རྒན་ཡོལ་བ་ལིན་རོན་ཆཱན་ལ་ཞིབ་བཤེར།

རྒན་ཡོལ་ཞུས་ཟིན་པའི་ལིན་རོན་ཆཱན་ལ་ཁྲིམས་འགལ་ཚབས་ཆེན་བྱས་པའི་ཉེས་མིང་འོག་རྒྱ་གཞུང་གིས་ཞིབ་བཤེར་བྱེད་བཞིན་འདུག

ཁ་སང་ཕྱི་དྲོར་རྒྱ་ནག་གི་ཆུ་ཚོད་ ༤ ། ༥༦ སྟེང་། དབུས་སྒྲིག་ཁྲིམས་ཞིབ་བཤེར་ལྷན་ཁང་གི་དྲ་བའི་སྟེང་། རྒྱ་ནག་རྒྱལ་སྲིད་སྤྱི་ཁྱབ་ཁང་གི་རྒྱུ་ནོར་ལྟ་སྐྱོང་ཨུ་ཡོན་གྱི་གནས་ཚུལ་ནང་རྒྱ་ནག་གློག་འཕྲིན་ལས་ཁུངས་ཀྱི་སྤྱི་གཉེར་བ་གཞོན་པ་ཟུར་བ་དང་། ཏང་གི་རྩ་འཛུགས་མགོ་གཙོ་གཞོན་པ་ལིན་རོན་ཆཱན་ (Leng Rongquan)

ཁྲིམས་འགལ་ཚབས་ཆེན་བྱས་པའི་དོགས་གཞིའི་འོག་ཞིབ་བཤེར་བྱེད་བཞིན་ཡོད་པ་ཁྱབ་བསྒྲགས་བྱས་འདུག

དེ་རིང་རྒྱ་གཞུང་གི་ཚད་ཞཱིན་དྲ་བས་གནས་ཚུལ་སྤེལ་པ་ལྟར་ན། ད་རེབ་ཞིབ་བཤེར་འོག་ཚུད་པའི་ལོ་ན་ ༦༦ སོན་པའི་ལིན་རོན་ཆཱན་དེ་རྒྱ་ནག་སྲིད་གྲོས་ཀྱི་འགན་འཛིན་གཞོན་པ་ཟུར་བ་དང་། དབུས་འཐབ་ཕྱོགས་གཅིག་གྱུར་གྱི་འགན་འཛིན་ཟུར་བ་ལིན་ཅི་ཧྭ་དང་འབྲེལ་བ་ཡོད་པ་མ་ཟད། ལིན་རོན་ཆཱན་དང་ལིན་ཅི་ཧྭ་ཡི་ནུ་བོ་ལིན་ཝན་ཁྲིན་གཉིས་ལ་ཡང་འདས་པའི་ལོ་མང་རིང་ཚོང་ལས་འབྲེལ་བ་ཡོད་སྟབས། ད་རེབ་ལིན་རོན་ཆཱན་ཞིབ་བཤེར་བྱས་པ་དེ་ཁོ་གཉིས་རྒྱབ་ཀྱི་སྟངས་འཛིན་བྱེད་མཁན་ཨ་རིའི་ཐོ་གཞུང་ལས་ཁུངས་ཀྱི་མ་དངུལ་དང་འབྲེལ་བ་ཡོད་འདུག ཅེས་སོགས་བཀོད་འདུག

སྔར་ལོའི་ལོ་མཇུག་ལ་ཚད་ཞཱིན་དྲ་བའི་སྟེང་རྩོམ་ཡིག་ཅིག་སྤེལ་བའི་ནང་། ལིན་ཅི་ཧྭ་ཡི་ནུ་བོ་ལིན་ཝན་ཁྲིན་གྱིས་ཝང་ཁྲིན་ (Wang Cheng) ཞེས་པའི་མིང་གཞན་ཞིག་བེད་སྤྱོད་བྱས་ཏེ། གླིང་དགུ་དྲ་ཐོག་ལས་ཁུངས་ (九洲在线有限公司) ཀྱི་འགན་འཛིན་བྱས་སྐབས། ལྐོག་ནས་ལིན་ཝན་ཁྲིན་དང་ཅང་མན་ཧིན་(Jiang Mianheng) སོགས་དང་ཚོང་ལས་ཁེ་དབང་གི་འབྲེལ་བ་བཙུགས་ཡོད་ཚུལ་བཀོད་འདུག

༢༠༠༣ ལོར་གླིང་དགུ་དྲ་ཐོག་ལས་ཁུངས་དབུ་བརྙེས་ཡོད་པ་དང་། ཐོག་མར་ལས་ཁུངས་དེ་དེབ་སྐྱེལ་བྱེད་སྐབས་རྒྱ་སྒོར་དུང་ཕྱུར་ ༤ དང་བྱེ་བ་ ༩ ཡི་མ་དངུལ་བཏང་ཡོད་ཅིང་། ཅང་མན་ཧིན་གྱི་སྟངས་འཛིན་བྱེད་བཞིན་པའི་རྒྱ་ནག་དྲ་རྒྱའི་བརྒྱུད་ལམ་ལས་ཁུངས་ (中国网络通讯集团公司) ཀྱིས་མ་དངུལ་བརྒྱ་ཆ་ ༤༠ ཡི་རོགས་སྐྱོར་བྱས་ཡོད་པ་དང་། རྒྱ་ནག་ཕྱི་ཕྱོགས་ལ་ཚོང་འབྲེལ་བྱེད་པའི་དྲ་རྒྱའི་ལས་ཁུངས་ (VC软银亚洲基础设施基金网络公司) དང་ཨ་ཊེ་ཇའུ་དྲ་རྒྱའི་མ་དངུལ་ལས་ཁུངས་ ( IDG网络投资公司)གཉིས་ཀྱིས་བརྒྱ་ཆ་ ༣༠ རེས་རོགས་སྐྱོར་བྱས་ཡོད་འདུག

སྐབས་དེར་རྒྱ་ནག་དྲ་རྒྱའི་བརྒྱུད་ལམ་ལས་ཁུངས་ཀྱི་སྤྱི་གཉེར་བ་གཞོན་པ་ལིན་རོན་ཆཱིན་གྱིས་མགྲིན་ཚབ་པའི་མིང་ཐོག་ནས་གཏམ་བཤད་སྤེལ་སྐབས། ལིན་ཝན་ཁྲིན་ལ་ཝང་ཁྲིན་ཞེས་པའི་མིང་བེད་སྤྱོད་བཏང་སྟེ། གླིང་དགུ་དྲ་ཐོག་ལས་ཁུངས་ཀྱི་སྤྱི་གཉེར་བའི་ལས་འགན་འཁུར་རྒྱུ་ཡིན་ཚུལ་བརྗོད་འདུག རྗེས་སུ་གླིང་དགུ་དྲ་ཐོག་ཅེས་པ་མིང་བསྒྱུར་ཏེ་ཉིན་ལྟར་སྐུད་ལམ་ (天天在线) ཅེས་བརྗེས་ཡོད་འདུག

༢༠༡༠ ལོའི་ཟླ་ ༤ པའི་ནང་ལིན་རོན་ཆཱན་རྒྱ་ནག་གློག་འཕྲིན་ལས་ཁུངས་ཀྱི་སྤྱིའི་འཆར་འགོད་པ་དང་། པེ་ཅིན་ཞིབ་འཇུག་ཁང་གི་འགན་འཛིན་གྱི་གོ་གནས་ནས་རྒན་ཡོལ་ཞུས་ཡོད་འདུག ཁོ་ ༡༩༤༩ ལོར་སྐྱེས་ཡོད་པ་དང་པེ་ཅིན་གློག་འཕྲིན་སློབ་ཆེན་ནས་སློབ་མཐར་ཕྱིན་ཡོད་འདུག

གསར་འགོད་པ། འཇིགས་མེད་རྒྱ་མཚོ།

དུས་བབ་དྲ་བ་ནས།།