བོད་མིའི་འཐབ་རྩོད་དང་ཆིག་སྒྲིལ་གྱི་རྣམ་པ་མཚོན་དགོས་པ་གལ་ཆེན་ཡིན།

གཟའ་པ་སངས་ཉིན་གསལ་བསྒྲགས་ཤིག་སྤེལ་བའི་ནང་། ད་ལོའི་གསུམ་བཅུའི་དུས་དྲན་ཉིན་ཨ་རིའི་ནེའུ་ཡོག་ཏུ་བྱུང་བའི་རྙོག་གླེང་ཐད། ཉེ་ལམ་ཨ་རིའི་སྐུ་ཚབ་དོན་གཅོད་ཁང་དང་བྱང་ཨ་རིའི་སྤྱི་འཐུས་རྣམ་གཉིས། དེ་བཞིན་གཞུང་འབྲེལ་མིན་པའི་ཚོགས་པ་ཁག་གི་སྐུ་ཚབ་བཅས་འཛོམས་ཏེ་གྲོས་བསྡུར་གནང་

མཐར་སྤྱི་མོས་གྲོས་ཆོད་དོན་ཚན་ ༧ བཞག་ཡོད་འདུག

ཉེ་ལམ་ཟླ་ ༤ ཚེས་ ༣ ཉིན། ཨ་རིའི་སྐུ་ཚབ་དོན་གཅོད་དབུ་དཀར་ཚང་སྐལ་རྡོར་མཆོག་དང་། བྱང་ཨ་རིའི་སྤྱི་འཐུས་བཀྲ་ཤིས་རྣམ་རྒྱལ་དང་ནོར་བུ་ཚེ་རིང་རྣམ་གཉིས། དེ་བཞིན། ནེའུ་ཡོག་དང་ནེའུ་རྗིར་སི་ས་གནས་བོད་རིགས་ཚོགས་པ་དང་། ས་གནས་བོད་ཀྱི་གཞོན་ནུ་ལྷན་ཚོགས་དང་བུད་མེད་ལྷན་ཚོགས། མདོ་ཁམས་ཆུ་བཞི་སྒང་དྲུག་ཚོགས་པ་དང་། བོད་རང་བཙན་སློབ་ཕྲུག་ཚོགས་པ། ཨ་རིའི་བོད་ཀྱི་མཐུན་གྲོགས་ཚོགས་པ་བཅས་ཀྱི་སྐུ་ཚབ་རྣམས་འཛོམས་ཡོད་འདུག

གྲོས་ཆོད་དེའི་ནང་། གོང་གི་ཚོགས་སྡེ་ཁག་གི་སྐུ་ཚབ་རྣམས་འཛོམས་ཏེ། གྲོས་བསྡུར་ལྷུག་པོར་གནང་མཐར། དེ་རེབ་ནེའུ་ཡོག་དང་ནེའུ་རྗིར་སི་བོད་རིགས་སྤྱི་མཐུན་ཚོགས་པ་གཙོས་པའི་ཚོགས་པ་ཁག་གིས་བོད་མིའི་སྒྲིག་འཛུགས་ཀྱི་ལངས་ཕྱོགས་ཐོག་འབད་བརྩོན་གནང་བ་དང་། ལས་འགུལ་གོ་སྒྲིག་ཞུ་ཕྱོགས་ཀྱང་དམངས་གཙོའི་ལམ་སྲོལ་ལྟར་ཐག་གཅོད་གནང་ཡོད་པར་ངོས་འཛིན་དང་སྔགས་བརྗོད་ཞུས་འདུག

ད་རེབ་མི་རེ་ཟུང་གིས་ཆེད་དུ་ལས་འགུལ་ལ་གཏོར་བརླག་གཏོང་ཐབས་བྱས་པ་དང་། གནས་ཚུལ་དེ་རིགས་སྤྱི་ཚོགས་བརྒྱུད་ལམ་ཁག་ཏུ་ཁྱབ་སྤེལ་གནང་བར་བློ་ཕམ།  དེ་བཞིན། མ་འོངས་པར་ཡང་གསུམ་བཅུའི་དུས་དྲན་དེ་གཞུང་འབྲེལ་ཐོག་སྲུང་གཙི་གནང་སྟེ། བོད་རིགས་སྤྱི་མཐུན་ཚོགས་པའི་གཙོ་འགན་འཁུར་ཏེ་ལས་རིམ་བཟོ་བཀོད་དང་གཏམ་བཤད་སོགས་ཀྱང་བོད་མིའི་འཐབ་རྩོད་དང་ཆིག་བསྒྲིལ་གྱི་རྣམ་པ་མཚོན་པ་ཞིག་དགོས་ཚུལ་སོགས་བཀོད་འདུག

གསལ་བསྒྲགས་ནང་འདི་ལྟར་བཀོད་འདུག ཕྱི་ལོ་ ༢༠༡༥ ཟླ་ ༤ ཚེས་ ༣ ཉིན་བྱང་ཨ་རིའི་བོད་ཀྱི་སྐུ་ཚབ་དོན་གཅོད་དབུ་དཀར་ཚང་སྐལ་རྡོར་ལགས་དང་བྱང་ཨ་རིའི་སྤྱི་འཐུས་ནོར་བུ་ཚེ་རིང་ལགས། སྤྱི་འཐུས་བཀྲ་ཤིས་རྣམ་རྒྱལ་ལགས་བཅས་ཀྱི་ལྷན་དུ་ནེའུ་ཡོག་དང་ནེའུ་རྗིར་སི་བོད་རིགས་སྤྱི་མཐུན་ཚོགས་པ་དང་ས་གནས་བོད་ཀྱི་གཞོན་ནུ་ལྷན་ཚོགས། ས་གནས་བོད་ཀྱི་བུད་མེད་ལྷན་ཚོགས། མདོ་ཁམས་ཆུ་བཞི་སྒང་དྲུག་ཚོགས་པ། བོད་རང་བཙན་སློབ་ཕྲུག་ཚོགས་པ། ཨ་རིའི་བོད་ཀྱི་མཐུན་གྲོགས་ཚོགས་པ་བཅས་ཀྱི་འཐུས་ཚབ་མཉམ་ཞུགས་ཡོད་པའི་ལྷན་ཙོགས་གནང་ཞིང་།

ལྷན་འཛོམས་གནང་བའི་དགོས་དོན་ནི་ཉེ་ཆར་ནེའུ་ཡོག་ཏུ་བོད་མིའི་རང་དབང་སྒེར་ལངས་ཉིན་མོ་སྲུང་བརྩི་ཞུ་སྐབས་བྱུང་བའི་གནད་དོན་རྣམས་བསླབ་བྱ་རུ་བླངས་ནས། མ་འོངས་པར་གསུམ་བཅུའི་དུས་དྲན་སྲུང་བརྩི་ཞུ་ཕྱོགས་སོགས་ལ་སྨན་སླད་མཉམ་རུབ་ཀྱི་ཐོག་ནས་ཞུ་སྒོའི་སྐོར་གྲོས་བསྡུར་ལྷུག་པོ་དང་གསང་པོ་ཞུས་ཏེ་གཤམ་འཁོད་དོན་གནད་ཁག་གི་ཐོག་སྤྱི་མོས་བྱུང་བའི་ཡོངས་ཁྱབ་ཞུ་རྒྱུ།

དོན་ཚན་དང་པོ།

འདི་ལོའི་གསུམ་བཅུའི་དུས་དྲན་སྲུང་བརྩི་གོ་སྒྲིག་ཞུ་ཕྱོགས་ཐད་ནེའུ་ཡོག་དང་ནེའུ་རྗིར་སི་བོད་རིགས་སྤྱི་མཐུན་ཚོགས་པ་

དང་དེ་མིན་ཚོགས་པ་ཁག་ནས་འབད་བརྩོན་ཇི་གནང་ལ་ཡི་རངས་བསྔགས་བརྗོད་ཡོད་ལ། གོ་སྒྲིག་གནང་མཁན་ཚོའི་ངོས་ནས་བོད་མིའི་སྒྲིག་འཛུགས་ཀྱི་ལངས་ཕྱོགས་གཞི་རྩིར་བཞག་པར་ངོས་འཛིན་གསལ་བོ་ཞུ་གི་ཡོད། དུས་དྲན་གོ་སྒྲིག་ཞུ་ཕྱོགས་ཀྱི་འཆར་གཞི་དང་མང་ཚོགས་ལ་སྔོན་ཚུད་ནས་བརྡ་ཁྱབ་གནང་རྒྱུ་སོགས་ཐག་གཅོད་ཐ་དག་མང་གཙོའི་ལམ་སྲོལ་བཞིན་མང་མོས་ཐོག་ནས་མོས་མཐུན་བྱུང་བ་ཞིག་ལ་ངོས་འཛིན་ཞུ་བཞིན་ཐོག་དུས་དྲན་སྲུང་བརྩིའི་ནང་མཉམ་ཞུགས་བྱེད་མཁན་ཡང་ཕོན་ཆེན་བྱུང་བར་ལེགས་བརྗོད་ཞུ་རྒྱུ་ཡིན།

དོན་ཚན་གཉིས་པ།

མ་འོངས་པར་གསུམ་བཅུའི་དུས་དྲན་གཞུང་འབྲེལ་གྱི་རྣམ་པ་ཐོན་པའི་ཐོག་ནས་སྲུང་བརྩི་ཞུ་རྒྱུ་གཙོ་གནད་ཆེ་བའི་ཆ་ཤས་ཤིག་ལ་བརྩིས་ཏེ། ལས་རིམ་བཟོ་བཀོད་དང་། གཏམ་བཤད་གནང་མཁན་བཅས་ཁྱོན་ཡོངས་ཀྱི་བོད་མིའི་འཐབ་རྩོད་དང་ཆིག་བསྒྲིལ་གྱི་རྣམ་པ་མཚོན་པ་ཞིག་དགོས་རྒྱུ་གལ་གནད་དུ་མཐོང་། གཞུང་འབྲེལ་གྱི་དུས་དྲན་སྲུང་བརྩིའི་མཛད་སྒོ་གྲུབ་མཚམས་སུ་ཁྲོམ་སྐོར་སྐད་འབོད་སོགས་ལ་བཀོད་བྱུས་སྟངས་འཛིན་རིགས་བྱ་ཐབས་དཀའ་བ་ཞིག་ལ་ངོས་འཛིན་ཞུ་གི་ཡོད།

དོན་ཚན་གསུམ་པ།

གོ་སྒྲིག་བྱེད་མཁན་ཚོས་གསུམ་བཅུའི་དུས་དྲན་གྱི་ལས་འགུལ་མ་སྤེལ་གོང་ནས་ཕྲེད་དར་དང་སྦྱར་ཡིག་ཁག་གཅིག་གྱུར་ཡོང་ཐབས་ལ་འབད་བརྩོན་གནང་རྒྱུ་དང་། དགོས་གལ་གྱུར་ཚེ་ཕྱི་ལོ་ ༢༠༡༣ ལོའི་ཟླ་བ་དང་པོའི་ནང་བཀའ་ཤག་དང་བོད་མི་མང་སྤྱི་འཐུས་ལྷན་ཚོགས་ནས་ལྡི་ལིར་སྤེལ་བའི་བོད་མིའི་གདུང་སེམས་མཉམ་སྐྱེད་ལས་འགུལ་སྐབས་བེད་སྤྱོད་གནང་བའི་ཕྲེད་དར་དང་བརྗོད་ཚིག་ཁག་ནས་དཔེ་ལེན་ཆོག་རྒྱུ་དང་། དུས་དྲན་སྐབས་སུ་འབོད་ཚིག་བེད་སྤྱོད་གནང་ཕྱོགས་ཐད་མང་ཚོགས་སྤྱི་ཡོངས་ཀྱི་བསམ་ཚུལ་དང་མཐུན་པ་བྱེད་ན་འཐུས་རྒྱུ།

དོན་ཚན་བཞི་པ།

བློ་ཕམ་གྱི་རང་བཞིན་ཞིག་ལ་གསུམ་དུས་སྐབས་མི་སྣ་རེ་ཟུང་གིས་གསུམ་དུས་སྒེར་ལངས་ཁྲོམ་སྐོར་སྐད་འབོད་ལ་དོ་ཕོགས་གཏོང་ཐབས་བྱས་པ་དང་། སྐབས་དེར་བྱུང་བའི་ལབ་གླེང་ཕྲན་བུ་རིགས་སྤྱི་ཚོགས་དྲ་རྒྱའི་ནང་བརྒྱུད་སྤེལ་བྱས་པ་ནི་སྤྱི་ཚོགས་བདེ་འཇགས་ལ་འགན་འཁུར་མེད་པའི་བྱ་སྤྱོད་རིགས་ལ་བློ་ཕམ་བྱུང་དོན། ང་ཚོས་ཚང་མར་འབོད་སྐུལ་ཞུ་རྒྱུར། གནས་ཚུལ་གང་འདྲ་ཞིག་བྱུང་བ་ཡིན་རུང་གདོང་དང་གདོང་ཐུག་ནས་བཤད་རེས་བྱ་རྒྱུ་དེ་བརྒྱུད་ལམ་ཡག་ཤོས་ཤིག་ཡིན་པར་ངོས་འཛིན་ཞུ་གི་ཡོད།

དོན་ཚན་ལྔ་པ།

སྤྱི་ཚོགས་འབྲེལ་མཐུད་དྲ་རྒྱ་ནི་ལག་ཆ་བཟང་པོ་ཞིག་ཡིན་པ་དེ་ལྟར་ཡང་། འདི་ལོའི་གནས་ཚུལ་དེ་འགན་འཁུར་མེད་པའི་ཐོག་ནས་སྤྱི་སྒེར་མི་སྣའི་བར་གཅིག་གིས་གཅིག་ལ་སྐྱོན་བརྗོད་དང་དམའ་འབེབས་བྱེད་རེས་བྱས་པའི་ངན་འབྲས་མིག་མཐོང་ལག་ཟིན་ལ་བརྟེན། སླད་ཕྱིན་ཚོགས་སྡེ་ཁག་གི་འགན་འཁུར་མི་སྣའི་ངོས་ནས་སྤྱི་ཚོགས་དྲ་རྒྱའི་ཐོག་གནས་ཚུལ་ཁྱབ་སྤེལ་བྱ་རྒྱུར་མཁེ་ཉེན་མ་འཛོལ་པ་གནང་གལ་ནན་བརྗོད་བྱ་རྒྱུ་ཡིན།

དོན་ཚན་དྲུག་པ།

ས་གནས་བོད་རིགས་སྤྱི་མཐུན་ཚོགས་པ་དེ་ནེའུ་ཡོག་དང་ནེའུ་རྗིར་སི་བོད་རིགས་མང་ཚོགས་ནས་འོས་འདེམས་བྱས་པའི་

སྒྲིག་འཛུགས་ཆེ་ཤོས་ཤིག་ཡིན་པས། མ་འོངས་གསུམ་བཅུའི་དུས་དྲན་གོ་སྒྲིག་ཞུ་སྐབས་བོད་རིགས་སྤྱི་མཐུན་ཚོགས་པའི་མགོ་ཁྲིད་འོག་ཏུ་གོང་གསལ་དོན་ཚན་ལྔ་པོ་གཞིར་བཞག་ཚོགས་པ་ཚང་མས་མཉམ་རུབ་གནང་རྒྱུ་མོས་མཐུན་བྱུང་།

དོན་ཚན་བདུན་པ།

གསུམ་བཅུའི་དུས་དྲན་གཙོ་བོར་གྱུར་བའི་གཞི་རྒྱ་ཆེ་བའི་ལས་འགུལ་སྤེལ་ཕྱོགས་ཐད་བོད་མིའི་སྒྲིག་འཛུགས་ནས་ལམ་སྟོན་ཞུ་རྒྱུ་བཅས། གོང་གསལ་དོན་ཚན་ཁག་མ་འོངས་གསུམ་བཅུའི་དུས་དྲན་གོ་སྒྲིག་ཞུ་ཕྱོགས་ཀྱི་ལམ་སྟོན་གྱི་ཚུལ་དུ་བོད་རིགས་སྤྱི་མཐུན་ཚོགས་པ་གཙོས་ཚོགས་པ་གཞན་ནས་ལག་སྟར་ཡོང་བ་ཞུ། ཨ་རིའི་སྐུ་ཚབ་དོན་གཅོད་ཁང་ནས་ ༢༠༡༥ ཟླ་ ༤ ཚེས་ ༡༠ ལ། ཞེས་སོགས་བཀོད་འདུག

དུས་བབ་དྲ་བ་ནས།།