རྩོམ་པ་པོ་བློ་མིག་རྒྱ་གཞུང་གིས་འཛིན་བཟུང་།

ཟླ་འདིའི་ཚེས་ ༡༧ ཉིན་གྱི་མཚན་མོའི་ཆུ་ཚོད་ ༡༡།༣༠ ཙམ་ལ་རྔ་པ་རྫོང་ཐོག་ནས་རྒྱ་གཞུང་གིས་རྩོམ་པ་པོ་བློ་མིག་ལགས་འཛིན་བཟུང་བཙན་ཁྲིད་བྱས་ཡོད་པ་དང་། དེའི་རྗེས་ཁོང་གར་ཡོད་ཅི་ཆགས་ཀྱི་གནས་ཚུལ་ཤེས་རྟོགས་མེད་པ་ཆགས་ཡོད་འདུག

དངོས་མིང་ལ་ཇོ་འཇམ་དབྱངས་དང་ཡོངས་གྲགས་སུ་བློ་མིག་ཏུ་འབོད་པ་ཁོང་རྒྱ་གཞུང་གིས་འཛིན་བཟུང་བྱེད་དོན་ཁ་གསལ་མེད་ཀྱང་། ཁོང་འཛིན་བཟུང་རྗེས་རྩོམ་པ་པོ་ ༢༠ ལྷག་གིས་ཁོང་གི་སྐོར་ལ་རྩོམ་ཡིག་བྲིས་ཡོད་པ་དག་དང་འབྲེལ་ཡོད་ཚོས་ཚོད་དཔག་བྱས་པ་ལྟར་ན། ཁོང་གིས་དེ་སྔོན་༢༠༠༨ ལོའི་ཞི་རྒོལ་དང་རང་ལུས་མེར་བསྲེགས་ཀྱི་རྒྱབ་ལྗོངས། ཁོར་ཡུག་གཏོར་བཅོམ་དང་སྨྲ་བརྗོད་རང་དབང་སོགས་ཀྱི་ཐད་རྒྱ་གཞུང་ལ་ཐེར་འདོན་རྩོམ་ཡིག་བྲིས་ཤིང་། བགྲོ་གླེང་དང་གཏམ་བཤད་སྔ་ཕྱི་མང་པོར་བྱས་པའི་རྐྱེན་གྱིས་ཡིན་པར་ངོས་འཛིན་བྱེད་ཀྱི་ཡོད་འདུག

རང་ལོ་ ༢༧ ཡིན་པའི་རྩོམ་པ་པོ་ཁོང་ནི་ཨ་མདོ་རྔ་པ་རྨེའུ་རུ་མའི་རུ་ཆེན་གསུམ་པའི་ཇོ་ཚང་གི་ཡིན་ཞིང་། ཕ་མིང་ལ་རྡོར་ཁོ་དང་མ་མིང་ལ་འཛམ་དཀར་ཟེར་གྱི་ཡོད་འདུག ལོ་དྲུག་གི་སྟེང་རྔ་པ་ཀིརྟི་དགོན་པར་གྲྭ་པ་བྱས་ཤིང་། ཀིརྟིའི་ནང་བསྟན་གཞོན་ནུའི་སློབ་གྲྭར་ཞུགས་ཏེ་སློབ་སྦྱོང་རྒྱུན་སྐྱོང་བྱེད་བཞིན་པའི་སྐབས་སུ་རྒྱ་གཞུང་གིས་གྲྭ་ཕྲུག་བདུན་བརྒྱ་ལྷག་ཡོད་པའི་ནང་བསྟན་གཞོན་ནུའི་སློབ་གྲྭ་སྒོ་བརྒྱབ་རྗེས། རྔ་པ་ཀིརྟི་དགོན་པ་གཙོས་བྱས་ཏེ་བྲག་མགོ་དགོན་དང་རེབ་སྐོང་། བླ་རུང་སྒར་སོགས་ནས་ནང་ཆོས་དང་རྩོམ་རིག་སོགས་ལ་སློབ་སྦྱོང་གནང་ཡོད་པ་དང་། ད་སྐབས་རྔ་པ་ཀིརྟི་དགོན་པའི་ཕར་ཕྱིན་འཛིན་གྲྭ་ཡིན་འདུག

༢༠༡༠ ལོར་༼ན་བུན་སེར་པོའི་འཕྱུར་སྟངས།༽ཟེར་བའི་དེབ་ཅིག་བརྩམས་ནས་ཟི་ལིང་ནས་དཔར་བསྐྲུན་བྱས་འདུག དེ་མིན་བོད་ནང་གི་མཆོད་མེ་དྲ་བ་དང་སེང་རྡོར་དྲ་བ། མཚོ་སྔོན་པོ་ཟིན་བྲིས་སོགས་སུ་ཆེད་རྩོམ་མང་པོ་སྤེལ་མྱོང་ཡོད་འདུག ལྷག་པར་ཉེ་ཆར་ཁོང་གིས་༼ལྕགས་སྒྲོག་གིས་བཀྱིགས་པའི་གཏམ་རྒྱུད།༽ ༼རྔ་པའི་ཡི་གེ་བ་དག་ལ་མཚོན་གྱིས་བསྣུན་གྱིན་ཡོད།༽ ༼ང་མ་ཤི་བར་དུ་ལྟ་ཚུལ་བཤད་ཁོ་ཐག་ཡིན།༽ ཟེར་བ་སོགས་ཀྱི་རྩོམ་ཡིག་སྤེལ་ཡོད་འདུག

དམིགས་བསལ་བོད་ནང་གི་རྩོམ་པ་པོ་སྒོ་ཤེར་དང་སེང་རྡོར། དགུ་རུང་སྤུན་གྲོལ། ཞོགས་ལྗང་སོགས་དང་ལྷན་དུ་༼ཟི་ལིང་གཟའ་ཉི་མའི་ཁ་བརྡ།༽ སོགས་ཀྱིས་མཚོན་པའི་མཚོ་སྔོན་དགེ་འོས་སློབ་ཆེན་སོགས་ནས་བགྲོ་གླེང་མང་པོ་བྱས་མྱོང་ཡོད་འདུག མ་ཟད་ཐོག་དང་པོར་རྔ་པ་རང་ནས་ཀྱང་༼རང་གྲོལ་བསྐྱར་ཞིབ་༽དང་༼གཟའ་ཉི་མའི་ཁ་བརྡ།༽ ཟེར་བའི་བགྲོ་གླེང་གསར་འཛུགས་བྱས་ཏེ། གཞོན་སྐྱེས་མང་པོར་ཤུགས་རྐྱེན་ཆེན་པོ་ཐེབས་ཡོད་འདུག རྨེའུ་རུ་མ་ནས་ཀྱང་༼སྨྲ་བརྗོད་མེད་པའི་འུ་ཅག་༽ཟེར་བའི་དམངས་ཚོགས་དང་མཉམ་དུ་བགྲོ་གླེང་ཞིག་གོ་སྒྲིག་བྱས་ཡོད་འདུག གོང་གི་གནས་ཚུལ་གཏོང་མཁན་རྨེའུ་དཀོན་རྒྱམ་ཡིན།

དུས་བབ་དྲ་བ་ནས།།