དཀའ་ངལ་ཅན་གྱི་ཁྱིམ་ཚང་ ༧༢ ལྷག་ལ་ཁང་ས་སྤྲོད་རྒྱུ་ཡིན་ཟེར།

བཙན་བྱོལ་བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱིས་སྤིར་ནང་ཆེན་གཞིས་སུ་ས་ཆ་ཨེ་ཀ་གཉིས་ཉོས་ཡོད་པ་དང་། མི་འགྱངས་བར་ས་ཆ་དེ་བོད་ནས་ཡོང་བའི་དཀའ་ངལ་ཅན་གྱི་ཁྱིམ་ཚང་ ༧༢ ནས་ ༧༥ ཙམ་ལ་བགོ་བཤའ་རྒྱག་རྒྱུ་ཡིན་འདུག

འདས་ལོར་བོད་མིའི་སྒྲིག་འཛུགས་ནང་སྲིད་ལས་ཁུངས་ནས་སྤིར་ནང་ཆེན་གཞིས་

ཆགས་སུ། བོད་ནས་ཡོང་བའི་སྡོད་གནས་དཀའ་ངལ་ཅན་ཚོར་ཧིན་སྒོར་འབུམ་ ༡༢༥ ཙམ་གྱིས་ས་ཆ་ཉོས་ཡོད་པ་ལྟར། མི་འགྱངས་བར་ས་ཆ་དེ་ཁྱིམ་ཚང་ ༧༢ ལྷག་ལ་བགོ་བཤའ་བརྒྱབ་སྟེ། ནང་སྲིད་ཀྱི་རོགས་རམ་འོག་སྒེར་སོ་སོ་ནས་ས་ཁྱོན་ལྟར་ཁང་པ་རྒྱག་འཆར་ཡོད་པ་དང་། གཞན། དགུ་བཅུ་གསུམ་ལས་འགུལ་ཚོགས་པའི་ཉེ་འཁྲིས་ཀྱི་ལག་རྩེད་སྤོ་ལོ་ཐང་དུ་ཆབ་སྲིད་བཙོན་ཟུར་ཚོར་སྡོད་ཁང་རྒྱག་བཞིན་པ་འདི་ལོའི་ཕྱི་ཟླ་ ༩ པ་ཙམ་ལ་འགྲུབ་འཆར་ཡོད་འདུག

གསར་འགོད་པས་བོད་མིའི་སྒྲིག་འཛུགས་ནང་སྲིད་དྲུང་ཆེ་འཁོར་ལྷ་ཚང་བསོད་ནམས་སྟོབས་རྒྱལ་ལགས་སུ། སྤིར་ས་གནས་ཀྱི་ལས་གཞི་དེ་ག་དུས་ནས་མགོ་བཙུགས་པ་དང་ད་ལྟ་གནས་སྟངས་ག་འདྲ་ཆགས་ཡོད་མེད་བཀའ་འདྲི་ཞུས་པར་ཁོང་གིས་ངོ་སྤྲོད་གནང་དོན། བོད་ནས་གསར་དུ་འབྱོར་བ་ཚོར་སྤྱི་ཡོངས་ནས་སྡོད་སའི་ཐོག་དཀའ་ངལ་ཆེན་པོ་འཕྲད་ཀྱི་ཡོད་པ་ལྟར། དེ་སྔོན་སྲིད་སྐྱོང་མཆོག་རྒྱ་གར་བྱང་ཤར་ཁུལ་དུ་ཕེབས་སྐབས་སྤིར་ཁུལ་གྱི་དཀའ་ངལ་ཡོད་པའི་ཁྱིམ་ཚང་ ༧༢ ནས་ ༧༥ ཙམ་གྱིས་ཁོ་རང་ཚོའི་བདེ་སྡུག་ཞུས་འདུག་ལ། དེ་བཞིན་ནང་སྲིད་བཀའ་བློན་མཆོག་ལའང་སྔ་རྗེས་སུ་བདེ་སྡུག་ཐེངས་མང་ཞུས་ཡོད་པ་རེད། གཞུང་གི་དགོངས་པའི་ནང་སྤིར་ཙམ་མ་ཡིན་པར་བོད་ནས་འབྱོར་བའི་འགྲོ་ས་སྡོད་ས་མེད་མཁན་ཚང་མར་གཟིགས་རྟོག་གནང་རྒྱུའི་འཆར་གཞི་ཡོད་ཀྱང་། འཆར་གཞི་དེ་ག་ཚོད་ལག་ལེན་བསྟར་ཐུབ་མིན་དངུལ་ལ་ཐུག་ཡོད་སྟབས། ད་ལྟའི་བར་དངུལ་གྱི་མཐུན་རྐྱེན་མ་ཚང་བ་དང་ས་ཆ་མ་རག་པར་ལྷག་པ་རེད། ན་ནིང་ང་ཚོས་ཁྱོན་ཧིན་སྒོར་ ༡༢༥ ཙམ་སྤྲད་དེ་ས་ཁྱོན་ཨེ་ཀ་ ༢ ཉོ་ཐུབ་ཡོད་པ་རེད། ཅེས་གསུངས་བྱུང་།

ཁོང་གིས་མུ་མཐུད་དུ་གསུངས་དོན། ཐོག་མའི་འཆར་གཞི་ལྟར་ན་ས་ཆ་ཉོས་པ་ཙམ་མ་ཡིན་པར་འཛུགས་སྐྲུན་ཏོག་ཙམ་ཐུབ་ན་བསམ་ཡོད་ཀྱང་། དངུལ་གྱིས་མ་འདང་བའི་དབང་གིས་ས་ཆ་ཁྱིམ་ཚང་སོ་སོར་བགོ་བཤའ་བརྒྱབ་ནས་ཁང་པ་སོ་སོས་རྒྱག་དགོས་ཀྱི་ཡོད་པ་རེད། ཡིན་ནའང་། ཁང་པ་རྒྱག་པར་ང་ཚོས་འགྲོ་སོང་ཕྲན་བུ་རེ་གཏོང་ཐུབ་པའི་རེ་བ་རྒྱག་གི་ཡོད། རབ་བྱུང་ན་ལས་གཞི་འདི་ད་ལོའི་ཕྱི་ཟླ་ ༣ པའི་ནང་ཁྱིམ་ཚང་སོ་སོར་ས་ཆ་བགོ་བཤའ་རྒྱག་ཐུབ་པའི་རེ་བ་རྒྱག་གི་ཡོད། ཅེས་བརྗོད་བྱུང་།

ཡང་ཁོང་ལ་ལས་གཞི་དེའི་ནང་ཁྱིམ་ཚང་འདེམས་སྒྲུག་ག་འདྲ་གནང་ཡོད་བཀའ་འདྲི་ཞུས་པར་ཁོང་གིས། སྤིར་ཁུལ་དུ་སྤིར་བོད་ཚོགས་དང་ནང་ཆེན་གཞིས་ཆགས། སྡེ་དགེ་གཞིས་ཆགས་བཅས་གཞིས་ཆགས་ཁག་གསུམ་ཡོད་པ་རེད། གཞིས་ཆགས་ཁག་སོ་སོའི་ནང་ནས་དཀའ་ངལ་ཅན་ག་འདྲ་འདེམས་སྒྲུག་བྱས་ཡོད་ཤེས་ཀྱི་མེད། གང་ལྟར་བོད་ནས་འབྱོར་བ་ཚོས་དང་པོར་གཞིས་ཆགས་ནང་ཁང་པ་གླས་ནས་བསྡད་པ་དང་། རིམ་གྱིས་གཞིས་ཆགས་ཀྱི་ནང་མི་ཚོ་ཕྱི་རྒྱལ་ལ་འགྲོ་སྐབས་ཁང་པ་རྩིས་སྤྲོད་དགོས་ཁེལ་བ། དེ་བཞིན་རྒྱ་གར་གྱི་ཁང་པ་གླས་ན་ཡང་ཁང་གླ་ཆེན་པོ་ཡིན་པ་སོགས་ཀྱི་དཀའ་ངལ་འཕྲད་ཀྱི་ཡོད། ང་ཚོའི་ངོས་ནས་ས་ཆ་ཉོ་རྒྱུའང་སྤིར་ལ་སྟབས་བདེ་པོ་འདྲ་ཆགས་ཡོད་སྟབས། ལས་གཞི་འདི་ས་གནས་དེར་མགོ་བཙུགས་པ་རེད། ཅེས་གསུངས་བྱུང་།

མ་འོངས་པར་ཁྱིམ་ཚང་དེ་ཚོ་ཕྱི་རྒྱལ་དུ་ཕྱིན་པ་ཡིན་ན་ས་ཆ་དང་ཁང་པ་སུ་ལ་བདག་དགོས་མིན་དོགས་འདྲི་ཞུས་པར། ཁོང་གིས། གཞིས་ཆགས་ཀྱི་ཐོབ་ཁོངས་རང་གི་ཐོག་ནས་ཁོ་རང་ཚོ་ག་ཚོད་གནས་སྡོད་བྱས་པའི་བར་དུ་ས་ཆ་དང་ཁང་པ་ཁོ་རང་ཚོར་བདག་གི་ཡོད་པ་རེད། ཡིན་ནའང་། མ་འོངས་པར་ནང་མི་ཚང་མ་ཕྱི་རྒྱལ་དུ་ཕྱིན་པ་ལྟ་བུ་བྱུང་ན། ཁང་པ་དེ་ཁོ་རང་ཚོས་བརྒྱབ་པ་ཡིན་སྟབས་སོ་སོ་འགྲོ་སྐབས་བོད་པ་ནང་ཁུལ་གྱི་སུ་ལ་སྤྲད་ནའང་ང་ཚོས་དམིགས་བསལ་དགག་བྱ་བྱེད་པའི་གནས་སྟངས་ཆགས་མེད་ཀྱང་། ས་ཆའི་རིན་འབབ་ཕྲན་བུ་ཚུར་ལེན་དགོས་ཁེལ་རྒྱུ་རེད་བསམ་གྱི་འདུག གང་ཡིན་ཟེར་ན། ཁོ་ཚོར་སོ་སོའི་གཞུང་གིས་ཐོབ་ཐང་སྤྲད་བཞག་པ་དེ་ལས་ཀྱང་ཡག་པོ་ཞིག་རག་གི་ཡོད་པ་རེད། གནས་ཚུལ་འདི་དག་སྐོར་ལ་ནང་སྲིད་ལས་ཁུངས་ངོས་ནས་སྒྲིག་གཞི་ཞིག་གཏན་འབེབས་གནང་དགོས་པ་རེད་དྲན་གྱི་འདུག ཅེས་གསུངས་བྱུང་།

ཡང་ཁོང་གིས་ནང་སྲིད་ལས་ཁུངས་ནས་བཙན་བྱོལ་བོད་མིའི་གཞིས་སྒར་གཞན་དག་ནང་ཡོད་པའི་བོད་ནས་འབྱོར་བའི་དཀའ་ངལ་ཅན་ཚོ་ལའང་དཀའ་ངལ་སེལ་ཐབས་གནང་པའི་འཆར་གཞི་ཡོད་སྐོར་གསུངས་དོན། བར་ལམ་ང་ཚོས་གཞིས་ཆགས་ཁག་གི་ལས་ཁུངས་ཚང་མར་ཡི་གེ་བཏང་སྟེ། ས་གནས་སུ་འགྲོ་ས་སྡོད་ས་མེད་པའི་མི་ག་ཚོད་ཡོད་མེད་ཀྱི་གྲངས་འབོར་གཏོང་རོགས་ཞེས་མངགས་ཡོད་སྟབས། དེ་ཚོ་འབྱོར་སོང་ན་ང་ཚོས་རིམ་གྱིས་དཀའ་ངལ་སེལ་ཐུབ་པའི་འབད་བརྩོན་བྱ་རྒྱུ་ཡིན། ཡིན་ནའང་། མ་འོངས་པར་བསྒྲུབ་ཐུབ་དང་མི་ཐུབ་ཟེར་བ་དེ་གནས་སྟངས་མང་པོ་ཞིག་ལ་རག་ལས་ཡོད། ང་ཚོ་ནང་སྲིད་ལས་ཁུངས་ཀྱིས་དགོངས་པ་གཉིས་པ་ཞིག་ག་རེ་བཞེས་ཀྱི་ཡོད་ཟེར་ན། གཞིས་ཆགས་ཁག་གི་མི་མང་པོ་ཕྱི་རྒྱལ་དུ་ཕྱིན་ཏེ། གཞིས་ཆགས་ཀྱི་ཁང་པ་དང་ས་ཆ་གང་ལ་གང་འཚམ་ཞིག་ལྷག་ཡོང་གི་ཡོད་སྟབས། བོད་ནས་གསར་དུ་འབྱོར་བའི་དཀའ་ངལ་ཅན་ཚོར་མཁོ་སྤྲོད་ཐུབ་པའི་འཆར་གཞི་ཞིག་སྒྲིག་གི་ཡོད། བསྟན་ འཛིན་སྒང་དང་མེའོ་སོགས་གཞིས་ཆགས་ཁག་ནས་ས་ཁང་གང་འཚམ་སྟོང་པར་ལྷག་ཡོད་པ་དེ་ ཚོ་སྟོང་པར་མ་བཞག་པར་བོད་ནས་འབྱོར་བ་ཚོར་སྤྲད་ན་འགྲིག་དང་མི་འགྲིག་བཀའ་ཤག་ ལ་སྙན་གསན་ཞུས་སྐབས། བསྟན་འཛིན་སྒང་སོགས་རྒྱ་གར་བྱང་ཤར་ཁུལ་དུ་ཡོད་པའི་གཞིས་ཆགས་ཁག་གི་ས་ཁང་སྤྲད་ན་འགྲིག་གི་རེད། ཡིན་ནའང་དེ་མིན་གྱི་གཞིས་ཆགས་ཁག་གི་ས་ཁང་ཐད་བསྐྱར་དུ་བཀའ་བསྡུར་གནང་དགོས་པའི་བཀའ་ཕེབས་སོང་། ཞེས་གསུངས་བྱུང་།

གཞན། དགུ་བཅུ་གསུམ་ལས་འགུལ་ཚོགས་པའི་ཉེ་འགྲམ་གྱི་ལག་རྩེད་སྤོ་ལོ་ཐང་དུ། ཆབ་སྲིད་བཙོན་པ་ཚོར་བཞུགས་གནས་ཁང་རྩེག་ཅིག་རྒྱག་གི་ཡོད་པ་དེའི་སྐོར་བཀའ་འདྲི་ཞུས་པར། ཁོང་གིས། བོད་ནང་དངོས་གནས་དྲང་གནས་ཆབ་སྲིད་ཀྱི་ལས་དོན་ཤུགས་ཆེན་པོ་གནང་བའི་རྐྱེན་ གྱིས་བོད་ནང་གནས་མ་ཐུབ་པར་རྒྱ་གར་ནང་བཙན་བྱོལ་དུ་ཡོང་བ་དང་། འདིར་ཡོང་སྟེ་ཡང་དཀའ་ངལ་འཕྲད་བསྡད་པ་དེ་ཚོར་༧གོང་ས་མཆོག་ནས་ཀྱང་དམིགས་བསལ་གཟིགས་རྟོག་གནང་ཐུབ་དགོས་པའི་དགོངས་གཞི་ཡོད་པ་ལྟར། བཀའ་ཤག་གིས་བཀའ་མངགས་གནང་སྟེ་ནང་སྲིད་ཀྱིས་ལས་གཞི་འདི་མགོ་བརྩམས་པ་རེད། ལས་གཞི་འདིར་ཐོག་མར་ས་ཆ་མ་རག་པའི་དཀའ་ངལ་མང་པོ་འཕྲད་སོང་། ཕྱིས་སུ་ས་ཆ་རག་པ་དང་མཉམ་དུ་དངུལ་ཡང་ཕྲན་བུ་ཞིག་རག་པ་རེད། ཡུན་ རིང་པོ་ནས་ཅིག་བྱ་རྒྱུ་ཡིན་ཟེར་ནས་ལྷག་བསྡད་པ་ལས་དངུལ་གང་ཡོད་པ་དེས་ལས་མགོ་ བཙུགས་བཞག་ན་ཡག་པོ་ཡོད་སྟབས། ད་ལྟའི་ཆར་འབུམ་ ༧༠ ལྷག་གིས་ཁང་པ་༡༦ ཡོད་པའི་ཐོག་རྩེག་གཉིས་ཅན་ཞིག་རྒྱག་བཞིན་ཡོད་ལ། རྩ་བའི་ས་ཆ་དེའི་ཐོག་ཁང་རྩེག་བཞི་རྒྱག་པའི་རྩིག་གདན་བཞག་ཡོད་པ་རེད། གང་ལྟར་འདི་ལོའི་ཕྱི་ཟླ་བརྒྱད་པ་དགུ་པའི་ནང་ཁང་པ་དེ་དག་རྒྱན་རྒྱག་པའི་འཆར་གཞི་ཡོད། སྐབས་དེར་ཆབ་སྲིད་བཙོན་ཟུར་སུ་ལ་གནང་དགོས་མིན་དེ་བདེ་སྲུང་ལས་ཁུངས་ཀྱིས་ དགོངས་པ་བཞེས་དགོས་པ་ཞིག་ཆགས་ཀྱི་ཡོད་པ་རེད་བསམ་གྱི་འདུག ཅེས་གསུངས་བྱུང་།

གསར་འགོད་པ། པདྨ་མཚོ།

དུས་བབ་དྲ་བ་ནས།།