བརྡ་དང་ཐ་སྙད་གང་ཞིག་བོད་སྐད་ནང་སྒྲ་བསྒྱུར་བྱས་ཚེ་ཁུངས་འདེད་དགོས།

དེང་སྐབས་བརྒྱུད་ལམ་ཁག་ཏུ་རྒྱ་ཡིག་དང་དབྱིན་ཡིག་སོགས་ལས་རྩོམ་ཡིག་དང་གསར་འགྱུར་མང་པོ་ཞིག་བོད་བསྒྱུར་བྱེད་ཀྱིན་ཡོད་སྟབས། གསར་འགོད་པས་ཤེས་རིག་ལས་ཁུངས་ཀྱི་བརྡ་ཆད་གཏན་འབེབས་ཚན་པའི་འགན་འཛིན་ཀརྨ་སྨོན་ལམ་ལགས་སུ་ད་ལྟའི་བོད་སྐད་ཡིག་དང་ལོ་ཙཱའི་གནས་སྟངས་སྐོར་བཅར་འདྲི་ཞུས།

དྲི་བ། དེང་སྐབས་བོད་ཕྱི་ནང་གཉིས་སུ་སྐད་ཡིག་ཉམས་ཆག་ཏུ་འགྲོ་བཞིན་འདུག་ཟེར་ནས་སྐད་རྒྱག་གི་ཡོད་ཀྱང་། རྩ་བའི་བོད་ཡིག་གི་ཡིག་རྨོངས་སེལ་ཚད་ཀྱི་གྲངས་འབོར་སྔར་ལས་ཡག་ཏུ་ཕྱིན་ཡོད་པ་རེད། སྐད་ཡིག་ཉམས་ཆག་དེ་གཙོ་བོ་གང་ལ་ངོས་འཛིན་གནང་དགོས་པ་དང་། སྐད་བསྲེ་ལྷད་ཅན་རིགས་འགོག་ཐབས་གང་འདྲ་ཡོད་དམ།

ལན། ལོ་ལྔ་བཅུ་དྲུག་བཅུའི་སྔོན་དང་བསྡུར་ན་ད་ལྟ་བོད་ཕྱི་གཉིས་སུ་བོད་ཡིག་གི་ཡིག་རྨོངས་གང་འཚམ་སེལ་ཡོད་ལ། གྲངས་ཚད་ཀྱང་འཕེལ་རྒྱས་ཕྱིན་ཡོད་པ་མ་ཟད། ལྷག་པར་དུ་བཙན་བྱོལ་ནང་ཡིག་རྨོངས་མེད་པར་ངོས་འཛིན་བྱས་ན་འགྲིག་གི་ཡོད་ཀྱང་། བོད་སྐད་བོད་ཡིག་ཉམས་ཆག་འགྲོ་གི་འདུག་ཟེར་དོན་གཙོ་བོ་དེ། གཅིག ད་ལྟའི་ང་ཚོའི་ཆབ་སྲིད་ཀྱི་གནས་སྟངས་དང་། གཉིས། བོད་རིགས་རྣམས་གཞིས་བྱེས་གཉིས་སུ་ཁ་གྱེས་ཡོད་པ་མ་ཟད། ཕྱི་ཕྱོགས་སུ་ཡོད་པ་དག་ཀྱང་ཡུལ་གྲུ་མང་པོ་ཞིག་ནང་ཁ་ཐོར་ནས་བསྡད་ཡོད་སྟབས། སྐད་ཡིག་དང་སྤྱི་ཚོགས། དངོས་པོའི་དཔལ་ཡོན་སོགས་ཀྱིས་གནོན་ཤུགས་དང་ཤུགས་རྐྱེན་འོག་སོ་སོའི་སྐད་ཡིག་བེད་སྤྱོད་གཏོང་ས་མེད་པ་དང་། བེད་སྤྱོད་གཏོང་ས་ཡོད་ཀྱང་དངོས་པོ་གསར་པ་མང་པོ་ཞིག་ལ་བོད་པའི་མིང་བཏགས་ཐུབ་ མེད་སྟབས། ཁྲོམ་རའི་ནང་མིང་ག་རེ་ཡོད་ཀྱང་ཚུར་ཁ་ཐུག་ལེན་དགོས་པར་བརྟེན། བོད་ཡིག་ཉམས་ཆག་འགྲོ་གི་ཡོད་པའི་སེམས་ཁྲལ་དང་མཐོང་ཚུལ་ཞིག་ཡོང་གི་ཡོད་པ་དང་། དེ་མིན་བོད་སྐད་ཡིན་པ་གང་ཞིག་ལ་བརྡ་སྤྲོད་དང་མ་མཐུན་པའམ་ཡང་ན་འགའ་ཞིག་ལ་སྐད་ཡིག་གཞན་གྱིས་ཤུགས་རྐྱེན་ཐེབས་ཏེ། སྐད་ཡིག་དེའི་བཤད་སྟངས་བོད་སྐད་ནང་འཁྱེར་ཏེ་ཚིག་སྦྱོར་འཁྲུག་པ་སོགས་སྲོལ་རྒྱུན་དང་མ་མཐུན་པ་དེ་འདྲ་བྱུང་ནས་ཉམས་ཆག་འགྲོ་བཞིན་ཡོད། ང་ཚོའི་ཆོས་རིག་སོགས་ལ་ཡོན་ཏན་ཡོད་མཁན་ཚོས་ཚུར་ཚིག་ཅིག་ལེན་སྐབས། ཚིག་དེ་ལ་བོད་སྐད་ཅིག་ཡོད་སྲིད་པ་མ་ཟད། བོད་སྐད་ཐོག་ལབ་དགོས་པ་རེད་དྲན་ནས་བེད་སྤྱོད་བཏང་ན་ཡག་པོ་ཡོད་རེད་མ་གཏོགས། དེ་མིན་དབྱིན་སྐད་དང་རྒྱ་སྐད། ཧིན་སྐད་དང་འཇར་མན་སྐད། ཧྥ་རན་སི་སྐད་སོགས་ནང་བསམ་ཚོད་དང་ལས་སླ་བཅོས་བྱས་ནས་དོ་སྣང་མ་སྤྲད་པར་བརྗོད་རྐྱང་བྱས་ཚེ། སྐད་ཡིག་གཞན་ནས་བོད་སྐད་ནང་ཟུར་ཆག་པ་དེ་དག་ཕ་ས་བུ་རྒྱུད་ནས་སོ་སོའི་སྐད་ཡིན་བསམ་པའི་འདུ་ཤེས་འཛིན་ཏེ། མ་འོངས་པར་བོད་སྐད་བོད་ཡིག་ཉམས་ཆག་འགྲོ་རྒྱུར་ཉེན་ཁ་ཡོད།

དྲི་བ། དེང་སྐབས་བོད་ཕྱི་ནང་གཉིས་སུ་སྐད་ཡིག་སྲུང་སྐྱོབ་ཀྱི་ལས་འགུལ་ཞིག་ཚ་ཚ་འུར་འུར་གྱིས་སྤེལ་བཞིན་ཡོད་པ་དེ་བཟང་ཕྱོགས་ཀྱི་འགྱུར་བ་ཞིག་རེད། འདིའི་ཐད་ལམ་སྟོན་ཟེར་ན་འདྲ། དགོངས་འཆར་གསར་པ་དེ་འདྲ་ཡོད་དམ།

ལན། དེང་སང་གོ་སྐབས་ཡོད་ཚད་ལ་བོད་ནང་སེམས་འཁུར་དང་འབད་བརྩོན་གནང་མཁན་ཡོད་ལ། རང་དབང་ལུང་པར་ཡོད་མཁན་ཚོས་ཀྱང་གནང་གི་ཡོད་པ་རེད། མང་པོ་ཞིག་གིས་བྱེད་དགོས་འདུག་གསུངས་མཁན་ཡོད་ཀྱང་ངས་བྱེད་རྒྱུ་ཡིན་ཟེར་མཁན་ཉུང་ཉུང་རེད། ཡིན་ནའང་ང་ཚོས་ཨ་ཕའི་ཕོར་པར་ཞེན་ཁོག་བྱས་ཏེ་སྐད་ཡིག་ལ་ཤ་ཚ་བྱས་ནས་ལས་འགུལ་རྩོམ་དགོས་སྟབས། ཕུགས་རྒྱང་རིང་པོ་དང་རྒྱ་ཆེ་སར་བསམ་བློ་གཏོང་དགོས་པའི་གནད་འགག་དེ་ཤེས་རྒྱུ་གལ་ཆེན་པོ་རེད། ཁ་ཤས་ལ་སེམས་ཤུགས་ཡོད་པ་ལྟར་དཀའ་ལས་ཀྱང་མང་པོ་བརྒྱབ་སྟེ། ཚད་གཞི་གང་འཚམ་ཞིག་ཏུ་སླེབ་སྐབས་ཡར་འཛེགས་རྒྱུའི་བསམ་བློ་བརླག་པའི་ཉེན་ཁ་ཡོད་པ་རེད། དེ་ནས་གཞོན་སྐྱེས་ཚོར་བོད་ཡིག་སློབ་ཁྲིད་བྱ་རྒྱུར་གོ་སྐབས་དང་ཁོར་ཡུག་གསར་པ་བསྐྲུན་ཏེ། ཕྱི་རབས་པ་ཚོས་བོད་སྐད་ཡག་པོ་འཆད་ཐུབ་པ་བཟོ་དགོས་པ་རེད་བསམ་གྱི་འདུག

དྲི་བ། ད་ཆར་རྒྱ་ནག་དང་ཕྱི་རྒྱལ་ལྟ་བུར་མཚོན་ན་ཞེ་ས་རྒྱག་མིན་དེ་ཤེས་ཡོན་ཡོད་མེད་ཀྱི་ཁྱད་པར་ཞིག་རེད། བོད་པའི་སྤྱི་ཚོགས་ནང་ཞེ་ས་མང་པོ་བརྒྱབ་ན་སྐུ་དྲག་གི་སྣང་བརྙན་དང་། ཡང་ན། གོ་རིམ་(གྲལ་རིམ་)གྱི་ཁྱད་པར་ཞིག་སྟོན་གྱི་ཡོད་སྟབས། འདི་བོད་པའི་ཞེ་སའི་ནང་དོན་གྱི་ཁྱད་པར་རེད་དམ། ཡང་ན་སྤྱི་ཚོགས་ཀྱི་འདུ་ཤེས་འཛིན་སྟངས་ཤིག་རེད།

ལན། ངས་བལྟས་ན་དེ་བག་ཆགས་ངན་པ་རེད་བསམ་གྱི་མི་འདུག སྔ་རབས་ལོ་རྒྱུས་ཐོག་བལྟས་ན་འཇིག་རྟེན་ཡ་རབས་ཀྱི་སྤྱོད་པ་བྱེད་དགོས་ཀྱི་ཡོད་པ་མ་ཟད། ལུས་ངག་ཡིད་གསུམ་གྱི་སྤྱོད་པ་བྱེད་དགོས་སྟབས། ངག་གི་སྤྱོད་ལམ་ནི་གཞན་ལ་ཚིག་སྨྲ་སྐབས་འཇམ་པོ་དང་ཞེ་ས་ཡོད་པ། གུས་ཞབས་ཡོད་པའི་ཐོག་ནས་བཤད་དགོས་པ་ནི་འཇིག་རྟེན་ཡ་རབས་ཀྱི་སྤྱོད་ཚུལ་ཞིག་རེད། བོད་ཆོལ་ཁ་གསུམ་གྱི་ཆ་ཤས་འགའ་ཤིག་ལ་ཞེ་ས་རྒྱག་རྒྱུའི་ལུགས་སྲོལ་མེད་སྟབས། བར་སྐབས་ཤིག་ལ་ཁ་ཤས་ཀྱིས་ཞེ་ས་ཟེར་བ་དེ་ལྷ་ས་དང་སྐུ་དྲག་ལ་འབྲེལ་བ་ཡོད་པ་མ་གཏོགས་དགོས་པ་མ་རེད་ཟེར་ནས་བསམ་ཚུལ་ཤོད་མཁན་དེ་འདྲ་ཡོད། ང་ཚོས་མི་ལ་ཞེ་སའི་ཚད་གང་འདྲ་ཞིག་ཞུ་དགོས་མིན་ཐད་རྩོད་པ་ཡོང་སྲིད་པ་ཞིག་ཡིན་ཡང་། ང་ཚོའི་བཀའ་དང་བསྟན་ཆོས་ནང་ལའང་ཞེ་ཚིག་མང་པོ་ཡོད་པ་མ་ཟད། སྔོན་བྱོན་ལོ་ཙཱ་བ་ཚོས་བསྒྱུར་སྐབས་བོད་སྐད་ནང་ཞེ་ཚིག་ཟེར་བ་དེར་བེད་སྤྱོད་ཡོད་པ་དང་། དགོས་པ་རྒྱུ་མཚན་ཡོད་པ་ཞིག་ལ་མཐོང་སྟེ་བཀོལ་སྤྱོད་བཏང་བ་རེད་བསམ་གྱི་འདུག ད་ལྟ་ཞེ་ཚིག་ལབ་ཚེ་དེ་སྐུ་དྲག་གི་གཤིས་ཀ་དང་གྲལ་རིམ་གྱི་ངོ་བོ་མཚོན་གྱི་ཡོད་དམ་ལབ་དགོས་དོན་ནི། ང་ཚོའི་བསམ་བློ་གཏོང་ཕྱོགས་དེ་རྒྱ་ཆུང་དྲགས་པའམ་གུ་དོག་དྲགས་པ་རེད་བསམ་གྱི་འདུག ང་ཚོས་ཞེ་ཚིག་ཞུ་མི་དགོས་པ་ཞིག་ལ་ཞུས་ན་དགོད་བྲོ་བོ་ཆགས་ཀྱི་རེད་མ་གཏོགས་གཞན་བོད་པ་ཚང་མས་ཞེ་ཚིག་ཐོག་ནས་སྐད་ཆ་བཤད་ཚེ། བོད་སྐད་བོད་ཡིག་ལ་ཕན་ལས་གནོད་ཡོད་པ་མ་རེད། དབྱིན་ཡིག་ནང་ཚིག་སྦྱོར་སྤེལ་སྐབས་ཞེ་ཚིག་མཚོན་དོན་བྱས་པ་ཙམ་མ་གཏོགས་ཞེ་ཚིག་ཟེར་བ་དེ་འདྲ་མཐོང་རྒྱུ་མེད་ཀྱང་། ཧིན་སྐད་སོགས་སྐད་ཡིག་གཞན་ནང་ཞེ་ས་ཡག་པོ་ཡོད་པ་མ་ཟད། ལྷག་པར་དུ་ཉི་ཧོང་སྐད་ཡིག་ནང་རང་དང་མཉམ་པར་ཞེ་ས་ཞུ་རྒྱུ་ཡོད་པ་དང་། གོང་མ་དང་བླ་མ། དཔོན་པོ་སོགས་མཐོ་རིམ་དག་ལ་ཞེ་ས་ཞུ་རྒྱུ་ཡོད་པ་སོགས་ཀྱི་གོ་རིམ་མི་འདྲ་བ་མང་པོ་ཡོད་པ་ཞིག་རེད་འདུག

དྲི་བ། བཙན་བྱོལ་བོད་མིའི་ཚགས་པར་དང་རླུང་འཕྲིན། བརྙན་འཕྲིན་སོགས་གསར་འགྱུར་བརྒྱུད་ལམ་ཁག་གིས་སྤྱི་ཡོངས་ནས་སྐད་ཆའི་ཚིག་སྦྱོར་སྤེལ་སྟངས་དང་། བོད་སྐད་རང་གི་བརྡ་དང་ཐ་སྙད་རིགས་བེད་སྤྱོད་གཏོང་ཕྱོགས་ཐོག་དགོངས་ཚུལ་གང་འདྲ་ཡོད་དམ།

ལན། ངས་དེར་རྒྱུ་མཚན་འདྲ་པོ་རིགས་གཉིས་ཞུ་རྒྱུ་ཡོད། དང་པོ། ང་ཚོར་སྲོལ་རྒྱུན་ནས་རྒྱ་དཀར་དང་རྒྱ་ནག བལ་ཡུལ། འབྲས་ལྗོངས། ཝ་ར་ན་སི། སྒང་ཏོག རྡོར་གླིང་སོགས་བོད་མིང་ཡོད་ཀྱང་། དེང་སང་ང་ཚོས་རྒྱ་གར་གྱི་ས་ཆ་མང་ཆེ་བར་རྒྱུས་ཡོད་སྟབས། རྒྱ་གར་སྐད་ཐོག་བརྗོད་ཀྱང་དཀའ་ངལ་གང་ཡང་འཕྲད་ཀྱི་མེད། སྔོན་མ་ཡིན་ན་བོད་མི་སྤྱི་ཡོངས་ཀྱིས་རྒྱ་གར་ནི་འཕགས་པའི་ཡུལ་དང་གཞོན་ནུ་དོན་གྲུབ་སངས་རྒྱས་ས། གནས་བསྐོར་ཡུལ་སོགས་ལས་རྒྱུས་གང་ཡང་མེད། རིམ་པས་བོད་པའི་ལོ་ཙཱ་བ་དག་རྒྱ་གར་ལ་ཕྱིན་ཏེ། ཁོ་ཚོས་དཔལ་ན་ལེན་ཌའི་མཁས་པ་དང་ནང་པའི་གནས་ཆེན་ཁག་རྒྱལ་པོའི་ཁབ་དང་ཡངས་པ་ཅན། བྱ་རྒོད་ཕུང་པོའི་རི་དང་རྩྭ་མཆོག་གྲོང་། མགོན་པོ་ཀླུ་སྒྲུབ་དང་སངས་རྒྱས་བསྐྱངས། ཟླ་བ་གྲགས་པ། ཞི་བ་འཚོ་ཞེས་དོན་བསྒྱུར་བྱས་ནས་བོད་བསྒྱུར་བྱས་ཡོད་སྟབས། བོད་པ་ཚོས་ཁོ་ཚོ་བོད་མི་ཞིག་དང་ས་ཆ་དེ་དག་བོད་པའི་ས་ཆ་ཡིན་བསམ་པའི་འདུ་ཤེས་ཤིག་ཡོང་གི་ཡོད་ཀྱང་། ཟླ་བ་གྲགས་པ་སུ་རེད་དམ་ལབ་ན་རྒྱ་གར་ནང་ཟླ་བ་གྲགས་པ་ཟེར་བ་དེ་འདྲ་བྱུང་མེད་སྟབས། རྒྱ་གར་གྱི་མིང་ཙཎྡ་ཀཱིརྟི་ཞེས་པ་དེ་འཁྱེར་ནས་འཚོལ་ཞིབ་བྱས་ན། གཞི་ནས་ཁོང་ན་ལེན་ཌའི་མཁས་པ་ཡིན་པ་ར་སྤྲོད་ཐུབ་ཀྱི་ཡོད་སྟབས། ང་ཚོས་ལུང་པ་དང་མི་མིང་གང་ཡིན་ཡང་སྒྲ་རང་སོར་འཇོག་དགོས་པ་མ་ཟད། དེ་དང་མཉམ་དུ་ཁྱད་ཚིག་དེ་འདྲ་འཇོག་རྒྱུ་གལ་ཆེན་པོ་ཆགས་ཡོད། དཔེར་ན། ཟླ་སྔོན་མའི་ཚེས་ ༢༦ ཉིན་ཨོ་བྷ་མ་རྒྱ་གར་གྱི་སྐུ་མགྲོན་གཙོ་བོར་ཕེབས་ཏེ་གསར་འགྱུར་ཚ་པོ་ཆགས་ཡོད་སྟབས། དེ་སྔ་ང་ཚོའི་གསར་ལམ་ཁག་གིས་ཉིན་མོ་དེར་རྒྱ་གར་དམངས་གཙོའི་ཉིན་མོ་ཞེས་འབོད་ཀྱི་ཡོད་ཀྱང་། དོན་དངོས་ཐོག་རྒྱ་གར་དམངས་གཙོའི་ཉིན་མོ་དང་ང་ཚོའི་ཟླ་ ༩ ཚེས་ ༢ ཉིན་གྱི་དམངས་གཙོའི་ཉིན་མོ་ལབ་པ་གཉིས་ལ་ཁྱད་པར་གང་འདུག ང་ཚོའི་དེ་དམངས་གཙོའི་སྐད་ཆ་ཡིན་ཡང་། ཕར་ཕྱོགས་དེ་སྤྱི་མཐུན་རྒྱལ་ཁབ་ཀྱི་སྐད་ཆ་ཡིན་སྟབས། ད་ལོ་གསར་འགྱུར་བརྒྱུད་ཁ་ཤས་ཀྱིས་རྒྱ་གར་སྤྱི་མཐུན་གྱི་ཉིན་མོ་ཞེས་བེད་སྤྱོད་བཏང་འདུག་ཀྱང་ཁ་ཤས་ཀྱིས་རྒྱ་གར་དམངས་གཙོའི་ཉིན་མོ་ཞེས་རང་འཇགས་བེད་སྤྱོད་བཏང་འདུག ང་ཚོས་རྒྱལ་ཁབ་ཀྱི་མིང་དེ་བྱང་ཀོ་རི་ཡ་ཡིན་ན་སྒྲ་རང་སོར་འཇོག་རྒྱུ་དང་། དེར་ (Democratic Republic) སོགས་ཁྱད་ཚིག་ཡོད་ན་དེའི་དོན་དག་བོད་ཡིག་ནང་བསླེབ་རྒྱུ་གལ་ཆེན་པོ་ཆགས་ཡོད།

དྲི་བ། དེང་སྐབས་དྲ་རྒྱ་དང་ཚགས་པར་སོགས་བརྒྱུད་ལམ་ཁག་ཏུ་སྐད་ཡིག་གཞན་པའི་ནང་གི་གནས་ཚུལ་དང་། རྩོམ་རིགས་མང་པོ་ཞིག་བོད་བསྒྱུར་བྱས་ཏེ་ཡོང་གི་འདུག་སྟབས། དེ་དག་ཁྲོད་བརྡ་དང་ཐ་སྙད་རིགས་སྒྲ་བསྒྱུར་དང་དོན་བསྒྱུར་བྱེད་ཕྱོགས་ཐོག་གཟིགས་ཚུལ་གང་འདྲ་ཡོད།

ལན། ང་ཚོར་སྔོན་མ་མེད་པ་ཞིག་བོད་བསྒྱུར་བྱེད་དགོས་ཚེ། བསྒྱུར་གཞི་དེར་བསམ་བློ་གཏོང་དགོས་རེད་མ་གཏོགས་ཡོད་ཚད་ཀྱིས་སྒྲ་བསྒྱུར་དང་དོན་བསྒྱུར་བྱེད་དགོས་ལབ་ན། རལ་གྲི་གནམ་གཡུགས་འདྲ་པོ་བྱས་ནས་བརྒྱ་ཁ་གཅིག་གཅོད་ཐོག་འགྲོ་སྲིད་པ་རེད། ང་ཚོས་བོད་བསྒྱུར་བྱེད་སྐབས་ཐ་སྙད་འདོགས་རྒྱུ་གཙོས་སྐབས་དོན་དང་ཚིག་སྦྱོར་སོགས་མང་པོ་ཞིག་ལ་བསམ་བློ་བཏང་སྟེ། མིང་སོགས་བོད་བསྒྱུར་མ་བྱས་པར་སྒྲ་རང་སོར་འཇོག་དགོས་མིན་ཐད་ཐབས་ཤེས་གང་ཡོང་བཙལ་ཏེ། གདམ་ཀ་བྱེད་དགོས་པ་ལས་འདི་ཡག་པ་དང་སྡུག་པ་རེད་ཟེར་རྒྱུ་མེད། ལྷག་པར་དུ་མིང་གསར་པ་འདོགས་མཁན་ཞིག་ཡིན་ན། སྒྲ་བསྒྱུར་དང་དོན་བསྒྱུར་གང་ཡིན་ཡང་འདོད་རྒྱལ་གྱི་མིང་ཞིག་འདོགས་ཐུབ་ན་སྟབས་བདེ་ཤོས་རེད། ད་ལྟ་ང་ཚོའི་སྤྱི་ཡོངས་ཀྱི་དཀའ་ངལ་དེ་བོད་བསྒྱུར་བྱེད་སྐབས་དོན་དག་ཕར་ཞོག ཀམ་པུཊར་སོགས་མིང་གཅིག་འདོགས་ཀྱི་ཡོད་ཀྱང་། དེའི་ཕྱི་ཕྱོགས་ཀྱི་བཟོ་ལྟ་དང་ད་ལྟ་འཕྲུལ་འཁོར་དེས་ལས་ཀ་ག་རེ་བྱེད་ཀྱི་ཡོད་པ། དེ་གང་འདྲ་བྱས་ཏེ་བྱུང་བ་སོགས་མང་པོ་ཞིག་ལ་བསམ་བློ་བཏང་སྟེ། གཞི་ནས་དེའི་དོན་དག་གི་འཆར་སྣང་འཁྱེར་ནས་དེར་རྗེས་གྲུབ་ཀྱི་མིང་འདོགས་ཀྱི་ཡོད་སྟབས། ངས་ང་ཚོར་འདོད་རྒྱལ་གྱི་མིང་འདོགས་རྒྱུའི་གཤིས་ཀའམ་རིག་རྩལ་གྱི་ཚད་གཞི་དམའ་པོ་ཡོད་ས་རེད་བསམ་གྱི་འདུག སྔོན་མ་བསྐལ་བ་ཆགས་སྐབས་ས་ཆུ་མེ་རླུང་། རྡོ་ཞེས་ལབ་ཀྱི་ཡོད་པ་ལྟར། ད་ལྟ་འགྲེལ་བཤད་རྒྱོབ་ཟེར་ན་མཚན་ཉིད་འཇོག་རྒྱུ་ཡོད་ཀྱང་། ས་ལ་གོ་རྒྱུ་ག་རེ་ཡོད་དམ་ཞེས་ན་གོ་རྒྱུ་གང་ཡང་མེད་སྟབས། མ་འོངས་པར་ང་ཚོས་དངོས་པོ་གསར་པ་ཞིག་ལ་འདོད་རྒྱལ་གྱི་མིང་བཏགས་ཚེ། ཉིན་ཞིག་ལ་མིང་བརྒྱ་ཕྲག་ཁ་ཤས་བཏགས་ཀྱང་དཀའ་ངལ་འཕྲད་ཀྱི་མ་རེད་བསམ་གྱི་འདུག

དྲི་བ། དེང་རབས་ཀྱི་ཐ་སྙད་གསར་པ་བོད་བསྒྱུར་བྱེད་ཕྱོགས་ཐོག བོད་ནང་རྒྱ་ཡིག་རྒྱ་སྐད་ལ་བསྟུན་པའི་སྒྱུར་སྟངས་ཤིག་དང་། བཙན་བྱོལ་ནང་དབྱིན་ཡིག་དབྱིན་སྐད་དང་། ཧིན་རྡི་སོགས་ལ་བསྟུན་པའི་སྒྱུར་སྟངས་ཤིག་བཅས་དངོས་པོ་གཅིག་ལ་སྒྱུར་གཉིས་གསུམ་རེ་ཡོང་གི་འདུག་པ་དེར་དགེ་སྐྱོན་གང་འདྲ་མཐོང་གི་ཡོད།

ལན། ད་ལྟ་ཐ་སྙད་གཅིག་འགྱུར་དགོས་ཟེར་མཁན་དང་སེམས་ཁྲལ་བྱེད་མཁན་མང་པོ་ཡོད་སྟབས། དང་པོ། ང་ཚོར་ཐ་སྙད་གཅིག་འགྱུར་དགོས་པ་དེ་ཛ་དྲག་ཆགས་ཡོད་ཚེ། དེར་ཛ་དྲག་གི་གདོང་ལེན་བྱེད་དགོས་པ་ཞིག་དང་། གལ་སྲིད་ཛ་དྲག་ཆགས་མེད་ན་དངོས་པོ་གཅིག་ལ་ཐ་སྙད་གསུམ་བཞི་ག་ཚོད་ཡོད་ཀྱང་། རིམ་པས་སྤྱི་ཚོགས་ནང་ཁྱབ་སྐབས་གདམ་ཀ་ཞིག་བྱས་ཏེ། ལོ་ཤས་ཕྱིན་རྗེས་དེ་དག་ཁྲོད་ནས་རེ་གཉིས་ཤིག་རང་བཞིན་གྱིས་ཟེགས་འགྲོ་བ་རེད། ངས་ང་ཚོར་ལྷག་འཕྲོས་ནང་ནས་གདམ་ཀ་མང་ཤོས་བྱེད་ཡུལ་དང་པོ་དང་གཉིས་པ། གསུམ་པ་བཅས་འདི་ཡིན་ཟེར་ནས་གཏན་འབེབས་བྱ་རྒྱུ་དང་བསྒུག་རྒྱུའི་དུས་ཚོད་ཡོད་ན། སྐད་ཡིག་གི་འཕེལ་རིམ་རྗེས་སུ་འགྲོ་དགོས་པ་ཆགས་ཡོད། ད་ལྟ་ང་ཚོ་མང་ཆེ་བས་སྒུག་རྒྱུ་མེད་པ་ཛ་དྲག་གནས་སྟངས་ཆགས་ཡོད་པའི་འདུ་ཤེས་འཛིན་གྱི་ཡོད་པ་མ་ཟད། བོད་ཕྱི་ནང་གཉིས་སུ་གཅིག་འགྱུར་དགོས་ཀྱི་འདུག་གསུང་མཁན་ཡོད་པ་མ་ཟད། བསམ་ཡོད་སེམས་ཤུགས་ཅན་མང་པོ་ཞིག་གིས་ཐབས་ཤེས་དང་བསམ་བློ་བཏང་སྟེ། ཐ་སྙད་མང་པོ་ཞིག་བཟོས་ནས་ཁྲོམ་རའི་ནང་འགྲེམས་སྤེལ་བྱས་ཡོད་ཀྱང་། གཅིག་འོག་གཅིག་ཏུ་མ་བསྡུས་པར་གཅིག་མཚུངས་ཆགས་རྒྱུ་ཅུང་དཀའ་ལས་ཁག་པོ་ཆགས་ཡོད། ཡིན་ཡང་། ད་ལྟ་བོད་དང་རྒྱ་ནག་ནང་རྒྱ་སྐད་ཤེས་མཁན་མང་པོ་ཡོད་པ་མ་ཟད། དབྱིན་སྐད་སོགས་ཕྱི་སྐད་སྦྱོང་རྒྱུར་དང་དོད་གསར་པ་ཞིག་སླེབ་བཞིན་ཡོད་སྟབས། རྒྱ་སྐད་ནང་འདི་འདྲ་ཞིག་ལབ་འདུག་ཀྱང་དབྱིན་སྐད་ནང་འདི་འདྲ་ཞིག་བཀོད་འདུག་ཟེར་ནས་ཐ་སྙད་གཅིག་འགྱུར་ཡོང་ཐབས་ལ་འབད་བརྩོན་བྱེད་སྲིད་པ་ཞིག་རེད་བསམ་གྱི་འདུག གལ་སྲིད་དེ་ལམ་ལྷོངས་མ་ཡོང་ན། ད་ལྟ་བཙན་བྱོལ་ནང་དབང་ནུས་ཡོད་པའི་ཐབས་ཤེས་དེ་འདྲ་བྱེད་རྒྱུ་ཁག་པོ་ཡིན་ཡང་། གཏེ་པོའི་ནང་གི་གཟུགས་བཟང་ཞེས་པའི་དཔེ་ལྟར་མེད་པ་ལས་དྲག་ཙམ་ཞིག བོད་མིའི་སྒྲིག་འཛུགས་ངོས་ནས་ཐ་སྙད་གཏན་འབེབས་ཀྱི་ལས་གཞི་ཞིག་འགྲོ་བཞིན་ཡོད་པ་དེ་ལ་རྒྱབ་སྐྱོར་བྱས་ནས་བེད་སྤྱོད་བཏང་ན་ཡག་པོ་ཡོད་པ་རེད་བསམ་གྱི་འདུག ཡིན་ནའང་ད་ལྟ་ང་ཚོའི་སྒལ་པར་སྨྲ་བརྗོད་རང་དབང་སོགས་རང་དབང་མང་པོ་ཞིག་འཁུར་ཡོད་སྟབས། བཙན་པོའི་དུས་སྐབས་ལྟར་གཞུང་གིས་བཀའ་བསྒྲགས་ནས་ཐ་སྙད་གཏན་འབེབས་བྱ་རྒྱུ་ཁག་པོ་ཆགས་ཡོད།

དྲི་བ། དབྱིན་སྐད་དང་རྒྱ་སྐད་སོགས་ལས་སྒྲ་བསྒྱུར་བྱེད་སྐབས། བོད་ཡིག་རང་གི་མིང་ཚིག་བེད་སྤྱོད་གཏོང་མཁན་ཁག་ཅིག་དང་། མཐུག་པོ་ལྔ་དང་། འོག་ཏུ་ཨ་ཆུང་དང་ཝ་ཟུར། ཡང་ན་ཡི་གེ་མང་པོའི་བར་དུ་ཚེག་མེད་པ་སོགས་ཅི་རིགས་ཡོང་གི་འདུག་པའི་ཐད་དགོངས་ཚུལ་གང་འདྲ་ཡོད།

ལན། དེང་སང་ང་ཚོས་རྒྱལ་སྤྱིའི་སྐད་ཡིག་ཁག་ལ་ཁ་གཏད་གཅོག་དགོས་སྟབས། བོད་ནང་རྒྱ་སྐད་ནས་བོད་བསྒྱུར་བྱས་པ་རེ་ཟུང་ཞིག་ལ་ཁས་ལེན་ཐུབ་དཀའ་བ་འདུག་མ་གཏོགས། གཞན་དཀའ་ངལ་ཞེ་དྲགས་མི་འདུག བཙན་བྱོལ་ནང་བོད་བསྒྱུར་བྱེད་མཁན་ཚོས་ཉི་ཧོང་གི་མི་དང་ས་མིང་བཅས་ལ་དབྱངས་དང་རྗེས་འཇུག་བརྒྱབ་ནས་སྒྲ་བསྒྱུར་བྱས་ན་འགྲིག་གི་ཡོད་ཀྱང་། ད་ལྟ་ང་ཚོར་དཀའ་ངལ་འཕྲད་ས་གཙོ་བོ་དེ་ཨུ་རུ་སུའི་སྐད་དང་དབྱིན་ཡིག ཧྥ་རན་སི་སོགས་ནུབ་ཕྱོགས་པའི་སྐད་ཡིག་དག་ནང་ཡོད་པའི་སྲིད་འཛིན་དང་སྲིད་བློན་གྱི་མིང་དང་ས་མིང་སོགས་རེད། དེ་དག་སྒྲ་རང་སོར་མ་བཞག་པར་གང་བྱུང་བསྒྱུར་ན་ཁྱད་མཚར་ཆགས་ཀྱི་རེད། རྒྱ་གར་སྐད་ནང་ཡི་གེ་གང་ཡིན་ཡང་སྒྲ་འགྱུར་བྱེད་རྒྱུ་མེད་སྟབས། བོད་ཡིག་ནང་ལའང་ཀློག་སྟངས་གཅིག་འགྱུར་ཡོད་མེད་ཀྱི་ཁྱད་པར་ཡོད་པ་རེད་མ་གཏོགས། མང་ཆེ་བ་ཧིན་སྐད་དང་གཅིག་པ་ཆགས་ཡོད་སྟབས། ངས་ང་ཚོས་བོད་བསྒྱུར་བྱེད་སྐབས་ཧིན་སྐད་ལྟར་བསྒྱུར་ན་འགྲིག་གི་རེད་བསམ་གྱི་འདུག ང་ཚོས་ཚེག་ག་པར་རྒྱག་དགོས་མིན་གྱི་རིགས་ལམ་དང་སྒྲ་མ་འཁྲུག་པར། ཚེག་འབྲི་ས་ཞིག་ལ་བྲིས་ནས་སྡེབ་གཅིག་གམ་སྔགས་ཡིག་ལྟར་བོད་ཡིག་ཐོག་བྲིས་ཀྱང་སྒྲ་དེ་ཉམས་ཀྱི་མེད་ཀྱང་། དེང་སང་མི་མང་པོ་ཞིག་གིས་མིང་ཚིག་འོག་ཏུ་འ་ཆུང་དང་ཝ་ཟུར་རྒྱག་གི་ཡོད་པ་དེ། ང་ཚོས་ལེགས་སྦྱར་སྐད་བོད་སྐད་ནང་བསྒྱུར་སྐབས་ལེགས་སྦྱར་སྐད་ལ་དབྱངས་ ༡༦ ཡོད་ཀྱང་བོད་སྐད་ལ་ ༤ ལས་མེད་སྟབས། ང་ཚོས་ལེགས་སྦྱར་ནང་ཨི་རིང་ཐུང་གཉིས་ཡོད་ཁོངས་ནས་རིང་བ་དེ་སྟོན་ཆེད་མིང་ཚིག་འོག་ཏུ་འ་ཆུང་ཞིག་རྒྱག་གི་ཡོད་པ་རེད། ང་ཚོས་ཨོ་བྷ་ཞེས་པའི་ཨོ་འོག་ཏུ་འ་ཆུང་ཞིག་བྲིས་ན་ཡག་པོ་མིན་འགྲོ་བསམ་ནས་འབྲི་མཁན་དེ་འདྲ་འདུག དེ་གསར་གཏོད་ཡིན་ན་རྒྱུ་མཚན་ཞིག་འཇོག་དགོས་རེད་མ་གཏོགས། ང་ཚོའི་སྲོལ་རྒྱུན་གཞིར་བཞག་བྱས་ན་གི་གུ་དང་ཞབས་ཀྱུ་འགྲོ་སར་འ་ཆུང་བརྒྱབ་ན་འགྲིག་གི་ཡོད་ཀྱང་། འགྲེང་བུ་དང་ན་རོ་གཉིས་ལ་རིགས་ལམ་དང་ཡིག་གཟུགས་གང་ཐད་ནས་འགྲིག་གི་ཡོད་པ་མ་རེད། ང་ཚོས་བྱུང་ན་སྲོལ་རྒྱུན་གྱི་འབྲི་སྲོལ་གང་ཡིན་ཤེས་པའི་ཐོག་ནས་རྒྱུན་འཁྱོངས་བྱ་རྒྱུ་གལ་ཆེན་པོ་ཆགས་ཡོད། དེང་སང་རྒྱ་ནག་ནང་ཧྥ་འབྲི་སྲོལ་གཅིག་འདུག དེ་སྔོན་མ་འབྲི་མཁན་ཞིག་གིས་འུ་ཐུག་ནས་བྲིས་པ་དེ་ད་ལྟ་མ་དག་རྒྱུན་འབྱམས་ཕྱིན་པ་ཞིག་ཡིན་པ་ལས། མཐུག་པོ་དང་ལོག་ཡིག་སོགས་གང་དུའང་མེད་པ་ཞིག་རེད།

དྲི་བ། ང་ཚོས་རྒྱལ་ཁབ་དང་མིའི་མིང་སོགས་ཐ་སྙད་གཏན་འབེབས་བྱེད་སྐབས་རྩ་འཛིན་གཙོ་བོ་ག་པར་འཇོག་དགོས་པ་དང་། དེ་དག་གཅིག་མཚུངས་བཀོལ་སྤྱོད་ཐུབ་ཐབས་གང་འདྲ་ཡོད་དམ།

ལན། ང་ཚོས་མི་དང་ས་མིང་སོགས་ཀྱི་སྒྲ་གདངས་དག་དབྱིན་ཡིག་ནང་བྲིས་ཡོད་ན་ཨ་རི་དང་དབྱིན་ཇི་གཉིས་ཀྱི་སྒྲ་གདངས་ཕལ་ཆེར་གཅིག་པ་ཡིན་སྲིད་ཀྱང་། ཧྥ་རན་སི་དང་འཇར་མན་སྐད། སི་པན་སྐད་སོགས་དབྱིན་ཡིག་དང་འབྲི་ཚུལ་འདྲ་པོ་ཡོད་ཀྱང་སྒྲ་གདངས་མི་འདྲ་བ་ཡོད་སྟབས། འདྲ་བ་རྒྱུ་མཚན་བྱས་ནས་ས་ཆ་དང་མི་མིང་སོགས་ཁག་ཅིག་ཡོངས་གྲགས་ཡིན་ཡང་། ང་ཚོས་རིགས་ཁ་ཤས་ལ་དོ་སྣང་མ་བྱས་པར་ནོར་འཁྲུལ་ཤོར་གྱི་འདུག ལྷག་པར་དུ་རྒྱ་གར་གྱི་མི་དང་ས་ཆའི་མིང་སོགས་དབྱིན་ཡིག་ནང་བྲིས་པ་གཞིར་བཟུང་ཚུར་བསྒྱུར་བ་ཡིན་ན། དཀའ་ངལ་ཆེན་པོ་ཡོད་པ་ཞིག་ཚོར་གྱི་འདུག ས་ཆ་དང་མི། ལུང་པའི་མིང་སོགས་རྒྱ་གར་ཡིན་ན་རྒྱ་གར་གྱི་འབོད་སྟངས་ཁོ་ན་བསྒྱུར་རྒྱུ་དང་། ཉི་ཧོང་དང་ཧྥ་རན་སིའི་སྐད་ཡིན་ན་སྒྲ་གཞིར་བཞག་བསྒྱུར་རྒྱུ་གལ་ཆེན་པོ་རེད། དཔེར་ན། (Michael) དབྱིན་ཡིག་ཐོག་མེ་ཁཱལ་འབོད་ཀྱི་ཡོད་ཀྱང་། ཧྥ་རན་སི་སྐད་ཐོག་མེ་ཤཱལ་འབོད་ཀྱི་ཡོད་སྟབས། ང་ཚོས་མིང་དེའི་ཁུངས་མ་འཚལ་བར་མེ་ཁཱལ་ཡིན་ཤག་བྱས་ནས་བསྒྱུར་ཚེ། རྒྱལ་སྤྱིའི་གསར་འགྱུར་ཁག་གིས་མེ་ཤཱལ་ཞེས་འབོད་སྐབས་ངོ་གནོངས་དགོས་པ་ཆགས་རྒྱུ་རེད།

དྲི་བ། ཡར་ཐོན་ཅན་གྱི་རྒྱལ་ཁབ་དང་ཡུལ་ལུང་དག་གིས་ལོ་ཙཱའི་དཔུང་ཁག་ལ་གཙིགས་ཆེན་བྱེད་པ་རེད། བཙན་བྱོལ་སྤྱི་ཚོགས་དང་། ཡང་ན་བོད་མིའི་སྒྲིག་འཛུགས་ཀྱི་ངོས་ནས་ལོ་ཙཱ་དང་ཡིག་བསྒྱུར་ལས་རིགས་ལ་འགན་འཁྱེར་ཕྱོགས་གང་འདྲ་མཐོང་སོང་། འདིའི་ཐད་འཆར་སྣང་དང་རེ་བ་དེ་འདྲ་ཡོད་དམ།

ལན། དེང་སང་གི་ལོ་ཙཱ་བ་མང་པོ་ཞིག་ནི་སོ་སོའི་ལྟོ་གོས་ཆེད་དང་ལས་གནས་ཆེད་བྱེད་ཀྱི་ཡོད་པ་མ་ཟད། སྔོན་མ་དང་བསྡུར་ན་མང་བ་ཡོད་པ་དང་བསྒྱུར་གཞི་ཡིན་ཡང་འགའ་ཤས་ཀྱིས་རྟོག་སྒྲུང་དང་ཁ་ཤས་ཀྱིས་ཚན་རིག བྱིས་སྒྲུང་དང་གཞས་ཚིག ནུབ་ཕྱོགས་པའི་རྩོམ་རིགས་གྲགས་ཅན་དང་རྒྱལ་སྤྱི་རྒྱལ་ནང་གི་གསར་འགྱུར་སོགས་ བསྒྱུར་གྱི་ཡོད་པ་མ་ཟད། ང་ཚོས་བསྒྱུར་སའི་སྐད་ཡིག་དེ་གཅིག་ཡིན་ན་ཁྲིམས་ཡིག་ཅིག་བཟོས་ན་འགྲིག་གི་ ཡོད་ཀྱང་། དེང་སང་བོད་པའི་ཆོས་རིག་དག་ཧྥ་རན་སིའི་སྐད་ནས་བོད་སྐད་ནང་སྒྱུར་མཁན་དང་། བོད་སྐད་ནས་ཧྥ་རན་སིའི་སྐད་ནང་སྒྱུར་མཁན་ཡོད་པ་མ་ཟད། སྐད་ཡིག་གཞན་ནང་ལའང་གཅིག་མཚུངས་སྒྱུར་མཁན་ཡོད་སྟབས། ང་ཚོར་སྒྲིག་འཛུགས་ཤིག་ཡོད་ཀྱང་། བསྒྱུར་མཁན་དེ་དག་ཚང་མ་བོད་པ་མིན་སྟབས། དེའི་དབང་འོག་ཏུ་བསྡུ་ཐུབ་མིན་གྱི་དཀའ་ངལ་ཞིག་ཆགས་ཡོད། དཔེར་ན། ན་ནིང་ས་ར་མཐོ་སློབ་ཀྱི་གཞོན་ནུས་འགན་བླངས་ཏེ། གྲ་སྒྲིག་ཚོགས་ཆུང་བཙུགས་པ་སོགས་ཀྱི་ཐབས་ཤེས་བྱས་ཀྱང་དེ་ཙམ་གྱིས་ནུས་པ་འཐོན་ཐུབ་ཀྱི་མེད་སྟབས། དཔལ་འབྱོར་དང་དབང་ནུས་ཡོད་མཁན་ཚོས་མར་བཀོད་སྒྲིག་བྱས་ནས་ཐབས་ཤེས་བྱེད་དགོས་པ་རེད་མ་གཏོགས། ང་ཚོས་སེམས་ཁྲལ་བྱས་ནས་སྡོད་རྒྱུ་ཙམ་ལས་ནུས་པ་འཐོན་རྒྱུ་གང་ཡང་ཡོད་པ་མ་རེད།

གསར་འགོད་པ། དོན་གྲུབ།

དུས་བབ་དྲ་བ་ནས།།