བློ་ཕམ་ཆེ་ཤོས་དགོན་པ་དེ་གནས་སྟངས་སྐྱོ་བོ་ཞིག་གི་འོག་ལྷག་ཡོད་པ་དེ་ཡིན།

ངྷ་ས་ཚེ་མཆོག་གླིང་གི་རྙོག་གླེང་ཁྲོད་མཁན་པོ་དང་དགེ་བསྐོས། དབུ་མཛད་གཙོས་པའི་གྲྭ་བ་ ༢༩ དགོན་པ་ནས་འཐོན་དགོས་བྱུང་ཡོད་པ་རྣམས་ལ། ཆོས་རིག་ལས་ཁུངས་ཀྱི་རོག་འདེགས་འོག་ད་ཆར་གྲྭ་བ་སྐོར་ཞིག་གི་འགྲོ་ཡུལ་གཏན་འཁེལ་བྱུང་ཡོད་ཀྱང་། ད་དུང་གྲྭ་བ་ ༡༥ ཙམ་གྱི་འགྲོ་ཡུལ་གཏན་འཁེལ་མེད་པར་ལྷག་འདུག

ཉེ་ལམ་ཕྱི་ཟླ་ ༧ པའི་ནང་ངྷ་ས་ཚེ་མཆོག་གླིང་དགོན་པའི་ཕྱག་མཛོད་ཐུབ་བསྟན་སྙན་གྲགས་ལགས་ཀྱིས་གཞུང་རྒྱུ་སྒེར་བདག་བྱས་པ་དང་དགོན་པའི་ནང་ཚུལ་མིན་སྣ་ཚོགས་བྱེད་ཀྱི་ཡོད་པའི་རྙོག་གླེང་ཞིག་གི་འོག དགོན་པའི་མཁན་པོ་དང་དགེ་བསྐོས་གཙོས་པའི་གྲྭ་བ་ ༦ རྒྱ་གར་ཉེན་རྟོག་ལས་ཁུངས་སུ་འཁྲིད་ཡོད་ཅིང་། རྗེས་སུ་ཞིབ་འཇུག་བྱས་སྐབས། ཚེ་མཆོག་གླིང་དགོན་པ་དེ་བོད་མིའི་སྒྲིག་འཛུགས་ཆོས་རིག་ལས་ཁུངས་ཀྱི་སྟངས་འཛིན་འོག་མེད་པར། ཁྲིམས་དང་འབྲེལ་བ་ཡོད་པའི་དགོན་པའི་ཡིག་ཆ་ཁག་དང་དངུལ་ཁང་གི་འཛིན་ཡིག་སོགས་ཕྱག་མཛོད་ཐུབ་བསྟན་སྙན་གྲགས་ཀྱི་མིང་ཐོག་ན་ཡོད་པ་དང་། དགོན་པའི་བསླབ་པ་སློབ་གཉེར་སོགས་སྤྱིའི་འཛིན་སྐྱོང་སྤེལ་གསུམ་གྱི་བདག་དབང་ཡོངས་ད་ཆར་སྒང་ཐོག་ཏུ་བཞུགས་ཡོད་པའི་དགོན་བདག་བླ་མ་བསྟན་འཛིན་དགེ་ལེགས་རིན་པོ་ཆེ་མཆོག་ལ་ཡོད་སྟབས། ཕྱག་མཛོད་དང་མཁན་པོ། དགོན་བདག་བླ་མ་བཅས་ཀྱིས་ནང་ཁུལ་ནས་ཐག་གཅོད་མི་བྱ་ཐབས་མེད་བྱུང་ཡོད།   

ཟླ་ ༩ ཚེས་ ༧ ཉིན་དགོན་བདག་བླ་མ་ཕེབས་ཏེ། དགོན་པའི་མཁན་པོ་དང་དགེ་བསྐོས། དབུ་མཛད་སོགས་དེ་སྔའི་གྲྭ་བ་ ༦ དེ་དུས་བཅད་ལྟར་དགོན་པ་ནས་འཐོན་དགོས་པའི་ཐག་གཅོད་བྱས་སྟབས། གྲྭ་བ་གཞན་ ༢༣ ཙམ་གྱིས་ཀྱང་ཐག་གཅོད་དེར་འདོད་པ་མེད་པའི་རྣམ་འགྱུར་བསྟན་ཏེ། ཁྱོན་སྡོམ་གྲྭ་བ་ ༢༩ ཙམ་གྱིས་ཉི་མ་གཅིག་ལ་དགོན་པ་ནས་རྩ་དགོངས་ཞུས་ཏེ། ཟླ་གཅིག་ལ་ཉེ་བའི་རིང་ངྷ་ས་སྟོད་པ་སྐྱིད་སྡུག་གི་ཚོགས་ཁང་གཡར་ནས་སྡོད་དགོས་བྱུང་ཡོད་ཀྱང་།ཟླ་སྔོན་མར་ཆོས་རིག་ལས་ཁུངས་ཀྱི་རྒྱབ་གཉེར་འོག་མཁན་རིན་པོ་ཆེ་དང་དགེ་བསྐོས་ཟུར་པ་བཀྲ་ཤིས་རྒྱལ་མཚན་གཉིས་ལྷོ་ཕྱོགས་སེ་སྨད་གྲྭ་ཚང་དང་གྲྭ་བ་གཞན་ ༡༠ ལྷོ་ཕྱོགས་རྒྱུད་སྨད་གྲྭ་ཚང་། གྲྭ་བ་ ༡ ཤེས་རབ་དགའ་ཚལ་སློབ་གླིང་། གྲྭ་བ་བ་ ༡ སླར་ཚེ་མཆོག་གླིང་གྲྭ་ཚང་བཅས་སུ་གཏན་འཁེལ་ཡོད་ཀྱང་། གྲྭ་བ་ ༩ ད་ལྟའི་ཆར་འགྲོ་ཡུལ་གཏན་མ་འཁེལ་བར་སྒང་ཏོག་ཏུ་ཡོད་པ་དང་། གྲྭ་བ་ ༥ ངྷ་སར་བསྡད་ཡོད་པ། གྲྭ་བ་ ༡ བལ་ཡུལ་བཅས་སུ་ལྷག་ཡོད་འདུག  

ཕྱི་ཚེས་ ༢༦ ཉིན་གསར་འགོད་པས་སླར་ཡང་ཁོང་ཅག་ལ་ཐུག་འཕྲད་ཀྱིས་ད་ཆར་དཀའ་ངལ་ཡོད་མེད་དང་། མ་འོངས་པར་བྱེད་འཆར་གང་ཡོད་སོགས་བཅར་འདྲི་ཞུས་པར། དབུ་མཛད་བསྟན་འཛིན་དོན་འགྲུབ་ལགས་ཀྱིས་ “ ཐོག་མར་དགོན་པ་ནས་ཕྱིར་ཐོན་རྗེས་བོད་གཞུང་དང་ཚོགས་པ་ཁག་ལ་སྙན་ཞུ་ཕུལ་ཡང་ཡ་ལན་བྱེད་མཁན་མ་བྱུང་བར་བདུན་ཕྲག་གཅིག་ཙམ་ལ་སྡོད་ཁང་དང་འཚོ་བའི་ཐོག་དཀའ་འཕྲད་སོང་ལ། གྲྭ་གཞོན་ཚོའི་ཀྱི་སློབ་གཉེར་ཡང་འཐུས་ཤོར་ལ་ཕྱིན་པ་རེད། རྗེས་སུ་བོད་གཞུང་གིས་འཚོ་བའི་ཐོག་རོགས་རམ་གནང་བྱུང་། མཁན་རིན་པོ་ཆེ་གཙོས་པའི་གྲྭ་བ་མང་པོ་ཞིག་ལ་འགྲོ་ཡུལ་ཡང་རག་སོང་། ཡིན་ནའང་། ཐེངས་འདིའི་ཐག་གཅོད་ཀྱི་ཐད་ནས་ཧ་ཅང་བློ་ཕམ་བྱུང་ཡོད། ནམ་རྒྱུན་དྲང་བདེན་མང་པོ་ཞིག་བཤད་ཀྱི་ཡོད་ཀྱང་། གནད་འགག་ལ་ཐུག་ཡོང་སྐབས་དྲང་བདེན་མེད་པ་གསལ་བོ་ཆགས་སོང” ཞེས་བརྗོད་བྱུང་།

ཡང་ཁོང་ལ་མ་འོངས་པར་འཆར་གཞི་གང་འདྲ་ཡོད་མེད་དྲིས་པར། “ ང་རང་ལ་མཚོན་ན་གཅིག་ནས་སྔོན་མ་བོད་ནང་ཆབ་སྲིད་ཀྱི་དཀའ་ངལ་འོག་འདིར་ཡོང་མཁན་ཞིག་ཡིན་སྟབས། ཕྱིར་བོད་ནང་ལོག་རྒྱུ་ཧ་ཅང་ཁག་པོ་རེད། གཉིས་ནས་ལོ་ཚོད་ཀྱི་དབང་གིས་དགོན་པ་གཞན་དུ་འཛུལ་ན། ཡང་བསྐྱར་འཛིན་རིམ་དང་པོ་ནས་མགོ་འཛུགས་དགོས་པ་སོགས་ཀྱིས་ད་ལྟ་འཆར་གཞི་གང་ཡང་མེད། གནད་དོན་འདི་བརྒྱུད་དེ་གཞུང་དང་མི་མང་ལ་ཞུ་འདོད་པ་ཞིག་ནི། ད་ལྟའི་ཆར་ང་ཚོའི་སྤྱི་ཚོགས་ནང་སྐྱ་མིན་སེར་མིན་གྱི་བཟུང་བའི་དགོན་པ་མང་པོ་ཞིག་ཡོད་སྟབས། དེ་ཚོར་བོད་གཞུང་གིས་བདག་པོ་རྒྱག་རྒྱུ་ཧ་ཅང་གལ་ཆེན་པོ་རེད ” ཅེས་བརྗོད་བྱུང་།

དགེ་བསྐོས་ཀརྨ་འོད་ཟེར་ལགས་སུ་བཅར་འདྲི་ཞུས་སྐབས། “ ང་ཚེ་མཆོག་གླིང་དུ་ཞུགས་ཏེ་ལོ་ ༡༢ ཕྱིན་སོང་། སོ་སོ་དགོན་པའི་དགེ་བསྐོས་ལ་བཞག་རྗེས།དགོན་པའི་ནང་འདུལ་ཁྲིམས་གཙང་མ་བཟོ་བའི་ཐད་འབད་པ་བྱས་པ་ཡིན། འོན་ཀྱང་གྲུབ་འབྲས་འཐོན་མ་སོང་བ་མ་ཟད། མཐར་རང་ཉིད་ཀྱང་དགོན་པ་ནས་ཐོན་དགོས་བྱུང་སོང་། ང་འགྲོ་དགོས་པར་འགྱོད་པ་གང་ཡང་མེད་མོད། བློ་ཕམ་ཆེ་ཤོས་རང་ཁྱིམ་ལྟ་བུའི་དགོན་པ་དེ་གནས་སྟངས་སྐྱོ་བོ་ཞིག་གི་འོག་ལྷག་ཡོད་པ་དེ་རེད། གོ་ཐོས་ལ་ཚེ་མཆོག་གླིང་གྲྭ་ཚང་བོད་གཞུང་ཆོས་རིག་ལས་ཁུངས་ཀྱི་སྟངས་འཛིན་འོག་མེད་པའི་སྐད་ཆ་འདུག  མ་འོངས་པར་གཞུང་ངོས་ནས་བོད་པའི་དགོན་པ་ཁག་བོད་པ་རང་གི་བདག་པོ་རྒྱག་རྒྱུའི་ཐོག་འབད་པ་བྱ་རྒྱུ་གལ་ཆེན་པོ་རེད ”ཅེས་བརྗོད་བྱུང་།  

གྲྭ་བསམ་གཏན་ལགས་སུ་བཅར་འདྲི་ཞུས་སྐབས། “ང་བོད་ནས་ཡོང་སྐབས་བཙན་བྱོལ་སྤྱི་ཚོགས་ལ་རེ་བ་ཆེན་པོ་ཞིག་བརྒྱབ་ནས་ཡོང་བ་ཡིན་ལ། རྒྱ་གར་ནས་སློབ་སྦྱོང་མུ་མཐུད་རྒྱུར་སེམས་ཐག་བཅད་ནས་ཡོང་བའི་གསར་འབྱོར་བ་ཞིག་ཡིན། ལོ་ ༧ རིང་ཚེ་མཆོག་གླིང་དུ་སློབ་གཉེར་དང་མཉམ་དུ་དགོན་པའི་ནང་འདུལ་ཁྲིམས་གཙང་མ་ཡོང་བའི་ཐོག་རྒྱབ་སྐྱོར་བྱེད་མཁན་ཞིག་ཡིན། ཉེ་ཆར་རྙོག་གླེང་སྐབས་མཁན་པོ་གཙོས་གྲྭ་བ་ ༦ ཕྱིར་ཕུད་བཏང་རྗེས་ཁོང་རྣམ་པའི་དྲང་བདེན་ལ་རྒྱབ་སྐྱོར་བྱས་ཏེ་དགོན་པ་ནས་རྩ་དགོངས་ཞུས་པ་ཡིན། ད་ལྟའི་བར་དཀའ་ངལ་རིམ་པར་འཕྲད་ཀྱང་འགྱོད་པ་སྐྱེས་མ་མྱོང་། ཡིན་ནའང་། བློ་ཕམ་ཆེ་ཤོས། ཚེ་མཆོག་གླིང་གཙོས་པའི་ང་ཚོའི་སྤྱི་ཚོགས་ཁྲོད་ཀྱི་ཚོགས་པ་མང་ཆེ་བ་མི་རེ་གཉིས་ཀྱི་ལག་ཏུ་ཤོར་ནས་ཁྲིམས་མེད་ལུགས་མེད་བྱེད་ཀྱི་ཡོད་པ་འདི་རེད། ང་རང་ལ་མཚོན་ན་ད་ལྟའི་ཆར་རྒྱ་གར་གྱི་སྐྱབས་བཅོལ་ལག་འཁྱེར་མེད་སྟབས། རྒྱ་གར་ནང་ལམ་ཁ་ཞིག་བརྙེད་ཁག་པོ་རེད། ཉེ་ཆར་ལྡི་ལི་རྒྱ་ནག་གཞུང་ཚབ་ལ་ཐོ་བརྒྱབ་ཡོད། ཡིག་ཆ་རག་རྗེས་ཕྱིར་བོད་དུ་ལོག་རྒྱུ་ཡིན ”ཞེས་བརྗོད་བྱུང་།

འདི་གའི་གསར་འགོད་པས་ཚེ་མཆོག་གླིང་གི་ཕྱག་མཛོད་ཐུབ་བསྟན་སྙན་གྲགས་ལགས་སུ་ཁ་པར་བརྒྱུད་དེང་སྐབས་གྲྭ་ཚང་གི་གནས་སྟངས་གང་འདྲ་ཡིན་མིན་དང་གྲྭ་བ་ག་ཚོད་ཡོད་མེད་དྲིས་བར་ལན་འདེབས་གནང་མ་སོང་།

གསར་འགོད་པ། དོན་གོ

དུས་བབ་དྲ་བ།