ཡུ་རོབ་ཀྱི་མཉམ་འབྲེལ་ཐོག་མ།

དེ་རིང་ཨི་ཊ་ལིར་བྲོས་བྱོལ་དུ་ཕྱིན་ནས་ལོ་ངོ་ ༡༠ ལྷག་ཕྱིན་པའི་རྒྱ་ནག་གི་དཔལ་འབྱོར་དོགས་ཡོད་ཉེས་ཅན་ཞིག་རྒྱ་གཞུང་ལ་རྩིས་སྤྲད་ཡོད་འདུག

རྒྱ་ནག་ཤིན་ཧྭ་གསར་ཁང་གིས་གནས་ཚུལ་སྤེལ་བ་ལྟར་ན། རྒྱ་ནག་ཧུའུ་པེ་ཞིང་ཆེན་གྱི་ལས་བྱེད་བུད་མེད་ཅིག་གིས་རྒྱ་སྒོར་ཁྲི་ ༡༤༠ ལྷག་ལྐོག་ཟ་བྱས་པའི་དོགས་

གཞིའི་འོག དེ་རིང་ཨི་ཊ་ལི་གཞུང་གིས་ཁོ་མོ་རྒྱ་ནག་ནང་ཕྱིར་སློག་བཏང་སྟེ། རྒྱ་ནག་རྒྱལ་སྤྱིའི་གནམ་ཐང་ནས་འཛིན་བཟུང་བྱས་ཡོད་པ་དང་། ཁོ་མོ་ནི་ཡུ་རོབ་གླིང་ནས་རྒྱ་ནག་གི་དཔལ་འབྱོར་དོགས་ཡོད་ཉེས་ཅན་ཞིག་ཕྱིར་སློག་བཏང་བ་ཐོག་མ་དེ་ཆགས་ཡོད་འདུག

ཀྲང་མིང་ཅན་གྱི་བུད་མེད་དེ་སྔོན་ཆད་ཧུའུ་པེ་ཞིང་ཆེན་གྱི་དངུལ་འཛིན་ཚོང་གཉེར་ཁང་ཞིག་གི་ལས་བྱེད་ཡིན་པ་དང་། ཕྱི་ལོ་ ༢༠༠༠ ཟླ་ ༡ ནས་ ༢༠༠༥ ཟླ་ ༡ བར་ཁོ་མོས་རྒྱ་སྒོར་ཁྲི་ ༡༤༠ ལྷག་ལྐོག་ཟ་བྱས་ཏེ། ཕྱི་ལོ་ ༢༠༠༥ ཟླ་ ༡༠ ནང་ཨི་ཊ་ལི་ནང་བྲོས་བྱོལ་དུ་ཕྱིན་ཡོད་པ་དང་། ཕྱིས་སུ་ཧུའུ་པེ་ཞིང་ཆེན་ཧི་ཅཱ་ཀྲང་གྲོང་ཁྱེར་ཞིབ་བཤེར་ཁང་གིས་ཞིབ་བཤེར་བྱས་ནས་ཁོ་མོ་འཛིན་བཟུང་དགོས་པའི་བཀའ་རྒྱ་བསྒྲགས་ཏེ། རྒྱ་ནག་ཉེན་རྟོག་ཁང་བརྒྱུད་དེ་རྒྱལ་སྤྱིའི་ཉེས་དོན་རྩ་འཛུགས་ཁང་ལ་ནག་ཉེས་ཞུ་གཏུག་བྱས་པ་དང་། ཨི་ཊ་ལིར་ཡོད་པའི་རྒྱ་ནག་ཉེན་རྟོག་ལས་དོན་འབྲེལ་མཐུད་པས་མཉམ་འབྲེལ་བྱས་པ་བརྒྱུད། འདས་ལོའི་ཕྱི་ཟླ་ ༡༠ པར་ཨི་ཊ་ལིའི་ཉེན་རྟོག་ཕྱོགས་ནས་ཁོ་མོ་འཛིན་བཟུང་བྱས་ཡོད་པ་མ་ཟད། རྒྱ་གཞུང་གི་རེ་སྐུལ་ལྟར་ཟླ་འདིའི་ཕྱི་ཚེས་ ༡༦ ཉིན་ཁོ་མོ་རྒྱ་ནག་ནང་ཕྱིར་སློག་གཏོང་བར་ཆོག་མཆན་སྤྲད་ཡོད་འདུག

རྒྱ་ནག་གཞུང་ཕྱོགས་ནས་གསར་ལམ་ཁག་ཏུ། རྒྱ་ནག་ཉེན་རྟོག་ཁང་གིས་འཛམ་གླིང་གི་རྒྱལ་ཁབ་ ༡༨༩ ཡི་ནང་ཉེན་རྟོག་ལས་དོན་ཕྱོགས་ཀྱི་མཉམ་འབྲེལ་བཙུགས་ཡོད་པ་མ་ཟད། རྒྱལ་ཁབ་ ༢༧ ནང་ཉེན་རྟོག་འབྲེལ་མཐུད་ཁང་ ༤༩ ཆེད་འཛུགས་བྱས་ཏེ། ཕྱི་རྒྱལ་དུ་བྲོས་བྱོལ་ཕྱིན་པའི་ཉེས་ཅན་ཚོར་གྲུབ་འབྲས་ལྡན་པའི་ཐོག་ནས་རྒོལ་རྡུང་བཏང་སྟེ་སྤྱི་མང་ཀྱི་ཁེ་ཕན་སྲུང་སྐྱོབ་བྱེད་བཞིན་ཡོད་སྐོར་བསྒྲགས་འདུག

གསར་འགོད་པ། པདྨ་མཚོ།

དུས་བབ་དྲ་བ་ནས།།