ནེལ་སིན་མན་ཌ་ལཱ་སྐུ་གཤེཊ་པར་མྱ་ངན།

མདང་ནུབ་ལྷོ་ཨ་ཧྥི་རི་ཁའི་རང་དབང་འཐབ་རྩོད་པ་ནེལ་སིན་མ་ཌ་ལཱ་མཆོག་སྐུ་གཤེགས་པར་དེ་རིང་བོད་མིའི་སྒྲིག་འཛུགས་དང་༧གོང་ས་མཆོག་གིས་མྱ་ངན་ཞུ་ཚིག་དང་ཁོང་གི་ནང་མིར་འཚམས་འདྲི་གནང་སོང་།    

དེ་རིང་སྔ་དྲོའི་ཆུ་ཚོད་ ༡༡ ཐོག གངས་སྐྱིད་ལྷག་པ་ཚེ་རིང་ཚོགས་ཁང་དུ། བོད་མིའི་སྒྲིག་འཛུགས་བཀའ་ཤག་གིས་མདང་ནུབ་ལྷོ་ཨ་ཧྥི་རི་ཁའི་རང་དབང་

འཐབ་རྩོད་པ་ནེལ་སིན་མན་ཌ་ལཱ་མཆོག་སྐུ་གྲོངས་བར། མྱ་ངན་དང་ཁོང་གི་ཁྱིམ་མི་གཉེན་འབྲེལ་སོགས་ལ་ཐུགས་གསོའི་གསར་འགོད་གསལ་བསྒྲགས་ཤིག་སྤེལ་སོང་། གསར་འགོད་ལྷན་ཚོགས་ཐོག་སྲིད་སྐྱོང་བློ་བཟང་སེང་གེ་མཆོག་གིས་ནེལ་སིན་མན་ཌ་ལཱ་མཆོག་གི་སྐུ་ཚེའི་མཛད་རྗེས་མདོར་བསྡུས་ངོ་སྤྲོད་དང་འབྲེལ་གསུངས་དོན། “ བོད་མིའི་སྒྲིག་འཛུགས་ཀྱི་ཐོག་ནས་སྐུ་ཞབས་ནེལ་སིན་མན་ཌ་ལཱ་མཆོག་དགོངས་པ་རྫོགས་པར་བློ་ཕམ་ཞེ་དྲག་བྱུང་། གང་ཡིན་ཟེར་ན། ཁོང་ལྟ་བུའི་མཛད་རྗེས་ཆེན་པོ་ཡོད་པའི་མི་སྣ་ཞིག་དགོངས་པ་རྫོགས་དུས་འཛམ་གླིང་སྤྱི་ཡོངས་ལ་གྱོང་གུན་ཆེན་པོ་ཐེབས་ཡོད་པ་དང་། དམིགས་བསལ་གྱིས་བོད་པ་ཚོས་དམིགས་དཔེ་ལྟ་ས་དང་རེ་བ་རྒྱག་སའི་དབུ་ཁྲིད་ཅིག་དགུང་པ་རྫོགས་པའི་གནས་སྟངས་ཤིག་ཆགས་ཡོད་པ་རེད། ཡིན་ནའང་། འཚེ་མེད་ཞི་བའི་ལམ་ནས་རྩ་དོན་བརྩད་ན་འགྲུབ་རྒྱུ་ཡོད་པ་དང་།  བདེན་པ་ཟེར་བ་དེ་འགྲུབ་རྒྱུ་ཡོད་པའི་ཁོང་གི་མཛད་རྗེས་དེར། བོད་མི་སྤྱི་ཡོངས་ནས་ད་ལྟ་ཡིན་ནའང་རེ་བ་དང་སེམས་ཤུགས་བཅངས་ཏེ། ཁོང་གི་མཛད་རྗེས་མུ་མཐུད་དུ་གནས་ཐུབ་པར་འབད་བརྩོན་གནང་རྒྱུ་ཧ་ཅང་གལ་ཆེན་པོ་རེད། ”ཅེས་གསུངས་སོང་།

དེ་བཞིན། དེ་རིང་སྔ་དྲོར་ ༸གོང་ས་སྐྱབས་མགོན་ཆེན་པོ་མཆོག་གིས་ནེལ་སིན་མན་ཌ་ལཱ་མཆོག་གི་ཁྱིམ་མིར་ཐུགས་ གསོའི་གསུང་འཕྲིན་ཞིག་བསྩལ་བའི་ནང་དུ། རླབས་ཆེན་གྱི་དབུ་ཁྲིད་ཅིག་དགོངས་པ་རྫོགས་པར་ཐུགས་ཕམ་ཆེན་པོ་བྱུང་ཞིང་དམ་པ་ཁོང་ལ་ཐུགས་སྨོན་དང་། ཤུལ་ལུས་ཁྱིམ་མི་དང་ལྷོ་ཨ་ཧྥེ་རི་ཁའི་མི་མང་ཡོངས་ལ་ཐུགས་གསོ་དང་གདུང་སེམས་མཉམ་སྐྱེད་གནང་བཞིན་ཡོད་ཅེས་སོགས་བཀོད་ཡོད་འདུག་ལ། ནེལ་སིན་མན་ཌ་ལཱ་མཆོག་སྐུ་གྲོངས་རྗེས། ཨ་རིའི་སྲིད་འཛིན་ཨོ་བྷ་མ་དང་དབྱིན་ཇིའི་སྲིད་བློན་ཌཱ་ཝེ་ཌི་ཁཱམ་རོན། རྒྱ་གར་གྱི་སྲིད་བློན་མན་མོ་ཧན་སིན། དེ་བཞིན་འཛམ་གླིང་མཉམ་འབྲེལ་རྒྱལ་ཚོགས་སོགས་ནས། འཛམ་གླིང་ཐོག་ཆེས་ཤུགས་རྐྱེན་ཆེ་ཞིང་སྙིང་སྟོབས་ལྡན་པའི་རླབས་ཆེན་གྱི་དབུ་ཁྲིད་ཅིག་དགོངས་པ་རྫོགས་པར་བློ་ཕམ་དང་། འཛམ་གླིང་མི་མང་གིས་ཁོང་གི་རླབས་ཆེན་གྱི་མཛད་རྗེས་ལ་དྲན་གསོ་དང་རྒྱུན་འཛིན་བྱེད་འོས་པའི་སྐོར་སོགས་ཀྱི་གསུང་འཕྲིན་གནང་འདུག

གསར་འགོད་པ། པདྨ་མཚོ།

དུས་བབ་དྲ་བ་ནས།