ཁ་ཆེ་ཆོས་ལུགས་ནང་ཁུལ་གྱི་འགལ་བ།

ཁ་སང་པ་ཀི་སི་ཐན་སུ་ཎེ་དྲག་སྤྱོད་པས་ཤཱི་ཡའི་ཁ་ཆེའི་ལྷ་ཁང་ཞིག་ལ་འབར་རྫས་གས་གཏོར་བྱས་ཏེ་མི་ ༥༩ ཙམ་བསད་ཡོད་འདུག 

ཁ་སང་པ་ཀི་སི་ཐན་གྱི་ཤཱི་ཁཱར་པུར་གྲོང་རྡལ་གྱི་ལཱ་ཀི་ཌར་ (Lakhi Dar) ས་ཁུལ་ནང་རྟེན་གཞི་བྱས་པའི་ཁ་ཆེའི་ཤཱི་ཡ་(Shia) ཆོས་ལུགས་ཀྱི་ལྷ་ཁང་ཞིག་ཏུ། ཁ་ཆེ་སུ་ཎེ་(Sunni) དྲག་སྤྱོད་ཤོག་ཁག་གིས་འབར་རྫས་གཡུགས་ཏེ་མི་༥༩

བསད་པ་དང་གཞན་མི་ ༥༠ ལྷག་ལ་རྨས་སྐྱོན་བཏང་ཡོད་འདུག

དོན་རྐྱེན་དེ་བཟོ་མཁན་པ་ཀི་སི་ཐན་བྷོ་ལཱ་ཆི་སི་ཐན་མངའ་སྡེའི་ནང་རྟེན་གཞི་བྱས་པའི་ཇུན་དྷོ་ལཱ་ (Jundullah) དྲག་སྤྱོད་ཤོག་ཁག་གི་མགྲིན་ཚབ་པ་ཧྥ་ཧཱ་ཌི་( Fahad Marwat) ཡིས་རྒྱ་གར་དུས་བབ་ཐོག “ང་ཚོའི་དགྲ་བོ་ནི་ཤཱི་ཡའི་ཆོས་ལུགས་རྗེས་འབྲང་པ་དག་ཡིན་སྟབས། ང་ཚོས་དུས་ནམ་ཡིན་ལ་ཁོ་ཚོའི་སྤྱི་ཚོགས་ལ་གཏོར་རྒོལ་གཏོང་རྒྱུ་ཡིན”ཞེས་བརྗོད་འདུག

པ་ཀི་སི་ཐན་སིན་དྷི་མངའ་སྡེའི་དྲིལ་བསྒྲགས་བློན་ཆེན་ཤཱར་ཇལ་ (Sharjeel Inam Memon) གྱིས།  “ད་ལྟ་ང་ཚོས་ཤཱི་ཁཱར་པུར་གྲོང་རྡལ་དང་སྨན་ཁང་ཁག་ལ་ཛ་དྲག་བཀའ་རྒྱ་བསྡམས་ཏེ། དྲག་སྤྱོད་པ་འཚོལ་ཞིབ་བྱེད་བཞིན་ཡོད་པ་མ་ཟད། ཁ་སང་འདས་གྲོངས་སོང་བ་དག་གི་ནང་མི་གཉེན་ཉེ་ཚོར་སེམས་གསོ་དང་། རྨས་སྐྱོན་ཕོག་མཁན་དག་སྨན་ཁང་ལ་བསྐྱལ་ནས་སྨན་བཅོས་བྱེད་བཞིན་ཡོད།” ཅེས་བརྗོད་འདུག

དེ་རིང་ཤཱི་ཡའི་ཆོས་ལུགས་རྗེས་འབྲང་པ་སྟོང་ཕྲག་མང་པོས་པ་ཀི་སི་ཐན་གྱི་རྒྱལ་ཡོངས་གྲོང་ཁྱེར་ཁག་ཏུ་ཞི་རྒོལ་བྱས་ཏེ། གཞུང་ལམ་བཀག་པ་དང་རླངས་འཁོར་གྱི་འཁོར་ལོ་བསྲེགས་པ་སོགས་བྱས་པ་མ་ཟད། མི་མང་པོ་ཞིག་གིས་སོ་སོའི་བྲང་ཁོག་བརྡུང་སྟེ་དྲག་སྤྱོད་པར་ཉེས་ཆད་གཏོང་དགོས་པ་དང་། ཤཱི་ཡའི་ཆོས་ལུགས་རྗེས་འབྲང་པའི་ལྷ་ཁང་ཁག་ལ་སྲུང་སྐྱོབ་བྱེད་དགོས་སྐོར་རྗོད་ཀྱིན་སྐད་འབོད་བྱས་ཡོད་པ་མ་ཟད། མཉམ་འབྲེལ་རྒྱལ་ཚོགས་ཀྱི་སྤྱི་ཁྱབ་དྲུང་ཆེ་བྷན་ཁེ་མོན་མཆོག་གིས་ཀྱང་། ཆོས་ལུགས་འཐེན་འཁྱེར་བྱས་ནས་ཉེས་མེད་མི་སེར་གསོད་པ་དེ་ནི་བློ་ཡུལ་དུ་གཤོང་དཀའ་བ་དང་འཇིགས་སུ་རུང་བ་ཞིག་ཡིན་སྟབས། པ་ཀི་སི་ཐན་གཞུང་གིས་ཐག་གཅོད་ནན་མོ་བྱས་ནས་གྲངས་ཉུང་མི་རིགས་ཀྱི་ཆོས་དད་རང་དབང་ལ་སྲུང་སྐྱོབ་བྱེད་དགོས་ཞེས་སོགས་བསྒྲགས་གཏམ་སྤེལ་འདུག

འདས་པའི་ལོ་ ༢༠ རིང་ནས་བཟུང་པ་ཀི་སི་ཐན་ནང་སུ་ཎེ་དང་ཤཱི་ཡ་ཆོས་ལུགས་རྗེས་འབྲང་བར་གསོད་རེས་ བྱས་རྗེས། ད་བར་པ་ཀི་སི་ཐན་ཀཱ་ར་ཆི་(Karachi) གྲོང་ཁྱེར་དང་པི་ཤཱ་ཝར (Peshawar)། བྷོ་ལཱ་ཆི་སི་ཐན་མངའ་སྡེའི་རྒྱལ་ས་ཁེའུ་ཌ་(Quetta) བཅས་སུ་ཁ་ཆེའི་ཆོས་བརྒྱུད་གཉིས་བར་དམག་འཁྲུག་ལངས་པ་ནས་བཟུང་། སུ་ཎེ་དྲག་སྤྱོད་ཤོག་ཁག་གིས་ད་བར་ཤཱི་ཡ་ཁ་ཆེ་ ༢༨༦༣ ལྷག་བསད་ཡོད་པ་མ་ཟད། ན་ནིང་ཟླ་ ༡༢ ནང་པེ་ཤཱ་ཝར་གྲོང་ཁྱེར་ནང་རྟེན་གཞི་བྱས་པའི་དམག་མིའི་སློབ་གྲྭ་ཞིག་ལ་གློ་བུར་འཇབ་རྒོལ་བྱས་ཏེ། སློབ་མ་ ༡༤༢ དང་། ༢༠༡༣ ལོར་ཡེ་ཤུའི་ལྷ་ཁང་ཞིག་ལ་འབམ་གཡུགས་ཏེ་མི་༨༥ བསད་པ་མ་ཟད། འདས་ལོར་ཨི་རན་ལ་གནས་སྐོར་ཕྱིན་ནས་པ་ཀི་སི་ཐན་ཕྱིར་ལོག་བྱེད་མཁན་གྱི་སྤྱི་སྤྱོད་རླངས་འཁོར་ཞིག་ལ་སྒྱོགས་མདེལ་འཕངས་ཏེ་མི་ ༢༤ བཅས་བསད་ཡོད་འདུག

གསར་འགོད་པ། དོན་གྲུབ།

དུས་བབ་དྲ་བ་ནས།།