གསུམ་བཅུའི་དུས་དྲན་ལ་དམ་དྲག་བྱེད་པར་གྲ་སྒྲིག

གསུམ་བཅུའི་དུས་དྲན་བསླེབ་ལ་ཉེ་བས་རྒྱ་གཞུང་གིས་དགོན་པ་ཁག་གི་གཙོས་བོད་ཁུལ་གྱི་ས་ཆ་མང་པོའི་ནང་སྔར་ལས་དམ་དྲག་བྱེད་པར་གྲ་སྒྲིག་བྱེད་བཞིན་ཡོད་འདུག

ཕ་ཡུལ་རེབ་གོང་ཕྱོགས་ནས་ཡིན་པའི་བོད་མི་ཞིག་གིས་འདི་གར་གནས་ཚུལ་མཁོ་

སྤྲོད་གནང་བ་ལྟར་ན། ལོ་གསར་དང་ཆོས་འཕྲུལ་སྨོན་ལམ་ཆེན་མོའི་སྐབས་དང་བསྟུན་ཏེ། རྒྱ་གཞུང་གིས་བོད་ཁུལ་གྱི་དགོན་པ་ཁག་གི་གཙོས་ས་ཁུལ་མང་པོར་དམ་དྲག་དང་དོགས་ཟོན་ཤུགས་ཆེན་བྱས་ཡོད་པ་ལྟར། ཟླ་འདིའི་ཕྱི་ཚེས་ ༤ དང་ ༥ སྟེ་བོད་ཟླ་ ༡ ཚེས་ ༡༤ དང་ ༡༥ ཉིན་རེབ་གོང་རོང་བོ་དགོན་དང་སྐུ་འབུམ་བྱམས་པ་གླིང་། བླ་བྲང་བཀྲ་ཤིས་འཁྱིལ། དེ་བཞིན་རྔ་བ་སྒོ་མང་དགོན་སོགས་སུ་སྨོན་ལམ་ཆེན་མོ་ཚོགས་སྐབས། རྒྱ་གཞུང་གིས་དྲག་ཆས་ཉེན་རྟོག་པ་དང་ཉེན་རྟོག་པ། དམག་མི་བཅས་སྔར་ལས་མང་པོ་འགྲེམས་འཇོག་བྱས་ཏེ་དམ་དྲག་ཤུགས་ཆེན་བྱས་ཡོད་འདུག

ཡང་གནས་ཚུལ་མཁོ་སྤྲོད་པ་དེས། ལོ་གསར་གྱི་སྔ་ནུབ་ནས་བཟུང་སྟེ་མགོ་ལོག་ཁུལ་དགའ་བདེ་རྫོང་དང་པད་མ་རྫོང་། དར་ལག་རྫོང་། རྨ་ཆེན་རྫོང་ར་རྒྱ་བཅས་ཀྱི་གཞུང་ལམ་ས་ཚིགས་ཀུན་ཏུ་རྒྱ་གཞུང་གིས་དམག་སྒར་བརྒྱབ་སྟེ། ས་གནས་བོད་མི་ཚོའི་འགྲོ་འདུག་སྤྱོད་གསུམ་ལ་ལྟ་རྟོག་དང་བཀག་སྡོམ་བྱེད་བཞིན་ཡོད་པ་མ་ཟད། བསླེབ་ལ་ཉེ་བའི་གསུམ་བཅུའི་དུས་དྲན་དང་རྒྱ་གཞུང་གིས་བརྗོད་པའི་ ༣.༡༤ དོན་རྐྱེན་སྐབས་ཞི་རྒོལ་ཟིང་འཁྲུག་མི་ཡོང་བར་ད་ལྟ་ནས་དོགས་ཟོན་གྲ་སྒྲིག་སྣ་ཚོགས་བྱེད་བཞིན་ཡོད་སྐོར་བརྗོད་བྱུང་།

གཞན་ཡང་། ས་གནས་བོད་མི་ཞིག་གིས་གནས་ཚུལ་མཁོ་སྤྲོད་གནང་བའི་ནང་། ཟླ་འདིའི་ཕྱི་ཚེས་ ༤ ཉིན་རྨ་ལྷོ་ཁུལ་གཅན་ཚ་རྫོང་ལ་མོ་བདེ་ཆེན་དགོན་གྱི་གར་འཆམ་གྱི་བྱེད་སྒོ་མཇུག་བསྡུས་ཡོད་ཀྱང་། དཔུང་རྟགས་དམར་པོ་བཏགས་པའི་ཉེན་རྟོག་པ་སོགས་ཀྱིས་མུ་མཐུད་དུ་དགོན་པའི་འདུ་ཁང་གི་རྒྱབ་རོལ་སོགས་ནས་ལྟ་རྟོག་ནན་མོ་བྱེད་བཞིན་ཡོད་པ་དང་། ལོ་གཅིག་ནང་གར་འཆམ་ཐེངས་གཅིག་མ་གཏོཊ་མེད་ཀྱང་རྒྱ་གཞུང་གིས་བོད་མིའི་ཆོས་དད་རང་དབང་སོགས་ལ་སྒོ་ཀུན་ནས་རྩིས་མེད་རྡོག་རོལ་གཏོང་གི་འདུག གནས་ཚུལ་འདི་དང་འབྲེལ་བའི་འདྲ་པར་ཡོད་ཀྱང་བདེ་འཇགས་ཆེད་བརྒྱུད་ལམ་དུ་བསྐུར་མེད་ཅེས་བརྗོད་འདུག

ཨེ་ཤ་ཡ་རང་དབང་རླུང་འཕྲིན་ཁང་གིས་གནས་ཚུལ་སྤེལ་བ་ལྟར་ན། ཟླ་འདིའི་ཕྱི་ཚེས་ ༨ ཉིན་བར་ཀན་ལྷོ་ཕྱོགས་ཀྱི་ཁུལ་དང་རྫོང་ཁག་གི་སྲིད་གཞུང་ལས་བྱེད་ཚོ་ལོ་གསར་གྱི་གུང་གསེང་ཡིན་ཡང་། ཟླ་འདིའི་ཕྱི་ཚེས་ ༡ ཉིན་གློ་བུར་དུ་བརྡ་ཁྱབ་ཅིག་བཏང་སྟེ་ཕྱི་ཚེས་ ༢ ཉིན་ལས་བྱེད་ཚང་མ་ལས་གནས་སུ་འབྱོར་དགོས་པ་དང་། སློབ་གྲྭ་ཁག་གི་སློབ་མ་ཚོ་དགུན་ཁའི་གུང་གསེང་དུ་ཕྱིན་ཡོད་ཀྱང་དགེ་རྒན་རྣམས་གཞུང་ལས་ཁང་དུ་འཛོམས་དགོས་པའི་བཀའ་བཏང་ཡོད་པ་མ་ཟད། ཛ་དྲག་གི་གནས་ཚུལ་མེད་ན་ལས་གནས་ནས་དགོངས་པ་ཞུ་མི་ཆོག་ལ། སྨོན་ལམ་ཆེན་མོ་སོགས་ཆོས་ཕྱོགས་ཀྱི་བྱེད་སྒོ་གང་ལའང་ཞུགས་མི་ཆོག་པའི་བཀའ་རྒྱ་བཏང་ཡོད་འདུག ལས་གནས་སུ་བསྡུས་བའི་ལས་བྱེད་ཚོ་མི་མང་འདུ་འཛོམས་བྱེད་ས་དང་ལྷག་པར་དུ་བླ་བྲང་བཀྲ་ཤིས་འཁྱིལ་དང་གཙོད་དགོན་པ། ཤིས་ཚང་སྒར་གསར་དགོན། ཅོ་ནེ་དགོན། འབོ་ར་དགོན་སོགས་སུ་བོད་མིའི་འགྲོ་སྡོད་ལ་རྟོག་ཞིབ་ཆེད་འགྲེམས་འཇོག་བྱས་ཏེ། བསླེབ་ལ་ཉེ་བའི་གསུམ་བཅུའི་དུས་དྲན་ལ་དམ་དྲག་ཤུགས་ཆེན་བྱེད་པར་སྟ་གོན་བྱེད་བཞིན་ཡོད་འདུག

གསར་འགོད་པ། པདྨ་མཚོ།

དུས་བབ་དྲ་བ་ནས།།