ལྕགས་དྲའི་ནང་གསོན་བསྲེཊ་བྱས།

ཁ་ཆེ་དྲག་སྤྱོད་པས་ཇོར་ཌན་གྱི་གནམ་གྲུའི་ཁ་ལོ་བ་ལྕགས་དྲའི་ནང་བཅུགས་ཏེ་གསོན་བསྲེགས་བྱས་རྗེས་ཇོར་ཌན་གཞུང་གི་བཙོན་འོག་ཏུ་ཡོད་པའི་ཁ་ཆེ་དྲག་སྤྱོད་པ་གཉིས་ཀྱང་དེ་མ་ཐག་སྲོག་ཐོག་ཏུ་བཏང་ཡོད་འདུག

ཁ་སང་ཨི་རག་དང་སེ་རི་ཡའི་ཁ་ཆེ་མཉམ་འབྲེལ་ཤོག་ཁག་(ISIS)གི་འཛིན་

བཟུང་འོག་ཡོད་པའི་ཇོར་ཌན་རྒྱལ་ཁབ་ཀྱི་གནམ་གྲུའི་ཁ་ལོ་བ་མུ་ཋ་ཁཱ་སེ་སི་བྷེ་ (Muath Kasaesbeh) ལྕགས་དྲའི་ནང་བཅུགས་ཏེ་གསོན་བསྲེགས་བྱེད་བཞིན་པའི་བརྙན་ཐུང་སྐར་མ་ ༢༢ ཅན་ཞིག་ཁྱབ་བསྒྲགས་བྱས་མ་ཐག ཇོར་ཌན་གཞུང་གི་འཛིན་བཟུང་འོག་ཡོད་པའི་ཁ་ཆེ་དྲག་སྤྱོད་མ་སཱ་ཇེ་ཌ་ཨལ་རེ་ཤཱ་ཝེ་(Sajida al-Rishawi)དང་། གཟེ་ཡཌ་ཁཱ་བྷོ་ལི་(Ziyad Karboli)གཉིས་སྒེ་ཐག་དཔྱེང་སྟེ་སྲོག་ཐོག་བཏང་ཡོད་འདུག

དེ་ནི་ཉེ་ལམ་ཕྱི་ཟླ་ ༡ ཚེས་ ༢༧ ཉིན། ཨི་རག་དང་སི་རི་ཡའི་མཉམ་འབྲེལ་དྲག་སྤྱོད་ཤོག་ཁག་གིས་ཉི་ཧོང་གི་གསར་འགོད་པ་ཁཱན་ཇེ་གྷོ་ཌོ་ (Kenji Goto)ཡིས་ཇོར་ཌན་གྱི་གནམ་གྲུ་གཏོང་མཁན་མུ་ཋ་ཁཱ་སེ་སི་བྷེའི་འདྲ་པར་བཟུང་ཡོད་པའི་བརྙན་ཐུང་ཞིག་ཕྱིར་བསྒྲགས་བྱས་ཏེ། གལ་ཏེ་ཇོར་ཌན་གཞུང་གིས་ཆུ་ཚོད་ ༢༤ ནང་ཚུད་དུ་དེ་སྔོན་ ༢༠༠༥ ལོར་ཇོར་ཌན་ནང་དྲག་སྤྱོད་སྤེལ་ཏེ་འཛིན་བཟུང་ཐེབས་པའི་སཱ་ཇེ་ཌ་ཨལ་རེ་ཤཱ་ཝེ་ཀློད་གྲོལ་མ་བཏང་ཚེ། ཁཱན་ཇེ་གྷོ་ཌོ་དང་མུ་ཋ་ཁཱ་སེ་སི་བྷེ་དམར་གསོད་གཏོང་རྒྱུ་ཡིན་ཚུལ་བསྒྲགས་ཡོད།

ཉི་ཧོང་དང་ཇོར་ཌན་གཞུང་གིས་ཁ་ཆེ་དྲག་སྤྱོད་པ་ཚོའི་དགོས་འདུན་དུས་ལྟར་མ་བསྐོང་སྟབས། ཚེས་ ༢༩ ཉིན་ཁ་ཆེ་དྲག་སྤྱོད་པས་ཉི་ཧོང་གི་གསར་འགོད་པ་ཁཱན་ཇེ་གྷོ་ཌོ་ཡི་སྐེ་གྲིས་བཅད་དེ་དམར་གསོད་གཏོང་བཞིན་པའི་བརྙན་ཐུང་ཞིག་ཕྱིར་བསྒྲགས་བྱས་ཡོད། ཇོར་ཌན་གཞུང་གིས་ཁོ་རང་ཚོའི་གནམ་གྲུའི་ཁ་ལོ་བ་དེའང་ཟླ་ ༡ ཚེས་ ༣ ཉིན་ཁ་ཆེ་དྲག་སྤྱོད་པ་ཚོས་དམར་གསོད་བཏང་ཟིན་པའི་ཡིད་ཆེས་བཞིན་ཡོད་འདུག

ཟླ་འདི་ཚེས་ ༣ ཉིན་ཁ་ཆེ་དྲག་སྤྱོད་པ་(IS)ཚོས་ཇོར་ཌན་གྱི་གནམ་གྲུའི་ཁ་ལོ་བ་མུ་ཋ་ཁཱ་སེ་སི་བྷེ་ལྕགས་དྲའི་ནང་བཅུགས་ཏེ་གསོན་བསྲེགས་བྱེད་བཞིན་པའི་བརྙན་ཐུང་སྐར་མ་ ༢༢ ཅན་ཞིག་ཁྱབ་བསྒྲགས་བྱས་པ་དང་། ཆུ་ཚོད་ཁ་ཤས་རྗེས་ཇོར་ཌན་གཞུང་གི་འཛིན་བཟུང་འོག་ཡོད་པའི་རེ་ཤཱ་ཝེ་དང་ཁཱ་བྷོ་ལི་གཉིས་སྐེ་ཐག་དཔྱེང་སྟེ་སྲོག་ཐོག་བཏང་ཡོད་པ་མ་ཟད། གཞན་བཙོན་འོག་ཏུ་ཡོད་པའི་ཁ་ཆེ་དྲག་སྤྱོད་པ་ཁག་ཅིག་སྲོག་ཁྲིམས་ཐག་གཅོད་བྱས་པ་ཁྱབ་བསྒྲགས་བྱས་ཡོད་འདུག

ཟླ་འདིའི་ཚེས་ ༣ ཉིན་ཇོར་ཌན་གཞུང་འབྲེལ་མི་སྣ་མོ་ཧཱམ་མ་གྷི་ཨལ་མོ་མན་(Mohammad al-Moman)གྱིས། ཉིན་དེའི་ཞོགས་པའི་ཆུ་ཚོད་ ༤ པའི་སྟེང་། ཇོར་ཌན་གཞུང་གི་འཛིན་བཟུང་འོག་ཡོད་པའི་ཁ་ཆེ་དྲག་སྤྱོད་མ་རེ་ཤཱ་ཝེ་དང་གཟེ་ཡཌ་ཁཱ་བྷོ་ལི་གཉིས་ཀྱི་ནག་ཉེས་ཁྲིམས་ཆད་ལག་བསྟར་བྱས་ཡོད་ཅེས་གསལ་བསྒྲགས་བསྐྱངས་འདུག

ཁཱ་སེ་སི་བྷེ་གསོན་བསྲེགས་བྱེད་བཞིན་པའི་བརྙན་ཐུང་གནས་ཚུལ་དེ་ཐོན་མ་ཐག་ཇོར་ཌན་གཞུང་གི་དམག་དཔོན་མན་ཌོ་ཨལ་མེརུ་ (Mamdouh al-Ameri)གྱིས། “ ང་ཚོའི་དཔའ་ངར་ལྡན་པའི་ཁཱ་སེ་སི་བྷེ་དོན་མེད་དུ་ཚེ་སྲོག་ཤོར་བ་ཞིག་མིན། ང་ཚོ་ཇོར་ཌན་གཞུང་གིས་ཁོང་ལ་འདྲ་མཉམ་གྱི་དགྲ་ཤ་ལེན་རྒྱུ་ཡིན” ཞེས་ཁ་ཆེ་དྲག་སྤྱོད་པར་བརྡ་ལན་སྤྲད་ཡོད་འདུག

 ཨ་རིའི་ནེའུ་ཡོག་དུས་བབ་སྟེང་། ཁ་ཆེ་དྲག་སྤྱོད་པས་གསོན་བསྲེགས་བཏང་བའི་ཁཱ་སེ་སི་བྷེ་ཡི་ནང་མིའི་གནས་ཚུལ་ཞིག་བཀོད་ཡོད་པའི་ནང་། གཟའ་མིག་དམར་ཉིན་ཁཱ་སེ་སི་བྷེ་ཡི་གནས་ཚུལ་མི་མཐོང་བ་བྱེད་ཆེད་ཐོག་མར་ཁོང་ཚང་གིས་བརྙན་འཕྲིན་སོགས་ཀྱི་སྒོ་བརྒྱབ་ཡོད་ཀྱང་། ཁཱ་སེ་སི་བྷེ་ཡི་སྐྱེས་དམན་ཨན་ཝ་ (Anwar)ཡིས་ཁ་པར་བརྒྱུད་གནས་ཚུལ་ཞིག་མཐོང་ཡོད་སྟབས། དེ་མ་ཐག་མོ་རང་ཕྱིར་བརྒྱུགས་ཏེ་མོ་རང་གི་ཁྱོ་གའི་མིང་ནས་འབོད་བཞིན།“དཀོན་མཆོག་ལགས། སྐུ་མཁྱེན། གནས་ཚུལ་འདི་མངོན་སུམ་མིན་པ་ཤོག”ཅེས་ངུ་འབོད་བྱས་ཡོད་པ་དང་། ཁཱ་སེ་སི་བྷེ་ཡི་ཨ་མ་ཨཱ་སཱ་ཧྥ་ (Issaf)ཡིས་ཀྱང་མ་རང་གི་མགོ་དཀྲུས་བཤུས་རང་གི་སྐྲ་ནས་འཐེན་བཞིན་ངུ་འབོད་བྱས་ཡོད་འདུག

ཐེངས་འདིར་ཁ་ཆེ་དྲག་སྤྱོད་པས་གསོན་བསྲེགས་བཏང་ཟིན་པའི་ཁཱ་སེ་སི་བྷེ་ནི། ༢༠༡༤ ལོའི་ཟླ་ ༡༢ པའི་ཚེས་ ༢༤ ཉིན། དམག་མིའི་གནམ་གྲུ་(F-16)རྟགས་ཅན་ཞིག་བཏང་སྟེ་ཁ་ཆེ་དྲག་སྤྱོད་པར་མཁའ་ཐོག་ནས་ཕར་རྒོལ་བྱེད་སྐབས། སྟབས་མ་ལེགས་པར་སི་རི་ཡའི་བྱང་ཕྱོགས་ས་ཁུལ་(Ar-Raqqa)ཞེས་པར་གནམ་གྲུ་ཟགས་ཏེ་དྲག་སྤྱོད་པས་བཙན་ཁྲིད་བྱས་ཡོད་འདུག

ཇོར་ཌན་གཞུང་གིས་སྲོག་ཐོག་ཏུ་བཏང་བའི་རང་ལོ་ ༤༦ ཡིན་པའི་ཁ་ཆེ་དྲག་སྤྱོད་མ་སཱ་ཇེ་ཌ་ཨལ་རེ་ཤཱ་ཝེ་ནི། ཨི་རག་རྒྱལ་ཁབ་ནས་ཡིན་པ་དང་༢༠༠༥ལོར་ཁ་ཆེ་དྲག་སྤྱོད་པས་ལུས་སྟེང་ལ་འབར་རྫས་བཏགས་ཏེ་ཇོར་ཌན་རྒྱལ་ས་ཨ་མན་ནང་གི་མགྲོན་ཁང་ཞིག་ལ་དྲག་སྤྱོད་སྤེལ་ཏེ་མི་ ༥༧ ལྷག་བསད་སྐབས་ཇོར་ཌན་གཞུང་གིས་ཁོ་མོ་འཛིན་བཟུང་བྱས་ཡོད།

དེ་བཞིན། གཟེ་ཡཌ་ཁཱ་བྷོ་ལི་ཡང་ཨི་རག་ནས་ཡིན་པ་དང་ཨལ་ཁེ་ཊ་ (al-Qaeda)ཚོགས་ཁག་གི་དྲག་སྤྱོད་པ་ཞིག་ཡིན་པ་དང་ ༢༠༠༨ ལོར་ཇོར་ཌན་གྱི་མི་ཞིག་བསད་ཡོད་པའི་ཉེས་ཅན་ཞིག་ཡིན་འདུག དུས་བབ་དྲ་བ་ནས།།