རྩ་ཁྲིམས་གཏན་འབེབས་ཐོག་གི་དཀའ་རྙོག

བལ་ཡུལ་གྲོས་ཚོགས་ཀྱིས་རྩ་ཁྲིམས་ཟིན་བྲིས་གཏན་འབེབས་བྱེད་བཞིན་ཡོད་པ་དང་བསྟུན་ཏེ། དེ་རིང་བལ་ཡུལ་རྒྱལ་ཡོངས་སུ་གཞུང་གི་ཉེན་རྟོག་པས་དོ་དམ་ནན་མོ་བྱས་ཡོད་འདུག

དེ་རིང་བལ་ཡུལ་གྱི་གྲོས་ཚོགས་འཐུས་མི་ཚོས་རྩ་ཁྲིམས་ཟིན་བྲིས་གཏན་འབེབས་

བྱེད་བཞིན་ཡོད་པ་དང་བསྟུན་ཏེ། ཕྱོགས་འགལ་ཚོགས་པས་གྲོས་ཚོགས་རྭ་བ་དང་རྒྱལ་ས་ཀཱ་ཋ་མཱན་ཀྲུ་ནང་ངོ་རྒོལ་བྱེད་འཆར་ཡོད་སྟབས་བལ་ཡུལ་གཞུང་གིས་ཉེན་རྟོག་པ་ཕོན་ཆེ་བཀྲམས་ཏེ་སྲུང་བྱ་ནན་མོ་བྱེད་བཞིན་ཡོད་འདུག

ཀཱ་ཋ་མཱན་ཀྲུའི་སྤྱི་ཁྱབ་ཨེག་ཎཱ་ར་ཡན་ (Ek Narayan Aryal) གྱིས་ཨེ་ཕེ་གསར་ལམ་ཐོག “དེ་རིང་ང་ཚོས་ཉེན་རྟོག་པ་སྟོང་ཕྲག་གཅིག་ལྷག་བཏང་སྟེ། བལ་ཡུལ་གྱི་གྲོས་ཚོགས་རྭ་བ་དང་རྒྱལ་ས་ནང་ལྟ་སྲུང་ནན་མོ་བྱེད་བཞིན་ཡོད། གལ་ཏེ་གྲོས་ཚོགས་འཐུས་མི་ཚོས་ཉེན་རྟོག་པས་ཉེན་བརྡ་གཏོང་མིན་ལ་མ་ལྟོས་པར། གྲོས་ཚོགས་ནང་ངོ་རྒོལ་དང་ཅ་ལག་བཅག་པ་སོགས་བྱས་ཚེ་འཇུ་བཟུང་བྱེད་རྒྱུ་ཡིན”ཞེས་བརྗོད་འདུག

བལ་ཡུལ་གྱི་གཞུང་འཛིན་ཚོགས་པ་དང་མཱ་ཁེ་སི་ལེ་ཉཱིན་ཚོགས་པའི་གྲོས་ཚོགས་འཐུས་མི་ར་ཇཱན་ (Rajan Bhattarai) གྱིས་ཀཱ་ཋ་མཱན་ཀྲུ་ཆ་འཕྲིན་ཐོག “དེ་རིང་གྲོས་ཚོགས་ཀྱིས་རྩ་ཁྲིམས་ཀྱི་ཟིན་བྲིས་གསར་པ་གཏན་འབེབས་བྱེད་བཞིན་ཡོད་སྟབས། ང་ཚོས་གཏན་འབེབས་བྱེད་མཁན་གྱི་ཚོགས་ཆུང་བསྐོ་བཞག་མ་བྱས་སྔོན་ལ། ཉུང་མཐར་གྲོས་ཚོགས་འཐུས་མི་ཚོས་རྩ་ཁྲིམས་ནང་གང་འགོད་རྒྱུ་ཡིན་མིན་ཐད་བསམ་ཚུལ་སྤུངས་ཐུབ་པ་བྱེད་དགོས།”ཞེས་བརྗོད་འདུག

བལ་ཡུལ་གྲོས་ཚོགས་ནང་འཐུས་མི་ ༦༠༥ ཡོད་ཁོངས་ནས་གསུམ་ཆ་གཉིས་ད་ལྟའི་གཞུང་འཛིན་ཚོགས་པ་སྟེ་ཀོང་རེ་སེ་ཚོགས་པ་དང་མཱ་ཁེ་སི་ལེ་ཉཱིན་ཚོགས་པའི་འཐུས་མི་ཡིན་སྟབས། དེ་སྔོན་ཚོགས་པ་གཉིས་ཀྱིས་གཞུང་འཛིན་སྐབས་ལོ་གཅིག་ནང་ཚུད་དུ་རྩ་ཁྲིམས་གཏན་འབེབས་བྱེད་རྒྱུ་ཡིན་སྐོར་བསྒྲགས་ཡོད་སྟབས། ཟླ་འདིའི་ཚེས་ ༢༠ ཉིན་བལ་ཡུལ་གྲོས་ཚོགས་ཀྱི་ཚོགས་གཙོས་གྲོས་ཚོགས་བརྒྱུད་རྩ་ཁྲིམས་ཟིན་བྲིས་ཚོགས་ཆུང་བསྐོ་བཞག་བྱེད་རྒྱུ་ཐག་གཅོད་བྱས་སྐབས། ཕྱོགས་འགལ་ཚོགས་པའི་འཐུས་མི་ཞིག་གིས་རྐུབ་སྟེགས་བཀྱགས་ཏེ་ཚོགས་གཙོའི་ཕྱོགས་སུ་འཕངས་ཏེ་གྲོས་ཚོགས་ནང་ཟིང་ཆ་ཆེན་པོ་བྱུང་ཡོད་ཅིང་། བལ་ཡུལ་རྒྱལ་ཡོངས་ནང་ངོ་རྒོལ་ལས་འགུལ་སྤེལ་ཏེ། སློབ་གྲྭ་དང་ཚོང་ཁང་སྒོ་བརྒྱབ་པ་དང་རླངས་འཁོར་འགྲུལ་བཞུད་བྱེད་མ་བཅུག་པ། ལམ་ཐོག་ཡོད་པའི་རླངས་འཁོར་ཁག་ཅིག་བསྲེགས་པ་སོགས་བྱས་ཏེ། གཞུང་འཛིན་ཚོགས་པས་ཆབ་སྲིད་ཚོགས་པ་གཞན་གྱི་མངོན་འདོད་ལ་བརྩི་བཀུར་འོག་རྩ་ཁྲིམས་ཟིན་བྲིས་གཏན་འབེབས་བྱེད་དགོས་པའི་དགོས་འདུན་བཏོན་ཡོད་འདུག

༢༠༠༨ ལོ་ནས་བཟུང་བལ་ཡུལ་གཞུང་གིས་རྩ་ཁྲིམས་ཟིན་བྲིས་གཏན་འབེབས་བྱེད་རྒྱུའི་ཐབས་ཤེས་གང་ཡོང་བྱས་ཀྱང་གྲུབ་འབྲས་ཐོན་མེད་སྟབས། ༢༠༡༣ ལོར་རྒྱལ་ཡོངས་འོས་བསྡུ་བརྒྱུད་ད་ལྟའི་གཞུང་འཛིན་གསར་པ་འདི་བསྐོ་བཞག་བྱས་ཡོད་ཀྱང་། ཆབ་སྲིད་ཚོགས་པ་དབར་ལྟ་བ་ལངས་ཕྱོགས་མི་མཐུན་པ་བྱུང་སྟེ། ད་བར་དུས་ཐོག་རྩ་ཁྲིམས་གཏན་འབེབས་བྱེད་ཕྱོགས་ཐད་འགོག་རྐྱེན་འཕྲད་བཞིན་ཡོད་སྟབས། མང་ཚོགས་དང་ཚོང་དོན་ལྷན་ཚོགས་ཀྱི་མགོ་ཁྲིད་ཚོས་མ་འདོད་པའི་རྣམ་འགྱུར་སྟོན་བཞིན་ཡོད་འདུག

དེ་རིང་བལ་ཡུལ་གྱི་བཟོ་ཚོང་ལྷན་ཚོགས་ཀྱི་ཚོགས་མི་ཇཱོ་ཌི་ (Saurabh Jyoti) ཡིས་ཨེ་བྷི་སི་གསར་ལམ་ཐོག “བློ་ཕམ་ནི་འཁྱོག་བཤད་ཅིག་ཡིན་སྟབས་མགོ་ཁྲིད་ཚོས་ཡང་བསྐྱར་ནོར་འཁྲུལ་གཅིག་པ་ཤོར་དགོས་དོན་གང་ཡིན”ཞེས་བརྗོད་འདུག

གསར་འགོད་པ། དོན་གྲུབ།

དུས་བབ་དྲ་བ་ནས།།