ཨ་རུ་ན་ཅཱལ་རྒྱ་གར་གྱི་ཆ་ཤས་རེད།

ཉེ་ཆར་ཉི་ཧོང་སྲིད་བློན་རྒྱ་གར་ནང་སྐོར་སྐྱོད་དང་བསྟུན་ཏེ་ཨ་རུ་ན་ཅཱལ་རྒྱ་གར་གྱི་ཆ་ཤས་ཤིག་ཡིན་སྐོར་བརྗོད་པ་དེར་ཁ་སང་རྒྱ་ནག་ཕྱི་སྲིད་ལྷན་ཁང་གིས་ལན་འདེབས་བྱས་འདུག

ཟླ་འདིའི་ཚེས་ ༡༧ དང་ ༡༨ བཅས་ཉིན་གཉིས་རིང་ཉི་ཧོང་གི་ཕྱི་སྲིད་བློན་ཆེན་

ཕུ་མེ་ཀི་ཤེ་ཌ་ (Fumio Kishida) རྒྱ་གར་རྒྱལ་ས་ལྡི་ལིར་རྒྱལ་དོན་སྐོར་སྐྱོད་བྱས་ཏེ། རྒྱ་གར་གྱི་སྲིད་བློན་ནཱ་རེན་ཌ་མུ་དྷེ་དང་ཕྱི་སྲིད་བློན་ཆེན་ལྕམ་སུ་ཤཱི་མ་རྣམ་གཉིས་ཐུག་འཕྲད་བྱས་ཏེ། ཞི་བདེ་རྒྱ་མཚོའི་མངའ་ཁུལ་ནང་བརྟན་ལྷིང་ཡོང་ཐབས་དང་། མཉམ་འབྲེལ་རྒྱལ་ཚོགས་བདེ་འཇགས་ལྷན་ཚོགས་ཀྱི་སྒྲིག་གཞི་ཁག་ཅིག་ལ་བཅོས་བསྒྱུར་གཏོང་རྒྱུར་མཉམ་ལས་བྱ་རྒྱུ་བཅས་ལ་གྲོས་མོལ་བྱས་ཡོད་པ་མ་ཟད། རྒྱལ་ཁབ་གཉིས་བར་དམག་སྦྱོང་དང་ཚོང་དོན་གོང་འཕེལ་གཏོང་རྒྱུ་དང་། ཉི་ཧོང་གཞུང་གིས་རྒྱ་གར་བྱང་ཤར་མངའ་སྡེའི་འཛུགས་སྐྲུན་ལས་གཞི་ཁག་ལ་རོགས་དངུལ་སྤྲོད་རྒྱུ་བཅས་ཀྱི་ཐོག་གྲོས་མོལ་བྱས་རྗེས། རྒྱལ་ས་ལྡི་ལིར་རྟེན་གཞི་བྱས་པའི་རྒྱ་གར་གྱི་རྒྱལ་སྤྱིའི་ལས་དོན་ཞིབ་འཇུག་ལྟེ་གནས་སུ་བསྐྱོད་དེ། རྒྱལ་ཁབ་གཉིས་བར་གྱི་འབྲེལ་ལམ་ཡར་རྒྱས་གཏོང་ཐབས་ཐོག་གཏམ་བཤད་དང་འབྲེལ་དྲི་བ་དྲིས་ལན་བྱེད་སྐབས། ཁོང་གིས་ཨ་རུ་ན་ཅཱལ་ནི་རྒྱ་གར་གྱི་ཆ་ཤས་ཤིག་ཡིན་ཡང་། རྒྱ་ནག་གཞུང་གིས་ཁོ་རང་ཚོའི་ཡིན་ཚུལ་བརྗོད་པ་དེ་དྲང་བདེན་མིན་སྐོར་བརྗོད་འདུག

ཁ་སང་རྒྱ་ནག་ཕྱི་སྲིད་ལྷན་ཁང་གི་མགྲིན་ཚབ་པ་ཧོང་ལི་ (Hong Lei) ཡིས་ “ང་ཚོས་ཉི་ཧོང་ཕྱོགས་ནས་རྒྱ་དཀར་ནག་གཉིས་ཀྱིས་གྲོས་མོལ་བརྒྱུད་ས་མཚམས་ཀྱི་རྩོད་ཉོག་སེལ་ཐབས་བྱེད་བཞིན་ཡོད་པ་དག་ལ་ཤེས་རྟོགས་ཐུབ་པ་བྱས་ཏེ། མ་འོངས་པར་འཁྲུག་རྐྱེན་སློང་གཞིའི་སྐད་ཆ་དེ་འདྲ་མ་བཤད་པར་དངོས་ཐོག་བདེན་ འཚོལ་བྱེད་དགོས་པ་མ་ཟད། ཉེ་ཆར་རྒྱ་གར་ནང་བཤད་པ་དག་ལ་གཞུང་ཕྱོགས་ནས་གསལ་བཤད་བྱེད་དགོས། གང་ཡིན་ཞེ་ན། ད་ལྟ་རྒྱ་གར་གྱི་མངའ་འོག་ཏུ་ཡོད་པའི་ཨ་རུ་ན་ཅཱལ་ཁྱབ་ཁོངས་མོན་ཡུལ་ (Monyul) དང་གློ་ཡུལ (Loyul)། ཙ་ཡུལ་(Tsayul) བཅས་བོད་རང་སྐྱོང་ལྗོངས་ཀྱི་མངའ་ཁོངས་ཡིན”ཞེས་བརྗོད་འདུག

དེ་རིང་ཉི་ཧོང་ཕྱི་སྲིད་ལྷན་ཁང་གིས་གནད་དོན་དེའི་ཐོག་རོའུ་ཌར་གསར་ལམ་ཐོག “ཨ་རུ་ན་ཅཱལ་མངའ་སྡེ་ནི་རྒྱ་གར་གྱི་དབང་བསྒྱུར་འོག་ཡོད་པ་དོན་དངོས་ཡིན་པ་མ་ཟད། ད་ལྟ་རྒྱ་གར་དང་རྒྱ་ནག་གིས་གྲོས་མོལ་བརྒྱུད་ས་མཚམས་ཀྱི་དཀའ་རྙོག་སེལ་ཐབས་བྱེད་བཞིན་ཡོད་སྟབས། བློན་ཆེན་མཆོག་གིས་དོན་དངོས་གནས་ཚུལ་གཞི་ལ་བཅོལ་ནས་ལན་འདེབས་བྱས་པ་རེད”ཅེས་བརྗོད་འདུག

འདས་པའི་ཟླ་ ༡༨ ལྷག་རིང་རྒྱ་ནག་དང་ཉི་ཧོང་བར་ལྷོ་རྒྱ་ནག་རྒྱ་མཚོའི་བདག་དབང་གནད་དོན་དང་། རྒྱ་ནག་གཞུང་གིས་ཞི་བདེ་རྒྱ་མཚོའི་གནད་དོན་བཅས་ཀྱི་ཐོག་རྩོད་རྙོག་འབྱུང་བཞིན་ཡོད།

ཐེངས་འདིར་ཉི་ཧོང་གི་ཕྱི་སྲིད་བློན་ཆེན་གྱིས་རྒྱ་དཀར་ནག་གཉིས་བར་ཨ་རུ་ནཱ་ཅལ་མངའ་སྡེའི་མོན་རྟ་དབང་གཙོས་ས་ཁུལ་ཁག་ཅིག་གི་བདག་དབང་གནད་དོན་དང་། ས་མཚམས་རྩོད་ཉོག་འབྱུང་གི་ཡོད་མེད་ལ་མ་ལྟོས་པར། ཨ་རུ་ན་ཅཱལ་ནི་རྒྱ་གར་གྱི་ས་ཁུལ་ཡིན་སྐོར་དང་། ནཱ་རེན་ཌ་མུ་དྷེས་བཏོན་པའི་རྒྱ་གར་ནང་མ་འཛུགས་བྱེད་བར་ཤོག་ཅེས་པའི་དཔལ་འབྱོར་སྲིད་ཇུས་ (Modinomics) དང་། ཤིང་ཛོ་ཨ་བྷེས་ཁྲོམ་རྭ་གསར་པ་གཏོད་དེ། རྒྱལ་སྤྱིའི་ཁྲོམ་རྭ་ནང་མཉམ་སྐྱོད་བྱེད་ཐུབ་པ་བྱ་དགོས་ཞེས་པའི་དཔལ་འབྱོར་སྲིད་ཇུས་ (Abenomics) གཉིས་མཉམ་ལས་བྱས་ཏེ་ཐུན་མོང་གི་དགྲ་བོར་ཁ་གཏད་གཅོག་དགོས་སྐོར་སོགས་བརྗོད་ཡོད་འདུག

གསར་འགོད་པ། དོན་གྲུབ།

དུས་བབ་དྲ་བ་ནས།།