གྲོས་མོལ་དང་གྲོས་མཐུན་གྱི་འགལ་འདུ།

ཁ་སང་ཨི་རན་གྱི་སྲིད་འཛིན་ཧཱ་སན་གྱིས་སྟོབས་ལྡན་རྒྱལ་ཁབ་ཁག་གིས་དཔལ་འབྱོར་ཉེས་ཆད་གཏོང་མཚམས་མ་བཞག་ཚེ་རྡུལ་ཕྲན་མཚོན་ཆའི་སྔོན་འགོག་གྲོས་མཐུན་ལ་མིང་རྟགས་འགོད་རྒྱུ་མིན་སྐོར་བརྗོད་འདུག

ཟླ་འདིའི་ཚེས་ ༡༤ ཉིན་ཨ་རིའི་སྲིད་འཛིན་ཨོ་བྷ་མས་ཨི་རན་ལ་དཔལ་འབྱོར་

ཉེས་ཆད་ཆག་ཡང་གཏོང་མིན་དང་། མ་འོངས་པའི་རྡུལ་ཕྲན་སྔོན་འགོག་གྲོས་མཐུན་ལ་དགག་བྱ་བྱེད་རྒྱུའི་འགན་དབང་ཆ་ཚང་ཨ་རིའི་གྲོས་ཚོགས་ལ་ཡོད་སྐོར་བརྗོད་ཡོད་སྟབས། ཁ་སང་ཨི་རན་གྱི་སྲིད་འཛིན་ཧཱ་སན་ (Hassan Rouhani) གྱིས་འཛམ་གླིང་སྟོབས་ལྡན་རྒྱལ་ཁབ་ཁག་གིས་ཨི་རན་ལ་དཔལ་འབྱོར་ཉེས་ཆད་ཆག་ཡང་མ་བཏང་ཚེ། རྡུལ་ཕྲན་སྔོན་འགོག་གི་གྲོས་མཐུན་ལ་མིང་རྟགས་འགོད་རྒྱུ་མིན་སྐོར་བསྒྲགས་འདུག

ཨི་རན་གྱི་སྲིད་འཛིན་ཧཱ་སན་གྱིས་ར་ཤཱེ་ཌི་གྲོང་ཁྱེར་(Rasht) ནང་སྐོང་ཚོགས་བྱས་པའི་རྒྱལ་སྤྱིའི་ལྷན་ཚོགས་ཤིག་གི་ཐོག “ཨ་རིའི་གྲོས་ཚོགས་གོང་འོག་གཉིས་ཀྱི་འཐུས་མི་དང་དྲག་སྤྱོད་པ་ཚོས་དགོས་འདུན་ག་རེ་བཏོན་པ་ཡིན་ནའང་། གནད་དོན་དེ་ང་ཚོ་དང་འབྲེལ་བ་གང་ཡང་མེད་སྟབས། ང་ཚོས་ཨ་རིར་བཟང་ཕྱོགས་ཀྱི་རྣམ་འགྱུར་བསྟན་པར་ཚུར་བཟང་ཕྱོགས་ཀྱི་ལན་པོ་སློག་དགོས་པ་དང་། ལྷག་པར་དུ་ད་བར་ཨི་རན་ལ་དཔལ་འབྱོར་ཉེས་ཆད་བཅད་པ་དག་ཆག་ཡང་མ་བཏང་ཚེ། མ་འོངས་པར་ཨི་རན་གྱིས་རྡུལ་ཕྲན་སྔོན་འགོག་གི་གྲོས་མཐུན་ལ་མིང་རྟགས་འགོད་རྒྱུ་མིན”ཞེས་དང་།ཨི་རན་གྱི་སྙན་གྲགས་ཅན་གྱི་ཆབ་སྲིད་པ་ཨཱ་ཡ་ཌོ་ལཱ་ (Ayatollah Ali Khamenei) ཡིས། “སྟོབས་ལྡན་རྒྱལ་ཁབ་ཁག་གིས་ཨི་རན་ལ་དཔལ་འབྱོར་ཉེས་ཆད་གཏོང་མཚམས་མ་བཞག་ཚེ། རྡུལ་ཕྲན་སྔོན་འགོག་གི་གྲོས་ཆོད་འཇོག་རྒྱུ་མིན”ཞེས་བརྗོད་འདུག

ཨ་རིའི་ཕྱི་སྲིད་དྲུང་ཆེ་ཇོན་ཁེ་རི་ཡིས་འཇར་མན་ནང་ཚོགས་འཆར་ཡོད་པའི་རྒྱལ་སྤྱིའི་རྒྱལ་ཁབ་བདུན་གྱི་ཕྱི་སྲིད་བློན་ཆེན་གྱི་བཞུགས་མོལ་ཚོགས་འདུར་བཅར་སྐབས་ཁོང་གིས། “འཛམ་གླིང་སྟོབས་ལྡན་རྒྱལ་ཁབ་ཁག་གིས་མ་འོངས་པར་ཟླ་གཉིས་ལྷག་རིང་ཨི་རན་དང་གྲོས་མོལ་བྱས་ཏེ། རྡུལ་ཕྲན་སྔོན་འགོག་གྲོས་ཆོད་འཇོག་ཐབས་བྱ་རྒྱུ་ཡིན་སྟབས། སྲིད་འཛིན་ཨོ་བྷ་མས་གྲོས་ཚོགས་འཐུས་མི་ཚོ་དང་གྲོས་མོལ་གནང་སྟེ། གྲོས་མཐུན་འདིར་རྒྱབ་སྐྱོར་འཐོབ་རྒྱུར་ཡིད་ཆེས་བྱེད་བཞིན་ཡོད”ཅེས་བརྗོད་འདུག

ཟླ་འདིའི་ཚེས་ ༡༥ ཉིན་རོའུ་ཌར་དང་ཧིན་དྷུ་སི་ཐན་དུས་བབ་ཐོག་གནས་ཚུལ་སྤེལ་དོན་ལྟར་ན། ཨོ་བྷ་མས་སྲིད་འཛིན་གྱི་དུས་ཡུན་ནང་ཨི་རན་གྱིས་རྡུལ་ཕྲན་མཚོན་ཆ་བཟོ་སྐྲུན་བྱ་རྒྱུར་སྔོན་འགོག་གི་གྲོས་ཆོད་ཅིག་འཇོག་རྒྱུར་འབད་བརྩོན་རིམ་པ་བྱས་ཡོད་ཀྱང་དོན་ཕན་སོན་པའི་གྲུབ་འབྲས་གང་ཡང་ཐོན་མེད་སྟབས། ༢༠༡༢ ལོ་ནས་བཟུང་ཨ་རི་དང་ཡུ་རོབ་མཐུན་ཚོགས་ཀྱིས་དཔལ་འབྱོར་ཉེས་ཆད་ལྕི་རུ་བཏང་སྟེ། དེ་སྔོན་ཨི་རན་གྱིས་ཉིན་གཅིག་ལ་རྡོ་སྣུམ་བྷེ་རལ་(barrels) ས་ཡ་གཅིག་དང་ཕྱེད་ཀ་ཕྱིར་ཚོང་བྱེད་བཞིན་པ་ཉུང་དུ་བཏང་ནས་ས་ཡ་གཅིག་ལས་བཙོང་མི་ཆོག་པ་བཟོས་ཏེ། ཡུལ་དེའི་དཔལ་འབྱོར་འཕེལ་རྒྱས་ལ་ཚོད་འཛིན་བྱས་ཡོད།

ཕྱི་ལོ་ ༢༠༡༣ ལོའི་ཟླ་ ༡༡ ནང་ཨ་རིའི་ཕྱི་སྲིད་དྲུང་ཆེ་ཇོན་ཁེ་རི་དང་ཨི་རན་གྱི་ཕྱི་སྲིད་བློན་ཆེན་ཇཱ་ཝ་ཌི་ཛཱ་རེབ་རྣམ་གཉིས་ཀྱིས་རྡུལ་ཕྲན་མཚོན་ཆའི་གནད་དོན་སྐོར་ལ་བར་བརྒལ་གྲོས་ཆོད་ཅིག་བཞག་སྟེ། ཨི་རན་གྱིས་རྡུལ་ཕྲན་མཚོན་ཆའི་རྒྱུ་ཆ་ཡུ་རེ་ནི་ཡམ་བརྒྱ་ཆ་ ༢༠ ཉུང་དུ་གཏོང་རྒྱུ་དང་འབྲེལ། གསོག་འཇོག་བྱས་པའི་ཡུ་རེ་ནི་ཡམ་དག་རྩ་མེད་བཟོས་ཚེ། ཨ་རི་དང་རྒྱལ་སྤྱིའི་རྒྱལ་ཁབ་ཁག་གིས་ཨ་སྒོར་ས་ཡ་ ༧༠༠ ལྷག་གི་གུན་གསབ་སྤྲོད་རྒྱུ་དང་། ༢༠༡༤ ལོའི་ཟླ་༧ ནང་གནད་དོན་དེའི་ཐོག་ཁྱབ་རྒྱ་ཆེ་བའི་གྲོས་ཆོད་ཅིག་འཇོག་རྒྱུ་ཐག་གཅོད་བྱས་ཡོད་ཀྱང་། ད་བར་འཇོག་ཐུབ་མེད་སྟབས། ༢༠༡༥ ལོའི་ཟླ་ ༤ ཚེས་ ༣ ཉིན་སུད་སིའི་གྲོང་ཁྱེར་ལུ་སན་ཎེ་ནང་དུ། ཨི་རན་དང་སྟོབས་ལྡན་རྒྱལ་ཁབ་ཁག་བར་རྡུལ་ཕྲན་སྔོན་འགོག་གྱི་སྒྲོམ་གཞི་ཞིག་གཏན་འབེབས་དང་འབྲེལ། ཟླ་ ༦ ཚེས་ ༣༠ ཉིན་གྲོས་ཆོད་འཇོག་རྒྱུར་གྲོས་མོལ་བྱས་ཡོད་སྟབས། ཁ་སང་མཉམ་འབྲེལ་རྒྱལ་ཚོགས་རྒྱལ་སྤྱིའི་རྡུལ་ཕྲན་ཞིབ་དཔྱོད་ཚོགས་པའི་རིགས་གཅིག་མཁས་དབང་ཁག་ཅིག་ཨི་རན་ནང་སྐོར་སྐྱོད་ཀྱིས། མཐོ་རིམ་དཔོན་རིགས་དང་ཆེད་མཁས་པ་ཚོར་ཐུག་སྟེ། རྡུལ་ཕྲན་མཚོན་ཆའི་གནད་དོན་སྐོར་ལ་གྲོས་བསྡུར་བྱས་ཡོད་ཅེས་སོགས་བཀོད་འདུག

དེ་རིང་རྒྱལ་སྤྱིའི་རྡུལ་ཕྲན་མཚོན་ཆའི་གནད་དོན་ཆེད་མཁས་པ་ཝུ་ཎར་ལགས་ཀྱིས་དབྱིན་ཡུལ་གྱི་ (The Guardian) ཐོག སྟོབས་ལྡན་རྒྱལ་ཁབ་ཁག་གིས་རྡུལ་ཕྲན་སྔོན་འགོག་གི་གྲོས་མོལ་འདི་བརྒྱུད་ཨི་རན་ལ་དཔལ་འབྱོར་ཉེས་ཆད་གཏོང་མཚམས་མ་བཞག་ཚེ། མ་འོངས་པར་གྲོས་ཆོད་འཇོག་ཐུབ་ཀྱང་ཕན་འབྲས་འཐོན་རྒྱུ་ཁག་པོ་ཆགས་ཡོད་ཅེས་དང་། ཨ་རིའི་དམངས་གཙོ་ཚོགས་པའི་གྲོས་ཚོགས་འཐུས་མི་མོར་ཧྥི་ (Chris Murphy) ཡིས། ཁ་ཉིན་གཞུང་གིས་གྲོས་ཚོགས་ནང་ཨི་རན་གྱི་རྡུལ་ཕྲན་མཚོན་ཆ་སྔོན་འགོག་བྱ་རྒྱུའི་ཐོག་ཚོར་ཤུགས་དྲག་པོས་གླེང་སློང་བྱས་པ་དེས། ད་ལྟ་འགྲོ་བཞིན་ཡོད་པའི་གྲོས་མོལ་ལ་འགོག་རྐྱེན་ཐེབས་མི་སྲིད་པ་མ་ཟད། དེ་ལས་ལྡོག་སྟེ་བཟང་ཕྱོགས་ཀྱི་འགྱུར་བ་ཞིག་འབྱུང་སྲིད་པ་རེད་ཅེས་བརྗོད་འདུག

གསར་འགོད་པ། དོན་གྲུབ།

དུས་བབ་དྲ་བ་ནས།།