔོན་སྨར་ཚང་བཀའ་བརྒྱུད་ཀྱི་བརྒྱུད་པ་ཆ་ཚང་ཆད་བསྡད་པ་ཞིག་ལ་ངོས་འཛིན་བྱེད་ཀྱིན་འདུག ད་ལྟ་བརྒྱུད་པ་སླར་གསོ་ཡོང་དང་མི་ཡོང་ཟེར་བ་དེ་རིན་པོ་ཆེ་ཡིས་གོང་དུ་གསུངས་པ་ལྟར། སྨར་ཚང་བཀའ་བརྒྱུད་ཀྱི་དབང་ལུང་མན་ངག་གི་བརྒྱུད་པ་དེ་ཏག་ཏག་བསྡད་ཡོད་མེད་ལ་རག་ལས་ཡོད་པ་རེད། ང་ཚོ་བོད་མི་མང་སྤྱི་འཐུས་ལྷན་ཚོགས་ཀྱི་ངོས་ནས་ཉམས་ཞིབ་བྱས་ཏེ་དེ་དང་དེ་རེད་ཟེར་ནས་ཞུ་ཤེས་ཀྱི་ཡོད་པ་མ་རེད། དེ་འབྲེལ་ཡོད་ཆོས་རིག་ལས་ཁུངས་དང་ཆོས་བརྒྱུད་སོ་སོའི་ནང་ཁུལ་དུ་གནས་སྟངས་ག་འདྲ་ཆགས་འདུག་དེ་ཚོའི་ཐོག་ལ་ཞིབ་འཇུག་བྱེད་དགོས་པ་དང་། གནས་སྟངས་ཁ་གསལ་བཟོ་དགོས་པ་གལ་ཆེན་པོ་ཆགས་ཡོད་པ་རེད་བསམ་གྱི་འདུག དེ་རིང་འདིར་བཅར་ནས་གཙོ་བོ་ག་རེ་ཞུ་རྒྱུ་ཡིན་ཟེར་ན། གངས་རི་ཀརྨ་རིན་པོ་ཆེས་གོང་དུ་གསུངས་པ་ལྟར་སྨར་ཚང་བཀའ་བརྒྱུད་ཕྱག་བཏབ་ནས་ ༨༤༨ ཕྱིན་པ་དང་། ཉམས་ཆག་སོང་ནས་ལོ་༣༧༠ ཙམ་ཕྱིན་ཡོད་པ་རེད། རིན་པོ་ཆེས་འགན་འཁུར་ཏེ་བརྒྱུད་རིམ་དང་འབྲེལ་བའི་ཐོག་ནས་ཞིབ་འཇུག་དང་ཡིག་ཆ་མཁོ་སྒྲུབ་གནང་བ་སོགས་ཉམས་པ་སླར་གསོའི་ལས་ཀ་ལ་ཞུགས་པར། བོད་མི་མང་སྤྱི་འཐུས་ལྷན་ཚོགས་ཀྱི་ངོས་ནས་རིན་པོ་ཆེས་ལོ་ ༦ རིང་སྐུ་ལས་བསྐྱོན་བཞག་པ་ཞིག་ལ་ངོས་འཛིན་དང་། རིན་པོ་ཆེས་ཐུགས་ཁུར་གནང་བ་དེར་ཐུགས་རྗེ་ཆེ་ཞེས་ཞུས་པ་ཡིན། ཞེས་སོགས་གསུངས་སོང་།

གསར་འགོད་པ། པདྨ་མཚོ།

དུས་བབ་དྲ་བ་ནས།།