པེ་ཅིན་ནས་མཱོ་སུ་ཁོ་ལ་ལྕཊ་ལམ་མཐུད་རྒྱུ་རེད།

དེ་རིང་རྒྱ་ནག་གཞུང་གིས་རྒྱལ་ས་པེ་ཅིན་ནས་ཨུ་རུ་སུའི་རྒྱལ་ས་བར་མྱུར་རྒྱུག་མེ་འཁོར་ལྕགས་ལམ་བཟོ་སྐྲུན་བྱ་རྒྱུ་ཡིན་སྐོར་བསྒྲགས་འདུག          སུ་ཁཱོའི་བར་སྤྱི་ལེ་ ༧༠༠༠ཙམ་ཡོད་ཅིང་ཆུ་ཚོད་ ༤༨ ནང་བསླེབ་ཐུབ་པའི་མྱུར་རྒྱུག་མེ་འཁོར་ལྕགས་ལམ་བཟོ་སྐྲུན་བྱ་རྒྱུ་ཡིན་པ་
དང་། མ་འོངས་པར་ཞི་བདེ་རྒྱ་མཚོའི་འོག་ཏུ་སྦུགས་ལམ་བརྒྱུད་མེ་འཁོར་ལྕགས་ལམ་བཟོ་སྐྲུན་བྱས་ཏེ། ཨ་རི་དང་ཁེ་ན་ཌར་མཐུད་དེ་དཔལ་འབྱོར་འབྲེལ་ལམ་གོང་མཐོར་གཏོང་ཐབས་བྱས་པ་ཞིག་ཡིན་འདུག

འདིའི་ཐད་རྒྱ་ནག་བཟོ་སྐྲུན་ཚན་རྩལ་ལྟེ་གནས་ཁང་གི་རིགས་གཅིག་མཁས་དབང་ཝང་མིང་ (Wang Meng-shu) གིས་རྒྱ་གར་དུས་བབ་ཐོག་བརྗོད་དོན། “མྱུར་རྒྱུག་མེ་འཁོར་ལྕགས་ལམ་བཟོ་སྐྲུན་གྱི་ལས་འཆར་འདི་རྒྱ་ནག་བྱང་ཤར་ས་ཁུལ་བརྒྱུད་ཨུ་རུ་སུའི་སི་བྷེར་ཡཱ་དང་། དེའི་རྗེས་ཞི་བདེ་རྒྱ་མཚོའི་འོག་གི་སྦུགས་ལམ་བརྒྱུད་ཨ་རིའི་མངའ་སྡེ་ཨཱ་ལཱ་སེ་ཁཱ་དང་ཁེ་ན་ཌ་བར་མཐུད་རྒྱུ་ཡིན་ཞིང་། མ་འོངས་པར་ལས་འཆར་འདིའི་མ་དངུལ་གྱི་འཁོར་རྒྱུག་ལ་དོ་ཕོག་མ་ཕྱིན་ཚེ་ལོ་ལྔའི་ནང་བསྒྲུབ་རྒྱུ་རེད”ཅེས་བརྗོད་འདུག

ཐེངས་འདིའི་རྒྱལ་ཁབ་གཉིས་བར་གྱི་མྱུར་རྒྱུག་མེ་འཁོར་ལྕགས་ལམ་བཟོ་སྐྲུན་ལས་གྲྭ་འདི། ༢༠༡༤ ལོའི་ཟླ་ ༡༠ པའི་ནང་ཨུ་རུ་སུའི་སྲིད་འཛིན་པུ་ཌིན་དང་རྒྱ་ནག་གི་སྲིད་བློན་ལི་ཁེ་ཆང་ཐུག་འཕྲད་སྐབས། རྒྱ་ནག་ལྕགས་ལམ་བཟོ་སྐྲུན་ལས་ཁུངས་དང་ཨུ་རུ་སུའི་ལྕགས་ལམ་ལས་ཁུངས་བར། རྒྱ་ནག་རྒྱལ་ས་པེ་ཅིང་ནས་ཨུ་རུ་སུའི་རྒྱལ་ས་མཱོ་སུ་ཁཱོ་བར་ལྕགས་ལམ་བཟོ་སྐྲུན་བྱ་རྒྱུའི་ཐག་གཅོད་བྱས་པ་ཞིག་ཡིན་ཞིང་། འདི་ནི་རྒྱ་ནག་གིས་ཕྱིའི་རྒྱལ་ཁབ་ནང་མྱུར་རྒྱུག་མེ་འཁོར་ལྕགས་ལམ་བཟོ་སྐྲུན་ལས་གཞི་སྤེལ་བ་ཐོག་མ་དེ་ཆགས་ཡོད་འདུག

རྒྱ་ནག་ལྕགས་ལམ་བཟོ་སྐྲུན་ལྷན་ཁང་གིས་ཆེད་ལས་ལག་རྩལ་གོང་འཕེལ་གཏོང་ཆེད། འཇར་མན་གྱི་ཌེར་སི་ཌན་ (Dresden) དང་། སི་ཌུ་ཌི་གྷར་ཌི་ (Stuttgart) བཟོ་ལས་ཚན་རྩལ་གཙུག་ལག་སློབ་ཁང་སོགས་དང་གྲོས་མཐུན་བཞག་སྟེ་རྒྱལ་ཁབ་གཉིས་ཀྱིས་མེ་འཁོར་ལྕགས་ལམ་བཟོ་སྐྲུན་གྱི་ལས་གྲྭ་ཁག་ལ་ཕན་ཚུན་ཞོགས་འདེགས་བྱ་རྒྱུ་བྱས་ཡོད།

ཨུ་རུ་སུས་ཐོག་མར་ཧྥ་རན་སིའི་ཁེ་ལས་(Alstom)ཞེས་པར་རྒྱལ་ས་མཱོ་སུ་ཁཱོ་ནས་རྡོ་སྣུམ་གྱིས་ཕྱུག་པའི་གྲོང་ཁྱེར་ཁཱ་ཛན་བར་མེ་འཁོར་ལྕགས་ལམ་བཟོ་སྐྲུན་ལས་འཆར་འདི་སྤྲོད་རྒྱུ་ཐག་གཅོད་བྱས་ཡོད་ཀྱང་། རྒྱ་ནག་གཞུང་གིས་ཨུ་རུ་སུའི་དཔལ་འབྱོར་ཉམས་ཉེས་ལས་སྐྱོབ་ཆེད་ཨུ་རུ་སུ་ནས་ལོ་ ༣༠ ནང་ཚུད་དུ་ཨ་སྒོར་ཐེར་འབུམ་ ༤༠༠ ལྷག་གི་རྡོ་སྣུམ་ཉོ་རྒྱུའི་ཚོང་དོན་གྲོས་མཐུན་བཞག་ཡོད་སྟབས། མེ་འཁོར་ལྕགས་ལམ་བཟོ་སྐྲུན་ལས་གཞི་དེ་ཡང་རྒྱ་ནག་ལ་སྤྲད་ཡོད་འདུག མེ་འཁོར་ལྕགས་ལམ་འདིས་རྒྱལ་ཁབ་གཉིས་ཀྱི་དཔལ་འབྱོར་འཕེལ་རྒྱས་འགྲོ་རྒྱུ་མ་ཟད། རྒྱ་ནག་ནང་རྟེན་གཞི་བྱས་པའི་འཇར་མན་གྱི་རླངས་འཁོར་བཟོ་གྲྭ་ཝོག་སེ་ཝེ་གྷན་ (Volkswagen) དང་ (BMW)། མཱར་སི་ཌེ་སེ་ (Mercedes) བཅས་ཡུ་རོབ་ནང་ཕྱིར་ཚོང་བྱ་རྒྱུར་ཕན་ཐོགས་ཡོང་རྒྱུ་ཡིན་འདུག

ཆབ་སྲིད་དབྱེ་ཞིབ་པ་ཚོས། དེ་སྔོན་ཞི་ཅིན་ཕིན་གྱིས་རྒྱ་གར་གྱི་སྲིད་བློན་ནཱ་རེན་ཌ་མུ་དྷེ་དང་གོས་ཚོང་འབྲེལ་གྱི་དཔལ་འབྱོར་མཉམ་འདེགས་ལམ་བུ་ཞེས་པའི་མིང་བྱང་འོག མྱུར་རྒྱུག་མེ་འཁོར་ལྕགས་ལམ་བཟོ་སྐྲུན་གྱིས་ཨེ་ཤ་ཡའི་དཔལ་འབྱོར་གོང་འཕེལ་གཏོང་ཐབས་ལ་མཉམ་ལས་བྱ་རྒྱུའི་གྲོས་མོལ་བྱས་པ་ལམ་ལྷུང་བྱུང་མེད་སྐོར་བརྗོད་འདུག

གསར་འགོད་པ། དོན་གྲུབ།

དུས་བབ་དྲ་བ་ནས།