གསང་བ་ཕྱི་གྱར་བྱས་པའི་ཁྲིམས་ཆད།

ཁ་སང་བྱང་ཁཱ་རོ་ལི་ཎ་མངའ་སྡེའི་ཁྲིམས་ཁང་གིས་ཨ་རིའི་གསང་བའི་ལས་ཁུངས་ཀྱི་འགན་འཛིན་ཟུར་པ་ཌ་ཝུ་ཌེ་པེ་ཌར་སེ་ལ་ལོ་གཉིས་ཀྱི་བཙོན་འཇུག་ཁྲིམས་ཐག་བཅད་འདུག

ཁ་སང་ཨ་རིའི་བྱང་ཁཱ་རོ་ལི་ཎ་མངའ་སྡེའི་ཅར་ལོ་ཌེ་ (Charlotte) གྲོང་ཁྱེར་གྱི་

ཆེས་མཐོའི་ཁྲིམས་ཁང་གིས་བཅད་ཁྲ་ཞིག་ཁྱབ་བསྒྲགས་བྱས་པའི་ནང་། ཨ་རིའི་སྐར་མ་བཞི་ཅན་གྱི་བགྲེས་ཡོལ་དམག་སྤྱི་དང་གསང་བའི་ལས་ཁུངས་ཀྱི་འགན་འཛིན་ཟུར་པ་ཌ་ཝུ་ཌེ་པེ་ཌར་སེ་ (David Petraeus) ལགས་ཀྱིས་ཁོ་རང་གི་རང་རྣམ་འབྲི་མཁན་དང་། ཟུར་བསྟན་དུ་གྲགས་པའི་ཧྥོ་ལཱ་བྷོར་ཌེ་ཝལ་(Paula Broadwell) ལ་ཨ་རིའི་དམག་དོན་གསང་བ་བཤད་ཡོད་པའི་ནག་ཉེས་བཙུགས་ཏེ། ལོ་གཉིས་རིང་ཚོད་ལྟའི་བཙོན་འཇུག་དང་ཨ་སྒོར་འབུམ་གཅིག་གི་ཉེས་ཆད་བཅས་བཏང་ཡོད་འདུག

ཁྲིམས་དཔོན་ཌ་ཝུ་ཌེ་ཀེ་སི་ལར་ (David Keesler) གྱིས་རོའུ་ཊར་གསར་ལམ་ཐོག “ཐོག་མར་ཆེས་མཐོའི་ཁྲིམས་ཁང་གིས་ཌ་ཝུ་ཌེ་པེ་ཌར་སེ་ལགས་སུ་ཨ་སྒོར་ ༤༠༠༠༠ ཡི་ཉེས་ཆད་གཅོད་རྒྱུ་བྱས་ཡོད་ཀྱང་། ཁོང་གིས་གཞུང་གི་ལས་ཀར་ཐལ་སྐྱོན་ཤུགས་ཆེན་ཤོར་ནས་གསང་བ་ཕྱི་གྱར་བྱས་པའི་བདེན་དཔུང་ཁུངས་ཕེར་བྱུང་ཡོད་སྟབས། ལོ་གཉིས་ཀྱི་དུས་བཀག་བཙོན་འཇུག་དང་ཨ་སྒོར་འབུམ་གཅིག་གི་ཆད་པ་གཅོད་རྒྱུའི་ཐག་གཅོད་བྱས་པ་རེད།”ཅེས་བརྗོད་འདུག

ཌ་ཝུ་ཌེ་པེ་ཌར་སེ་ལགས་ཀྱི་དག་སེལ་ཁྲིམས་རྩོད་པ་ཁཱན་ཌལ་(David Kendall) གྱིས། “ཁྲིམས་ཁང་གིས་ཌ་ཝུ་ཌེ་པེ་ཌར་སེ་ཡིས་རྒྱལ་ཁབ་ཀྱི་གསང་བ་ཕྱི་གྱར་བྱས་ཚུལ་བརྗོད་ཡོད་ཀྱང་། ཁོང་གི་རང་རྣམ་ནང་གསང་བའི་གནས་ཚུལ་གང་ཡང་འཁོད་མེད་སྟབས། ངའི་གྱོད་ཡར་ཁྲིམས་ཐག་དེ་འདྲ་གཅོད་དགོས་དོན་གང་ཡང་ཆགས་མེད།”ཅེས་བརྗོད་འདུག

ཟླ་འདིའི་ཚེས་ ༢༣ ཉིན་དབྱིན་ཡུལ་ཆ་འཕྲིན་དང་རོའུ་ཊར་གསར་ལམ་ཐོག་གནས་ཚུལ་སྤེལ་དོན་ལྟར་ན། ལོ་ན་ ༦༢ ལ་སོན་པའི་ཌ་ཝུ་ཌེ་པེ་ཌར་སེ་ལགས་ནི། ཨ་རིའི་པིན་སེ་ཌོན་གཙུག་ལག་སློབ་ཆེན་གྱི་འབུམ་རམས་པ་དང་གྱེན་ལོག་ཤོག་ཁག་གི་གནད་དོན་ཆེད་མཁས་པ་ཡིན་སྟབས། དེ་སྔོན་ཁོང་གིས་ཨི་རག་དང་ཨབ་གྷན་ནང་རྟེན་གཞི་བྱས་པའི་ཨ་རིའི་དམག་དཔུང་གི་བཀོད་དོམ་དམག་སྤྱི་བྱས་ཏེ། དྲག་སྤྱོད་པ་རྩ་མེད་བཟོ་རྒྱུའི་ལས་འགན་ཡག་པོ་བསྒྲུབས་ནས་ཨ་རིར་ཕྱིར་ལོག་དང་འབྲེལ་ཨ་རིའི་གསང་བའི་ལས་ཁུངས་ཀྱི་འགན་འཛིན་བྱས་ཡོད་འདུག

གནས་ཚུལ་དེའི་ནང་མུ་མཐུད་དུ། ༢༠༡༢ ལོའི་ཟླ་ ༡༡ ནང་ཨ་རིའི་དབུས་གཞུང་ཉུལ་ཞིབ་ཁང་ (FBI) ཟེར་བས་ཁོང་དང་ཁོང་གི་རང་རྣམ་ (All In: The Education of General David Petraeus) ཞེས་པ་འབྲི་མཁན་ཧྥོ་ལཱ་བྷོར་ཌེ་ཝལ་ལགས་དང་ལུས་འབྲེལ་བྱུང་ཡོད་པ་མ་ཟད། ཁོ་མོར་ཨ་རིའི་གསང་གནས་དང་མཉམ་འབྲེལ་དམག་ཇུས། ཁོང་དང་སྲིད་འཛིན་ཨོ་བྷ་མ་དང་ཨ་རིའི་བདེ་སྲུང་ལྷན་ཚོགས་བཅས་བར་གྱི་གྲོས་བསྡུར་བྱས་པའི་ཟིན་བྲིས་དེབ་ཅིག་བསྟན་པ་སོགས་ར་སྤྲོད་བྱུང་ཡོད་སྟབས། ལས་གནས་ནས་དགོངས་པ་ཞུ་བཅུག་པ་མ་ཟད། ཁ་སང་ཨ་རིའི་ཁྲིམས་ཁང་གིས་ཁོང་གི་བྱས་ཉེས་ལ་ལོ་གཉིས་ལྷག་བརྟག་དཔྱད་བྱས་ཏེ། ཁོང་ལ་ལོ་གཉིས་ཀྱི་བཙོན་འཇུག་ཁྲིམས་ཐག་བཅད་ཡོད་སྟབས། ཁོང་གིས་བརྩེ་བའི་དགའ་པོ་ཉེ་པོ་དང་ལས་རོགས་ཚོར་དགོངས་པ་མ་ཚོམ་ཞེས་བརྗོད་ཡོད་སྐོར་སོགས་བཀོད་འདུག

དེ་རིང་གསང་དོན་དཔེ་སྐྲུན་ཁང་(WikiLeaks) ཞེས་པ་གསར་འཛུགས་བྱེད་མཁན་ཨོ་སི་ཊོ་ལི་ཡའི་མི་སེར་ཇུ་ལེན་ཨ་སན་ཇེ་ (Julian Assange) ཡི་མགྲིན་ཚབ་ཁྲིམས་རྩོད་པ་མེ་ཁཱལ་(Michael Ratner) གྱིས་རྒྱ་གར་དུས་བབ་ཐོག ཨ་རིའི་གཞུང་གིས་རྒྱལ་ཁབ་ཀྱི་གསང་བ་ཕྱིར་གྱར་བྱེད་མཁན་ལ་ཉེས་པ་ཡང་མོ་དེ་འདྲ་ཞིག་བཅད་པ་དེ་ནི་ལག་མགོར་ཐལ་ལྕག་ཞུས་པ་ཙམ་ཞིག་ལས་གཞན་ངེས་པ་རྙེད་པའི་ཐག་གཅོད་གང་ཡང་བྱས་མི་འདུག་ཅེས་བརྗོད་འདུག

གསར་འགོད་པ། དོན་གྲུབ།

དུས་བབ་དྲ་བ་ནས།།