རང་ཤི་བརྒྱབ་ནས་ཁྱིམ་གྱི་རྒྱུ་ནོར་དང་གྲོགས་པོའི་བདེ་འཇཊ་སྲུང་།

ཏང་གི་ཚོགས་ཆེན་བཅོ་བརྒྱད་པའི་རྗེས་ནས་བཟུང་རྒྱ་ནག་གི་དཔོན་རིགས་མང་པོ་ཞིག་རྒྱུན་ལྡན་མིན་པར་འདས་གྲོངས་སུ་འགྲོ་བའི་གྲངས་འབོར་འཕར་བཞིན་ཡོད་ཅིང་། དཔྱད་བརྗོད་པ་མང་པོ་ཞིག་གིས་དེ་ནི་ཞི་ཅིན་ཕིན་གྱི་ལྐོག་ཟ་རུལ་སུངས་རྒོལ་རྡུང་ལས་འགུལ་ལ་འབྲེལ་བ་ཡོད་སྐོར་བརྗོད་འདུག

རྒྱ་གཞུང་གི་ཏང་གི་ཚོགས་ཆེན་ ༡༨ ཚོགས་པའི་རྗེས་སུ་རྒྱ་གཞུང་གི་དཔོན་རིགས་མང་པོ་ཞིག་རྒྱུན་ལྡན་མིན་པར་འདས་གྲོངས་སུ་ཕྱིན་བའི་གྲངས་འབོར་ལྡབ་གསུམ་འཕར་ཡོད་པ་དང་། དཔྱད་ཞིབ་པ་ཁག་ཅིག་གིས། དཔོན་རིགས་ཚོས་རང་ཤི་རྒྱག་བཞིན་པའི་གནད་དོན་དེ་མི་སྒེར་གཅིག་གཉིས་ཀྱི་གནད་དོན་ཞིག་མིན་པར་སྤྱི་ཚོགས་ཁྱོན་ཡོངས་ཀྱི་གནད་དོན་ཞིག་ཡིན་སྟབས། རྒྱ་གཞུང་ནས་དེ་ལ་འགྲེལ་བཤད་གསལ་བོ་ཞིག་བྱ་དགོས་ཚུལ་བརྗོད་འདུག་ལ། ཡང་དཔྱད་ཞིབ་པ་ཁག་ཅིག་གིས་རྒྱ་ནག་དཔོན་རིགས་མང་པོ་ཞིག་གིས་རང་ཤི་རྒྱག་བཞིན་པའི་གནད་དོན་དེ་གུང་ཁྲན་ཏང་གི་ལྐོག་ཟ་རུལ་སུངས་དང་འབྲེལ་བ་ཡོད་ཅིང་། ལྐོག་ཟ་རུལ་སུངས་མེད་པར་བཟོ་དགོས་ན་གུང་ཁྲན་ཏང་མེད་པར་བཟོས་ཏེ་དམངས་གཙོའི་ལམ་སྲོལ་ཐོག་བསྐྱོད་དགོས་ཚུལ་བརྗོད་འདུག

ཟླ་སྔོན་མའི་ཚེས་ ༢༢ ཉིན་དབྱིན་ཇིའི་དཔལ་འབྱོར་དྲ་བའི་རྒྱ་ཡིག་སྡེ་ཚན་གྱིས་གནས་ཚུལ་སྤེལ་བ་ལྟར་ན། ༢༠༡༢ ལོ་གཅིག་པུར་རྒྱ་གཞུང་གི་མཐོ་རིམ་དཔོན་རིགས་ ༡༢ ཀྱིས་རང་ཤི་བརྒྱབ་ཡོད་ཅིང་། དེ་དག་ཁྲོད་མི་ ༤ ལྐོག་ཟ་རུལ་སུངས་གྱོད་དོན་དང་འབྲེལ་བ་ཡོད་འདུག ༢༠༡༣ ལོར་དཔོན་རིགས་ ༧ གྱིས་རང་ཤི་བརྒྱབ་ཡོད་པའི་ཁྲོད་མི་གཉིས་ལྐོག་ཟ་རུལ་སུངས་ལ་འབྲེལ་བ་ཡོད་འདུག ༢༠༡༤ ལོར་ལྡབ་གསུམ་འཕར་ཏེ་མི་ ༣༩ ཡིས་རང་ཤི་བརྒྱབ་ཡོད་པ་ལས་མི་ ༡༠ ལ་ལྐོག་ཟ་རུལ་སུངས་དང་འབྲེལ་པ་ཡོད་འདུག ལོ་སྔོན་མའི་ཟླ་ ༡༡ པའི་ཚེས་ ༣ ཉིན་ཚད་ཞིན་ (Caixin)དྲ་བའི་སྟེང་གནས་ཚུལ་སྤེལ་པ་ལྟར་ན། ༢༠༡༤ ལོའི་ཟླ་ ༡ ནས་ཟླ་ ༩ བའི་བར་དཔོན་རིགས་ ༣༢ ཀྱིས་རང་ཤི་བརྒྱབ་ཡོད་ཅིང་། དེའི་ཁྲོད་ཀྱི་དཔོན་རིགས་མང་པོ་ཞིག་གིས་རང་ཤི་རྒྱག་དགོས་པའི་རྒྱུ་མཚན་ཁ་གསལ་མེད་ཀྱང་། ཁ་ཤས་ལ་ལས་ཀའི་གནོན་ཤུགས་དང་། ཁ་ཤས་སེམས་ཀྱི་དཀའ་ངལ་འོག་རང་ཤི་རྒྱག་པའི་ལམ་ཁ་བདམས་པ་ཡིན་སྲིད་བརྗོད་འདུག

ཀྲུང་གོ་གཞོན་ནུའི་ཚགས་ཤོག་ལུང་འདྲེན་བྱས་པའི་ནང་དུ། ༢༠༡༣ ལོའི་ཟླ་ ༡ ཚེས་ ༡ ཉིན་ནས་ ༢༠༡༤ ལོའི་ཟླ་ ༤ ཚེས་ ༡༠ ཉིན་བར་རྒྱུན་ལྡན་མིན་པར་འདས་གྲོངས་སུ་ཕྱིན་པའི་དཔོན་རིགས་གྲངས་ ༥༤ ཡོད་པ་དང་། དེའི་ཁྲོད་ཀྱི་མི་ ༢༣ གྱིས་རང་ཤི་བརྒྱབ་ཡོད་འདུག གཞན། ཞིན་ཅིན་ཚགས་ཤོག་གིས་གནས་ཚུལ་སྤེལ་པ་ལྟར་ན། ༢༠༡༤ ལོའི་ཟླ་ ༡ ཚེས་ ༡ ནས་ཟླ་ ༧ པའི་ཚེས་ ༣༡ བར་དཔོན་རིགས་ ༣༡ ཙམ་རྒྱུན་ལྡན་མིན་པར་འདས་གྲོངས་སུ་ཕྱིན་ཡོད་འདུག རྒྱ་ནག་གཞུང་ཕྱོགས་ནས་མི་ ༡༦ ཙམ་གྱིས་རང་ཤི་བརྒྱབ་པ་དང་གཞན་གྱིས་བསད་བཅས་ཀྱི་དོན་རྐྱེན་འོག་གྲོངས་ཡོད་པ་ལས་མི་ ༡༣ ཙམ་ཁང་རྩེག་སྟེང་ནས་མར་མཆོངས་ཏེ་རང་ཤི་བརྒྱབ་པ་ངོས་ལེན་བྱས་ཡོད་འདུག

རྒྱ་ནག་གི་དཔོན་རིགས་ཚོ་རྒྱུན་ལྡན་མིན་པའི་འདས་གྲོངས་སུ་འགྲོ་བཞིན་པའི་གནས་ཚུལ་ཁྲོད། ཁང་རྩེག་སྟེང་ནས་མཆོང་པ་དང་སྐེ་ཐག་འཔྱང་སྟེ་ཤི་བ། ཆུའི་ནང་ལ་ལྕེབས་པ། སྨན་འདྲ་མིན་ཟོས་ནས་ཤི་བ། རང་གིས་རང་ལ་མེ་མདའ་བརྒྱབ་སོགས་ཡིན་འདུག

ཤི་བའི་རྒྱུ་རྐྱེན་ཐད་རྒྱ་གཞུང་ཕྱགོས་ནས་བྱ་བའི་གནོན་ཤུགས་དང་བཟའ་ཚང་གི་གནད་དོན། སེམས་ཁམས་ཀྱི་ནད་གཞི་ཡོད་པ་སོགས་ཡིན་ཚུལ་རྗོད་བཞིན་ཡོད་ཀྱང་། ཕྱིའི་དཔྱད་ཞིབ་པ་ཚོས་རྒྱ་ནག་གི་མཐོ་རིམ་དཔོན་རིགས་ཁྲོད་རང་ཤི་རྒྱག་བཞིན་པའི་གནད་དོན་གྱི་འབྱུང་རྐྱེན་གཙོ་བོ་ལྐོག་ཟ་རུལ་སུངས་ལ་དང་དབང་ཆ་སྒེར་སྤྱོད་ཀྱི་གནད་དོན་དང་འབྲེལ་བ་ཡོད་སྐོར་བརྗོད་འདུག

ཟླ་སྔོན་མའི་ཚེས་ ༣༡ ཉིན་དབྱིན་ཇིའི་དཔལ་འབྱོར་དྲ་བའི་རྒྱ་ཡིག་སྡེ་ཚན་གྱིས་གནས་ཚུལ་སྤེལ་བ་ལྟར་ན། ཞི་ཅིན་ཕིན་སྲིད་འཛིན་ཆགས་རྗེས་ཀྱི་ལོ་གཉིས་ལྷག་རིང་ལྐོག་ཟ་རུལ་སུངས་ལ་རྡུང་རྡེག་ཚ་ནན་བཏང་བའི་བརྒྱུད་རིམ་ཁྲོད། ཁྱོན་བསྡོམས་རྒྱ་ནག་གི་དཔོན་རིགས་སྟག་དང་སྦྲང་མ་ཁྲི་ ༢༥ ལྷག་ལ་ཉེས་ཆད་དང་ཉེན་བརྡ་བཏང་ཡོད་ཅིང་། དེ་དག་ཁྲོད་ཀྱི་དཔོན་རིགས་མང་པོ་ཞིག་རྒྱུན་ལྡན་མིན་པའི་ཐོག་ནས་འདས་གྲོངས་སུ་ཕྱིན་ཡོད་འདུག

འདས་གྲོངས་སུ་ཕྱིན་པའི་དཔོན་རིགས་དེ་དག་གི་ནང་མི་དང་ལས་རོགས། ངོ་ཤེས་གྲོགས་པོ་ཚོས་བརྗོད་པ་ལྟར་ན། འདས་གྲོངས་ཕྱིན་པ་ནི་ཆེས་རླབས་ཆེན་གྱི་ཐབས་ལམ་ཞིག་བདམས་པ་རེད་ཟེར། གང་ཡིན་ཞེ་ན། འཆི་བ་ཡིས་ལྐོག་ཟ་རུལ་སུངས་ཀྱི་གྱོད་དོན་ཞིབ་བཤེར་མཚམས་འཇོག་བྱེད་ཐུབ་པ་དང་། རང་དང་འབྲེལ་བ་ཡོད་པའི་མི་སྣ་དག་གི་བདེ་འཇགས་ཀྱང་སྲུང་སྐྱོབ་ཐུབ་ཟེར། ད་དུང་ཁྱིམ་ཚང་གི་རྒྱུ་ནོར་ཡོད་ཚད་སྲུང་སྐྱོབ་ཐུབ་པ་མ་ཟད། གལ་སྲིད་གྱོད་དོན་འོག་བཙོན་དུ་ཚུད་ཡོད་པ་དག་ཀྱང་ཀློད་གྲོལ་གཏོང་ཐུབ་པ་དང་། ཁོ་ཚོའི་རྒྱུ་ནོར་གཞུང་བཞེས་མི་གཏོང་བ་མ་ཟད་ཁོ་ཚོའི་རྒན་ཕོགས་ཀྱང་ཆ་ཚང་མུ་མཐུད་དུ་འཐོབ་ཀྱི་ཡོད་ཟེར།

ཟླ་སྔོན་མའི་ཚེས་ ༣༠ ཉིན་ཨེ་ཤ་ཡའི་རྒྱ་ཡིག་དྲ་བའི་སྟེང་། རྒྱ་ནག་གི་འགྲོ་བ་མིའི་ཐོབ་ཐང་འཐབ་རྩོད་པ་ཡད་ཏཱོ་ (Yedu)ཡིས། དཔོན་ངན་ཚོས་རང་ཤི་རྒྱག་པ་ནི་ཁོ་ཚོའི་རྒྱལ་ཁ་ལྟ་བུ་ཆགས་ཡོད། ཁོ་ཚོས་རང་ཤི་བརྒྱབ་པ་ཡིན་ན་ཁོ་ཚོའི་གྱོད་དོན་ཞིབ་བཤེར་མཚམས་འཇོག་ཐུབ་པ་དང་། ཁོ་ཚོས་ལྐོག་ཟ་བྱས་པའི་རྒྱུ་ནོར་ཡང་ཁོ་ཚོའི་ནང་མི་ཚོར་དབང་གི་རེད། དེ་ལས་གལ་ཆེ་བ་ཞིག་ནི་ཁོ་ཚོའི་གོང་གི་མཐོ་རིམ་དཔོན་རིགས་ཚོའང་མུ་མཐུད་དུ་གཞུང་ནང་གནས་ཐུབ་ཀྱི་ཡོད་སྟབས། རང་ཤི་བརྒྱབ་པ་ནི་ཁོ་ཚོའི་མཚོན་འགོག་ལྕགས་ཕུབ་ལྟ་བུ་དེ་ཆགས་ཡོད་ཅེས་བརྗོད་འདུག

ཡད་ཏཱོ་ཡིས་མུ་མཐུད་དུ་ “ད་ལྟ་དཔོན་རིགས་མང་པོ་ཞིག་རྒྱུན་ལྡན་མིན་པར་འདས་གྲོངས་སུ་སོང་ཡོད་པ་ལས་མང་ཆེ་བ་ལྐོག་ཟ་རུལ་སུངས་དང་འབྲེལ་པ་རེད། ཡིན་ན་ཡང་། གཞུང་ཕྱོགས་ནས་དེ་དག་ཤི་བའི་རྒྱུ་རྐྱེན་གཙོ་བོ་ནད་རིགས་འདྲ་མིན་ལ་ཁ་གཡར་ཡོད་ཀྱང་། དོན་དངོས་སུ་དེ་ཚང་མ་རྫུན་རེད། ཉེ་བའི་ལྐོག་ཟ་རུལ་སུངས་ཀྱི་གྱོད་དོན་ཁྲོད་ན། གཅིག་ལ་གཅིག་བརྟེན་མིན་པ་སུ་ཞིག་འདུག ཚང་མ་གཅིག་གི་ཁེ་དབང་གཅིག་ལ་འབྲེལ་ནས་ཡོད་སྟབས། གཅིག་ལ་གནོད་སྐྱོན་བྱུང་ན་གཞན་དག་ལའང་རང་བཞིན་གྱིས་གནོད་སྐྱོན་ཕོག་གི་ཡོད། གལ་སྲིད་ཁོ་ཚོས་རང་ཤི་རྒྱག་པའི་ཡི་ལམ་ཁ་དེ་འདེམ་པ་ཡིན་ན། གཅིག་ནས་ཁོ་ཚོའི་ནང་མི་ཚོར་བདེ་འཇགས་ཡོང་ཐུབ་པ་དང་། གཉིས་ནས་ཁོ་ཚོའི་རྒྱབ་ཀྱི་ཁེ་དབང་གི་འབྲེལ་ཐག་རིང་པོ་དེར་ཡང་འགན་ལེན་ཐུབ་ཀྱི་ཡོད། དེར་བརྟེན། དཔོན་རིགས་ཚོའི་གདམ་ག་ཉག་ཅིག་དེ་རང་ཤི་རྒྱག་རྒྱུ་དེ་རེད།

ཡང་སྙིང་ལྐོག་ཟ་རུལ་སུངས་རྒོལ་རྡུང་ལས་འགུལ་འདི་ཆབ་སྲིད་གཙང་འཁྲུད་ཀྱི་དབང་ཆའི་འཐབ་རྩོད་ཅིག་ཡིན་པ་མ་ཟད། གདམ་ཀ་རང་བཞིན་ཅན་གྱི་ལམ་ཁ་ཞིག་ཀྱང་ཡིན་སྟབས། གལ་སྲིད་ད་རེབ་ཀྱི་ལྐོག་ཟ་རུལ་སུངས་ལ་རྒོལ་རྡུང་གི་རླུང་མགོ་འཇོག་ཐུབ་བྱུང་ན་ཡང་། གོ་གནས་ཡར་འཕར་ཡོད་པའི་དཔོན་རིགས་དེ་ཚོས་ཀྱང་མུ་མཐུད་དུ་ལྐོག་ཟ་རུལ་སུངས་བྱེད་ངེས་རེད།” ཅེས་བརྗོད་འདུག

རྒྱ་ནག་གི་གསར་འགྱུར་བརྒྱུད་ལམ་ཁག་ཏུ་སྔོན་ཆད་ལོ་མང་ལས་ཀ་བྱས་མྱོང་བའི་མཱ་ཞའོ་མིན་ (Mashao Ming)གྱིས་བརྗོད་རྒྱུར། “རྒྱ་གཞུང་གི་དཔོན་རིགས་ཚོས་རང་ཤི་རྒྱག་བཞིན་པའི་གནས་ཚུལ་ཏེ་རྒྱ་གཞུང་ནང་ཁུལ་ལ་ཤུགས་རྐྱེན་ཚབས་ཆེན་བཟོས་ཡོད་སྟབས་རྒྱ་ནག་གི་དཔོན་རིགས་ཁ་ཤས་ཀྱི་སེམས་ལ་གནོན་ཤུགས་དང་འཇིགས་སྣང་སྐྱེ་སྲིད་ལ། འཇིགས་སྣང་དེས་ཞི་ཅིན་ཕིན་གྱིས་ལྐོག་ཟ་རུལ་སུངས་ཀྱི་རྒོལ་རྡུང་ལ་ངར་ཤུགས་ཡོད་པ་ལྟ་བུ་ཞིག་ཀྱང་ཆགས་ཡོད་པ་རེད། འོན་ཀྱང་། དཔོན་རིགས་ག་ཚོད་ཀྱིས་རང་ཤི་བརྒྱབ་ཡོད་དམ། ཁོ་ཚོ་དང་ཁོ་ཚོའི་ཇག་ཚོགས་དེའི་ནག་ཉེས་དང་བསྡུར་ན། རང་ཤི་ཁ་ཤས་བརྒྱབ་པ་ཙམ་གྱིས་རིན་ཐང་ཉུང་དྲགས་པ་རེད། ཁོ་ཚོས་མི་ག་ཚོད་ལ་སྡུག་སྦྱོང་བཏང་ཡོད་དམ། རྒྱུ་ནོར་ག་ཚོ་ལྐོག་ཟ་བྱས་ཡོད་དམ། དོན་དངོས་སྟེང་ལྐོག་ཟ་རུལ་སུངས་རྒོལ་རྡུང་གི་རྒྱལ་ཁ་ངོ་མའི་མཚོན་རྟགས་ནི། ངེས་པར་ཏུ་དམངས་གཙོའི་ལམ་ལུགས་ལག་བསྟར་བྱ་དགོས་པ་དང་། ཏང་གི་དབང་ཆ་སྒེར་གཅོད་རྩ་མེད་བཟོ་རྒྱུ་དེ་ཁོ་ན་རེད།”ཅེས་བརྗོད་འདུག

རྒྱ་ནག་ནང་ཁུལ་གྱི་དཔྱད་ཞིབ་པ་ཁ་ཤས་ཀྱིས། རྒྱ་ནག་གི་དཔོན་རིགས་མང་པོ་ཞིག་རྒྱུན་ལྡན་མི་པར་འཆི་ལམ་དུ་འགྲོ་བཞིན་པ་འདི་ནི་མི་སྒེར་གྱི་གནད་དོན་ཞིག་མིན་པར་སྤྱི་ཚོགས་ཀྱི་གནད་དོན་ཞིག་རེད། འོན་ཀྱང་། གཞུང་ཕྱོགས་ཀྱི་གསར་ལམ་ཁག་ཏུ་རང་ཤིའི་རྒྱུ་རྐྱེན་གཙོ་བོ་གསང་བ་བྱས་ཏེ་ཁྱབ་བསྒྲགས་བྱེད་ཀྱིན་མེད། གང་ལྟར། རྒྱུ་རྐྱེན་ག་རེ་ཡིན་ནའང་སྡོམ་ཚིག་རབ་རིབ་ཅིག་གིས་འགེབ་སྲུང་བྱས་ན་འགྲིག་གི་མ་རེད། གལ་སྲིད་དཔོན་རིགས་དེ་ཚོ་ནག་ཉེས་ལ་སྐྲག་ནས་རང་ཤི་རྒྱག་གི་ཡོད་ན། སྤྱི་ཚོགས་ལ་གནས་ཚུལ་དེ་ཤེས་པའི་དབང་ཆ་ཡོད་སྟབས། གཞུང་ཕྱོགས་ནས་མི་མང་ལ་ཡིད་ཆེས་འཕེར་བའི་གསལ་བཤད་རྩིས་སྤྲོད་ཅིག་ཡོད་དགོས། ཅེས་བརྗོད་འདུག དུས་བབ་དྲ་བ་ནས།།