གསར་འགྱུར་བཅའ་ཁྲིམས་བཟོ་འཆར།

རྒྱ་ནག་རྒྱལ་ཡོངས་མི་མང་འཐུས་ཚོགས་སྐབས་བཅུ་གཉིས་པའི་རྒྱུན་ལས་ལྷན་ཁང་གིས་རྒྱ་ནག་ནང་གསར་འགྱུར་བཅའ་ཁྲིམས་ཤིག་གཏན་འབེབས་བྱེད་པར་གྲ་སྒྲིག་བྱེད་བཞིན་ཡོད་འདུག

འདས་པའི་ལོ་གཉིས་རིང་རྒྱ་ནག་གཞུང་གིས་ཧུའུ་པེ་དང་ཧེ་ལུང་ཅང་། ཧྥི་ཅན། སི་

ཁྲོན། པེ་ཅིན་དང་ཧྲང་ཧྲེ་སོགས་ཞིང་ཆེན་དང་གྲོང་ཁྱེར་ཁག་ ༡༥ ནང་གསར་འགྱུར་ཀུན་སྤྱོད་ལས་དོན་ལྷན་ཚོགས་གསར་འཛུགས་བྱས་ཏེ། གསར་འགྱུར་ལས་རིགས་དང་འབྲེལ་བའི་ཚོགས་འདུ་རིམ་པར་བསྡུ་བཞིན་ཡོད་ཀྱང་། ཚོགས་འདུའི་དགོས་དམིགས་དང་གསར་དུ་བཙུགས་པའི་ལྷན་ཚོགས་ཀྱི་ཚོགས་མིའི་གྲུབ་ཆ། དེའི་ལས་འགན་སོགས་ཁ་གསལ་བཟོས་མེད་ཀྱང་། ཁ་སང་ཕྱི་ཚེས་ ༡ ཉིན་རྒྱ་ནག་དབུས་བརྙན་འཕྲིན་ཁང་གིས་གནས་ཚུལ་སྤེལ་བ་ལྟར་ན། དབུས་གསར་འགྱུར་ལས་སྒྲུབ་ཁང་གི་འགན་འཛིན་ཟུར་པ་དང་རྒྱ་ནག་མི་མང་འཐུས་མི་ཚོགས་པའི་རྒྱུན་ལས་ལོའུ་པེན་ཅེ་ཡིས། ད་སྐབས་རྒྱལ་ཡོངས་མི་མང་འཐུས་ཚོགས་ནས་གསར་འགྱུར་བརྒྱུད་སྒྲོག་ཐད་ཀྱི་བཅའ་ཁྲིམས་ཤིག་གཏན་འབེབས་བྱེད་པར་ཞིབ་འཇུག་བྱེད་བཞིན་ཡོད། དེང་སང་གསར་འགྱུར་བརྒྱུད་ལམ་ཁག་གིས་གང་བྱུང་གིས་གནས་ཚུལ་སྤེལ་ཏེ་མི་སེམས་འགུག་ཐབས་བྱེད་ཀྱི་ཡོད་པ་དང་། ཡང་སྲོལ་རྒྱུན་གྱི་གསར་འགྱུར་དོ་དམ་ལམ་ལུགས་ཧ་ཅང་དམ་དྲགས་པའི་རྐྱེན་གྱིས་རྣམ་པ་ཙམ་དུ་གྱུར་ཡོད་སྟབས། མ་འོངས་པར་གསར་འགྱུར་བརྒྱུད་སྒྲོག་གི་བཅའ་ཁྲིམས་གཏན་འབེབས་བྱུང་ན་སྐྱོན་ཆ་དེ་ཚོ་སེལ་ཐུབ་སྐོར་བརྗོད་འདུག

ཡང་ཁོང་གིས། ཁྲིམས་ཀྱིས་རྒྱལ་ཁབ་སྐྱོང་བ་ལྟར་གསར་འགྱུར་བརྒྱུད་སྒྲོག་ལའང་ཁྲིམས་སྐྱོང་གི་འདུ་ཤེས་བསྐྲུན་དགོས་ལ། གལ་སྲིད་གསར་འགྱུར་བརྒྱུད་སྒྲོག་གི་དབྱེ་མཚམས་གསལ་བོ་མེད་ཚེ་སྟངས་འཛིན་བྱེད་བདེ་བོ་མེད་སྟབས། གནས་ཚུལ་གང་དག་བརྒྱུད་སྒྲོག་ཆོག་པ་དང་མི་ཆོག་པའི་ཁྲིམས་ལུགས་དང་། ཀུན་སྤྱོད་རྣམ་གཞག སྤྱི་ཚོགས་སྒྲིག་ལམ་བཅས་ཀྱི་དབྱེ་མཚམས་གསལ་བོ་བཟོས་ཏེ་བཀག་རྒྱ་སྣ་ཚོགས་ལས་གྲོལ་ཐབས་བྱེད་དགོས། བཅའ་ཁྲིམས་གཏན་འབེབས་བྱུང་ན། གསར་འགྱུར་ལས་རིགས་གཉེར་མཁན་ཚོས་ཁྲིམས་ཀྱི་འགན་དབང་ལྟར་སོ་སོའི་བྱ་སྤྱོད་ལ་སོ་སོས་ཐག་གཅོད་བྱེད་ཆོག་པས་རང་བདག་གི་དབང་ཆ་འཐོབ་པར་ཕན་ནུས་ཡོད་སྐོར་བརྗོད་འདུག

འདི་ལོའི་ཕྱི་ཟླ་ ༦ པའི་ནང་རྒྱ་ནག་དབུས་གསར་འགྱུར་ལས་སྒྲུབ་ཁང་གིས་གསར་འགྱུར་བརྒྱུད་སྒྲོག་སྐོར་གྱི་སྒྲིག་གཞི་ཡིག་ཆ་ཞིག་སྤེལ་ཏེ། ལས་སྒྲུབ་ཁང་གི་ཆོག་མཆན་མེད་པའི་གསར་འགོད་པ་དང་གསར་འགྱུར་ཁང་ཁག་ཅིག་གིས་སྐྱོན་བརྗོད་ཀྱི་གནས་ཚུལ་སྤེལ་བཞིན་པར་བཀག་འགོག་བྱ་རྒྱུ་ཡིན་སྐོར་བསྒྲགས་ཡོད་པ་དང་། འདི་ལོའི་ཕྱི་ཟླ་ ༡༠ ནང་ཡང་ལས་སྒྲུབ་ཁང་དེ་དང་རྒྱ་ནག་བརྒྱུད་ལམ་གནས་ཚུལ་དོ་དམ་ཁང་གཉིས་མཉམ་འབྲེལ་ཐོག ཕྱི་ལོ་ ༢༠༡༥ ལོའི་ལོ་མགོ་ནས་བཟུང་དབུས་གཞུང་དང་ས་གནས་ཁག་གི་གསར་འགྱུར་རྒྱ་དྲ་གཙོ་གྲས་རྣམས་དང་། རྒྱལ་ཡོངས་རང་བཞིན་གྱི་ལས་ཁུངས་ཁག་གི་གསར་འགྱུར་དྲ་བའི་གནས་ཚུལ་འཚོལ་སྒྲིག་པ་ཚོར་ངེས་པར་དུ་གསར་འགོད་པའི་དཔང་ཡིག་དགོས་ཀྱི་ཡོད་ཀྱང་། ཚོང་ལས་དང་འབྲེལ་བའི་རྒྱ་དྲ་ཁག་གི་གསར་འགོད་པ་ཚོ་དེའི་ནང་དུ་ཚུད་མེད་སྐོར་བརྗོད་འདུག

གོང་གི་གནས་ཚུལ་དེའི་ཐད་རྒྱ་ནག་སྲིད་ཁྲིམས་སློབ་ཆེན་གྱི་དགེ་རྒན་ཟུར་པ་ཐིན་པའོ་ལགས་ཀྱིས། སྤྱིར་བཏང་གསར་འགྱུར་བརྒྱུད་སྒྲོག་གི་བཅའ་ཁྲིམས་གཏན་འབེབས་བྱེད་པར་བསམ་ཚུལ་མི་འདྲ་བ་གཉིས་སླེབ་ཀྱི་ཡོད་པ་རེད། ཁག་ཅིག་གིས་རྒྱ་ནག་གི་གསར་འགྱུར་བརྒྱུད་སྒྲོག་བྱ་བར་བཅའ་ཁྲིམས་ཀྱི་གཞི་རྟེན་མེད་པར་དབུས་དྲིལ་བསྒྲཊ་ལྷན་ཁང་དང་། གསར་འགྱུར་ལས་སྒྲུབ་ཁང་སོགས་ཀྱི་ངག་ཐོག་བཀའ་བཀོད་འོག་དཀའ་རྙོག་མང་པོ་བྱུང་བཞིན་ཡོད་སྟབས། གསར་འགྱུར་བརྒྱུད་སྒྲོག་གི་བཅའ་ཁྲིམས་ཤིག་གསར་དུ་གཏན་འབེབས་བྱས་ན་ཡག་པོ་ཡོད་ལུགས་བརྗོད་ཀྱི་ཡོད་པ་དང་། ཡང་ཁག་ཅིག་གིས་ད་ལྟའི་རྒྱ་ནག་གི་ཆབ་སྲིད་སྒྲོམ་གཞིར་སྤྱི་ཡོངས་ནས་འཕོ་འགྱུར་མ་ཕྱིན་པའི་གནས་བབ་འོག གསར་འགྱུར་བརྒྱུད་སྒྲོག་གི་བཅའ་ཁྲིམས་ཤིག་གཏན་འབེབས་བྱས་པ་ཡིན་ན། གསར་འགོད་རང་དབང་ལ་སྟངས་འཛིན་ཤུགས་ཆེན་ཐེབས་རྒྱུ་ཡིན་པས་བཅའ་ཁྲིམས་དེ་གཏན་འབེབས་བྱེད་མི་འོས་སྐོར་བརྗོད་ཀྱིན་ཡོད་པ་རེད། ཕྱི་ལོ་༡༩༩༠ ལོར་རྒྱ་གཞུང་གིས་འདུ་འཛོམས་ཁྲོམ་སྐོར་གྱི་བཅའ་ཁྲིམས་གཏན་འབེབས་བྱས་ཏེ། འདུ་འཛོམས་ཁྲོམ་སྐོར་ལ་སྟངས་འཛིན་དང་བཀག་སྡོམ་ཤུགས་ཆེན་བྱེད་བཞིན་ཡོད་པ་ལྟར། གསར་འགྱུར་བརྒྱུད་སྒྲོག་གི་བཅའ་ཁྲིམས་གཏན་འབེབས་བྱས་ན་གསར་འགོད་རང་དབང་ལ་སྔར་ལས་སྟངས་འཛིན་བྱ་རྒྱུ་ཡིན་སྐོར་བརྗོད་འདུག

གསར་འགོད་པ། པདྨ་མཚོ།

དུས་བབ་དྲ་བ་ནས།།