གཞུང་ཆེན་རིགས་གཅིག་རྐང་འཛིན་གྱི་སྒྲིག་གཞི་བསྐྱར་བཅོས་གཏན་འབེབས།

དེ་རིང་གངས་སྐྱིད་དུ་གཞུང་ཆེན་རིགས་གཅིག་རྐང་འཛིན་ཐད་ཚོགས་འདུ་ཞིག་མགོ་འཛུགས་གནང་བའི་སྟེང་ཆོས་རིག་བཀའ་བློན་མཆོག་གིས་གཞུང་ཆེན་རིགས་གཅིག་རྐང་འཛིན་པ་ཚོ་དཔལ་ན་ལེན་ཌའི་མཁས་སྒྲུབ་གཉིས་ལྡན་ལྟར་འཛམ་གླིང་ཐོག་གཙུག་ཏུ་བཀུར་འོས་ཀྱི་མཁས་པ་ཆགས་རྒྱུར་འབད་བརྩོན་ཞུ་བཞིན་ཡོད་

གསུངས།

དེ་རིང་སྔ་དྲོའི་ཆུ་ཚོད་ ༩།༣༠ པའི་སྟེང་། བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་ལྷག་པ་ཚེ་རིང་ཚོགས་ཁང་དུ། ཉིན་གཉིས་རིང་གི་ཆོས་རིག་ལས་ཁུངས་ཀྱི་གོ་སྒྲིག་འོག་གཞུང་ཆེན་རིགས་གཅིག་རྐང་འཛིན་གྱི་མཁས་པའི་ཚོགས་ཆུང་གི་ཚོགས་འདུ་ཐེངས་གཉིས་པ་དེ་མགོ་འཛུགས་གནང་ཡོད་ཅིང་། སྐུ་མགྲོན་གཙོ་བོར་ཆོས་རིག་བཀའ་བློན་པདྨ་ཆོས་འབྱོར་མཆོག་ཕེབས་འདུག

ལྷན་ཚོགས་ཀྱི་ཐོག་མར་ཆོས་རིག་དྲུང་ཆེ་དོན་གྲུབ་རྡོ་རྗེ་ལགས་ཀྱིས་ངོ་སྤྲོད་གནང་བར། ང་ཚོས་ད་ཐེངས་ཚོགས་འདུ་འདིའི་ནང་གྲོས་གཞི་དོན་ཚན་ལྔ་བཞག་ཡོད་པ་དང་། གལ་ཆེ་ཤོས་ཤིག་ནི་དེ་སྔའི་གཞུང་ཆེན་རིགས་གཅིག་རྐང་འཛིན་གྱི་སྒྲིག་གཞི་ཁག་ཅིག་ལ་བསྐྱར་ཞིབ་དང་བསྐྱར་བཅོས་ཀྱི་འཆར་ཟིན་ཞིག་དེ་རིང་གི་ཚོགས་འདུའི་ཐོག་འབུལ་རྒྱུ་ཡིན་སྟབས། དེའི་དོན་ཚན་རེ་རེ་ཐོག་བགྲོ་གླེང་དང་གཏན་འབེབས་གནང་དགོས།

ད་ལྟ་གཞུང་ཆེན་རིགས་གཅིག་རྐང་འཛིན་གྱི་སློབ་གཉེར་སྐབས་དང་པོ་དེ་འགྲོ་བཞིན་ཡོད་པ་དང་། སྐབས་གཉིས་པ་རིང་མིན་ཕྱི་ཟླ་ ༤ ཚེས་ ༡ ཉིན་ནས་མགོ་འཛུགས་ཞུ་རྒྱུ་དང་། དེའི་ནང་འཚང་སྙན་འབུལ་མཁན་ ༡༦ ཙམ་བྱུང་ཡོད་སྟབས། ད་ཐེངས་མཁས་པའི་ཚོགས་འདུ་འདིའི་ཐོག་འདེམས་སྒྲུག་གནང་དགོས་པ་ཆགས་ཡོད། ཅེས་སོགས་ངོ་སྤྲོད་གནང་སོང་། ད་དུང་ཁོང་གིས། ལྷན་ཚོགས་ནང་ཕེབས་མཁན་ཆོས་བརྒྱུད་ཁག་གི་མཁས་དབང་རྣམས་པས་གཞུང་ཆེན་རིགས་གཅིག་རྐང་འཛིན་གྱི་ལས་འཆར་འདིར་ལེགས་སྤེལ་ཉེས་འགོག་གི་དགོངས་འཆར་ག་རེ་ཡོད་ཀྱང་། ཚོགས་ཆུང་འདིའི་ཐོག་ལམ་སྟོན་གང་བྱུང་བ་གཞིར་བཞག་ང་ཚོས་ལག་བསྟར་བྱ་རྒྱུ་ཡིན། ཞེས་སོགས་བརྗོད་སོང་།

དེའི་རྗེས་སྐུ་མགྲོན་གཙོ་བོ་ཆོས་རིག་བཀའ་བློན་མཆོག་གིས། ང་ཚོས་གཞུང་ཆེན་རིགས་གཅིག་རྐང་འཛིན་གྱི་ལས་རིམ་འདི་ལོ་གཅིག་སྔོན་ཙམ་ནས་མགོ་འཛུགས་བྱས་ཏེ། སྒྲིག་གཞི་གཏན་འབེབས་ཀྱིས་ད་ལྟ་འགྲོ་བཞིན་ཡོད་པ་མ་ཟད། སྡེ་ཚན་དང་པོའི་ནང་རིགས་གཅིག་རྐང་འཛིན་པ་ ༢༢ ཡོད་ཁོངས་ནས་གཅིག་གིས་དགོངས་པ་ཞུས་ཤུལ་དུ་གཞན་ཚང་མས་ཉམས་ཞིབ་གནང་བཞིན་ཡོད་སྟབས། ཆོས་རིག་ལས་ཁུངས་ངོས་ནས་ཁོང་ཚོར་གང་ཐུབ་ཅི་ཐུབ་བྱེད་བཞིན་ཡོད། ང་ཚོའི་ཆོས་བརྒྱུད་ཁག་ལ་དགེ་བཤེས་ལྷ་རམས་པ་དང་། མཁན་པོ་དང་སློབ་དཔོན་ཟེར་བ་སོགས་ཀྱི་ཐ་སྙད་འདྲ་མིན་ཞིག་ཡོད་པ་རེད། ང་ཚོས་དགེ་བཤེས་ལྷ་རམས་པ་དང་འབུམ་རམས་པ་ (Phd) གཅིག་མཚུངས་ཡིན་པར་ངོས་འཛིན་བྱེད་ཀྱི་ཡོད་ཀྱང་། ངས་དེ་འདྲ་མ་རེད་བསམ་གྱི་འདུག ངས་ད་ལྟ་ང་ཚོས་གནང་བཞིན་པའི་གཞུང་ཆེན་རིགས་གཅིག་རྐང་འཛིན་འདི་འབུམ་རམས་པ་རེད་བསམ་གྱི་འདུག དགེ་བཤེས་ལྷ་རམས་པ་ནི་གཞུང་ཆེན་བཀའ་པོད་ལྔ་ལ་གཟིགས་ནས་དེའི་ཐོག་རྒྱུགས་འཕྲོད་པ་ཞིག་ལ་ཟེར་གྱི་ཡོད། རིགས་གཅིག་རྐང་འཛིན་ཟེར་བ་དེ་གཞུང་ཆེན་བཀའ་པོད་ལྔའི་ཁྲོད་ནས་གཞུང་ཆེན་གཅིག་ཐོག་སློབ་གཉེར་གནང་ནས་མཁས་པ་གཙུག་ཏུ་བཀུར་བ་ཞིག་ཆགས་ཐུབ་པ་ཞིག་དགོས་ཀྱི་ཡོད་སྟབས། ངས་ཐ་སྙད་འདོགས་སྟངས་ཐད་མ་འོངས་པར་བཀའ་བསྡུར་དང་ཐུགས་ཞིབ་གནང་དགོས་ཀྱི་འདུག་བསམ་གྱི་ཡོད། ཅེས་སོགས་གསུངས་སོང་།

ང་ཚོས་གཞུང་ཆེན་རིགས་གཅིག་རྐང་འཛིན་གནང་མཁན་དག་དཔལ་ན་ལེན་ཌའི་མཁས་སྒྲུབ་གཉིས་ལྡན་གྱི་སྐྱེས་བུ་ལྟར། འཛམ་གླིང་འདིའི་སྟེང་གཙུག་ཏུ་བཀུར་འོས་ཀྱི་མཁས་པ་ཆགས་རྒྱུར་རེ་བ་དང་འབད་བརྩོན་ཞུ་བཞིན་ཡོད། དེ་ཆགས་རྒྱུའི་མཐུན་རྐྱེན་དེ་ད་ཐེངས་མཁས་པའི་ཚོགས་ཆུང་ཐོག་བཀའ་བསྡུར་གནང་སྟེ། མཁས་དབང་ཚོས་སྒྲིག་གཞི་སྒྲིག་འཛུགས་གཏན་འབེབས་དང་། རིགས་གཅིག་རྐང་འཛིན་གནང་མཁན་ཚོས་རྩོམ་ཡིག་བྲིས་པ་དག་ལ་ཉམས་ཞིབ་གནང་རྒྱུ་དུས་སྐབས་འདིར་གལ་ཆེན་པོ་ཆགས་ཡོད་པ་མ་ཟད། མ་འོངས་པར་ཁོ་ཚོ་གང་འདྲ་ཆགས་མིན་ནི་ད་ཐེངས་ལྷན་ཚོགས་ཐོག་ཕེབས་པའི་མཁས་པ་ཚོར་རག་ལས་ཡོད། ཅེས་གསུངས་སོང་།

ཡང་ཆོས་རིག་བཀའ་བློན་མཆོག་གིས་དགེ་བཤེས་མའི་བསླབ་པ་སློབ་གཉེར་བྱེད་ཕྱོགས་དང་མ་འོངས་པའི་འཆར་སྣང་ཐོག་གསུངས་དོན། ༢༠༡༡ ལོར་ཆོས་བརྒྱུད་ཁག་གི་དབུ་བླ་ལྷན་རྒྱས་ཀྱི་ཚོགས་འདུ་ཚོགས་སྐབས། བཙུན་མ་ཚོས་དགེ་བཤེས་མ་གཏོང་རྒྱུའི་ཐོག་ལ་བཀའ་བསྡུར་རབ་དང་རིམ་པ་མང་པོ་བྱུང་ཡོད་པ་རེད། དགེ་བཤེས་མ་གཏོང་རྒྱུ་དེ་ཆོས་བརྒྱུད་གཞན་ལ་དཀའ་ངལ་མེད་ཀྱང་། དགེ་ལུགས་པར་དཀའ་ངལ་འབྱུང་གི་ཡོད་སྟབས། ང་ཚོས་དགེ་བཤེས་ལྷ་རམས་པ་མང་པོ་གདན་འདྲེན་ཞུས་ཏེ། མཁས་པའི་ཚོགས་ཆུང་བཙུགས་ནས་ཉིན་གཉིས་གསུམ་རིང་སྒྲིག་གཞི་གཏན་འབེབས་མགོ་འཛུགས་ཞུས་ཏེ། དང་ཐོག་ཡིག་ཚད་གཏོང་མཁན་ ༢༧ ཙམ་བྱུང་ཡོད་པ་ལས་གཉིས་ཀྱིས་རྒྱུགས་འཕྲོད་མེད་པ་དང་ཨང་དང་པོ་གསུམ་བྱུང་ཡོད། ཅེས་གསུངས་སོང་།

ཁོང་གིས་མུ་མཐུད་དུ། བཙུན་མ་ཚོས་ལོ་ ༡༧ རིང་གཞུང་ཆེན་ཁག་ལ་གཟིགས་ཏེ། ལོ་རེར་ཆ་སྙོམས་བརྒྱ་ཆ་ ༦༥ རག་དགོས་པ་དང་། དེའི་རྗེས་གཞུང་ཆེན་ཁག་ལ་ལོ་ ༤ ལ་གཟིགས་ཏེ་མཐའ་མ་དགེ་བཤེས་མའི་ལག་འཁྱེར་སྤྲོད་ཀྱི་ཡོད་པ་རེད། ད་ལྟ་ལོ་གཉིས་ཙམ་འགྲོ་བཞིན་ཡོད་པ་དང་དེའི་ནང་དགེ་བཤེས་མ་ཉི་ཤུ་རྩ་གཉིས་རྩ་གསུམ་ཙམ་ཞིག་ཡོད་པ་རེད། བཙུན་མ་ཚོས་ང་ཚོ་བུད་མེད་རེད་བསམ་ནས་དམིགས་བསལ་གང་ཡང་མ་གནང་རོགས། ང་ཚོས་སློབ་གཉེར་བྱས་ཏེ་རྒྱུགས་བཏང་ནས་ལག་འཁྱེར་རག་ཐབས་བྱེད་ཀྱི་ཡིན་གསུངས་སོང་། ངས་དེ་རླབས་ཆེན་ཞིག་དང་གཟི་བརྗིད་ཅིག་རེད་བསམ་གྱི་འདུག ༢༠༡༦ ལོར་གཞུང་ཆེན་རིགས་གཅིག་རྐང་འཛིན་པ་ ༢༠ ལྷག་དང་། བོད་ཀྱི་ལོ་རྒྱུས་ནང་བྱུང་མྱོང་མེད་པའི་དགེ་བཤེས་མ་ ༢༠ ལྷག་ཐོན་གྱི་ཡོད་སྟབས། ང་ཚོས་མ་འོངས་པར་རིགས་གཅིག་རྐང་འཛིན་ཐོན་མཁན་དག་ཚད་དང་ལྡན་པ་ཞིག་ཡོང་རྒྱུ་དེ་གལ་ཆེན་དོན་ཆེན་དུ་བརྩི་བཞིན་ཡོད། ཞེས་སོགས་གསུངས་སོང་།

ཉིན་གཉིས་རིང་གི་བགྲོ་གླེང་ཐོག་གྲོས་གཞི་དོན་ཚན་ ༥ ཡོད་པ་དག་ནི། ༢༠༡༣ ཟླ་ ༡༡ ནང་བསྐྱངས་པའི་ཚོགས་འདུ་དང་པོའི་གྲོས་ཆོད་ཐོག་བསྐྱར་ཞིབ་གནང་རྒྱུ་དང་། ཆོས་རིག་ལས་ཁུངས་ནས་རགས་ཟིན་དུ་ཕུལ་བའི་གཞིང་ཆེན་རིགས་གཅིག་རྐང་འཛིན་ལས་རིམ་གྱི་སྒྲིག་གཞིའི་ཐོག་བསྐྱར་ཞིབ་བཀའ་བསྡུར་གྱིས་གཏན་འབེབས་གནང་རྒྱུ། གསར་དུ་གཏན་འབེབས་ཞུས་པའི་སྒྲིག་གཞིའི་དགོངས་དོན་མཁས་པའི་ཚོགས་ཆུང་གི་ཚོགས་གཙོ་འོས་འདེམས་གནང་རྒྱུ། གསར་དུ་གཏན་འབེབས་ཞུས་པའི་སྒྲིག་གཞིའི་དགོངས་དོན་ ༢༠༡༥ དང་ ༢༠༡༦ ནས་ ༢༠༡༨ དང་ ༢༠༡༩ བར་གྱི་གཞུང་ཆེན་རིགས་གཅིག་རྐང་འཛིན་པ་འདེམས་སྒྲུག་གནང་རྒྱུ། དེ་མིན་འབྲེལ་ཆགས་གནད་དོན་ཐོག་བཀའ་བསྡུར་གནང་རྒྱུ་བཅས་ཡིན་འདུག ཅེས་འཁོད་འདུག

གསར་འགོད་པ། དོན་གྲུབ།

དུས་བབ་དྲ་བ་ནས།།