ལོ་ ༢༠༠ ཐུགས་དམ་ལ་བཞུགས།

ཉེ་ལམ་སོག་ཡུལ་ནས་གསར་རྙེད་བྱུང་བའི་དགེ་འདུན་པ་དེའི་ཕུང་པོར་བརྟག་དཔྱད་བྱས་པ་བརྒྱུད་ཁ་སང་ཐུགས་དམ་ལ་བཞུགས་ཡོད་ཚུལ་བསྒྲགས་འདུག

ཁ་སང་སོག་པོའི་ (MongolBeat) ཞེས་པའི་གསར་ལམ་ཐོག་གནས་ཚུལ་སྤེལ་བ་ལྟར་ན། ཟླ་སྔོན་མའི་ཚེས་ ༢༧ ཉིན་སོག་ཡུལ་རྒྱལ་ས་ཨུ་ལཱན་བྷ་ཌར་ (Ulan Bator) མངའ་ཁོངས་སུང་གྷེ་ཎོ་ཁཱར་ཁཱན་ (Songinokhairkhan) གྱི་ས་ཁུལ་ནས་ལོ་ ༢༠༠ གོང་སྐུ་གཤེགས་པའི་ནང་པའི་ཆོས་པ་ཞིག་གི་ཕུང་པོ་སྒོ་ཕྱུགས་སེམས་ཅན་གྱི་པགས་པས་བཏུམས་ཏེ་དཀྱིལ་དཀྲུང་དུ་བཞུགས་ཡོད་པ་ཞིག་རྙེད་སོན་བྱུང་རྗེས། ཉིན་ཤས་རིང་སོག་ཡུལ་རྒྱལ་སར་རྟེན་གཞི་བྱས་པའི་རྒྱལ་ཡོངས་

ལུས་ཁམས་བརྟག་ཞིབ་ལྟེ་གནས་ཁང་གིས་ཐབས་ལམ་འདྲ་ཐོག་ནས་བརྟག་དཔྱད་བཏང་མཐར། ཁ་སང་དགེ་འདུན་པ་དེ་གྲོངས་མེད་པར་ད་དུང་ཐུགས་དམ་ལ་བཞུགས་ཡོད་ཚུལ་ཕྱིར་བསྒྲགས་བྱས་འདུག

སྙན་གྲགས་ཅན་གྱི་ནང་པའི་དགེ་འདུན་པ་བྷ་རེ་ཀཱར་འཛིན་ (Dr Barry Kerzin) ཞུ་བ་ཞིག་གིས་སོག་པོའི་གསར་ལམ་ཐོག “དེ་སྔོན་ང་རང་ཐུགས་དམ་དུ་བཞུགས་ཡོད་པའི་སྒོམ་ཆེན་པ་མང་པོ་ཞིག་ལ་ལྟ་ཞིབ་བྱེད་པའི་གོ་སྐབས་ཐོབ་མྱོང་ཡོད། གལ་ཏེ་མི་ཞིག་འདས་གྲོངས་སོང་རྗེས་ཐུགས་དམ་ནང་བདུན་ཕྲག་གསུམ་ལྷག་བཞུགས་ཚེ། ཁོང་གི་སྐུ་ཕུང་འཁུམ་མགོ་བཙུགས་ཏེ་མཐའ་མ་སྐྲ་དང་སེན་མོ། གྱོན་གོས་མ་གཏོགས་ལྷག་གི་མེད། ཐེངས་འདིར་གསར་རྙེད་བྱུང་བའི་དགེ་འདུན་པའི་སྐུ་ཕུང་འཁྲིས་སུ་སྡོད་མཁན་ཚོས་ཉིན་ཤས་རིང་ནམ་མཁར་འཇའ་ཤར་བའི་རྟགས་མཚན་མཐོང་ཡོད་སྟབས། ཁོང་ལ་གཉུག་མ་འོད་གསལ་ངང་དུ་བཞུགས་ཡོད་པ་རེད། གལ་སྲིད་ཁོང་གིས་མུ་མཐུད་སྒོམ་བརྒྱབ་ཚེ་སངས་རྒྱས་ཀྱི་གོ་འཕང་ཐོབ་སྟེ་སེམས་ཅན་ལ་ཕན་བདེ་བསྐྲུན་ཐུབ་པ་ཞིག་རེད”ཅེས་སོགས་བརྗོད་འདུག

བྷེ་རི་ཡའི་དུས་བབ་ (Siberian Times) ཐོག་སོག་ཡུལ་རྒྱལ་སར་རྟེན་གཞི་བྱས་པའི་སོག་པའི་ནང་བསྟན་གཙུག་ལག་སློབ་གཉེར་ཁང་གི་སློབ་དཔོན་ཆེན་མོ་པུ་རེབ་བྷ་ཌ་ (Ganhugiyn Purevbata) ཡིས། “བླ་མ་ཁོང་དཀྱིལ་དྲུང་དུ་བཞག་ལ་བཞུགས་ཡོད་པ་མ་ཟད། ཕྱག་གཡོན་པ་ཁ་ཕྱེ་བ་དང་གཡས་པས་ཆོས་སྟོན་བཞིན་ཡོད་པའི་ཚུལ་བསྟན་ཡོད་སྟབས། ཁོང་ཐུགས་དམ་ངང་བཞུགས་ཡོད་པ་ལས་འདས་གྲོངས་སོང་མེད་པ་གསལ་པོ་རེད”ཅེས་བརྗོད་འདུག

ཟླ་ ༡ ཚེས་ ༢༧ ཉིན་གསར་རྙེད་བྱུང་བའི་ནང་པའི་དགེ་འདུན་པའི་ཕུང་བོ་དེ་ནི། ༡༨༥༢ ལོར་ཨུ་རུ་སུའི་བྷུར་ཡཱ་ཌི་ཡཱ་ (Buryatia) མངའ་ཁུལ་དུ་སྐྱེས་ཤིང་། ༡༩༢༧ ལོར་འདས་གྲོངས་སོང་བའི་བོད་ཀྱི་ནང་ཆོས་དོན་གཉེར་བ་བླ་མ་ཌཱ་ཤི་ཌོར་ཛོ་ (Dashi-Dorzho Itigilov) ཡི་སློབ་དཔོན་ཡིན་པའི་ཚོད་དཔག་བྱས་ཡོད་ཅིང་། བླ་མ་ཌཱ་ཤི་ཌོར་ཛོ་འཚོ་བཞུགས་སྐབས་ཕུང་པོ་མ་རུལ་བར་ཉར་ཚགས་བྱེད་ཕྱོགས་ཀྱི་སྒོམ་སྒྲུབ་ཉམས་ལེན་གནང་མཁན་ཞིག་ཡིན་པ་མ་ཟད། ཁོང་མ་གྲོངས་སྔོན་དགེ་ཕྲུག་ལ་ཁོང་གྲོངས་རྗེས་ཕུང་པོ་དཀྱིལ་དཀྲུང་བྱས་ནས་སར་སྦེད་དགོས་པའི་ཁ་ཆེམས་བཞག་པ་ལྟར་བྷུར་ཡཱ་ཌི་ཡཱ་མངའ་ཁུལ་གྱི་རྒྱལ་ས་ཨུ་ལན་ (Ulan Ude) ཉེ་འདབས་སུ་སྦས་རྗེས། ༢༠༠༢ ལོར་ཁོང་གི་ཕུང་པོ་སྔོག་ནས་རྒྱལ་སའི་དགོན་པ་ཞིག་ཏུ་རུལ་ཡོད་མེད་བརྟག་དཔྱད་བྱས་པར། ཁོང་ད་དུང་འདས་གྲོངས་སོང་མེད་པ་མ་ཟད་གཟུགས་པོར་ཚ་དྲོད་རྒྱས་བཞིན་ཡོད་ལུགས་བརྗོད་འདུག

ནང་པའི་དགེ་འདུན་པ་དེའི་སྐུ་ཕུང་དེ་ཉེ་ལམ་ཨན་ཌོར་ (Enhtor) ཟེར་བ་ཞིག་གིས་ཁཱོབ་ཌི་སེ་ཁེ་ (Kobdsk) ས་ཁུལ་གྱི་བྲག་ཕུག་ཅིག་བརྙེད་དེ། རྒྱལ་ས་ཨུ་ལན་བྷ་ཌར་(Ulaanbaatar)གྱི་རང་ཁྱིམ་དུ་སྦས་ཏེ། རྒྱལ་ཁབ་གཞན་ལ་རིན་གོང་མཐོ་པོ་བྱས་ཏེ་བཙོང་གྲབས་ཡོད་སྐབས་ཉེན་རྟོག་པས་འཇུ་བཟུང་བྱས་ཡོད་འདུག

ད་ལྟ་དགེ་འདུན་པ་དེའི་ཕུང་པོ་སོག་ཡུལ་རྒྱལ་སར་ཡོད་པའི་རྒྱལ་ཡོངས་ཁྲིམས་དོན་སྨན་སྦྱོར་དཔྱད་ཞིབ་བསྟི་གནས་ཁང་ནང་མུ་མཐུད་བརྟག་དཔྱད་བྱེད་བཞིན་ཡོད་འདུག

གསར་འགོད་པ། དོན་གྲུབ།

དུས་བབ་དྲ་བ་ནས།།