དབང་པོའི་ནུས་པ་ཉམས་པ་ཚོའི་ཐོབ་ཐང་ལ་སྲུང་སྐྱོབ་བྱེད་དགོས།

གླིང་མཆོག་སྤྲུལ་རིན་པོ་ཆེ་ནི་བོད་བརྒྱུད་ནང་བསྟན་ཁྲོད་ཀྱི་གོ་ཐོབ་གུས་བརྩི་ཆེན་པོ་ཡོད་པའི་བླ་མ་ཞིག་ཡིན། ཁོང་རླངས་འཁོར་བརྡབ་སྐྱོན་འོག་ཞབས་ལ་སྐྱོན་བྱུང་རྗེས། སྨན་བཅོས་ནང་ཡང་རྒྱུན་ལྡན་བཞིན་ཕེབས་པ་མ་ཐུབ་པའི་སྐུ་ངལ་བྱུང་སྐོར་ལ་བཅར་འདྲི་ཞུས་པར། ཁོང་གིས་དབང་པོའི་ནུས་པ་ཉམས་པ་ཚོའི་རིན་ཐང་གོང་འཕེལ་བཏང་དགོས་ན་དང་པོ་མི་མང་གི་གོ་རྟོགས་གོང་འཕེལ་གཏོང་དགོས་སྐོར་གསུངས་བྱུང་།

གླིང་མཆོག་སྤྲུལ་རིན་པོ་ཆེ་མཆོག་ ༡༩༨༥ ལོར་འཁྲུངས་རྗེས་དགུང་ལོ་དྲུག་ལ་ཕེབས་སྐབས་

༸གོང་ས་མཆོག་གིས་ཡོངས་འཛིན་གླིང་རིན་པོ་ཆེའི་(༡༩༠༣ ནས་ ༡༩༨༣)ཡང་སྲིད་དུ་ངོས་འཛིན་གནང་ཞིང་། སྐུ་གོང་མས་༸གོང་ས་༸སྐྱབས་མགོན་ཆེན་པོ་མཆོག་གི་ཡོངས་འཛིན་གནང་ཡོད་པ་མ་ཟད། དགའ་ལྡན་ཁྲི་ཐོག་ ༩༧ པའི་མཛད་འགན་ཡང་བཞེས་ཡོད། ༢༠༡༢ ཟླ་ ༡༡ ཚེས་ ༢༨ ཉིན་གླིང་རིན་པོ་ཆེ་རྒྱ་གར་གྱི་གྲོང་ཁྱེར་གྷོ་ཝའི་གནམ་ཐང་ལ་༸གོང་ས་མཆོག་ལ་ཕེབས་བསུར་བཅར་སྐབས་ཕེབས་ལམ་དུ་རླངས་འཁོར་གདོང་ཐུག་འོག་རྨས་སྐྱོན་ཚབས་ཆེན་བྱུང་ཡོད་པ་དང་། སྐུ་གཟུགས་དྲག་སྐྱེད་ཆ་ཚང་ཡོང་ཐབས་སུ་ལོ་གཉིས་རིང་ཞབས་ལ་བཤག་བཅོས་ལན་མང་དང་སྨན་བཅོས་གནང་བ་མ་ཟད། རྒྱུན་རིང་ལུས་རྩལ་སོགས་སྐུ་གཟུགས་ཀྱི་བཅོས་ཐབས་ནན་པོ་གནང་ཡོད། སྨན་བཅོས་ཀྱི་བརྒྱུད་རིམ་ནང་བཟོད་བསྲན་དང་རྒྱུན་སྲིང་གནང་བ་བཅས་ཀྱིས་ད་ཆ་རིན་པོ་ཆེ་མཆོག་ཕར་ཚུར་ཕེབས་རྒྱུར་སྐུ་ངལ་མེད་པར་གྱུར་ཡོད་སྟབས། ཁོང་ལ་བཅར་འདྲི་ཞུས་པ་འདིས་བོད་པའི་སྤྱི་ཚོགས་ནང་དབང་པོའི་ནུས་པ་ཉམས་པ་ཚོས་གདོང་ལེན་ཇི་ལྟར་བྱེད་དགོས་ཀྱི་ཡོད་པ་ལ་དོ་སྣང་ཡོང་བའི་རེ་བ་བྱས་པ་ཡིན།

བོད་པའི་སྤྱི་ཚོགས་ནང་རྒྱུན་རིང་ནས་དབང་པོའི་ནུས་པ་ཉམས་པ་ཚོར་ཆེ་མཐོང་དང་བདག་སྤྲོད་མེད་པར་ལུས་ཡོད། རིན་པོ་ཆེར་བྱུང་བའི་གནས་ཚུལ་དེས་གནས་སྟངས་ལ་གློ་བུར་འགྱུར་བ་ཡོང་རྒྱུར་དྲན་གསོ་བྱས་ཡོད། བོད་པའི་སྤྱི་ཚོགས་ནང་སྐྱེ་བོ་སུ་འདྲ་ཞིག་ཡིན་རུང་མི་ཚེའི་ནང་དབང་པོ་ཉམས་པ་ཆགས་སྲིད། དེ་ཡང་སྐྱེས་མ་ཐག་དང་བརྡབ་སྐྱོན་བྱུང་བ། ལོ་ན་རྒས་པ་སོགས་ལ་བརྟེན་ནས་དབང་པོའི་ནུས་པ་ཉམས་པ་ནི་ལྡོག་ཏུ་མེད། དེ་བཞིན་རང་ཉིད་ཀྱིས་བརྩེ་གདུང་བྱ་ཡུལ་ཞིག་དང་སྤྱི་ཚོགས་ནང་ཚང་མས་གུས་བཀུར་བྱེད་ཡུལ་གྱི་མི་གང་ཡང་དབང་པོའི་ནུས་པ་ཉམས་སྲིད་པ་ཡིན། འཛམ་གླིང་འཕྲོད་བསྟེན་ལས་ཁུངས་ཀྱི་ཚོད་རྩིས་ལྟར་ན། འཛམ་གླིང་ནང་དབང་པོའི་ནུས་པ་ཉམས་པ་མི་ཐེར་འབུམ་གཅིག་ཡོད་པ་དང་། དེས་འཛམ་གླིང་མི་འབོར་གྱི་བརྒྱ་ཆ་ ༡༥ ཟིན་ཡོད། དེའི་གོ་དོན་ནི་རྒྱལ་ཁབ་དང་སྤྱི་ཚོགས་གང་འདྲ་ཞིག་ཡིན་རུང་དེའི་མི་འབོར་གྱི་བརྒྱ་ཆ་ ༡༥ དབང་པོའི་ནུས་པ་ཉམས་པ་ཡིན་པའི་བསྟན་ཡོད། དེར་བརྟེན། ལོ་རེའི་ཕྱི་ཟླ་ ༡༢ ཚེས་ ༣ ཉིན་འཛམ་གླིང་ནང་དབང་པོའི་ནུས་པ་ཉམས་པ་ཚོའི་ཉིན་མོར་སྲུང་བརྩི་བྱེད་ཀྱིན་ཡོད་པ་དང་། ཉིན་མོ་འདིར་བོད་པའི་སྤྱི་ཚོགས་ནང་མི་བརྒྱ་ཆ་ ༡༥ དབང་པོའི་ནུས་པ་ཉམས་པའི་གྲས་ཡིན་པ་དྲན་གསོ་བྱས་ཏེ། ཁོང་ཚོའི་བདེ་དོན་ལ་གུས་ཞབས་བྱ་རྒྱུའི་འགན་འཁུར་བླངས་ཏེ། མིག་གི་དབང་པོ་ཐང་པོ་ཡོད་པ་དང་མེད་པ་གཉིས་ཀར་སོ་སོའི་རེ་བའི་ཕུགས་བསམ་བསྒྲུབ་རྒྱུར་ཐོབ་ཐང་དང་རང་དབང་འདྲ་མཉམ་ཡོད་པར་ཆ་འཇོག་བྱེད་དགོས།

དྲི་བ། རིན་པོ་ཆེ་མཆོག་ལ་མཚམས་འདྲི་དང་ཆབས་ཅིག དོན་ཚན་གཉིས་ལ་བཀའ་འདྲི་ཞུ་རྒྱུ་ཡིན། ༢༠༡༢ ལོ་ནས་ཨ་རིར་དབང་པོའི་ནུས་པ་ཉམས་པ་ཚོའི་ཆེད་ལས་ཀ་བྱེད་རྒྱུ་མགོ་འཛུགས་བྱས་པ་ཡིན། ལས་ཀ་དེས་ངའི་མདུན་ལམ་ལ་འགྱུར་བ་ཆེན་པོ་ཞིག་བཏང་བྱུང་། དེ་ནས་བཟུང་དབང་པོའི་ནུས་པ་ཉམས་པ་ཚོའི་ཐོབ་ཐང་གོང་འཕེལ་གཏོང་བའི་ལས་དོན་འདི་ངའི་མི་ཚེའི་ཆ་ཤས་ཤིག་ཏུ་གྱུར་སོང་། ང་ཚོ་བོད་དོན་འཐབ་རྩོད་དང་དབང་པོའི་ནུས་པ་ཉམས་པ་ཚོའི་ཐོབ་ཐང་རྩོད་རྒྱུ་གཉིས་ལ་མཚུངས་ཆོས་མང་པོ་འདུག འོན་ཀྱང་ང་ཚོའི་སྤྱི་ཚོགས་ནང་གི་དབང་པོའི་ནུས་པ་ཉམས་པ་ཚོའི་མི་ཚེར་ལྟ་དུས་ཁོང་ཚོར་ཆ་རྐྱེན་ཚད་དང་ལྡན་པ་མཁོ་སྤྲོད་བྱ་རྒྱུ་དེ་སྣང་མེད་བཞག་པའམ་བདག་པོ་མེད་པར་ལྷག་པའི་མཐོང་ཚུལ་བྱུང་། བཙན་བྱོལ་སྤྱི་ཚོགས་ནང་གི་དགོན་པ་ཁག་ཏུ་འཁོར་ལོར་བརྟེན་ཏེ་སྐྱོད་ཆོག་ཡུལ་གཅིག་ཀྱང་མེད་པ་དེ་གཞི་ལ་བཞག་སྟེ། རིན་པོ་ཆེ་མཆོག་གིས་ད་བར་གདོང་ལེན་ཇི་གནང་དང་སྐུ་ངལ་གང་འཕྲད་སྐོར་ངོ་སྤྲོད་ཅིག་གནང་རོགས།

བཀའ་ལན། སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་ལམ་རིམ་གསུང་ཆོས་བསྩལ་ཆེད་མ་ཕེབས་པའི་ཉིན་གཅིག་གི་གོང་བརྡབ་སྐྱོན་དེ་བྱུང་བ་རེད། དེའི་དགོང་མོར་བཤག་བཅོས་བྱས་པ་ཡིན། སྐབས་དེར་རིག་པ་གསལ་ཐང་ཐང་ཡིན་སྟབས་གསུང་ཆོས་ཞུ་རུ་བཅར་ཐུབ་ས་རེད་བསམ་པ་ཞིག་བྱུང་སོང་། འོན་ཀྱང་བརྡབ་སྐྱོན་ལས་དབང་པོའི་ནུས་པ་ཉམས་ཏེ་གསུང་ཆོས་ལ་བཅར་ཐུབ་མ་སོང་། སྨན་པ་ཚོས་བཤག་བཅོས་བྱས་རྗེས་ཟླ་བ་གཉིས་ཙམ་རིང་གོམ་པ་སྤོ་རྒྱུ་མེད་པའི་ལམ་སྟོན་གནང་བྱུང་། སྨན་ཁང་ནས་ཐོན་རྗེས་གྷོ་ཝ་གྲོང་ཁྱེར་ནང་ཁང་པ་ཞིག་གི་འོག་ཤོད་ནས་ཁང་ཆུང་ཞིག་གླས་ཏེ་བསྡད་པ་ཡིན། འོན་ཀྱང་ཁང་པའི་འོག་ཤོད་ཡིན་ནའང་ཕྱི་ལ་འགྲོ་སྐབས་སྐས་འཛེག་བརྒྱུད་དེ་འགྲོ་པ་དང་། རྐང་པར་ནུས་པ་ཕྲན་བུ་བསླེབས་པ་དང་རླུང་གཙང་མ་རྔུབ་ཆེད་ཕྱི་ལ་ཐོན་འདོད་ཆེ་ནའང་ཐོན་ཐུབ་ཀྱི་མི་འདུག ལུས་ཀྱི་ནུས་པ་ཉམས་པ་ལ་བརྟེན་ནས་ཟླ་བ་གཉིས་ཙམ་རིང་ཁང་པའི་ནང་སྡོད་དགོས་བྱུང་སོང་།

གྷོ་ཝ་ནས་ལྡི་ལིར་མ་ཐོན་བར་དཀའ་ངལ་ཆེན་པོ་བྱུང་། གནམ་གྲུའི་ནང་ཡར་འཛུལ་རྒྱུ་དང་མར་འབབ་རྒྱུ། ཁང་པར་འཛུལ་རྒྱུ། ལམ་ཟུར་དུ་གོམ་པ་རྒྱག་ས་མེད་པ་དང་ལམ་ཟུར་བཀག་སྒོ་མེད་པ། ལམ་ཁ་བདེ་བོ་མེད་པ་སོགས་ཀྱིས་དབང་པོའི་ནུས་པ་ཉམས་པ་ཚོར་དཀའ་ངལ་ཆེན་པོ་འཕྲད་ཀྱིན་འདུག དེ་ནས་ལྡི་ལིར་ལོ་གཅིག་ཙམ་བསྡད་པ་ཡིན། དེ་དུས་དྷ་རམ་ས་ལར་༸གོང་ས་མཆོག་གི་གསུང་ཆོས་ལ་བཅར་འདོད་ལན་མང་བྱུང་ཡང་འགྲོ་འོང་གི་ཆ་རྐྱེན་མེད་པ་བཅས་ཀྱིས་དཀའ་ངལ་བྱུང་། གཞི་རྩའི་བརྡབ་སྐྱོན་བྱུང་བ་ནས་བཟུང་དཀའ་ངལ་མ་བྱུང་བ་འདི་རེད་ཅེས་བརྗོད་རྒྱུ་གཅིག་ཀྱང་མེད། ཆུང་ཚགས་རྐུབ་སྟེགས་ནས་ལངས་རྒྱུ་ཡང་དཀའ་ངལ་རེད།

དྲི་བ། མི་འགའ་ཤས་ཀྱིས་དབང་པོའི་ནུས་པ་ཉམས་པ་ནི་བསོད་བདེ་དམན་པས་རེད་བསམ་གྱི་ཡོད། ཁྲིམས་ལུགས་ཀྱི་འགྲོ་སྟངས་མེད་པའི་སྤྱི་ཚོགས་ནང་དབང་པོའི་ནུས་པ་ཉམས་པ་ཚོ་གནས་བབས་གཅིག་ལ་འཇོག་གི་མེད་པ་དང་། ཁོང་ཚོ་སྙིང་རྗེའི་ཡུལ་དུ་འཇོག་གི་རེད། ད་དུང་སྡུག་ཤོས་ནི་གཞན་གྱིས་འཚེ་བ་བྱེད་ཡུལ་ཆགས་རྒྱུ་ལྡོག་ཏུ་མེད་པ་ཞིག་རེད། འགའ་ཞིག་གིས་དབང་པོའི་ནུས་པ་ཉམས་པ་དེས་གོ་སྐབས་གསར་པ་ཐོབ་བྱུང་བརྗོད་མཁན་ཡང་ཡོད། བརྡབ་སྐྱོན་དེ་བྱུང་རྗེས་རིན་པོ་ཆེར་ཐུགས་ཚོར་གང་བྱུང་།

བཀའ་ལན། བརྡབ་སྐྱོན་བྱུང་བ་དེ་སྟབས་མ་ལེགས་པ་རེད། འོན་ཀྱང་དེར་བློ་ཕམ་གང་ཡང་བྱེད་ཀྱི་མེད། དེའི་སྐོར་ལ་བསམ་བློ་བཏང་ནས་རྒྱུན་ལྡན་བཞིན་འགྲོ་ཐུབ་རྒྱུར་ཕན་ཐོགས་མེད། ཚང་མས་བདེ་སྐྱིད་ལྡན་པའི་མི་ཚེ་ཞིག་འདོད་ཀྱི་ཡོད། དེ་འདྲ་ཞིག་ཡོང་བར་ཐབས་སྐྱོའི་གནས་ཚུལ་དེའི་སྐོར་དྲན་བསྡད་པ་ཡིན་ན་དེས་བློ་ཕམ་ཡོང་རྒྱུ་ལས་གཞན་མེད། དེས་སོ་སོ་སྤོབས་པ་ཞུམ་གྱི་རེད། ལུས་དང་དེ་མིན་དབང་པོའི་ནུས་པ་ཉམས་པའི་རིགས་ལ་ང་ཚོར་བཅོས་ཐབས་མེད་ཀྱང་། ཡར་ཐོན་ཅན་གྱི་འཕྲུལ་རིག་དང་མཐུན་རྐྱེན་གཞན། ཚན་རིག་དང་སྨན་བཅོས་སོགས་ཀྱི་ཁེ་ཕན་ལེན་ཐུབ་པ་བྱེད་དགོས། ངོས་ལ་ཆ་མཚོན་ན་བཤག་བཅོས་བྱས་ནས་ཉིན་གཉིས་སོང་རྗེས་ལུས་གསོ་ཐབས་ལམ་སང་མགོ་བཙུགས་པ་ཡིན། ན་ཟུག་དང་དཀའ་ངལ་ཇི་ཙམ་ཡོད་ཀྱང་བཅོས་ཐབས་ཆ་ཚང་བྱ་རྒྱུར་སེམས་ཐག་ཆོད་པོ་བྱས་སྟབས་གང་འཚམ་ནས་ལུས་ལ་འགུལ་ཤུགས་བསླེབས་བྱུང་།

གཞི་རྩའི་དབང་པོའི་ནུས་པ་ཉམས་པ་དང་བརྡབ་སྐྱོན་བྱུང་བ་ཡིན་ན། དེ་ནས་རྣམ་པར་རྒྱལ་ཐུབ་པའི་སེམས་ཤུགས་ཡོད་དགོས་གལ་ཆེན་པོ་རེད། ངའི་བཤག་བཅོས་དང་པོ་དེ་ལམ་ལྷོང་ལྡན་པ་བྱུང་མེད། ཟླ་བ་དྲུག་གི་རྗེས་སུ་སླར་ཡང་བཤག་བཅོས་གཉིས་པ་བྱེད་དགོས་ཀྱི་འདུག་ལབ་སོང་། བཤག་བཅོས་དེ་ལས་སླ་པོ་ཞིག་མིན་པ་ཤེས་བཞིན་ངོས་ལེན་བྱས་པ་ཡིན། མཐའ་མ་དེར་ངའི་པུས་མོར་གཅུ་གཟེར་ ༡༢ བརྒྱབ་པ་རེད། ང་ཚོ་ཚང་མར་བདེ་སྐྱིད་ལྡན་པའི་མི་ཚེ་ཡོད་ཆོག་པ་དང་། དེ་འདྲ་ཞིག་ཡོང་ཐུབ་པའི་ལམ་ཁ་ཡོད་ན། དེའི་གོ་སྐབས་བློས་གཏོང་རྒྱུ་མེད། ངོས་རང་གཟུགས་ཁམས་བདེ་ཐང་དང་ལོ་བདུན་ཅུ་བརྒྱད་ཅུ་བར་གནས་ཐུབ་ཀྱི་རེད་བསམ་གྱི་འདུག སླར་ཡང་ལུས་ཀྱི་ནུས་པ་ཆ་ཚང་བ་ཡོད་པ་ཞིག་ཡོང་འདོད་ཡོད།

དྲི་བ། དབང་པོ་ཉམས་པ་ཚོའི་ཐོབ་ཐང་ཐོག་ཨ་རི་ནི་འཛམ་གླིང་ནང་སྲོལ་འབྱེད་ལྟ་བུ་ཡིན་པ་དང་དབང་པོའི་ནུས་པ་ཉམས་པ་ཚོའི་ཐོབ་ཐང་ཐོག་གསེར་ལྟ་བུའི་ནུས་པ་ཡོད་ཅེས་རྗོད་ཀྱི་ཡོད། འོན་ཀྱང་དབང་པོའི་ནུས་པ་ཉམས་པ་ཚོར་དབྱེ་འབྱེད་དང་མིང་ཆལ་ད་ལྟའང་ཡོད་མུས་རེད། ཡར་རྒྱས་ཕྱིན་པའི་རྒྱལ་ཁབ་མང་པོར་དེ་དག་ལ་ལྟ་སྐྱོང་གི་འགྲོ་ལུགས་བཟང་པོ་མེད། ཁྱད་པར་དུ་ཨེ་ཤ་ཡའི་ནང་དབང་པོའི་ནུས་པ་ཉམས་པ་ཚོར་མིང་ཆལ་བཟོ་རྒྱུའི་གོམས་གཤིས་ཤུགས་ཆེན་པོ་ཡོད། ང་ཚོའི་སྤྱི་ཚོགས་ནང་གནས་ཚུལ་དེ་རིགས་ཇི་ལྟར་འགོག་དགོས་པར་མཐོང་གི་ཡོད།

བཀའ་ལན། དབང་པོ་ཉམས་པ་མང་ཆེ་བ་ཞིག་ནི་སྔར་སྐྱེས་དུས་ནས་མ་ཡིན་པར། རྗེས་ཀྱི་འཕྲལ་རྐྱེན་ཞིག་ལ་བརྟེན་ཏེ་གནས་སྟངས་དེ་ཆགས་ཀྱིན་ཡོད། ངོས་ལ་ཆ་མཚོན་ན་རླངས་འཁོར་བརྡབ་སྐྱོན་བྱུང་བ་ལ་བརྟེན་ཏེ་གནས་སྐབས་རིང་དབང་པོའི་ནུས་པ་ཉམས་པ་རེད། འཕྲལ་རྐྱེན་ཞིག་གིས་དབང་པོའི་ནུས་པ་ཉམས་པའི་གནས་སྟངས་ལ་འགྱུར་བ་ཡོང་གི་རེད། གང་ལྟར་སྤྱི་ཚོགས་དང་བྱེ་བྲག་ཏུ་དབང་པོའི་ནུས་པ་ཆ་ཚང་ལྡན་པ་ཚོས་ནུས་པ་ཉམས་པ་ཚོའི་ཐོབ་ཐང་ལ་བདག་པོ་བརྒྱབ་ནས་སྤྱི་ཚོགས་ནང་འཁྲིད་དགོས་པ་དང་། སྐྱེ་བོ་གཞན་པ་བཞིན་གོ་སྐབས་གཅིག་གྱུར་དང་ནུས་པ་ཆ་ཚང་ཡོད་པའི་ངེས་ཤེས་ཐོབ་པ་བྱེད་དགོས། དེས་ཁོང་ཚོ་ཕུགས་རྒྱང་རིང་པོར་གཞན་ལ་བརྟེན་མི་དགོས་པར་འཚོ་གནས་ཐུབ་པ་མ་ཟད། སྤྱི་ཚོགས་ལ་ལེགས་སྐྱེས་འབུལ་ཐུབ་མཁན་ཆགས་ངེས་རེད། དེ་རིགས་ནི་ང་ཚོ་ཐུན་མོང་གི་ཁེ་ཕན་རེད། དབང་པོའི་ནུས་པ་ཉམས་པ་འགའ་རེར་ཚོར་ཤེས་དང་ཚོར་སྣང་དམིགས་བསལ་རྣོ་བོ་ཡོད་པ་རེད་ཅེས་གོ་མྱོང་། ཁོང་ཚོར་རིག་རྩལ་ཁྱད་འཕགས་ཅན་ཡོད་པ་དེ་ནི་རིན་ཐང་ཆེན་པོ་རེད།

དྲི་བ། ནང་པའི་སྤྱི་ཚོགས་ནང་དབང་པོའི་ནུས་པ་ཉམས་པ་དེ་ལས་ཡིན་པར་ངོས་འཛིན་བྱས་ཏེ། ཁོང་ཚོར་མིང་ཆལ་དང་དབྱེ་འབྱེད། ཐུབ་ཚོད་གཏོང་བ་སོགས་བྱས་ཏེ་ཁོང་ཚོའི་དབང་བོའི་ནུས་པ་ཉམས་པའི་སྒང་ལ་སེམས་ཡང་གསོད་ཀྱིན་ཡོད། སྐུ་ཉིད་ཀྱིས་སྐྱེ་བོ་ཞིག་གི་དབང་པོའི་ནུས་པ་ཉམས་པ་དེ་ལས་ལ་བརྟེན་ནས་བྱུང་བར་ངོས་འཛིན་གནང་གི་ཡོད་དམ།

བཀའ་ལན། དབང་པོའི་ནུས་པ་ཉམས་པ་དེ་སྡིག་པའི་ལས་ལ་བརྟེན་ནས་བྱུང་བ་དང་། སྐྱེ་བ་སྔོན་མར་སྡིག་པའམ་ལས་ངན་པ་བསགས་པ་ལས་བྱུང་བ་མ་རེད་ཅེས་བརྗོད་ཐུབ་མཁན་ཡོད་པ་མ་རེད་ལ། ངོས་ལ་རླངས་འཁོར་གྱི་བརྡབ་སྐྱོན་བྱུང་ནས་དབང་པོའི་ནུས་པ་ཉམས་པ་དེ་ངས་སྡིག་པའི་ལས་བྱས་པ་ལས་བྱུང་བ་རེད་ཅེས་ཀྱང་བརྗོད་ཐུབ་པ་ཁག་པོ་རེད། འོན་ཀྱང་དབང་པོ་ནུས་པ་ཉམ་པ་ཚོ་ལ་ཁྲིམས་ཐོག་ནས་ཐོབ་ཐང་དང་ཐུན་རྐྱེན་བསྐྲུན་དགོས་པ་སོགས་ངེས་པར་དུ་ཡོད་དགོས།

དྲི་བ། ངའི་བསམས་པར་དགོན་པ་ཁག་ནང་དབང་པོའི་ནུས་པ་ཉམས་པ་དང་ལོ་ན་བགྲེས་པ་ཚོར་ཆ་རྐྱེན་བསྐྲུན་དགོས་པ་དང་། སློབ་གྲྭ་ཁག་ཏུའང་དབང་བོ་སྐྱོན་ཅན་ཚོར་སློབ་ཕྲུག་གཞན་བསྐྱོད་སར་འགྲོ་ཐུབ་པའི་ཆ་རྐྱེན་བསྐྲུན་རྒྱུར་གོམས་པ་སྤོ་དགོས་ཀྱི་འདུག དེ་འདྲ་གནང་རྒྱུར་འགྲོ་སོང་ཆེན་པོ་ཡིན་ཡང་། འཛམ་གླིང་དངུལ་ཁང་གིས་ཚོད་རྩིས་བྱས་པར། ཨར་ལས་ཀྱི་མགོ་འཛུགས་ནས་ཆ་རྐྱེན་དེ་དག་ཡོད་པ་བཟོས་ན་འགྲོ་སོང་འཕར་མ་བརྒྱ་ཆ་གཅིག་ལྷག་མེད་པ་བསྟན་འདུག ཨ་རིའི་ནང་ཆ་མཚོན་ན་སྤྱི་ཚོགས་ཀྱི་བེད་སྤྱོད་སའི་སྡེ་ཚན་ཚང་མར་ཁྲིམས་ཐོག་ནས་འགྲོ་འོང་སོགས་ཆ་རྐྱེན་ལྡན་པ་བཟོ་དགོས་ཀྱི་ཡོད་པ་རེད། བོད་པའི་སྤྱི་ཚོགས་དེ་དབང་པོའི་ནུས་པ་ཉམས་པ་ཚོར་ཕན་པའི་སྤྱི་ཚོགས་ཤིག་བཟོ་རྒྱུ་གལ་ཆེན་པོ་ཡིན་སྟབས། བོད་པའི་སྤྱི་ཚོགས་ནང་གི་དགོན་པ་དང་སློབ་གྲྭ གཞུང་གི་ལས་ཁུངས་སོགས་ལ་དབང་པོའི་ནུས་པ་ཉམས་པ་ཚོར་སྟབས་བདེའི་ཆ་རྐྱེན་བསྐྲུན་ཐབས་ཡོད་དམ།

བཀའ་ལན། ཨ་རིའི་ནང་བསྐྱོད་སྐབས་འགྲུལ་བཞུད་མེ་འཁོར་འབབ་ཚིགས་ནང་ཡར་འདེགས་སྐས་འཛེག་དང་མེ་འཁོར་དང་སྤྱི་སྤྱོད་རླངས་འཁོར་སོགས་ལ་དབང་པོའི་ནུས་པ་ཉམས་པ་དང་ལོ་ན་བགྲེས་པ་ཚོར་དམིགས་བསལ་རྐུབ་སྟེགས་ཟུར་བཅད་འདུག ཉེ་དུས་སན་ཧྥི་རན་སིས་ཁོའི་ཉི་ཧོང་གི་ཇའི་ལྡུམ་ར་ཞེས་པར་སྐྱོད་སྐབས་ངས་འཁར་རྒྱུགས་བེད་སྤྱོད་བྱེད་ཀྱི་ཡོད་སྟབས་ལག་འཁྱེར་ཉོ་དགོས་ཀྱི་མི་འདུག དེ་དག་ནི་ཨ་རིའི་ནང་མཐོང་བའི་ཉམས་ལེན་བཟང་པོ་འགའ་ཞིག་རེད། རྒྱ་གར་ནང་དགོན་པ་ཚོ་འགྲོ་འོང་སོགས་ཀྱི་ཆ་རྐྱེན་ལྡན་པ་བཟོ་རྒྱུར་བོད་མིའི་སྒྲིག་འཛུགས་ཀྱི་ཆོས་རིག་ལས་ཁུངས་བརྒྱུད་ནས་ཡོང་དགོས་པ་དང་། ཆོས་རིག་ལས་ཁུངས་ལ་བཙན་བྱོལ་ནང་ཡོད་པའི་བོད་ཀྱི་དགོན་སྡེ་ཚོར་བཀའ་ཁྱབ་གཏོང་རྒྱུའི་དབང་ཚད་ཡོད་པས་བོད་མིའི་སྒྲིག་འཛུགས་ཀྱི་ལམ་སྟོན་ལ་དགོན་པ་གྲྭ་ཚང་ཚོས་གུས་བརྩི་གནང་གི་རེད་བསམ་གྱི་འདུག

མཐའ་མ་དབང་པོ་ཉམས་པ་ཚོའི་ཐོབ་ཐང་དང་དེ་མིན་ཐོབ་ཐང་གཞན་ཅི་འདྲ་ཞིག་ཡིན་རུང་ཁ་ཁུ་སིམ་པོར་གནས་ཐབས་མེད། ཨ་རིའི་ནང་མི་རིགས་དཀར་ནག་དང་ཆོས་ལུགས་འདྲ་མཉམ་སོགས་ཀྱི་ཐོབ་ཐང་ཆེད་འཐབ་རྩོད་བྱེད་ཀྱིན་ཡོད། ངའི་ཡིད་ཆེས་ལ་སོ་སོའི་ཐོབ་ཐང་སོ་སོས་རྩོད་དགོས་པ་དང་། ལྷག་པར་དུ་དབང་པོའི་ནུས་པ་ཉམས་པ་ཚོའི་ཐོབ་ཐང་ཐད་གཞན་པ་ཚོས་འགན་འཁུར་ལེན་རྒྱུ་གལ་ཆེན་པོ་རེད། འོན་ཀྱང་དང་པོ་དབང་པོའི་ནུས་པ་ཉམས་པ་ཚོ་མདུན་དུ་ཐོན་ནས་རྩོད་དགོས། འཛམ་གླིང་ནང་དཀའ་ངལ་སེལ་མ་ཐུབ་པའི་གནད་དོན་གང་ཡང་མེད། ངའི་ཡིད་ཆེས་ལ་དཀའ་ངལ་ཚང་མར་ཐབས་ལམ་ཡོད་པ་རེད་བསམ་གྱི་འདུག

མཇུག་གི་གཏམ། ང་ཚོའི་སྤྱི་ཚོགས་ཀྱི་འཕེལ་རྒྱས་དེ་ནུས་པ་ཞན་པའི་མི་མང་ལ་བདག་པོ་རྒྱག་ཐུབ་མིན་ལ་རག་ལས་ཡོད་པ་དང་། སྐྱེ་བོ་ཞིག་གིས་སྤྱོད་ཚུལ་ངོ་མ་དེ་རང་ཉིད་ལས་གནས་སྟངས་ཞན་པ་ཞིག་ལ་རོགས་སྐྱོར་བྱེད་ཐུབ་མིན་ནས་ཚད་འཇལ་དགོས། ད་ལྟའི་བར་དུ་དབང་པོ་སྐྱོན་ཅན་ཚོས་སྤྱི་ཚོགས་ཐོག་ངོ་ཚ་ཉོས་པ་དང་། མཐོང་ཆུང་ཁྱད་གསོད་བཟེད་པ། སེམས་ལ་བཀའ་ངལ་འཕྲད་པ་བཅས་ང་ཚོས་གཅིག་གིས་གཅིག་ལ་རྔན་པ་སྤྲད་པ་དང་དགོངས་དག་ཞུས་པ་ཡིན་ན་ཡང་དག་ཅིག་མ་རེད། ང་ཚོས་བྱེད་ཐུབ་པ་དེ་ནི་མི་སྒེར་སོ་སོས་དབང་པོའི་ནུས་པ་ཉམས་པའི་སྐྱེ་བོ་ཞིག་གི་གཞི་རིམ་འགྲོ་བ་མིའི་ཐོབ་ཐང་སྲུང་སྐྱོབ་དང་གོང་འཕེལ་གཏོང་རྒྱུར་མདུན་སྐྱོད་ཀྱི་ཆོད་སེམས་དང་དམ་བཅའ་འཇོག་དགོས་པ་མ་ཟད། གནད་དོན་དེ་གཞི་རྒྱ་ཆེ་བའི་སྒྲོམ་གཞིའི་ནང་འཇོག་དགོས། བྱམས་བརྩེ་དང་ཞི་བའི་རིག་གཞུང་ནང་གནད་དོན་དེ་འཇོག་མ་ཐུབ་པ་ཡིན་ན་བདེ་སྐྱིད་དང་གུས་བཀུར། བཟོད་བསྲན་ལྡན་པའི་སྤྱི་ཚོགས་བསྐྲུན་རྒྱུའི་དམིགས་དོན་བསྒྲུབ་ཐུབ་པ་དཀའ། ཁོང་ཚོའི་ཐོབ་ཐང་ནི་ང་ཚོས་འཐབ་རྩོད་བྱེད་བཞིན་པའི་རང་དབང་དང་ཐོབ་ཐང་གི་མཁའ་རླུང་ལས་གལ་ཆེ་བ་མིན་ནའང་ཛ་དྲག་ཆུང་བ་མིན། ང་ཚོའི་སྤྱི་ཚོགས་དེ་ཡང་དག་པ་ཞིག་མ་བྱུང་བར་ང་ཚོའི་མཐའ་མའི་དམིགས་ཡུལ་བསྒྲུབ་རྒྱུར་ལམ་ལྷོང་ཡོང་རྒྱུ་མིན་པ་དང་། ཡང་དག་པའི་སྤྱི་ཚོགས་དེའི་སྐྱེ་བོ་ཚང་མ་ལ་བདེ་སྐྱིད་དང་དོན་ལྡན་གྱི་མི་ཚེ་སྐྱེལ་ཆོག་པ་ཡིན།

 བསྟན་འཛིན་བདེ་སྐྱིད་ཀྱིས་བཅར་འདྲི་ཞུས། ཟླ་བ་དར་རྒྱས་ཀྱིས་བོད་ཡིག་ཏུ་ཕབ་བསྒྱུར་བྱས།

དུས་བབ་དྲ་བ་ནས་བླངས།