བརྒྱུད་རིམ་ཞིག་གི་ཐོག་ནས་བཀའ་ཤག་གི་ཐག་གཅོད་དེར་འགྲིག་གི་མི་འདུག་ལབ་མེད།

འཛིན་རིམ་བཅུ་པའི་སློབ་ཕྲུག་ཁག་ཅིག་ལ་མགོ་ཁྲིད་ནུས་པ་སྐྱེད་སྲིང་གི་ཟབ་སྦྱོང་ཐོག ཤེས་རིག་བཀའ་བློན་མཆོག་གིས་སྔོན་ཆད་ཨ་རིའི་གཞུང་གིས་བཙན་བྱོལ་བོད་མིའི་ཤེས་ཡོན་ཐད་ཨ་སྒོར་ས་ཡ་ ༢ ཡི་རོགས་དངུལ་རག་ཡོད་པ་ལྟར། ད་ཆར་ཁེ་ན་ཌ་ནས་ཀྱང་ཨ་སྒོར་ས་ཡ་ ༢ ཡི་རོགས་དངུལ་ཡོང་གི་ཡོད་སྐོར་གསུངས་

འདུག

བོད་མིའི་སྒྲིག་འཛུགས་ཤེས་རིག་ལས་ཁུངས་ཀྱི་གོ་སྒྲིག་འོག དྷ་ཤོད་བོད་ཁྱིམ་སློབ་གྲྭའི་ཚོགས་ཁང་དུ་རྒྱ་བལ་གཉིས་ནས་བོད་པའི་གཏན་ཉིན་སློབ་གྲྭ་ཁག་གི་འཛིན་རིམ་བཅུ་པའི་སློབ་ཕྲུག་ཁག་ཅིག་ལ་༼འགོ་ཁྲིད་ནུས་པ་སྐྱེད་སྲིང་གནང་ཕྱོགས་དང་འབྲེལ་བའི་ཟབ་སྦྱོང་།༽ཐེངས་གཉིས་པ་དབུ་འཛུགས་གནང་ཡོད་ཅིང་། ཁ་སང་སྐུ་མགྲོན་གཙོ་བོར་སྲིད་སྐྱོང་བློ་བཟང་སེང་གེ་མཆོག་དང་ཤེས་རིག་བཀའ་བློན་དངོས་གྲུབ་ཚེ་རིང་རྣམ་གཉིས་ཕེབས་ཡོད།

ཟབ་སྦྱོང་དབུ་འཛུགས་ཐོག་ཤེས་རིག་བཀའ་བློན་མཆོག་གིས་ཤེས་རིག་ལས་ཁུངས་ཀྱི་ངོས་ནས་ ༢༠༡༤ ལོར་བཙན་བྱོལ་བོད་མིའི་སློབ་གྲྭ་ཡོངས་རྫོགས་ཀྱི་འཛིན་གྲྭ་བཅུ་པའི་སློབ་ཕྲུག་ ༣༡༠ ལ་མགོ་ཁྲིད་ནུས་པ་སྐྱེད་སྲིང་གི་ཟབ་སྦྱོང་སྤྲད་པར་ཕན་ཐོགས་ཆེན་པོ་བྱུང་ཡོད་སྟབས། ད་རེབ་སླར་ཡང་སློབ་ཕྲུག་ ༣༠༠ ལྷག་ལ་མགོ་ཁྲིད་ནུས་པ་སྐྱེད་སྲིང་གི་ཟབ་སྦྱོང་ཐེངས་གཉིས་པ་གོ་སྒྲིག་ཞུས་སྐོར་དང་འབྲེལ་ནས་གསུངས་དོན། ང་ཚོའི་ཁ་གཏད་རྒྱ་ནག་གཞུང་ལ་ཆ་མཚོན་ན། མི་འབོར་དང་དཔལ་འབྱོར། དྲག་ཤུགས་སོགས་གང་ཅིའི་ཐད་ཁ་གཏད་གཅོག་ཐབས་ཁག་པོ་ཆགས་ཡོད་ཀྱང་། ང་ཚོས་སྤུས་ཚད་དང་ཤེས་ཚད། ནུས་པ་བཅས་ཀྱི་ཐོག་ནས་ཏན་ཏན་ཁ་གཏད་གཅོག་ཐུབ་ཀྱི་རེད། བོད་ཀྱི་གནད་དོན་ནི་ཉིན་རེ་བཞིན་ཛ་དྲག་ཆེ་རུ་འགྲོ་བཞིན་ཡོད་སྟབས། མ་འོངས་པར་འགན་འཁུར་གནང་མཁན་ནི་སློབ་གྲྭ་ཁག་གི་སློབ་ཕྲུག་ལས་གཞན་སུ་ཡང་མེད་སྟབས། ཁྱེད་རང་ཚོ་མཐོང་བའི་སྐབས་སུ་ང་ཚོ་དགའ་བ་དང་། ༧གོང་ས་མཆོག་ཐུགས་དགྱེས་པ། གཞིས་བྱེས་བོད་མི་རྣམས་སྤོབས་པ་སྐྱེ་བ་དེ་འདྲ་ཡོང་གི་ཡོད་སྟབས། ཁྱེད་རང་ཚོ་ཧྲ་ཏག་ཏག་ཡག་པོ་མ་བྱས་ན། ང་ཚོ་བློ་ཕམ་དང་༧གོང་ས་མཆོག་ཐུགས་ཕམ་ཡོང་རྒྱུ་ཡིན་པ་མ་ཟད། བོད་ནང་གི་རྒྱ་ཆེའི་མང་ཚོགས་ཚོ་བློ་ཞུམ་པའི་གནས་སྟངས་ཆགས་ངེས་རེད། དཔེར་ན། དྲག་པོའི་སྒྲིག་འཛུགས་ནང་སྐད་ཆ་ཤོད་སྲོལ་ཞིག་ཡོད་པ་ནི། དམག་མི་འབུམ་ཡོད་ཀྱང་ཞེད་ཀྱི་མི་འདུག་ཀྱང་། དམག་དཔོན་དྲག་གྲས་བརྒྱ་སྐོར་དེ་འདྲ་ཡོད་ན་ཞེད་ཀྱི་འདུག་ལབ་སྲོལ་ཡོད་པ་ལྟར། མགོ་ཁྲིད་མཁན་དེ་ཧ་ལས་པའི་གལ་ཆེན་པོ་ཆགས་ཡོད། ད་ལྟ་རྒྱ་ནག་གཞུང་གིས་ཀྱང་བོད་པའི་མི་རབས་གསར་པ་ཚོར་ལྟ་བསྡད་ཡོད་སྟབས། སོ་སོའི་ཤེས་ཡོན་ཐོག་འབད་བརྩོན་བྱས་ཏེ་མ་འོངས་པར་མི་རིགས་ཀྱི་རྩ་དོན་དང་རྒྱལ་སྤྱིའི་སྡིངས་ཆའི་ཐོག་ལས་དོན་སྒྲུབ་མཁན་གྱི་མགོ་ཁྲིད་དེ་འདྲ་ཆགས་ཐུབ་པ་བྱེད་དགོས། ཞེས་སོགས་གསུངས་འདུག

ཤེས་རིག་བཀའ་བློན་མཆོག་གིས་ཤེས་ཡོན་སློབ་གསོའི་ཐད་གསུངས་དོན། ལོ་གཉིས་གོང་ལ་ཨ་རིའི་རོགས་སྐྱོར་ཚན་པས་ཤེས་ཡོན་ཐོག་ཨ་སྒོར་ས་ཡ་༢ ཡི་རོགས་སྐྱོར་སྤྲོད་རྒྱུའི་ལས་འཆར་ཐོན་པ་ལྟར་ལག་བསྟར་བྱེད་ཐུབ་པ་བྱུང་ཡོད་པ་མ་ཟད། ལྷག་པར་དུ་ཤེས་རིག་ལས་ཁུངས་ངོས་ནས་འཛིན་གྲྭ་༡༢ ཀྱི་སློབ་མ་ཚོར་དམིགས་བསལ་སྦྱོང་བརྡར་དང་། འཛིན་གྲྭ་ ༡༢ ཐོན་རྗེས་ཀྱང་དམིགས་བསལ་ཚུད་རྒྱུགས་གཏོང་དགོས་པའི་འགྲན་བསྡུར་ཆེད་སྦྱོང་བརྡར་སྤྲོད་རྒྱུ་སོགས་ཁྱབ་བསྒྲགས་བྱས་ཡོད། སྔོན་མ་ཕ་མ་ཚོས་གོ་སྐབས་དེ་འདྲ་རེ་བ་རྒྱག་རྒྱུ་ཕར་ཞོག་གོ་མྱོང་ཡང་ཡོད་པ་མ་རེད། ད་ལྟ་ཕྱི་རྒྱལ་ལ་སློབ་སྦྱོང་འགྲོ་རྒྱུ་སོགས་སློབ་མ་རང་ཉིད་ཀྱི་འཇོན་ན་གོ་སྐབས་ཡོད་པ་མ་ཟད་ཐོབ་ཀྱི་ཡང་ཡོད་སྟབས། ད་ལྟ་ཁྱེད་ཚོ་གཞི་རིམ་སློབ་གྲྭའི་ནང་དཀྱོག་མཚམས་ལྟ་བུ་ཞིག་ནང་སླེབ་ཡོད་སྟབས། ད་རེབ་ཟབ་སྦྱོང་འདི་འཛིན་རིམ་བཅུ་པའི་སློབ་ཕྲུག་ཆེད་དུ་གོ་སྒྲིག་བྱས་པ་རེད། ད་ལྟ་ང་ཚོས་ཕྱི་ཕྱོགས་ལ་གསལ་བསྒྲགས་བྱས་ན་འགྲིག་གི་མི་འདུག་མ་གཏོགས། ང་ཚོར་ཁེ་ན་ཌ་གཞུང་གིས་ཤེས་ཡོན་སློབ་གསོ་འཕེལ་རྒྱས་གཏོང་ཆེད་ཨ་སྒོར་ས་ཡ་ ༢ ཀྱི་རོགས་དངུལ་ཐོན་ཡོང་གི་ཡོད་སྟབས། དེ་འདྲའི་ལས་འཆར་དེ་ཚོ་ཞལ་ནས་གསུངས་པ་ཙམ་མིན་པར་དོན་དངོས་ཐོག་ལག་ལེན་འཁེལ་ཡོང་གི་ཡོད་པ་རེད། ཅེས་སོགས་གསུངས་འདུག

དེའི་རྗེས་སྲིད་སྐྱོང་མཆོག་གིས་འཛིན་རིམ་ ༡༢ ཀྱི་གྲུབ་འབྲས་དང་འབྲེལ་བའི་ཐོག་གསུངས་དོན། དེ་རིང་ ༢༠༡༥ མགོ་བཙུགས་ནས་ཉིན་གཉིས་པ་དེ་ཆགས་ཡོད་ལ། བཀའ་ཤག་གི་ཐོག་ནས་ལོ་འདིའི་དབུ་འབྱེད་ཀྱི་མཛད་སྒོ་ཐེངས་དང་པོ་དེ་ཆགས་ཡོད་པ་མ་ཟད། ཤེས་རིག་ལས་ཁུངས་ཀྱི་ ༢༠༡༥ ལོའི་ལས་གཞི་ཐོག་མ་དེའང་ཆགས་ཡོད་སྟབས། ངས་འདི་ནི་རྟེན་འབྲེལ་བཟང་པོ་ཞིག་རེད་བསམ་གྱི་འདུག རྣམ་པ་ཚོས་ལོ་གསར་པའི་ཁས་ལེན་དམ་བཅའ་དེ་མ་འོངས་མགོ་ཁྲིད་བྱེད་ཀྱི་ཡིན་ཞེས་པ་དེ་འཇོག་དགོས། དེ་སྔོན་ནས་བཟུང་བཀའ་ཤག་གི་ངོས་ནས་ཤེས་ཡོན་དེ་གལ་འགངས་ཆེན་པོ་ཞིག་ལ་ངོས་འཛིན་ཞུ་བཞིན་ཡོད་པ་ལྟར། ཤེས་རིག་ལས་ཁུངས་ཀྱི་ངོས་ནས་ཀྱང་ཤེས་ཡོན་ཐོག་སྔར་ལྷག་གོ་སྐབས་དང་མཐུན་རྐྱེན་བསྐྲུན་བཞིན་ཡོད། ༢༠༡༠ ལོར་རྒྱ་གར་རྒྱལ་ཡོངས་ཀྱི་འཛིན་རིམ་ ༡༢ ཀྱི་ཡིག་ཚད་ཁྲོད་བོད་རིགས་སློབ་ཕྲུག་ཁྲོད་བརྒྱ་ཆ་ ༨༠ ཡན་ལོན་མཁན་སློབ་མ་ ༡༢༧ བྱུང་ཡོད་ཀྱང་། ༢༠༡༤ ལོར་སློབ་མ་ ༣༢༡ བྱུང་ཡོད་པ་མ་ཟད། བརྒྱ་ཆ་ ༩༠ ཡན་ལོན་མཁན་སྡེ་ཚན་རེ་ནས་གསུམ་རེ་བྱུང་སྟེ་དགའ་ལྡན་ཕོ་བྲང་གི་བྱ་དགའ་ཐོབ་ཡོད་ཀྱང་། ༢༠༡༣ ལོར་མ་སུ་རི་བོད་ཁྱིམ་གྱི་སློབ་མ་བསྟན་འཛིན་ཆོས་སྐྱིད་ཀྱིས་བརྒྱ་ཆ་ ༩༥།༤ ལོན་ཡོད་ཀྱང་། ༢༠༡༤ ལོར་སུ་གང་ལ་བརྒྱ་ཆ་དེ་འདྲ་རག་མེད། ཡིན་ཡང་ད་ལན་མོན་གྷོ་ཌི་སློབ་གྲྭའི་སློབ་མ་ཞིག་གིས་བརྒྱ་ཆ་ ༩༤།༦ ལོན་ཡོད་ཀྱང་། ཁོ་རང་གི་མིང་ལ་ཤཱི་ཝ་ཎཱི་ཅེར་དྷི་རི་ཟེར་བ་ལས་སྒྲོལ་མ་དང་རྡོ་རྗེ་ལབ་ཀྱི་མི་འདུག ཧི་མ་ཅལ་མངའ་སྡེའི་གཞུང་གིས་བོད་ཕྲུག་ཚོར་ཕྱི་ལུགས་ཀྱི་སྨན་པའི་སློབ་སྦྱོང་ཆེད་རྐུབ་སྟེགས་གསུམ་གནང་གི་ཡོད་པ་མ་ཟད། ཚུད་རྒྱུགས་སྐབས་སྤྱི་ཡོངས་སློབ་ཚན་ཁག་གི་ཕྱོགས་བསྡོམས་སྐར་གྲངས་ ༧༢༠ ནས་བོད་པར་དམིགས་བསལ་བཏང་ནས་སྐར་གྲངས་ ༣༦༠ ལས་ལོན་དགོས་ཀྱི་མེད་ཀྱང་། ད་ལོ་སློབ་མ་སུ་གཅིག་ཚུད་མེད་སྟབས་རྐུབ་སྟེགས་དེ་དག་སློབ་མ་གཞན་ལ་ཤོར་སྟབས། མ་འོངས་པར་སློབ་ཕྲུག་ཚོས་སློབ་སྦྱོང་ཐོག་འབད་བརྩོན་བྱས་ནས་ཤེས་རིག་ལས་ཁུངས་ཀྱིས་བསྐྲུན་པའི་མཐུན་རྐྱེན་དེ་དག་ཆུ་ཟོས་སུ་མི་འགྲོ་བར་གནང་དགོས་རྒྱུ་ཧ་ཅང་གལ་ཆེན་པོ་ཆགས་ཡོད། ལོ་བཅུའི་སྔོན་ལ་ཤེས་རིག་ལས་ཁུངས་ངོས་ནས་སློབ་ཕྲུག་ ༡༣༠ ལྷག་ལ་སློབ་ཡོན་འབུམ་ ༨༩ གནང་གི་ཡོད་ཀྱང་། ན་ནིང་སློབ་ཕྲུག་ ༥༠༧ ལ་སློབ་ཡོན་འབུམ་ ༣༤༠ ལྷག་སྤྲད་ཡོད་པ་རེད། ཅེས་སོགས་གསུངས་འདུག

དེ་རིང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་བཙན་བྱོལ་བོད་མིའི་དམངས་གཙོའི་སྐོར་ལ་གཏམ་བཤད་གནང་དོན། ད་ཐེངས་ཀྱི་སྲིད་སྐྱོང་འོས་འདེམས་དེར་བལྟས་ཚེ་སྲིད་འཛིན་གྱི་ལམ་ལུགས་ཐོག་འགྲོ་གི་ཡོད་པ་འདྲ་པོ་ཆགས་ཡོད་ཀྱང་། ང་ཚོ་སྲིད་འཛིན་ལམ་ལུགས་རང་ཐོག་འགྲོ་གི་མེད། དེ་བཞིན་གྲོས་ཚོགས་ལམ་ལུགས་ཐོག་འགྲོ་གི་ཡོད་དམ་བརྗོད་ན་གྲོས་ཚོགས་ལམ་ལུགས་ཐོག་ལའང་འགྲོ་གི་མེད་སྟབས། ང་ཚོ་ལམ་ལུགས་དེ་གཉིས་ཀྱི་དཀྱིལ་མཚམས་ལ་ལྷག་བསྡད་པ་འདྲ་པོ་ཞིག་ཆགས་ཡོད་སྟབས། ད་ལྟ་ང་ཚོའི་དམངས་གཙོའི་ལམ་ལུགས་ལ་ཁྱད་ཆོས་ག་རེ་ཡོད་དམ་ཞེ་ན། དང་པོ། ང་ཚོར་ས་ཁུལ་གྱི་འོས་བསྡུ་བྱ་རྒྱུའི་ལམ་ལུགས་དེ་མེད་སྟབས། མི་གཅིག་ལ་འོས་གཅིག་ཟེར་བའི་དམངས་གཙོའི་ལམ་ལུགས་དེའི་ཐོག་ཤར་བསྐྱོད་བྱེད་ཐུབ་ཀྱི་ཡོད་པ་མ་རེད། ང་ཚོའི་སྤྱི་འཐུས་གདམ་སྟངས་དེ་ཆོལ་ཁ་དང་ཆོས་ལུགས་སོ་སོ་ནས་འདེམས་ཀྱི་ཡོད། སྤྱིར་བཏང་ཡུ་རོབ་དང་ཨ་རིའི་སྤྱི་འཐུས་དེ་དག་ས་ཁུལ་གྱི་སྤྱི་འཐུས་ཆགས་ཀྱི་ཡོད་ཀྱང་། བྱང་ཡུ་རོབ་ནས་གཅིག་དང་ལྷོ་ཡུ་རོབ་གཅིག་ཡིན་ཟེར་ནས་འདེམས་ཀྱི་མེད་པ་མ་ཟད། བྱང་ཨ་རིའི་སྤྱི་འཐུས་ཀྱང་ཨ་རི་ནས་གཅིག་དང་ཁེ་ན་ཌ་ནས་གཅིག་ཡིན་ཟེར་བའི་ལམ་ལུགས་མེད་སྟབས། ཨ་རིའི་བོད་མི་ཡོངས་རྫོགས་ཀྱི་སྤྱི་འཐུས་གཉིས་དང་ཁེ་ན་ཌའི་བོད་མི་ཡོངས་རྫོགས་ཀྱི་སྤྱི་འཐུས་གཅིག་འདེམས་ཀྱི་ཡོད་སྟབས། ང་ཚོར་ས་ཁུལ་གྱི་སྤྱི་འཐུས་མེད་སྟབས། མི་གཅིག་ལ་འོས་གཅིག་ཟེར་བའི་ཡོང་གི་མེད། ད་ལྟ་ཨ་རི་དང་ཡུ་རོབ་ནང་ཡོད་མཁན་གྱི་བོད་པ་ཡིན་ཚེ། འོས་ཤོག་གཉིས་རེ་ལྡུག་རྒྱུ་ཡོད་ཀྱང་། ང་ཚོ་རྒྱ་བལ་འབྲུག་གསུམ་ནང་སྡོད་མཁན་གྱི་བོད་མི་སྐྱ་བོ་ཚོ་ཡིན་ན་ཆོལ་ཁ་སོ་སོ་གཞིར་བཞག་འོས་ ༡༠ རེ་དང་གྲྭ་བཙུན་ཚོར་འོས་ ༡༢ རེ་ལྡུག་རྒྱུ་ཡོད་སྟབས། ཡུ་རོབ་ཁུལ་གྱི་བོད་མི་ཚོར་འོས་ ༢ ལས་ལྡུག་རྒྱུ་མེད་ཀྱང་། རྒྱ་བལ་འབྲུག་གསུམ་གྱི་བོད་མི་སྐྱ་བོ་ཚོར་འོས་ ༡༠ དང་སེར་མོ་བ་ཚོར་འོས་ ༡༢ རེ་ལྡུག་རྒྱུའི་ཐོབ་ཐང་ཡོད་སྟབས། མི་རེར་འོས་གཅིག་རེ་ཟེར་བ་དེ་ཏག་ཏག་གཅིག་ཡོང་གི་མེད་པ་རེད། གཞན་ཞིག་ནི་ང་ཚོར་ཆབ་སྲིད་ཚོགས་པ་མེད་སྟབས། གཞུང་འཛིན་དང་ཕྱོགས་འགལ་ཚོགས་པ་ཟེར་བ་དེ་འདྲ་མེད་པ་རེད། ཅེས་སོགས་གསུངས་འདུག

མཇུག་ཏུ་སློབ་ཕྲུག་ཞིག་གིས་སྤེལ་སྐོབ་འཚོ་བྱེད་སྨན་ཁང་དུ་ལྐོག་ཟ་རུལ་སུངས་དང་འབྲེལ་བའི་རྙོག་གླེང་ཞིག་བྱུང་བའི་སྐོར་ལ་དྲི་བ་བཏོན་པའི་ལན་དུ་ཚོགས་གཙོ་མཆོག་གིས། ང་ཚོས་སྤེལ་ཀོབ་འཚོ་བྱེད་སྨན་ཁང་དང་འབྲེལ་བའི་ཐོག་ནས་ཞིབ་འཇུག་ཚོགས་ཆུང་གཉིས་བཙུགས་པ་རེད། ཞིབ་འཇུག་ཚོགས་ཆུང་དང་པོ་དེ་འཕྲོད་བསྟེན་ལས་ཁུངས་ཀྱིས་བཙུགས་ཡོད་ཀྱང་། འཕྲོད་བསྟེན་བཀའ་བློན་གྱིས་རྩིས་མེད་བཏང་བ་རེད། ཞིབ་འཇུག་ཚོགས་ཆུང་གཉིས་པ་དེ་བཀའ་ཤག་གིས་བཙུགས་ཏེ། ཆད་པ་བསྒྲུབ་དགོས་པ་བསྒྲུབས་པ་དང་ལས་བྱེད་གནས་སྤོས་གཏོང་དགོས་པ་བཏང་བ་བཅས་ཀྱི་བཅད་ཁྲ་བཏང་ཡོད་ཀྱང་། འགན་འཛིན་ལྷག་པ་ཚེ་རིང་གིས་དངུལ་ལྐོག་ཟ་བྱས་བཞག་ཟེར་བ་ཞིབ་འཇུག་ཚོགས་ཆུང་གཉིས་ཀས་ཁུངས་བསྐྱལ་ཐུབ་ཡོད་པ་མ་རེད། ཅ་ལག་གམ་འཕྲུལ་ཆས་གཅིག་ཉོས་ནས་དེའི་ལོ་རེའི་བདག་སྐྱོང་ལོ་གཅིག་མ་བཞག་པར་ལོ་ལྔ་དྲུག་བཞག་ཡོད་སྟབས། ཅ་ལག་གཅིག་ལ་ཧིན་སྐོར་ ༡༣༠༠༠ གནས་ཚེ་བདག་སྐྱོང་གི་རིན་གོང་ཡང་ཧིན་སྒོར་ ༡༣༠༠༠ ཆགས་ཏེ་ཅ་ལག་གི་རིན་གོང་དང་བདག་སྐྱོང་རིན་འབབ་འདྲ་པོ་ཆགས་པའི་གནས་ཚུལ་བྱུང་ཡོད་སྟབས། ང་ཚོས་འཛིན་སྐྱོང་གི་བརྒྱུད་རིམ་ཞིག་གི་ཐོག་ནས་བཀའ་ཤག་གིས་ཐག་གཅོད་གནང་བ་དེར་འགྲིག་གི་མི་འདུག་གང་ཡང་ལབ་མེད། ཐག་གཅོད་གནང་བཞག་པ་དེར་ང་ཚོས་འགྲིག་འདུག་དང་མི་འདུག་གང་ཡང་ཞུ་རྒྱུ་མིན། དོ་བདག་ཁོ་རང་ལ་མ་འགྲིག་པ་ཡིན་ན་ཁྲིམས་ཁང་ལ་འགྲོ་རྒྱུ་ཞིག་ཡོད་ཡོད་པ་རེད། ཅེས་གསུངས་འདུག

གསར་འགོད་པ། དོན་གྲུབ།
དུས་བབ་དྲ་བ་ནས།།