བོད་སོག་ཡུ་གུར་གསུམ་ནི་བཙན་འོག་གི་ལས་མཐུན་སྤུན་མཆེད་ཡིན།

འཛམ་གླིང་ཡུ་གུར་མཐུན་ཚོགས་ཀྱི་གོ་སྒྲིག་འོག  ༢༠༡༣ ལོའི་ཕྱི་ཟླ་ ༣ ཚེས་ ༡༡ ཉིན་སུད་སིའི་ཇེ་ནའེ་ཝར་ཡུ་གུར་དང་བོད། ལྷོ་སོག རྒྱ་རིགས་དམངས་གཙོ་དོན་གཉེར་བ་བཅས་མཉམ་འབྲེལ་གྱི་ཚོགས་ཆེན་ཞིག་འཚོགས་རྒྱུ་ཡིན་འདུག

དེ་རིང་ཕྱི་ཚེས་ ༢ ཉིན་འཛམ་གླིང་ཡུ་གུར་མཐུན་ཚོགས་ཀྱི་དྲ་རྒྱའི་སྟེང་གནས་ཚུལ་སྤེལ་དོན། ཨ་རིའི་དམངས་གཙོ་ཐེབས་རྩ་ཚོགས་པའི་རྒྱབ་སྐྱོར་དང་། རྒྱལ་ཁབ་ཀྱི་འཐུས་ཚབ་མིན་པའི་རྒྱལ་སྤྱིའི་མི་རིགས་ཀྱི་མཐུན་ཚོགས་ཀྱིས་རོགས་

རམ་མཐུན་འགྱུར་གནང་ཐོག  འཛམ་གླིང་ཡུར་གུར་མཐུན་ཚོགས་ཀྱི་གོ་སྒྲིག་ལྟར།  ༼ཤར་ཏུར་ཀུ་སི་ཐན་དང་བོད། ལྷོ་སོག་བཅས་ཀྱི་འགྲོ་བ་མིའི་ཐོབ་ཐང་དང་། དམངས་གཙོ། རང་དབང་།  དེ་བཞིན་རྒྱ་གཞུང་གི་མགོ་ཁྲིད་གསར་བའི་མདུན་དུ་ལྷག་པའི་གནད་དོན། ༽ ཞེས་པའི་བརྗོད་གཞིའི་ཐོག   ཕྱི་ལོ་ ༢༠༡༣ ལོའི་ཟླ་ ༣ ཚེས་ ༡༡ ནས་ ༡༣ བར་སུད་སིའི་གྲོང་ཁྱེར་ཇེ་ནའེ་ཝར་(Geneva)བགྲོ་གླེང་ཚོགས་འདུ་ཞིག་འཚོགས་གཏན་ཁེལ་འདུག

འཛམ་གླིང་ཡུ་གུར་མཐུན་ཚོགས་ཀྱིས་ཚོགས་འདུའི་སྔོན་འགྲོའི་གསལ་བསྒྲགས་དེ་ ༢༠༡༢ ལོའི་ཕྱི་ཟླ་ ༡༢ ཚེས་ ༢༧ ཉིན་ཐོག་མར་སྤེལ་ཡོད་པ་དང་། ཚོགས་འདུར་མཉམ་ཞུགས་གནང་མཁན་ཚོས་ ༢༠༡༣ ལོའི་ཕྱི་ཟླ་ ༢ ཚེས་ ༥ ཡི་སྔོན་ལ། མི་སྒེར་སོ་སོའི་མིང་དང་སྡོད་གནས་ཁ་བྱང་། མི་ཚེ་ལོ་རྒྱུས་བཅས་འཛམ་གླིང་ཡུ་གུར་འཐུས་ཚབ་ཚོགས་པར་འབུལ་འབྱོར་གནང་དགོས་ཀྱི་ཡོད་པ་དང་། ཚོགས་འདུའི་དམིགས་ཡུལ་ནི་ཡུ་གུར་དང་བོད། ལྷོ་སོག་བཅས་ཀྱི་མ་འོངས་བའི་ཁེ་དབང་དང་མི་རིགས་གནད་དོན་ཐད་བགྲོ་གླེང་གནང་རྒྱུ་མ་ཟད། ཉེ་བའི་ལོ་འགར་རྒྱ་ནག་ནང་གི་རྒྱ་རིགས་དམངས་གཙོ་དོན་གཉེར་བ་དག་གི་དམངས་གཙོའི་འབོད་སྒྲ་ཤུགས་ཆེ་རུ་གྱུར་ཡོད་ལ། དེ་དང་འབྲེལ་ནས་ཁོང་ཚོར་ཡང་རྒྱ་གཞུང་གི་དྲག་གནོན་དཀའ་སྡུག་གཅིག་མཚུངས་འཕྲད་བཞིན་པར་བརྟེན། རྒྱ་ནག་གི་དམངས་གཙོ་བཅོས་སྒྱུར་སྐོར་ནས་སོགས་ལ་བགྲོ་གླེང་བྱ་རྒྱུ་ཡིན་པ་མ་ཟད། ཐེངས་འདིའི་བགྲོ་གླེང་ཚོགས་འདུ་བརྒྱུད་ནས་རྒྱ་གཞུང་གི་གཉའ་གནོན་དབང་སྒྱུར་གྱི་དཀའ་སྡུག་གཅིག་མཚུངས་འཕྲད་བཞིན་པའི་ཤར་ཏུར་ཀི་སི་ཐན་དང་། བོད། ལྷོ་སོག  རྒྱ་རིགས་དམངས་གཙོ་དོན་གཉེར་བ་བཅས་ནས་མ་འོངས་པའི་འཐབ་རྩོད་ཐད་མཉམ་ལས་ཡོང་ཐུབ་རྒྱུའི་རེ་བ་བཅངས་ཡོད་འདུག 

བགྲོ་གླེང་ཚོགས་འདུའི་གསལ་བསྒྲགས་ནང་། ཡུ་གུར་དང་བོད། ལྷོ་སོག་པོ་བཅས་ཀྱི་བར་གནའ་སྔ་མོ་ནས་རིག་གནས་དང་ཆོས་ལུགས། སྲིད་དོན་གྱི་འབྲེལ་འདྲིས་ཡོད་ལ། ལྷག་པར་དུ་འདས་པའི་དུས་རབས་ཕྱེད་ཙམ་གྱི་རིང་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཟེར་བའི་རྒྱ་ནག་དམར་གཞུང་གིས་ཡུ་གུར་དང་བོད། ལྷོ་སོག་གསུམ་ལ་མི་རིགས་གཉའ་གནོན་དང་། ཆབ་སྲིད་དབང་སྒྱུར། དཔལ་འབྱོར་བཤུ་བཞོག་བྱས་པ་མ་ཟད། མི་རིགས་སོ་སོའི་འགྲོ་བ་མིའི་ཐོབ་ཐང་བརྡལ་བཤིག་བཏང་སྟེ་དྲག་སྤྱོད་དང་མི་སེར་སྤེལ་བའི་སྲིད་ཇུས་སྤེལ་བར་བརྟེན། ཡུ་གུར་དང་བོད། ལྷོ་སོག་གསུམ་སོ་སོའི་མི་རིགས་ཀྱི་རང་དབང་དང་དམངས་གཙོའི་འཐབ་རྩོད་བརྒྱུད་རིམ་ཁྲོད་གཅིག་མཚུངས་ཀྱི་དཀའ་སྡུག་མྱོང་མཁན་གྱི་ལས་མཐུན་ཕུ་ནུ་མིང་སྲིང་ཆགས་ཡོད་ཅེས་བཀོད་འདུག

ད་དུང་གསལ་བསྒྲགས་ནང་། ཡུ་གུར་བ་དང་བོད་མི། ལྷོ་སོག་པོ་གསུམ་གྱིས་ཞི་བདེ་ཡི་ལམ་ནས་དམངས་གཙོ་དང་ཁྲིམས་མཐུན། རང་སྐྱོང་ཡོང་ཐབས་ཀྱི་འབད་བརྩོན་རིམ་པ་ལ་རྒྱ་གཞུང་གིས་གདུག་སྤྱོད་དྲག་གནོན་བྱས་ཏེ། ཆབ་སྲིད་དབང་སྒྱུར་དང་། རིག་གནས་དབང་སྒྱུར། མི་རིགས་ཆེན་པོའི་གཉའ་གནོན་བཅས་བྱས་ཏེ། བོད་སོག་ཡུ་གུར་མི་རིགས་རྣམས་གང་བྱུང་དུ་འཛིན་བཟུང་བཙན་ཁྲིད་ཀྱིས་གར་སོང་ཆ་མེད་དུ་གྱུར་བ་དང་། ཡ་ང་མེད་པར་གདུག་སྤྱོད་དྲག་རྡུང་དང་དམར་གསོད་སོགས་བྱས་པའི་རྐྱེན་གྱིས། བོད་སོག་ཡུ་གུར་ས་ཁུལ་ནང་གཅིག་རྗེས་གཉིས་མཐུད་ཀྱིས་ཞི་བའི་ངོ་རྒོལ་རིམ་པར་བྱུང་བ་མ་ཟད། ༢༠༠༩ལོར་ནས་བོད་ནང་རང་ལུས་མེར་བསྲེགས་ཀྱི་ཛ་དྲག་གི་ཞི་རྒོལ་བྱུང་བ་དང་། ལོ་དེའི་ཕྱི་ཟླ་ ༧ ཚེས་ ༥ ཉིན་ཤར་ཏུར་ཀི་སི་ཐན་གྱི་རྒྱལ་ས་ཝུ་རའོ་མུ་ཆིའི་ནང་ཡུ་གུར་སློབ་ཕྲུག་དང་མི་མང་གི་ཞི་བའི་ངོ་རྒོལ་ལ་རྒྱ་གཞུང་གིས་དྲག་གནོན་དམར་གསོད་བྱས་པ། དེ་བཞིན། འདས་པའི་དུས་ཡུན་ནང་ལྟོས་འཇོག་གིས་ཅུང་ཙམ་ལྷིང་འཇགས་ཡིན་པའི་ལྷོ་སོག་པོའི་ནང་དུའང་སྔར་བྱུང་མ་མྱོང་བའི་གཞི་རྒྱ་ཆེ་བའི་ཞི་རྒོལ་བྱུང་ཡོད་པ་སོགས། ཡུ་གུར་དང་བོད། ལྷོ་སོག་མི་རིགས་གསུམ་གྱི་མནར་གཅོད་བཟོད་སྒོམ་གྱི་ཚད་དེ།  ཆེས་མཐར་མཇུག་གི་བཟོད་བརླག་བྲལ་བའི་ཛ་དྲག་གི་དུས་སྐབས་འདིར། མི་རིགས་འདི་གསུམ་གྱི་ཤེས་ལྡན་མི་སྣ་དང་། ཆབ་སྲིད་ལས་འགུལ་པ། དེ་བཞིན། རྒྱལ་སྤྱིའི་སྒྲིག་འཛུགས་འདྲ་མིན་གྱི་འཐུས་ཚབ་བཅས་མཉམ་ཞུགས་ཀྱི་བགྲོ་གླེང་ཚོགས་འདུ་ཞིག་འཚོགས་དགོས་པའི་དུས་ལ་བབས་སྐོར་བརྗོད་འདུག 

འཛམ་གླིང་ཡུ་གུར་མཐུན་ཚོགས་ནི།  ༢༠༠༤ ལོར་འཇར་མན་དུ་ཤར་ཏུར་ཀི་སི་ཐན་མི་རིགས་ཚོགས་པ་དང་འཛམ་གླིང་ཡུ་གུར་ན་གཞོན་འཐུས་ཚབ་ཚོགས་པ་གཉིས་མཉམ་སྒྲིལ་ཐོག་གསར་དུ་བཙུགས་པ་ཞིག་ཡིན་ལ།  ཚོགས་པ་འདི་ནི་འཛམ་གླིང་ཡུ་གུར་མི་རིགས་ཀྱི་ཁྲིམས་མཐུན་ངོ་བོ་མཚོན་པའི་ཤར་ཏུར་ཀི་སི་ཐན་གྱི་འཐབ་རྩོད་ལ་སྣེ་ཁྲིད་མཁན་གྱི་ཚོགས་སྡེ་ཆེ་ཤོས་དེ་ཆགས་ཡོད་ལ། ཚོགས་པ་འདིའི་ད་ལྟའི་ཚོགས་གཙོ་ནི་ལྕམ་རེ་བྷེ་ཡ་ཁཱ་ཌིར་ལགས་ཡིན་པ་རེད།  མཐུན་ཚོགས་འདིའི་རྟེན་གཞི་གཙོ་བོ་འཇར་མན་དུ་ཡོད་པ་དང་། འཛམ་གླིང་རྒྱལ་ཁབ་ཁག་གི་ནང་ཡན་ལག་མཐུན་ཚོགས་མང་པོ་ཡོད་འདུག

གསར་འགོད་པ། ཚེ་རིང་རྒྱལ།

དུས་བབ་དྲྭ་བ་ནས།